“പ്രകൃതി നിനക്ക് തന്ന ആ കഴിവ് നിന്റെ ജീവിതവിജയത്തിനായി നീ ഉപയോഗിക്കുക.”
സ്വാമിജിയുടെ ആ ഉപദേശം കേട്ടപ്പോൾ സാമിന് ആദ്യം ചെറിയൊരു ചമ്മൽ തോന്നിയെങ്കിലും, അദ്ദേഹം പറഞ്ഞതിലെ ആ ‘മാന്ത്രികമായ ബിസിനസ്സ് തന്ത്രം’ സാമിന് ശരിയാണെന്ന് തോന്നി.
അങ്ങനെ ടൗണിലെ ഏറ്റവും വലിയ ലേഡീസ് ഫാൻസി ആൻഡ് ബൊട്ടീക് തുടങ്ങാൻ അവൻ തീരുമാനിച്ചു.
ഈ പുതിയ ആശയം മനസ്സിലുറപ്പിച്ചയുടനെ സാം ഫോണെടുത്ത് വിളിച്ചത് ശ്രേയയെയാണ്.
“ഹലോ ചേട്ടാ… എന്തൊക്കെയുണ്ട് ഗ്രാമത്തിലെ വിശേഷങ്ങൾ? ?”
ഫോണെടുത്തയുടനെ അവളുടെ ചോദ്യങ്ങൾ തുടങ്ങി.
“, ഞാൻ ഇവിടെ ടൗണിൽ പുതിയൊരു ബിസിനസ്സ് തുടങ്ങാൻ പോവുകയാണ്,” സാം വളരെ ആവേശത്തോടെ പറഞ്ഞു.
“സ്ത്രീകൾക്ക് വേണ്ടിയുള്ള ഒരു വലിയ ലേഡീസ് ഫാൻസി ആൻഡ് വസ്ത്രവ്യാപാര കട!”
അതുകേട്ട് മറുതലയ്ക്കൽ ശ്രേയ വലിയ ശബ്ദത്തിൽ ചിരിച്ചു.
“എന്താ ചേട്ടാ ഈ പറയുന്നത്? ഒരു സിവിൽ എഞ്ചിനീയർ നാട്ടിൻപുറത്ത് പോയി ലേഡീസ് ഫാൻസി കട തുടങ്ങുകയോ? ചേട്ടൻ അവിടെയുള്ള പെൺകുട്ടികളെ മയക്കാൻ വേണ്ടിയിട്ട് പ്ലാൻ ചെയ്തതാണോ ഇത്?”
അവൾ കളിയാക്കി.
“ഏയ് അതല്ലെടാ… ഇവിടെ അതിനാണ് കൂടുതൽ സാധ്യത,”
ഗന്ധർവ്വന്റെ വശ്യതയെക്കുറിച്ച് അവളോട് പറയാൻ കഴിയാത്തതുകൊണ്ട് സാം ഒഴിഞ്ഞുമാറി. കളിയാക്കിയെങ്കിലും,..
ശ്രേയ അവന് വലിയ പിന്തുണ നൽകി.
“ചേട്ടൻ എന്ത് ചെയ്താലും എനിക്ക് സന്തോഷമേയുള്ളൂ. ചേട്ടൻ പെട്ടെന്ന് തന്നെ ആ ടൗണിലെ വലിയൊരു ബിസിനസ്സുകാരനാകട്ടെ!”
ശ്രേയയുമായി സംസാരിച്ചുകൊണ്ടിരിക്കെ അച്ഛൻ ഫോൺ വാങ്ങി.
സാമിന്റെ പുതിയ ബിസിനസ്സ് ആശയത്തെക്കുറിച്ച് ശ്രേയ അപ്പോഴേക്കും അച്ഛനോട് പറഞ്ഞിരുന്നു.
“സാം, ആ ഗ്രാമത്തിൽ നീ ഒറ്റപ്പെട്ടുപോകുമോ എന്നൊരു പേടി എനിക്കുണ്ടായിരുന്നു. പക്ഷേ ഇപ്പോൾ നിന്റെ തീരുമാനങ്ങൾ കേൾക്കുമ്പോൾ എനിക്ക് വലിയ സന്തോഷമുണ്ട്,”
അച്ഛന്റെ ശബ്ദത്തിൽ സ്നേഹവും അഭിമാനവുമുണ്ടായിരുന്നു.
“നീ തുടങ്ങാൻ പോകുന്ന ആ കടയ്ക്ക് വേണ്ട അഡ്വാൻസ് തുകയും, സാധനങ്ങൾ എടുക്കാനുള്ള മുഴുവൻ മൂലധനവും അച്ഛൻ തരാം. നീ ധൈര്യമായിട്ട് നല്ലൊരു കടമുറി കണ്ടുപിടിച്ച് കാര്യങ്ങൾ തുടങ്ങിക്കോ.”
അച്ഛന്റെ ആ വാക്കുകൾ സാമിന് വലിയ ആത്മവിശ്വാസം നൽകി.
താൻ എടുത്ത വ്രതവും തനിക്ക് ലഭിച്ച ശക്തിയും തന്റെ ജീവിതത്തിൽ പുതിയൊരു പ്രകാശം കൊണ്ടുവരുന്നതായി സാമിന് തോന്നി.
സ്വന്തമായി ഒരു കട തുടങ്ങാനുള്ള തയ്യാറെടുപ്പുകളോടെ, പുതിയൊരു ലക്ഷ്യത്തിലേക്ക് അവൻ നടന്നുതുടങ്ങുകയാണ്.
അത്താഴം കഴിഞ്ഞ് ഉമ്മറത്തെ തിണ്ണയിൽ വിശ്രമിക്കുകയായിരുന്നു മുത്തശ്ശനും മുത്തശ്ശിയും.
അച്ഛനോടും ശ്രേയയോടും സംസാരിച്ചതിന് ശേഷം, വലിയൊരു സന്തോഷത്തോടെ സാം അവരുടെ അടുത്തേക്ക് ചെന്നു.
ഒരു കാവൽക്കാരനായി മാത്രം ഈ ഗ്രാമത്തിൽ ഒതുങ്ങിക്കൂടാതെ,
അടുത്തുള്ള ടൗണിൽ താനൊരു പുതിയ ബിസിനസ്സ് തുടങ്ങാൻ പോകുന്ന കാര്യം അവൻ അവരോട് വിശദീകരിച്ചു.
സ്വാമിജിയുടെ ഉപദേശപ്രകാരം ഒരു വലിയ ലേഡീസ് ഫാൻസി ആൻഡ് വസ്ത്രവ്യാപാര സ്ഥാപനമാണ് താൻ തുടങ്ങാൻ പോകുന്നതെന്നും അവൻ പറഞ്ഞു.
ഇതുകേട്ട് മുത്തശ്ശന്റെയും മുത്തശ്ശിയുടെയും കണ്ണുകൾ സന്തോഷം കൊണ്ട് നിറഞ്ഞു.
“എന്റെ കുട്ടി നഗരത്തിലേക്ക് തിരിച്ചുപോകാതെ ഞങ്ങളുടെ കൂടെ ഇവിടെത്തന്നെ നിൽക്കാൻ തീരുമാനിച്ചല്ലോ…
ഞങ്ങൾക്കിനി ഇതിൽ കൂടുതൽ എന്ത് വേണം!” മുത്തശ്ശി സാമിന്റെ
നെറുകയിൽ തലോടിക്കൊണ്ട് പറഞ്ഞു.
“അവനിപ്പോൾ വെറുമൊരു നഗരവാസി അല്ലെടീ, ഈ നാടിന്റെ കാവൽക്കാരനല്ലേ. അവൻ ധൈര്യമായിട്ട് തുടങ്ങട്ടെ,”
മുത്തശ്ശനും പൂർണ്ണ പിന്തുണ നൽകി. അവരുടെ ആ സന്തോഷം സാമിന്റെ ആത്മവിശ്വാസം പതിന്മടങ്ങ് വർദ്ധിപ്പിച്ചു.
ടൗണിലേക്കുള്ള യാത്ര
പിറ്റേന്ന് രാവിലെ തന്നെ ബൈക്കുമെടുത്ത് സാം ടൗണിലേക്ക് തിരിച്ചു.
ബിസിനസ്സ് തുടങ്ങാൻ ഏറ്റവും അത്യാവശ്യം നല്ലൊരു കടമുറി കണ്ടെത്തുക എന്നതാണ്.
ടൗണിലെത്തിയ അവൻ നേരെ പോയത് അവിടെയുള്ള പരിചയസമ്പന്നനായ ഒരു റിയൽ എസ്റ്റേറ്റ് ബ്രോക്കറെ കാണാനാണ്.