താൻ അവനിലേക്ക് ആകർഷിക്കപ്പെടുന്നുണ്ടോ എന്ന വലിയ ഭയമാണ് ആ വാതിൽ അത്ര വേഗത്തിൽ കൊട്ടിയടക്കാൻ അവളെ പ്രേരിപ്പിച്ചത്
ഇരുളടഞ്ഞ ആ മുറിയിൽ ഒറ്റയ്ക്കിരുന്ന് വിപഞ്ചിക പൊട്ടിക്കരഞ്ഞു.
സ്വന്തം ജീവൻ പണയം വെച്ചും തന്നെ സംരക്ഷിക്കാൻ നിൽക്കുന്ന അവനോട് ഇനി എങ്ങനെ മുഖത്ത് നോക്കി സംസാരിക്കും എന്നവൾക്കറിയില്ലായിരുന്നു.
താൻ കാണിച്ച നന്ദികേടിന് സാം ഇനി ഒരിക്കലും തന്റെ മുന്നിലേക്ക് വരില്ല എന്ന് അവൾക്ക് ഉറപ്പായിരുന്നു.
അത്രമാത്രം താനവനെ വേദനിപ്പിച്ചിട്ടുണ്ട്. ഈ വലിയ കുറ്റബോധത്തിന്റെ ഭാരവുമായി നാളത്തെ പ്രഭാതത്തെ
എങ്ങനെ നേരിടുമെന്ന ആശങ്ക മാത്രമായിരുന്നു ആ രാത്രിയിൽ അവൾക്ക് മുന്നിലുണ്ടായിരുന്നത്.
ടൗണിലെ ആ പുതിയ മൂന്നുനില കെട്ടിടത്തിന്റെ താഴത്തെ നില അന്ന് വളരെ ഭംഗിയായി അലങ്കരിച്ചിരുന്നു.
ഗ്ലാസ് ഡോറുകൾക്ക് മുകളിൽ സാമിന്റെ
പുതിയ കടയുടെ ബോർഡ് തിളങ്ങി നിന്നു
‘നീലാംബരി ഫാൻസി ആൻഡ് ബൊട്ടീക്’.
ഉദ്ഘാടനത്തിനായി അതിരാവിലെ തന്നെ അച്ഛനും ശ്രേയയും നഗരത്തിൽ നിന്നും എത്തിയിരുന്നു. മുത്തശ്ശനും മുത്തശ്ശിയും നിറഞ്ഞ സന്തോഷത്തോടെ അവർക്കൊപ്പം മുൻപിലുണ്ട്.
സാമിന്റെ പുതിയ സുഹൃത്തായ ഹരിയാണ് ഉദ്ഘാടനത്തിന്റെ ബാക്കി കാര്യങ്ങളെല്ലാം നോക്കിനടത്തുന്നത്.
കസവ് മുണ്ടും സിൽക്ക് ഷർട്ടും ധരിച്ച്, മുഖത്തൊരു വലിയ പുഞ്ചിരിയുമായി സാം എല്ലാവരെയും സ്വീകരിച്ചു.
ശുഭമുഹൂർത്തത്തിൽ അച്ഛനും മുത്തശ്ശനും ചേർന്ന് റിബൺ മുറിച്ചു.
ശ്രേയയും കടയ്ക്കുള്ളിലെ വലിയ നിലവിളക്കിൽ ദീപം തെളിയിച്ചതോടെ ആ പുതിയ സ്ഥാപനത്തിന്റെ പ്രവർത്തനം ഔദ്യോഗികമായി ആരംഭിച്ചു.
ഉദ്ഘാടനം കഴിഞ്ഞ് അധികം വൈകാതെ തന്നെ ടൗണിലെ ആളുകൾ കടയിലേക്ക് വന്നുതുടങ്ങി.
മറ്റ് കടകളിലേത് പോലെ തികച്ചും സാധാരണമായ ഒരു തുടക്കം.
എന്നാൽ അവിടെ വന്ന കസ്റ്റമേഴ്സിൽ ഒരു പ്രത്യേകത സാമും ഹരിയും അപ്പോൾ ശ്രദ്ധിച്ചു.
വസ്ത്രങ്ങൾ എടുക്കാൻ വന്ന പലർക്കും തുണിയുടെ നിറത്തെക്കുറിച്ചും ഡിസൈനുകളെക്കുറിച്ചുമൊക്കെ ആദ്യം ചെറിയ ആശയക്കുഴപ്പങ്ങൾ ഉണ്ടായിരുന്നു.
എന്നാൽ സാം ചെന്ന് അവരോട് സംസാരിക്കുകയോ ഒരു വസ്ത്രം എടുത്തുകാണിക്കുകയോ ചെയ്താൽ, പിന്നെ അവർക്ക് യാതൊരു സംശയവുമില്ലായിരുന്നു.
സാമിന്റെ ആ ശബ്ദത്തിനും വശ്യതയ്ക്കും മുന്നിൽ അവർ വളരെ വേഗം കൺവിൻസ്ഡ് ആകുന്നുണ്ടായിരുന്നു.
അവൻ തിരഞ്ഞെടുത്ത് നൽകുന്ന വസ്ത്രങ്ങളെക്കുറിച്ച് പിന്നെ വില പേശാനോ, വേണ്ടെന്ന് വെക്കാനോ ആരും തയ്യാറായില്ല.
സ്വാമിജി പറഞ്ഞ ഗന്ധർവ്വ ആകർഷണം എന്നത് വെറുമൊരു ആൾക്കൂട്ടത്തെ സൃഷ്ടിക്കുകയല്ല, മറിച്ച് തന്റെ മുന്നിലെത്തുന്നവരെ വളരെ വേഗം സ്വാധീനിക്കാനും അവരിൽ വലിയൊരു വിശ്വാസം ഉണ്ടാക്കിയെടുക്കാനും കഴിയുക എന്നതാണെന്ന് സാം തിരിച്ചറിഞ്ഞു.
സാമിന്റെ ഈ കഴിവ് കണ്ട് ഹരി അത്ഭുതത്തോടെ പറഞ്ഞു, “ഡാ സാമേ…
നിനക്ക് നല്ലൊരു ബിസിനസ്സ് തലയുണ്ടല്ലോ. നീ സംസാരിച്ചാൽ പിന്നെ ഏത് കസ്റ്റമറും രണ്ടാമതൊന്ന് ചിന്തിക്കാതെ സാധനം വാങ്ങിയിട്ടേ പോകുന്നുള്ളൂ!
അധികം വൈകാതെ തന്നെ ഈ ടൗണിലെ ഏറ്റവും മികച്ച കടയായി ഇത് മാറും.”
സാം അതുകേട്ട് പുഞ്ചിരിച്ചു.
കച്ചവടം വളരെ ഭംഗിയായി നടക്കുന്നുണ്ടെങ്കിലും സാമിന്റെ മനസ്സ് അവിടെയായിരുന്നില്ല.
ആ തിരക്കുകൾക്കിടയിലും അവന്റെ കണ്ണുകൾ ഗ്ലാസ് ഡോറിന് പുറത്തേക്ക് ഒരാളെ തിരയുന്നുണ്ടായിരുന്നു—വിപഞ്ചിക.
ഇന്നലെ രാത്രിയിലെ ആ ഭയാനകമായ സംഭവത്തിന് ശേഷം അവൾ എന്ത് ചിന്തിക്കുന്നുണ്ടാകും? അവൾ ഈ ഉദ്ഘാടനത്തിന് വരുമോ? ഒരൊറ്റത്തവണയെങ്കിലും അവളെയൊന്ന് കാണാൻ സാമിന്റെ മനസ്സ് വല്ലാതെ തുടിച്ചു.
തന്റെ പുതിയ ജീവിതത്തിന്റെ ഈ വലിയ സന്തോഷത്തിൽ, തന്നെ ശരിക്കും മനസ്സിലാക്കിയ ഒരേയൊരാൾ അവളായിരിക്കണം എന്ന് സാം ആഗ്രഹിച്ചിരുന്നു.
പക്ഷേ, അവിടെയെങ്ങും ആ മുഖം മാത്രം ഉണ്ടായിരുന്നില്ല.
തന്നെ വീണ്ടും വീണ്ടും അപമാനിച്ച തറവാട്ടുകാരുടെ മുന്നിലേക്ക് വരാൻ അവൾക്ക് കഴിയില്ല എന്ന് സാമിനറിയാമായിരുന്നു.