തനിക്ക് വേണ്ട കടമുറിയെക്കുറിച്ച് സാം ബ്രോക്കറോട് വിശദീകരിച്ചു. “സ്ത്രീകൾക്കും കുട്ടികൾക്കും വേണ്ടിയുള്ള സാധനങ്ങളാണ് കൂടുതലും.
അതുകൊണ്ട് അത്യാവശ്യം വലിപ്പമുള്ള, ടൗണിലെ തിരക്കുള്ള ഭാഗത്ത് തന്നെ ഒരു മുറി വേണം.”
ബ്രോക്കർ സാമിനെയും കൂട്ടി ടൗണിലെ പല കെട്ടിടങ്ങളും കയറിയിറങ്ങി.
എന്നാൽ പലതും സാമിന് ഇഷ്ടപ്പെട്ടില്ല.
ചിലത് തീരെ ചെറുതായിരുന്നു, മറ്റുചിലതിന് വാഹനങ്ങൾ പാർക്ക് ചെയ്യാൻ സൗകര്യമുണ്ടായിരുന്നില്ല.
ഒടുവിൽ ബ്രോക്കർ സാമിനെ ടൗണിന്റെ ഹൃദയഭാഗത്തുള്ള പുതിയൊരു കെട്ടിടത്തിന് മുന്നിലെത്തിച്ചു.
വലിയൊരു മൂന്നുനില കെട്ടിടമായിരുന്നു അത്. അതിന്റെ നിർമ്മാണ പ്രവർത്തനങ്ങൾ അവസാന ഘട്ടത്തിലായിരുന്നു
പെയിന്റിംഗും ടൈൽസ് വിരിക്കുന്ന പണികളും മാത്രമാണ് ഇനി ബാക്കിയുള്ളത്.
താഴത്തെ നിലയിലെ വലിയൊരു കടമുറി ബ്രോക്കർ സാമിന് കാണിച്ചുകൊടുത്തു.
വലിയ ഗ്ലാസ് ഡോറുകൾ വെക്കാൻ പാകത്തിലുള്ള, വിശാലമായ ആ മുറി കണ്ടയുടനെ സാമിന് അത് വല്ലാതെ ഇഷ്ടപ്പെട്ടു.
തന്റെ മനസ്സിൽ കണ്ട ബൊട്ടീക്കിനും ഫാൻസി സ്റ്റോറിനും ഏറ്റവും അനുയോജ്യമായ ഇടം അതുതന്നെയാണെന്ന് അവൻ ഉറപ്പിച്ചു.
അവർ കടമുറി കണ്ടുകൊണ്ടിരിക്കെ, കെട്ടിടത്തിന്റെ പണികൾക്ക് മേൽനോട്ടം വഹിച്ചുകൊണ്ട് സാമിന്റെ അതേ പ്രായം തോന്നിക്കുന്ന ഒരു ചെറുപ്പക്കാരൻ അവിടേക്ക് വന്നു. വളരെ ഊർജ്ജസ്വലനായ ഒരു യുവാവ്.
ബ്രോക്കർ അയാളെ സാമിന് പരിചയപ്പെടുത്തിക്കൊടുത്തു.
“സാം, ഇതാണ് ഈ കെട്ടിടം ഉടമസ്ഥന്റെ മകൻ, ഹരി.”
ഹരി വലിയൊരു ചിരിയോടെ സാമിന് നേരെ കൈ നീട്ടി.
“ഹലോ സാം, ഞാൻ ഹരി. അച്ഛൻ ടൗണിലില്ലാത്തതുകൊണ്ട് ഇപ്പോൾ ഇതിന്റെ പണികളൊക്കെ നോക്കുന്നത് ഞാനാണ്.”
സാമും സന്തോഷത്തോടെ അവന് കൈകൊടുത്തു.
ബിസിനസ്സ് കാര്യങ്ങളെക്കുറിച്ചും കടമുറിയുടെ വാടകയെക്കുറിച്ചുമെല്ലാം അവർ സംസാരിച്ചു തുടങ്ങി.
ഒരേ പ്രായത്തിലുള്ളവരായതുകൊണ്ട് വളരെ പെട്ടെന്ന് തന്നെ അവർക്കിടയിൽ വലിയൊരു സൗഹൃദം ഉടലെടുത്തു.
കടയുടെ ഇന്റീരിയർ ഡിസൈനിംഗിന് ആവശ്യമായ സഹായങ്ങൾ താൻ ചെയ്തുതരാമെന്ന് ഹരി ഏറ്റു.
യാതൊരു പരിചയവുമില്ലാത്ത ആ ടൗണിൽ തനിക്കൊരു പുതിയ ചങ്ങാതിയെ ലഭിച്ചതിന്റെ വലിയ സന്തോഷത്തിലായിരുന്നു സാം. വിപഞ്ചികയുമായുള്ള പ്രശ്നങ്ങളുടെ സങ്കടങ്ങൾക്കിടയിലും, സാമിന്റെ ജീവിതത്തിൽ പുതിയൊരു പ്രഭാതം വിടരുകയായിരുന്നു.
അമ്പലക്കുളത്തിന്റെ പടവുകളിൽ തുണിയലക്കുകയായിരുന്നു വിപഞ്ചിക.
ഗ്രാമത്തിലെ വാർത്തകളുടെ പ്രധാന കേന്ദ്രമാണല്ലോ അമ്പലക്കുളവും പരിസരവും.
കുളിക്കാനും അലക്കാനുമായി വന്നിരിക്കുന്ന ഗ്രാമത്തിലെ ചില സ്ത്രീകളുടെ സംസാരം അങ്ങോട്ട് വന്നതുമുതൽ അവൾ കേൾക്കുന്നുണ്ട്.
സാധാരണ അവരുടെ സംസാരങ്ങളിൽ അവൾ വലിയ താല്പര്യം കാണിക്കാറില്ല.
എന്നാൽ പെട്ടെന്ന് അവരുടെ കൂട്ടത്തിൽ നിന്ന് ആ പേര് കേട്ടപ്പോൾ അവളുടെ ശ്രദ്ധ അങ്ങോട്ടേക്ക് തിരിഞ്ഞു.
“നമ്മുടെ വലിയ തറവാട്ടിലെ സാം ടൗണിൽ ഒരു വലിയ കട തുടങ്ങുകയാണത്രേ…”
പഞ്ചായത്ത് മെമ്പറുടെ ഭാര്യ രമ പറഞ്ഞത് കേട്ട് വിപഞ്ചികയുടെ കൈകൾ ഒരു നിമിഷം നിശ്ചലമായി.
“സത്യമാണോ രമേച്ചി? നഗരത്തിൽ പോയി വലിയ എഞ്ചിനീയറിംഗ് ഒക്കെ പഠിച്ച ചെറുക്കനല്ലേ അവൻ? എന്നിട്ടിപ്പോൾ നാട്ടിൽ വന്ന് കച്ചവടം തുടങ്ങുകയാണോ? അതും ഈ വലിയ വ്രതമൊക്കെ കഴിഞ്ഞ്?”
കൂട്ടത്തിലൊരാൾ സംശയത്തോടെ ചോദിച്ചു.
“അതൊക്കെയാടീ ഇപ്പോഴത്തെ ട്രെൻഡ്. വെറുമൊരു കടയല്ല അവൻ തുടങ്ങുന്നത്… പെണ്ണുങ്ങൾക്ക് വേണ്ടിയുള്ള വലിയൊരു ലേഡീസ് ഫാൻസി സ്റ്റോറും ബൊട്ടീക്കും!
പുതിയ കെട്ടിടത്തിൽ പണിയൊക്കെ തകൃതിയായി നടക്കുന്നുണ്ട്. ഉദ്ഘാടനം ഉടനെ ഉണ്ടാകുമെന്നാ കേട്ടത്.”
ഇത്രയും കേട്ടതും വിപഞ്ചികയുടെ മുഖത്ത് കടുത്ത പുച്ഛം നിറഞ്ഞു. നഗരത്തിൽ പഠിച്ച, നാടിനെ രക്ഷിക്കാൻ വലിയ തപസ്സനുഷ്ഠിച്ച ഒരു യോദ്ധാവ് ഇപ്പോൾ ടൗണിൽ പോയി പെണ്ണുങ്ങളുടെ മാലയും
വളയും വിൽക്കാൻ പോകുന്നു!
അവളുടെ ഉള്ളിലെ അസുരഗണം ആ വാർത്തയെ സ്വന്തം രീതിയിൽ വ്യാഖ്യാനിക്കാൻ തുടങ്ങി.