തന്റെ കണ്ണുകൾ കണ്ടതുകൊണ്ടുമാത്രം അത് സത്യമാവണമെന്നില്ല.
കറുത്ത വളയുടെ ശക്തിയെക്കുറിച്ച് സംസാരിച്ച മനുഷ്യനാണ് ഹരിഹരൻ. മറ്റുള്ളവരുടെ മനസ്സിലേക്ക് ദൃശ്യങ്ങൾ കടത്തിവിടാമെന്ന് പറഞ്ഞതും അദ്ദേഹം തന്നെ. അങ്ങനെയെങ്കിൽ ആദിത്യൻ കണ്ട വിരലും മനസ്സിൽ സൃഷ്ടിക്കപ്പെട്ട ഒരു കാഴ്ചയായിക്കൂടേ?
എന്നാൽ ആ സംശയം അധികനേരം നിലനിന്നില്ല.
അത് വെറും കാഴ്ചയായിരുന്നില്ല.
ആ ഗന്ധം അവൻ അനുഭവിച്ചിരുന്നു. റുധിരഹാരി തൊട്ടപ്പോൾ ഉയർന്ന ശബ്ദം കേട്ടിരുന്നു. വിരൽ ചലിച്ച നിമിഷം മേശപ്പുറത്തെ പൊടി മാറിയത് കണ്ടിരുന്നു.
എല്ലാറ്റിനുമപ്പുറം, അതു കണ്ടപ്പോൾ
സ്വന്തം ശരീരം പ്രകടിപ്പിച്ച പ്രതികരണം യാഥാർഥ്യമായിരുന്നു. വയറിനുള്ളിൽനിന്ന് ഉയർന്ന അസ്വസ്ഥതയും ഛർദിയും വെറും ഭയത്താൽ മാത്രമുണ്ടായതല്ലെന്ന് അവന് തോന്നി.
വിരൽ യഥാർത്ഥമായിരുന്നു.
അതിൽ അവന് സംശയമില്ല.
പക്ഷേ വിരൽ യക്ഷിയുടേതാണെന്ന് എങ്ങനെ ഉറപ്പിക്കും?
മനുഷ്യർക്ക് അറിയാത്ത രോഗങ്ങൾ ലോകത്തുണ്ടാവാം. ശരീരത്തിൽനിന്ന് വേർപെട്ട ശേഷവും പേശികൾ ഏതാനും നിമിഷം ചലിക്കുന്നത് സ്വാഭാവികമാണെന്ന് പഠിച്ചിട്ടുമുണ്ട്. എന്നാൽ വർഷങ്ങളായി ഉണങ്ങിക്കിടന്ന വിരൽ എങ്ങനെ ചലിക്കും?
ഉത്തരമില്ല.
അവൻ ഇടതുകൈ ഉയർത്തി നോക്കി.
വെളുത്ത വളയുടെ അടയാളം കാണുന്നില്ല. സാധാരണ ചർമ്മം മാത്രം. വലതുകൈയിലും അതുതന്നെ.
കറുത്ത വള തനിക്കുള്ളിലുണ്ടെന്ന് ഹരിഹരന് വ്യക്തമായി അറിയാം. എന്നാൽ വെളുത്ത വളയെക്കുറിച്ച് അദ്ദേഹത്തിന് വെറും സംശയം മാത്രമേയുള്ളൂ. അത് ഇപ്പോഴും നീലകണ്ഠത്ത് മനയിലെ സ്വർണത്തട്ടിലാണെന്നാണ് അദ്ദേഹം വിശ്വസിക്കുന്നത്.
ആ വിശ്വാസം അങ്ങനെതന്നെ തുടരട്ടെ.
വെളുത്ത വള തന്റെ ഉള്ളിലുണ്ടെന്ന് ഇപ്പോൾ ആരോടും പറയേണ്ടതില്ല.
ഹരിഹരൻ പറഞ്ഞതെല്ലാം സത്യമാണെങ്കിൽ രണ്ടു വളകളും ഒരാളെ സ്വീകരിച്ച ആദ്യസംഭവമാണ് ഇത്. അതിന്റെ ഫലം എന്താണെന്ന് ആർക്കും അറിയില്ല. കാര്യം പറഞ്ഞാൽ അദ്ദേഹം പരീക്ഷണങ്ങൾ നടത്താൻ ശ്രമിച്ചേക്കാം.
പുതുശ്ശേരിയിലെ മറ്റുള്ളവർക്കും വിവരം ലഭിച്ചേക്കാം. അതിലും അപകടകരമായി, അച്ഛനെ കൊന്നവർ വളകളെ അന്വേഷിച്ചെത്തിയതാണെങ്കിൽ അവർ തന്റെ പിന്നാലെ വരും.
അതിനാൽ മൗനം തന്നെയാണ് സുരക്ഷ.
പെട്ടെന്നാണ് അഞ്ജനയെക്കുറിച്ചുള്ള ചിന്ത മനസ്സിലെത്തിയത്.
ഹരിഹരൻ പറഞ്ഞത് ശരിയാണെങ്കിൽ അഞ്ജനയ്ക്ക് എന്തെങ്കിലും അറിയാമായിരിക്കുമോ? ചെറിയമ്മയായ സുമലത അവളോട് സംസാരിച്ചിട്ടുണ്ടെന്ന് അദ്ദേഹം പറഞ്ഞിരുന്നു. മഹാദേവൻ മരിക്കുന്നതിനുമുമ്പ് എന്തെങ്കിലും പറഞ്ഞിരിക്കാം.
കറുത്ത വളയെക്കുറിച്ചല്ലെങ്കിലും പ്ലാനാശ്ശേരിയിലെ അന്വേഷണത്തെക്കുറിച്ചോ അപകടത്തിനു മുൻപുണ്ടായ സംഭവങ്ങളെക്കുറിച്ചോ അവൾക്കറിയാമായിരിക്കും.
അഞ്ജനയോട് ചോദിച്ചാൽ?
ആ ചിന്ത വന്നതുപോലെ ആദിത്യന്റെ
മുഖം മുറുകി.
എന്തിനാണ് അവളോട് ചോദിക്കുന്നത്?
തന്റെ അമ്മയുടെ സ്ഥാനത്തേക്ക് വന്ന സ്ത്രീയോട്?
അവൾ നേരിട്ട് ദേവികയെ കൊന്നിട്ടില്ല. അത് അവനറിയാം. എങ്കിലും തന്റെ മനസ്സിൽ അമ്മയുടെ തകർന്ന ജീവിതവുമായി അഞ്ജനയുടെ മുഖം ബന്ധപ്പെട്ടു കിടക്കുകയായിരുന്നു.
അച്ഛനുമായി അവൾക്കുണ്ടായ ബന്ധം അമ്മയെ വേദനിപ്പിച്ചിരിക്കണം. നിയമപരമായ അമ്മയുമായുള്ള ബന്ധം അവസാനിപ്പിക്കാതെയാണ് അയാൾ അവളെ വിവാഹം ചെയ്തത്.
അവളോട് സഹായം ചോദിക്കുന്നത് അമ്മയോടുള്ള വഞ്ചനയാകുമോ?
എന്നാൽ ഹരിഹരൻ മറ്റൊരു കാര്യം പറഞ്ഞിരുന്നു.
മഹാദേവന്റെ ഇരുണ്ട മന്ത്രപ്രയോഗങ്ങൾ കാരണം അഞ്ജന ഒരുപാട് അനുഭവിച്ചിട്ടുണ്ടെന്ന്.
അതിന്റെ അർഥമെന്താണ്?
അച്ഛൻ അവളുടെ മനസ്സിലും കടന്നിരുന്നോ? അവളുടെ തീരുമാനങ്ങളെ നിയന്ത്രിച്ചിരുന്നോ? പൂജയുടെയും മന്ത്രത്തിന്റെയും പേരിൽ അവളെ ഭയപ്പെടുത്തിയിരുന്നോ? അവളെ ആഭിചാരകർമ്മങ്ങൾക്ക് ഉപയോഗിച്ചുവോ? അഞ്ജന മഹാദേവനോടൊപ്പം ജീവിച്ചത് സ്വന്തം തീരുമാനപ്രകാരമായിരുന്നോ, കറുത്ത വളയുടെ സ്വാധീനത്തിലായിരുന്നോ? അറിയില്ല.