അവനൊരു നടക്കാത്ത വാഗ്ദാനവും കൊടുത്തു ഫോണും വച്ചു ഞാൻ വെളിയിലേക്ക് ഇറങ്ങി നടന്നു. പുറത്ത് ടാപ്പിന് അടുത്ത് അഞ്ജനയും ഇഷാനിയും നിൽക്കുന്നുണ്ടായിരുന്നു. അഞ്ജന ഇഷാനിയുടെ കണ്ണിൽ വെള്ളമൊഴിച്ചു കണ്ണ് തുടച്ചു കൊടുക്കുന്നു. രണ്ട് പേരും എന്നെ തന്നെ നോക്കി നിന്നു. അഞ്ജന എന്തോ ഇഷാനിയുടെ ചെവിയിൽ പറയുന്നുണ്ട്. ഒരുപക്ഷെ അവളെ രക്ഷിക്കാൻ ആണ് ഞാൻ ഇതിൽ ഇടപെട്ടത് എന്ന കാര്യം ആയിരിക്കുമോ? ഇഷാനിയുടെ മുഖത്ത് ചെറുതായ് ഒരു ചിരി വരുന്നത് പോലെ എനിക്ക് തോന്നി. പക്ഷെ അവൾക്ക് മുഖം കൊടുക്കാതെ തല വെട്ടിച്ചു ഞാൻ തിരിച്ചു നടന്നു.
ബൈക്ക് പാർക്ക്‌ ചെയ്തിരിക്കുന്ന ബദാം മരത്തണലുകളിലേക്ക് ഞാൻ എത്തിയപ്പോൾ പിന്നിൽ ആരോ ഓടിയെത്തുന്ന കാൽപെരുമാറ്റം ഞാൻ കേട്ടു. അവിടെ മന്ദം വീശുന്ന കാറ്റിൽ അവളുടെ ഗന്ധം എനിക്ക് കിട്ടി. ഇഷാനിയാണ് എനിക്ക് പിന്നിലുള്ളത്. അത് തിരിഞ്ഞു നോക്കാതെ തന്നെ എനിക്ക് മനസിലായി. ഞാൻ ബൈക്കിലേക്ക് എത്തുമ്പോ പിന്നിൽ നിന്നും ചേട്ടാ.. ചേട്ടാ.. എന്ന് അവൾ വിളിക്കുന്നത് എനിക്ക് കേൾക്കാമായിരുന്നു. പക്ഷെ അത് കേൾക്കാത്ത ഭാവത്തിൽ ഞാൻ ബൈക്കിന്റെ കീ വച്ചു സ്റ്റാർട്ട്‌ ആക്കി ബൈക്കിൽ കയറി ഇരുന്നു.
‘അർജുൻ ചേട്ടാ..’
അവളാദ്യമായി ആണ് എന്റെ പേര് വിളിക്കുന്നത്. എന്നെ അർജുൻ എന്ന് വിളിക്കുന്നവർ ഇപ്പൊ കോളേജിൽ ചുരുക്കമാണ്. അവളുടെ മുഖത്തേക്ക് എന്തെന്ന ചോദ്യഭാവത്തിൽ ഞാൻ നോക്കി
‘താങ്ക്യൂ ‘
നിന്റെ നന്ദി എനിക്ക് വേണ്ട മൈരേ. ഞാൻ മനസിൽ പറഞ്ഞു. ഞാൻ അവളുടെ താങ്ക്യൂവിന് വിലകൊടുക്കാതെ വണ്ടി സ്റ്റാർട്ട്‌ ആക്കി. ഒരു നന്ദി അല്ല ഞാൻ ആദ്യം കേൾക്കാൻ ആഗ്രഹിച്ചത് എന്ന് അവൾക്കും മനസിലായി
‘പിന്നെ… സോറി…’
അവൾ മടിച്ചു മടിച്ചു പറഞ്ഞു. പറയാനുള്ള വല്ലായ്മയെക്കാൾ എന്നോടുള്ള പേടിയാണ് അവൾക്ക് കൂടുതൽ എന്ന് എനിക്ക് തോന്നി
‘നീയെന്താ പറയാൻ വന്നത്. താങ്ക്യൂവോ അതോ സോറിയോ.? അതോ രണ്ടും കൂടിയോ?
ഒരു പുച്ഛഭാവത്തിൽ ഞാൻ അവളോട് ചോദിച്ചു. അവളെന്തെങ്കിലും മറുപടി പറയുന്നതിന് മുമ്പ് ഞങ്ങൾക്ക് കുറച്ചു മാറി നിന്ന കൂട്ടത്തിൽ നിന്നൊരുവൻ അവളെ വിളിച്ചു
‘കോണ്ടം… എവിടെ പോണു ‘
അവൾക്ക് യാതൊരു പരിചയവും ഇല്ലാത്ത ഒരുത്തൻ ആണ് അതെന്ന് എനിക്ക് തോന്നി. എനിക്ക് മുന്നിൽ വച്ചു ആ പേര് വിളിക്കപ്പെട്ടപ്പോൾ അവൾ ചൂളിപ്പോയത് ഞാൻ കണ്ടു. എന്റെ മുന്നിൽ വച്ചു അപമാനിക്കപ്പെടുമ്പോ അവൾ വല്ലാതെ വേദനിക്കുന്നതായി എനിക്ക് തോന്നി. അങ്ങനെ ആ ദിവസം രണ്ടാം തവണയും അവളുടെ രക്ഷകൻ കുപ്പായം എനിക്ക് അണിയേണ്ടി വന്നു.
‘അവൾക്ക് കൊള്ളാവുന്ന ഒരു പേരുണ്ട്. അത് വിളിക്കാമെങ്കിൽ നീ വിളിച്ചാൽ മതി ‘
താക്കീതിന്റെ സ്വരത്തിൽ അവൻ പറഞ്ഞതിലും ഉറക്കെ ഞാൻ അവന് മറുപടി കൊടുത്തു. കൂട്ടത്തിൽ ശോഭിക്കാൻ വേണ്ടി ചെയ്തത് അടിച്ചു തിരിച്ചു കിട്ടയതോടെ അവനും വിട്ടു കൊടുത്തില്ല.
‘നിന്നെ ഞാൻ വിളിച്ചില്ലല്ലോ.. നീ നിന്റെ കാര്യം നോക്കിയാൽ മതി ‘
‘ഞാൻ ആരുടെ കാര്യം നോക്കണം എന്ന് നീ കൊണയ്ക്കണ്ട ‘
ബൈക്ക് ഓഫ്‌ ആക്കി ചാടിയിറങ്ങി ഞാൻ അവനടുത്തേക്ക് നടന്നു. എന്നാൽ അതിന് മുന്നേ തന്നെ അവന്റെ കൂടെയുള്ളവർ അവനെ ഉന്തി തള്ളി അവിടുന്ന് കൊണ്ട് പോയി. അവൻ കണ്മുന്നിൽ നിന്ന് പോകുന്ന വരെ ഞാൻ അവനെ നോക്കി ദഹിപ്പിച്ചു കൊണ്ടിരുന്നു. അവൻ പോയി കഴിഞ്ഞാണ് എന്നെ അടിയുണ്ടാക്കാൻ പോകാതെ ഇരിക്കാൻ ഇഷാനി ശ്രമിച്ച കാര്യം ഞാൻ ശ്രദ്ധിച്ചത്. അവൾ രണ്ട് കൈകൊണ്ടും എന്റെ കയ്യിൽ പിടിച്ചിരുന്നു. ഞാൻ നോക്കിയപ്പോ അവൾ കൈ പിൻവലിച്ചു
‘നിനക്ക് എന്താ പറയാൻ ഉള്ളത്. പറഞ്ഞു തൊലയ്ക്ക് ‘
എന്റെ ദേഷ്യം പോയിരുന്നില്ല. അത് അവനോടുള്ള ദേഷ്യം ആയിരുന്നോ ലാബിൽ വച്ചു തന്നതിന് ഇഷാനിയോട് തന്നെ ഉള്ള ദേഷ്യം ആയിരുന്നോ എന്ന് എനിക്ക് തന്നെ നിശ്ചയം ഇല്ലായിരുന്നു. എന്തായാലും എന്റെ ദേഷ്യപ്പെടലിൽ തിരിച്ചൊന്നും പറയാനാവാതെ അവൾ നിൽക്കുന്നത് കണ്ടു ഞാൻ സ്വരം ഒന്ന് മയത്തിലാക്കി അവളോട് ചോദിച്ചു
‘നിന്റെ പേര് കോണ്ടം എന്നാണോ?
‘അല്ല ‘
‘അങ്ങനെ വിളിക്കുന്നത് നിനക്ക് ഇഷ്ടം ആണോ?
അല്ല എന്ന രീതിയിൽ തലയാട്ടി
‘പിന്നെ എന്തിനാ ഓരോരുത്തർ ഓരോ പേരിട്ട് വിളിക്കുമ്പോ പഴം വിഴുങ്ങിയ പോലെ നിൽക്കുന്നത്. വാ തുറന്നു പറഞ്ഞൂടെ ‘
അതിനവൾക്ക് ഉത്തരം ഇല്ലായിരുന്നു. അവൾ പറയാൻ പിറകെ ഓടി വന്ന കാര്യം എന്നോട് പറഞ്ഞു
‘അഞ്ജന പറഞ്ഞു ചേട്ടൻ കാരണം ആണ് പൈസ കിട്ടിയത് എന്ന്. ചേട്ടൻ ഇല്ലാരുന്നു എങ്കിൽ എല്ലാരുടെയും മുന്നിൽ ഞാൻ കള്ളി ആയേനെ. ഞാൻ ലാബിൽ വച്ചു ചേട്ടനോട് പറഞ്ഞത് വച്ചു നോക്കുമ്പോൾ ചേട്ടൻ എനിക്ക് വേണ്ടി സംസാരിക്കുക പോലും ചെയ്യണ്ട കാര്യം ഇല്ലായിരുന്നു. എന്നിട്ടും എന്നെ ഹെല്പ് ചെയ്തു…. ലാബിലെ കാര്യത്തിൽ എന്റെ ഭാഗത്താണ് തെറ്റ്.. സോറി.. ശരിക്കും സോറി..’
ഇഷാനി അവളുടെ ഹൃദയത്തിൽ തട്ടി എന്നോട് സംസാരിച്ചു
‘നിന്റെ സോറി ഒന്നും എനിക്ക് വേണ്ട. ആരുമായും കമ്പനി ഇല്ലാതെ ഇരിക്കുന്ന കണ്ടു പാവം തോന്നിയാണ് ഞാൻ അങ്ങോട്ട്‌ കേറി മിണ്ടി കൊണ്ട് ഇരുന്നത്. അപ്പൊ അതിന് വേറെ അർഥം വച്ചു കണ്ടു പറഞ്ഞിട്ട് ഇപ്പൊ സോറി പറയുന്നു.’
‘അയ്യോ വേറെ അർഥത്തിൽ ഒന്നുമല്ല. ഞാൻ അപ്പൊ എന്തോ ആലോചിച്ചു മൂഡോഫ് ആയിരുന്നു. അതാണ് അങ്ങനെ പറയാൻ പാടില്ലാത്തത് ഒക്കെ പറഞ്ഞത്. ശരിക്കും അതാലോചിച്ചു ഞാൻ വിഷമിച്ചു ഇരിക്കുവായിരുന്നു. അപ്പോളാണ് ഈ സംഭവം നടന്നത്. ചേട്ടനോട് അനാവശ്യം പറഞ്ഞതിന് ദൈവം എനിക്ക് തന്ന ശിക്ഷ ആയിരുന്നു അത് ‘
പാവത്തിന്റെ വർത്തമാനം കേട്ട് എനിക്ക് ചിരി വന്നു. പക്ഷെ ഞാൻ അത് പുറത്ത് കാണിച്ചില്ല. പരുക്കൻ മുഖം വച്ചു ഞാൻ അവളെ നോക്കി
‘നിന്റെ സോറിയും താങ്ക്സും ഒക്കെ വരവ് വച്ചു. ഞാൻ പോകുന്നു ‘
ഞാൻ നടന്നു ബൈക്കിൽ കയറി ഇരുന്നു. താക്കോൽ സ്റ്റാർട്ട്‌ ആകുന്നതിനു മുമ്പ് അവൾ വീണ്ടും എന്റെയടുക്കലേക്ക് വന്നു
‘ചേട്ടന് ഇപ്പോളും എന്നോട് ദേഷ്യം ആണെന്ന് അറിയാം. ഞാൻ ഇവിടെ നിൽക്കുന്നത് ചേട്ടന് ദേഷ്യം ആകുമോ ഇനിയും ‘
ഒഴിവാക്കാൻ നോക്കിയിട്ടും ഇഷാനി പിന്നാലെ വന്നത് എനിക്കുള്ളിൽ ഒരു കുളിർമ സമ്മാനിച്ചു.
‘എനിക്ക് ആരോടും ദേഷ്യമൊന്നുമില്ല ‘
ഞാൻ ദേഷ്യം പുറത്ത് കാണുന്ന രീതിയിൽ തന്നെ സംസാരിച്ചു
‘പക്ഷെ ഇപ്പോളും ദേഷ്യം ഉള്ള പോലെ ആണല്ലോ. ഞാൻ സോറി പറഞ്ഞില്ലേ. ഇനി ഞാൻ അങ്ങനെ മണ്ടത്തരം ഒന്നും പറയില്ല. ഉറപ്പ് ‘
‘നീ എന്റെയടുത്തു മണ്ടി കളിക്കണ്ട. നീ അത് അറിഞ്ഞോണ്ട് പറഞ്ഞതാണ് എന്ന് എനിക്ക് ശരിക്കും അറിയാം. ഞാൻ നിന്നോട് വന്നു സംസാരിക്കുന്നതും നിന്റെ കയ്യിൽ പിടിക്കുന്നതുമെല്ലാം ഒരു ഫ്രണ്ട് എന്ന നിലയിൽ ആയിരുന്നു. നിന്റെ മാത്രം അല്ല എല്ലാവരോടും ഞാൻ അങ്ങനെ ആണ്. ഞാൻ പെരുമാറിയതിൽ നിനക്ക് മാത്രം എന്താണ് ഇത്ര പ്രശ്നം ഉണ്ടായത് എന്ന് എനിക്ക് മനസിലായില്ല. ഇനി വീണ്ടും അടുത്ത് എന്റെ പെരുമാറ്റം നിനക്ക് ഇനിയും ശല്യം ആകില്ല എന്ന് ആര് കണ്ടു. അതോണ്ട് ഇനിയും നാണം കെടാൻ എനിക്ക് മേല..’
