‘ഞാനോ. ഞാനൊന്നും അല്ല. ഞാൻ എടുത്തിട്ടില്ല ‘
അവൻ നുണകളുടെ ഒരു പ്രതിരോധം തീർക്കാൻ ശ്രമിച്ചു
‘പിന്നെ നിനക്ക് എവിടുന്നാ പൊതി വാങ്ങാൻ അത്രയും ക്യാഷ്. നീ ഇത്രയും നേരം എവിടെ പോയിരുന്നു?
എന്റെ ചോദ്യങ്ങൾക്ക് അവൻ വിശ്വാസയോഗ്യം അല്ലാത്ത കള്ളങ്ങൾ പറഞ്ഞു. അവന്റെ പ്രതിരോധം പതിയെ വീണു തുടങ്ങിയിരുന്നു. അപ്പൊ കാര്യം മനസിലാക്കിയ ഗോകുലും എനിക്കൊപ്പം ചേർന്ന് ചോദ്യം ചെയ്യാൻ തുടങ്ങി.
‘ടാ നമ്മുടെ ക്ലാസ്സിൽ മാത്രമേ ക്യാമറ ഇല്ലാതുള്ളു. പക്ഷെ ക്ലാസ്സിലേക്ക് നീ തിരിച്ചു വന്നത് വരാന്തയിലെ ക്യാമറയിൽ കിട്ടി കാണും. നീ എടുത്തിട്ടുണ്ടെങ്കിൽ ഇപ്പൊ അത് സമ്മതിച്ചേക്ക്. ആരും അറിയാതെ ഒതുക്കാം. നീ കള്ളം പറഞ്ഞു പിടിച്ചു നിൽക്കാൻ ആണേൽ ക്യാമറ തപ്പി ടീച്ചേർസ് അറിഞ്ഞു മൊത്തം നാറി നിന്റെ പഠിത്തം വരെ മുഞ്ചും ‘
അവൻ കള്ളങ്ങൾ പറയുന്നത് നിർത്തി മൗനം സ്വീകരിച്ചു. ഒന്നൂടെ ഉന്തിയാൽ അവൻ മുഴുവൻ ആയും വീഴുമെന്ന് എനിക്ക് മനസിലായി
‘ഇത് വരെയും നീ ആണെന്ന് ആർക്കും അറിയില്ല. ഇതിപ്പോ ഞാനും ഇവനും അവളും മാത്രമേ അറിയൂ. പുറത്തൊരാൾ അറിയാതെ ഞാൻ നോക്കിക്കോളാം. നീ എടുത്തോ ഇല്ലയോ എന്ന് മാത്രം പറ ‘
‘അളിയാ സോറി. എനിക്ക് ഒരു അബദ്ധം പറ്റിയതാ. മുഴുവൻ എടുക്കണം എന്ന് ഞാൻ കരുതിയില്ല. പെട്ടന്ന് വെപ്രാളത്തിൽ മുഴുവൻ എടുത്തതാ. ഞാൻ പൊതി വാങ്ങിയത് അല്ലാതെ വേറൊരു പൈസ തൊട്ടിട്ടില്ല. ദേ എന്റെ കയ്യിലുണ്ട് ബാക്കി. ഞാൻ സത്യത്തിൽ ബാക്കി തിരിച്ചു വയ്ക്കാൻ ആണ് വന്നത് ‘
അവൻ പറഞ്ഞത് സത്യം ആണോ അതോ കള്ളം ആണോ എന്ന് ആലോചിച്ചു ബുദ്ധിമുട്ടാൻ നിന്നില്ല ഞാൻ
‘അഞ്ഞൂറ് എടുത്താലും അയ്യായിരം എടുത്താലും കള്ളത്തരം നല്ലതല്ല. നീ ഇത് ഇപ്പൊ നിർത്തുന്നതാണ് നിനക്ക് നല്ലത്.. പൈസ നീ ഇവനെ ഏൽപ്പിക്കു. പൊതി വാങ്ങിയ പൈസ നീ അവന്റെ കയ്യിൽ നിന്ന് തിരികെ വാങ്ങിക്ക്. വേറെ പ്രശ്നം ഒന്നും വരാതെ ഞാൻ ഇത് ഡീൽ ആക്കിക്കോളാം’
‘അവൻ ഇനി തിരിച്ചു തരുമോ പൈസ?
സംശയത്തോടെ ശരത് എന്നോട് ചോദിച്ചു
‘തരണം. ഇല്ലെങ്കിൽ നീ വാങ്ങിക്കണം. ആഷിക്കിനെയും കൂട്ടിക്കോ. അവനോട് ഞാൻ പറഞ്ഞു എന്ന് കൂടി പറ. എന്നിട്ടും തന്നില്ലേൽ ഞാൻ നോക്കിക്കോളാം ‘
ശരത്തിനൊപ്പം ഞാൻ ഗോകുലിനെയും ആഷിക്കിനെയും പറഞ്ഞു വിട്ടു. കൂട്ടുകാരികളുടെ നടുവിൽ വിഷമിച്ചു നിന്ന അഞ്ജനയെ വീണ്ടും ഞാൻ ഒറ്റക്കോരിടത്തു മാറ്റി കൊണ്ട് പോയി നിർത്തി
‘നിന്റെ പൈസ ഇപ്പൊ കിട്ടും. പക്ഷെ ഇവിടെ ആരോടും അത് മോഷണം പോയി എന്ന് പറയരുത്. വീട്ടിൽ വച്ചു മറന്നു വച്ചു എന്നെ പറയാവുള്ളൂ ‘
‘കിട്ടിയോ. സത്യം ആണോ ചേട്ടാ..’
അഞ്ജനയുടെ മുഖം സന്തോഷം കൊണ്ട് ചുവന്നു തുടുക്കുന്നത് ഞാൻ കണ്ടു. കണ്ണീർ നിറഞ്ഞ അവളുടെ കണ്ണിൽ പ്രകാശം വീണു.
‘കിട്ടി ‘
‘ആരാ എടുത്തത്.?
‘അത് നിന്നോട് പറഞ്ഞാൽ നീ ബാക്കിയുള്ളവരോട് പറഞ്ഞു കൊടുക്കില്ലേ? ആരും ഇതറിയില്ല എന്ന് ഉറപ്പ് ഞാൻ വാങ്ങിച്ചു. നിനക്ക് പൈസ കിട്ടിയാൽ പോരെ ‘
അഞ്ജന പലവുരു നിർബന്ധിച്ചിട്ടും ഞാൻ ശരത്തിന്റെ കാര്യം പറഞ്ഞില്ല. അവളെ കൊണ്ട് സത്യം ഇടീച്ചാൽ പോലും അവളുടെ ഗ്യാങ്ങിൽ എങ്കിലും അത് പുറത്താകും എന്ന് എനിക്കറിയാമായിരുന്നു.
‘എന്നോട് പറഞ്ഞില്ലെങ്കിലും വേണ്ട എനിക്ക് വേണ്ടി പൈസ കണ്ടു പിടിച്ചു തന്നല്ലോ.. താങ്ക്സ് ‘
അഞ്ജന സ്നേഹത്തോടെ എന്നെ കെട്ടിപ്പിടിച്ചു.
‘ഗോകുൽ ഇപ്പൊ പൈസ ആയി വരും. അതാരും കാണാതെ മാറ്റിക്കോണം. ഞാൻ പറഞ്ഞല്ലോ പൈസ വീട്ടിൽ മറന്നു വച്ചെന്നെ പറയാവൂ..’
‘അങ്ങനെ പറഞ്ഞോളാം.. ഗോകുലിനോട് പൈസ കയ്യിൽ വച്ചാൽ മതി ഞാൻ വൈകിട്ട് വാങ്ങിക്കോളാം എന്ന് പറ ‘
‘മ്മ് പറയാം. പിന്നെ നീയൊരു കാര്യവും ഇല്ലാത്ത കാര്യത്തിനാണ് ഇഷാനിയുടെ മണ്ടക്ക് കയറിയതും അവളെ നാണം കെടുത്തിയതും.. പറ്റുമെങ്കിൽ അവളോടൊരു സോറി പറഞ്ഞേക്ക് ‘
‘അയ്യോ സത്യം.. എന്റെ റിലേ പോയി കിടക്കുവായിരുന്നു. ഞാൻ ആണേ അതിന്റെ കണ്ണിലും കുത്തി. പാവം.. ഞാൻ സോറി പറഞ്ഞോളാം ‘
അഞ്ജന വളരെ ആത്മാർത്ഥമായിട്ടാണ് അത് പറഞ്ഞത്. ശരി എന്ന അർഥത്തിൽ തല കുനുക്കി ഞാൻ തിരിയാൻ നേരം അവളെന്റെ കയ്യിൽ പിടിച്ചു സംശയത്തോടെ ചോദിച്ചു
‘അപ്പൊ ഇത് എന്റെ വിഷമം കണ്ടു കഷ്ടപ്പെട്ട് കണ്ടു പിടിച്ചത് അല്ലല്ലേ..?അവളുടെ വിഷമം കണ്ടു റോക്കി ചേട്ടൻ ഡീറ്റെക്റ്റീവ് ആയതാണ് ല്ലേ…’
അവൾ പെട്ടന്ന് അങ്ങനെ പറഞ്ഞപ്പോ എന്ത് തിരിച്ചു പറയണം എന്നറിയാതെ ഞാൻ കുഴങ്ങി.
‘കുഴപ്പമില്ല.. എന്താണേലും ഞാൻ ഹാപ്പി ആയീ….’
എനിക്കെന്തെങ്കിലും പറയാൻ കഴിയുന്നതിനു മുന്നേ തന്നെ അവൾ ഉറക്കെ വിളിച്ചു പറഞ്ഞിട്ട് എന്റെയടുത്തു നിന്നും കൂട്ടുകാരികളുടെ അടുത്തേക്ക് സന്തോഷവാർത്ത പറയാൻ ഓടിപോയി. ഞാൻ ഈ ചെയ്തത് ഇഷാനിക്ക് വേണ്ടി ആണെന്ന് അവൾക്ക് മനസിലായി. എന്തായാലും അവൾ സോറി പറയുമ്പോ ഇഷാനിയുടെ വിഷമം മാറുമായിരിക്കും. ക്ലാസ്സിൽ നിന്ന് ഇറങ്ങി പുറത്തേക്ക് നടക്കാൻ പോകുമ്പോളാണ് ഫോണിൽ ഗോകുലിന്റെ കാൾ വരുന്നത്. അങ്ങേ തലയ്ക്കൽ സനീഷ് ആയിരുന്നു. അവന്റെ പേര് ഇപ്പോളാണ് കിട്ടുന്നത് എനിക്ക്.
‘ഭായ് ഞാൻ സനീഷ് ആണ്. നിങ്ങൾ ശരത്തിനെ പറഞ്ഞു വിട്ടോ എന്റെ അടുത്ത് സാനം തന്നിട്ട് പൈസ തിരിച്ചു വാങ്ങിക്കാൻ ‘
‘ആടാ ഞാൻ പറഞ്ഞിട്ടാണ് അവർ വന്നത് ‘
‘ഭായ് നിങ്ങൾ ഇങ്ങനെ പറഞ്ഞാൽ എങ്ങനാ. ഒരു ബിസിനസ്‌ നടന്നാൽ പിന്നെ അത് തിരിച്ചു ആക്കുന്ന നടപടി ആണോ? സ്‌ഥിരം വരുന്ന പിള്ളേരോടൊക്കേ നിങ്ങളോട് പറഞ്ഞ പോലെ ഞാൻ സാധനം ഇല്ലെന്ന് പറഞ്ഞു വിട്ടു. ഞാൻ ഇനിയിപ്പോ എന്ത് ചെയ്യണം ‘
‘ബ്രോ നീ ക്ഷമിക്ക്. അവന് ചെറിയൊരു വിഷയം ഉണ്ട്. ഇപ്പൊ നീ ആ പൈസ കൊടുത്തു അവന്റേന്ന് സാധനം വാങ്ങിക്ക്. അത്യാവശ്യ കേസ് ആയത് കൊണ്ടാണ്. അല്ലെങ്കിൽ ഇതിൽ ഞാൻ ഇടപെടില്ലായിരുന്നു ‘
ഞാൻ തഞ്ചത്തിൽ അവനെ കാര്യത്തിന്റെ വഴിയിലാക്കി.
‘നിങ്ങൾ പറഞ്ഞ കൊണ്ട് ഞാൻ ഇത്തവണ വിട്ടു വീഴ്ച ചെയ്യാം. നിങ്ങൾ പറഞ്ഞത് കൊണ്ട് മാത്രം ‘
അവസാനം അവൻ പൈസ തിരിച്ചു കൊടുക്കാമെന്നു സമ്മതിച്ചു. ഫോൺ കട്ട് ചെയ്യുന്നതിന് മുമ്പേ അവൻ പെട്ടന്ന് എന്നോട് ഒന്നൂടെ ഡീൽ ഇട്ടു
‘അല്ല റോക്കി ഭായ്.. നിങ്ങൾ കുറച്ചു മുന്നേ എന്നോട് ചോദിച്ചില്ലായിരുന്നോ.. അതിപ്പോളും ആവശ്യമുണ്ടോ..? ഞാൻ അവിടെ തന്നെ കാണും..’
അതിന്റെടേൽ കൂടെ മൈരൻ ഉണ്ടാക്കാൻ നോക്കുന്നു. ഞാൻ പക്ഷെ മാന്യമായി തന്നെ അവനെ ഒഴിവാക്കി
‘ഞാൻ ഇപ്പൊ വീട്ടിലേക്ക് പോകുവാ ബ്രോ. നമുക്ക് അടുത്ത വട്ടം സെറ്റ് ആക്കാം ‘
