ഞാൻ ആ പിക്കിൽ വീണ്ടും വീണ്ടും നോക്കി. എന്ത് ഐശ്വര്യമാണ് ഇതിൽ അവളെ കാണാൻ. ഇത്രയും മുടി ഉണ്ടായിട്ടാണോ അവളിത് മുറിച്ചു കളഞ്ഞത്. അവൾ മുടി മുറിച്ചതിനെ കുറിച്ച് ചോദിച്ചപ്പോ രാഹുലിനും അറിയില്ലായിരുന്നു. ഒരു സുപ്രഭാതത്തിൽ അവൾ മുടി മുറിച്ചു. അത്രേ അറിയൂ. ഞങ്ങളുടെ ഡെസ്കിന് രണ്ട് ബഞ്ച് അപ്പുറമായി എല്ലാവരിൽ നിന്നും ഒറ്റപ്പെട്ടു നിൽക്കുന്ന ഇഷാനിയെ ഞാൻ കണ്ടു. അവളെയും ആ ഫോട്ടോയും ഞാൻ മാറി മാറി നോക്കി. എന്തൊക്കെയോ വ്യത്യാസങ്ങൾ അവൾക്ക് വന്നിട്ടുണ്ട്. ഈ പിക്കിൽ അവളെ കണ്ടാൽ എല്ലാവരിൽ നിന്നും ഒഴിഞ്ഞു മാറി നടന്ന ഒരാളായി തോന്നില്ല. ‘അവളുടെ ഫോട്ടോ ഉണ്ടായിട്ട് ആണോടാ നാറി നീ എന്നെ കൊണ്ട് മാസ്ക് മാറ്റാൻ ഓരോ ചീപ്പ് ഐഡിയ പറഞ്ഞു തന്നത് ‘ ഞാൻ അവന്റെ തലക്ക് ഒരു കിഴുക്ക് കൊടുത്തോണ്ട് ചോദിച്ചു
‘ഡേയ് ഇതിലൊക്കെ ഇവൾ ഉണ്ടെന്ന് ഞാൻ ഇപ്പോളാണ് ശ്രദ്ധിക്കുന്നത്. ഇത് ഫോട്ടോ എടുത്ത പോലും ഞാൻ ഓർക്കുന്നില്ലായിരുന്നു. വേറെ ഫോട്ടോ ഉണ്ടോന്ന് നോക്കാം എന്തായാലും. കുറച്ചൂടെ ക്ലിയർ ആയത് ‘ അവൻ ഫോണിൽ തിരഞ്ഞു
‘എല്ലാവരും മൂന്ന് പേരുള്ള ഗ്രൂപ്പ് ആയി തിരിഞ്ഞു ഇരിക്കണം. ഓരോ ഗ്രൂപ്പിനും ഓരോ എക്സ്പീരിമെന്റ് ആയിരിക്കും. പെട്ടന്ന് ആകട്ടെ ‘ ബിനു സാർ എല്ലാവരോടും ഗ്രൂപ്പ് തിരിയാൻ പറഞ്ഞിട്ട് പുറത്തേക്ക് പോയി. ആഷിക്ക് വരാത്ത കാരണം ഞങ്ങളുടെ ഗ്രൂപ്പിൽ ഒരാൾ ഒഴിവുണ്ട്. ഇഷാനിയെ നോക്കിയപ്പോൾ അവൾ ആരുടെ അടുത്തേക്കും പോകുന്നതും കണ്ടില്ല അവളെ ആരും കൂടെ കൂട്ടുന്നതും കണ്ടില്ല.
‘ഞാൻ പോയി അവളുമാർ ആരെങ്കിലും ഗ്രൂപ്പിൽ ഇല്ലാത്തത് ഉണ്ടോ എന്ന് നോക്കാം.’ രാഹുൽ എഴുന്നേറ്റ് കൊണ്ട് പറഞ്ഞു.
‘ഡാ ഇഷാനിയെ വിളിച്ചാലോ? അവൾ ഒരു ഗ്രൂപ്പിലും ഇല്ല എന്ന് തോന്നുന്നു ‘
‘പോ മൈരേ അവൾ ഒന്നും വേണ്ട. ഞാൻ വേറെ ആരെയെങ്കിലും നോക്കിയിട്ട് വരാം ‘
‘അതെന്താ അവൾ ആയാൽ. അവൾ നല്ലപോലെ പഠിക്കും എന്നല്ലേ നീ പറഞ്ഞത്. എനിക്കിത് എപ്പോളും ശ്രദ്ധിക്കാനും റീഡിങ് എടുക്കാനും ഒന്നും പറ്റില്ല. അവളാണേൽ അതൊക്കെ നോക്കി ചെയ്തോളും. നമുക്ക് നോക്കി എഴുതേണ്ട കാര്യമേ ഉള്ളു ‘
‘ഡാ ആഷി അടുത്ത ആഴ്ച ലാബിൽ വരുമ്പോ അവനെ എന്ത് ചെയ്യും ‘
‘അവനെയും എടുക്കാം. ഇപ്പൊ എന്തായാലും മൂന്ന് പേര് വേണമെന്നല്ലേ പറഞ്ഞത്. നീ പോയി അവളെ വിളിക്ക് ‘
‘ഡാ ഞാൻ പോണോ. എനിക്ക് അവളായി കമ്പനി ഇല്ല. നീ പോയി വിളിക്ക് ‘ അവൻ മടിയോടെ പറഞ്ഞു
‘നീ ഒരു വർഷം ഒരുമിച്ച് പഠിച്ചവൻ അല്ലെ. നീ തന്നെ ചെന്ന് വിളിക്ക് ‘ ഞാൻ അവനെ നിർബന്ധിച്ചു
‘നിനക്കല്ലേ അവളെ ഇവിടെ വേണ്ടത്. നീ പോയി പറഞ്ഞാൽ മതി ‘ ഈ തെണ്ടി ഒരു വിധത്തിലും അടുക്കുന്നില്ലല്ലോ. ‘ഗോവയിൽ വച്ചു എന്റെ വോഡ്ക മുഴുവൻ അടിച്ചു കേറ്റുമ്പോ എന്തൊക്കെ വാഗ്ദാനം ആയിരുന്നു. ഒരാഴ്ചക്ക് ഉള്ളിൽ കമ്പിനി ആക്കും, ഫോൺ നമ്പർ വാങ്ങി തരും. എന്നിട്ടിപ്പോ ഊമ്പിത്തരം കാണിക്കുന്നോ മഹിറെ ‘ സർക്കാസം ആണെങ്കിലും കുടിച്ച കള്ളിന്ന് നന്ദി ഉള്ളവൻ ആയത് കൊണ്ട് അവൻ അ അവളുടെ അടുത്തേക്ക് പോയി സംസാരിച്ചു. അവൾ ഒരു തവണ പെട്ടന്നെന്നെ ഒന്ന് പാളി നോക്കി. ഞങ്ങളുടെ കൂടെ ഗ്രൂപ്പ് ആകാൻ അവൾക്ക് താല്പര്യം ഇല്ലെന്ന് പറഞ്ഞാലോ എന്ന് ഞാൻ ഭയപ്പെട്ടു. പക്ഷെ അത് ഉണ്ടായില്ല. അവൻ വന്നതിന്റെ പുറകെ അവൾ വന്നു എനിക്ക് എതിരായി ഇരുന്നു. എരണം കെട്ട മാസ്ക് അപ്പോളും മുഖത്ത് തന്നെ ഉണ്ടായിരുന്നു. വലിയ അടുപ്പം കാണിച്ചില്ല എങ്കിലും റീഡിങ് എടുക്കാനും കണക്ക് കൂട്ടാനും ഒക്കെ അവൾ ഞങ്ങളോട് സംസാരിച്ചു. സദാ സമയം സൊറ പറഞ്ഞു ക്ലാസ്സിൽ ഇരിക്കുന്ന ഞാൻ വളരെ ആത്മാർഥതയോടെ എക്സ്പീരിമെന്റ് ചെയ്യുന്നത് കണ്ടു രാഹുൽ ഞെട്ടി. റീഡിങ് എടുക്കുന്നതും അഡ്ജസ്റ്റ് ചെയ്യുന്നതിനെ പറ്റിയും എല്ലാം ഞാൻ അവളോട് ചോദിച്ചു കൊണ്ടിരുന്നു. അവൾ വളരെ ആത്മാർത്ഥതയോടെ അതെല്ലാം എനിക്ക് പറഞ്ഞു തന്നു. എഴുതുമ്പോൾ ഹൂഡിയുടെ കൈ തെറുത്ത് കേറ്റി വയ്ക്കുമ്പോൾ അവളുടെ മെലിഞ്ഞു നീണ്ട കൈ വിരലുകളും വെളുത്തു തുടുത്തു നിന്ന മനോഹരമായ കൈത്തണ്ടയും ഞാൻ നോക്കി നിന്നു. അവളുടെ കൈത്തണ്ടയിൽ രുദ്രാക്ഷം കൊണ്ടുള്ള ബ്രേസ്-ലേറ്റ് ഉണ്ടായിരുന്നു.. അവളുടെ ഗോതമ്പിന്റെ നിറമുള്ള കൈകളിൽ ചാരനിറത്തിൽ ആ രുദ്രാക്ഷം കാണാൻ നല്ല ഭംഗി ഉണ്ടായിരുന്നു. ഒരു കൗതുകത്തോടെ ഞാൻ അതിൽ നോക്കിയിരുന്നു.
‘നാണം ഇല്ലല്ലോടാ മൈരേ ഇങ്ങനെ അലക്കാൻ ‘ പഠനത്തിൽ ഉള്ള എന്റെ ആത്മാർത്ഥത കണ്ട് രാഹുലിന് കുരു പൊട്ടിയത് ഞാൻ മുഖം കൊടുത്തു പോലുമില്ല. രണ്ട് പീരീഡ് എത്ര വേഗം ആണ് പോയത് എന്ന് പോലും എനിക്ക് മനസിലായില്ല. അവൾക്കൊപ്പം കുറച്ചു നേരം കൂടി ചിലവഴിക്കാൻ പറ്റിയിരുന്നെങ്കിൽ എന്ന് ഞാൻ ആശിച്ചു. റീഡിങ് എഴുതുന്നതിന് ഇടയിൽ അവളുടെ കയ്യക്ഷരം ഒക്കെ ഞാൻ ശ്രദ്ധിച്ചു. ഇത്രയും വെടിപ്പായി അക്ഷരങ്ങൾ അടുക്കി വച്ചിരിക്കുന്നത് എങ്ങനെ ആണെന്ന് എനിക്ക് അതിശയമായി. രണ്ട് പീരീഡ് ലാബ് എങ്ങനെ കടന്ന് പോയി എന്ന് പോലും എനിക്ക് മനസിലായില്ല. ആ സമയത്തിന് ഇടയിൽ പലതവണ അവളെന്നോട് സംസാരിച്ചിരുന്നു എങ്കിലും അവളെന്നോട് സൗഹൃദം തോന്നിക്കുന്ന രീതിയിൽ ഒന്നും തന്നെ സംസാരിച്ചിരുന്നില്ല. ഞങ്ങളുടെ രണ്ടിന്റെയും ഇടയിൽ ഒരു പ്രതിമ കണക്കെ രാഹുൽ പെട്ടിരിക്കുകയായിരുന്നു.
ലാബ് കഴിഞ്ഞു ബ്രേക്കിന്റെ സമയം അവനായി ക്യാന്റീനിൽ ചെന്നപ്പോളാണ് കൃഷ്ണ ഇഷാനിയുടെ പേര് പറഞ്ഞു എനിക്കിട്ട് ഒന്ന് കുത്തിയത് ‘പുതിയ ഗ്രൂപ്പ് ഒക്കെ അടിപൊളി ആണല്ലോ’
അവളെന്തിനെ കുറിച്ചാണ് പറഞ്ഞത് എന്ന് എനിക്ക് പെട്ടന്ന് പിടികിട്ടിയില്ല. എനിക്ക് മനസിലായില്ല എന്ന് കണ്ടപ്പോ അവൾ തന്നെ ഒരു കളിയാക്കൽ ചുവയോടെ അതെന്റെ മുഖത്ത് നോക്കി പറഞ്ഞു ‘അല്ല ലാബിൽ നിങ്ങളുടെ ഗ്രൂപ്പ് അടിപൊളി ആയിട്ടുണ്ടെന്ന് ‘ ‘ഞങ്ങൾ ഒരാൾ കുറവായിരുന്നു. നോക്കിയപ്പോ അടുത്ത് അവളും. പിന്നെ പഠിക്കുന്ന ആയത് കൊണ്ട് വേറെ ഒന്നും നോക്കിയില്ല. അല്ലാതെ ഒന്നുമില്ല ‘ എനിക്ക് മുമ്പേ രാഹുൽ അവൾക്ക് മറുപടി കൊടുത്തു. ഞാൻ ഇഷാനി ആയി കമ്പനി ഉണ്ടാക്കുന്നതും മിണ്ടുന്നതുമൊക്കെ ബാക്കിയുള്ളവർ എന്തിനാണ് ചികയാൻ പോകുന്നത് എന്നെനിക്ക് മനസിലായില്ല.. അത്തരമൊരു കാര്യത്തിന് ഒരു വിശദീകരണമാർക്കും കൊടുക്കേണ്ട കാര്യം ഉണ്ടെന്നും എനിക്ക് തോന്നിയില്ല. എന്നാലും കൃഷ്ണയേ മുഷിപ്പിക്കണ്ട എന്ന് കരുതി ഞാൻ മറുത്തൊന്നും പറഞ്ഞില്ല. ‘അവൾക്ക് എന്താ കുഴപ്പം. ആരും അവളോട് മിണ്ടുന്നതു ഒന്നും കണ്ടിട്ടില്ല ഞാൻ. അപ്പൊ ഇടക്ക് കാണുമ്പോൾ ഒരു മൈൻഡ് കൊടുക്കുന്നു എന്നെ ഉള്ളു ‘
