അത്രയും പേര് വട്ടം നിന്ന് അടിച്ചാൽ ഒന്നും ചെയ്യാൻ പറ്റില്ല എന്നെനിക്ക് നല്ലത് പോലെ അറിയാമായിരുന്നു. രണ്ട് പേർക്ക് നടക്കാൻ മാത്രം വീതിയുള്ള ടോയ്ലറ്റ് ആകുമ്പോൾ ഒറ്റക്ക് ഒറ്റക്ക് ആളെ കിട്ടും. എന്റെയൊപ്പം അടിക്കാൻ കയറരുത് എന്ന് ഞാൻ രാഹുലിന് നല്ല താക്കീത് കൊടുത്തിരുന്നു. അഥവാ എന്റെ കയ്യിൽ നിന്നില്ലേൽ പിടിച്ചു മാറ്റേണ്ട ചുമതല ആയിരുന്നു അവന്. അവനപ്പോളും സംഭവം പറഞ്ഞു തീർക്കാമെന്ന് പറയുന്നുണ്ടായിരുന്നു
എന്തായാലും എന്റെ പ്ലാനിങ് പോലെ തന്നെ ഞങ്ങളെ തപ്പി ഷോണും ഗ്യാങ്ങും ടോയ്ലെറ്റിൽ കയറി. അടി പൊട്ടുമെന്ന് മനസിലായപ്പോ പതിയെ ഓരോരുത്തർ ആയി അവിടെ നിന്നും മാറാൻ തുടങ്ങി. ഷോൺ ആയിരുന്നു മുന്നിൽ നിന്നത്. അവന്റെ തൊട്ട് പിന്നിൽ അടി വാങ്ങിയ അലക്സ്. അവന്റെ പിറകിൽ ഫൈസി അങ്ങനെ.. മുഖമുഖം വന്നു നിന്നപ്പോ ഈ കോളേജിലെ ഡോണിനോട് എന്തെങ്കിലും രണ്ട് പഞ്ച് പറയണം എന്ന് എന്റെ മനസ്സിൽ ഉണ്ടായിരുന്നു. പക്ഷെ രാഹുൽ അത് കുളമാക്കി. ഞങ്ങൾ തമ്മിൽ എന്തെങ്കിലും പറയുന്നതിന് മുന്നേ അവൻ ഇടക്ക് കയറി വിഷയം ഒതുക്കാൻ നോക്കി. അടിക്കാൻ തന്നെ കച്ച കെട്ടിയ ഷോണിന്റെ ആദ്യ അടി എനിക്ക് വേണ്ടി എന്റെ കൂട്ടുകാരൻ തെണ്ടി ഏറ്റുവാങ്ങി. കൂട്ടത്തിൽ പ്രശ്നം ഒതുക്കി തീർക്കാൻ കഴച്ചു നിന്നവന് തന്നെ അടി കിട്ടിയ സ്ഥിതിക്ക് പിന്നെ ചോദ്യവും പറച്ചിലിന്റെയും ഒക്കെ ആവശ്യം ഉണ്ടായിരുന്നില്ല. അലക്സിനു കൊടുത്തതിന്റെ ബാക്കി കൈ ചുരുട്ടി ഷോണിന്റെ മുഖം നോക്കി ഒന്ന് പെരുക്കി. എന്നിട്ട് പിന്നിലേക്ക് ഒരു ചുവട് ഇറങ്ങി ആഞ്ഞൊരു ചവിട്ട് ഫൈസിയുടെ നെഞ്ചിൽ ചവിട്ടി. നല്ലൊരു ഊക്കൻ ചവിട്ടായിരുന്നു. അതിന്റെ ആയത്തിൽ അവനും അവന്റെ പിറകിൽ ഉള്ളവരും മലർന്നടിച്ചു വീണു. ആ തക്കത്തിൽ എനിക്ക് നല്ലത് പോലെ അലക്സിനെ ഒന്നൂടെ പെരുമാറാൻ കിട്ടി. അതിനിടയിൽ കിട്ടിയ അവന്റെ രണ്ടടികൾക്ക് ഞാൻ മൈര് വില പോലും കൊടുത്തില്ല. അവന്റെ കഴുത്തു എന്റെ കൈകൾക്ക് ഇടയിൽ മുറുക്കി കുനിച്ചു നിർത്തി നടുവിന് കൈമുട്ട് ചേർത്ത് ഭേഷായി കൊടുത്തു. അതിനിടയിൽ ചവിട്ടിൽ മലർന്ന് വീണവർ ചാടി പിരണ്ടു എണീറ്റ് വീണ്ടും എന്റെയടുത്തേക്ക് പാഞ്ഞു വരുന്നുണ്ടായിരുന്നു. സത്യം പറഞ്ഞാൽ എനിക്കും നല്ലത് പോലെ കിട്ടുന്നുണ്ടായിരുന്നു. പക്ഷെ നില ഉറപ്പിച്ചു ഞാൻ നിന്നടിക്കുന്നത് കൊണ്ട് അവരുടെ ആത്മവിശ്വാസം കുറയുന്നത് എനിക്ക് അറിയാൻ സാധിക്കുന്നുണ്ടായിരുന്നു. അവർ ഏകദേശം പിന്മാറുന്നതിന്റെ വക്കിൽ എത്തിയപ്പോളാണ് അവരെ വകഞ്ഞു മാറ്റി ഫൈസി എന്റെ മുന്നിലേക്ക് വന്നത്. ഞാൻ കൊടുത്ത ചവിട്ട് വച്ചു അത്രയും ആവേശം അവൻ കാണിക്കേണ്ടതല്ല. കൈക്ക് നല്ല വേഗത ഉള്ളത് കൊണ്ട് രണ്ട് കൈ കൊണ്ടും അവന്റെ നെഞ്ചിലേക്ക് ഞാൻ ആഞ്ഞിടിച്ചു. ഒരിടി നല്ലത് പോലെ അവന് കിട്ടിയെങ്കിലും അടുത്തത് അവൻ വളരെ വിദഗ്ദമായി കൈ വച്ചു ബ്ലോക്ക് ചെയ്തു. അതിന്റെ അത്ഭുതം എന്നിൽ നിന്ന് മാറുന്നതിനു മുമ്പ് തന്നെ അവന്റെ ഇടം കയ്യിൽ നിന്നൊരു പഞ്ച് എന്റെ കണ്ണിന് താഴെ കിട്ടി.
മൈര്…!! കണ്ണിൽ കൂടി വെള്ളം ഒഴുകുന്ന പോലെ എനിക്ക് തോന്നി. മൊത്തത്തിൽ ഒരു മൂടൽ. ഇത്രയും നേരം കിട്ടിയ അടിയൊന്നും ഇത്രക്ക് പവർ ഇല്ലായിരുന്നു. എന്റെ കണക്ക് കൂട്ടൽ പിഴച്ചത് ഇവിടെ ആണ്. പിള്ളേരെ മൊത്തത്തിൽ അങ്ങ് ഊക്കി വിടാമെന്ന് ഞാൻ അതിമോഹം കാണിച്ചു. കൂട്ടത്തിൽ അടി പഠിച്ച ഒരുത്തൻ ഉണ്ടാകുമെന്ന് ഞാൻ നിരീച്ചില്ല. എന്തായാലും ഇനി അതാലോചിച്ചിട്ട് കാര്യമില്ല. കിട്ടുന്നത് പോലെ തിരിച്ചു കൊടുക്കുക. ഫൈസീയുടെ രണ്ട് മൂന്ന് അടി കൂടെ അതിനിടയിൽ എനിക്ക് കിട്ടി. ഒറ്റക്ക് ആണേൽ അവനോട് അടിച്ചു നിൽക്കാമായിരുന്നു. പക്ഷെ ഇതിപ്പോ എന്റെ ചുറ്റും അവന്മാർ നിന്ന് അടിക്കുക ആണ്. ഫൈസിക്ക് ആണേൽ നല്ല കൈ നീളവും ഉണ്ട്. അത് വച്ചു അവനും നല്ലത് പോലെ കീച്ചുന്നുണ്ട്. രാഹുൽ ഒരാളിനെ കൊണ്ട് ഇവന്മാരെ എല്ലാം പിടിച്ചു മാറ്റാൻ നടക്കുന്നുമില്ല. കോളേജിലെ ഗരുഡനെ തീർക്കാൻ വന്ന എന്റെ ആരൂഢം പിള്ളേർ ഇടിച്ചു കലക്കുമെന്ന അവസ്ഥ ആയി. ഇടി പിന്നെ മാറി ചവിട്ടായി. ഒന്നും ചെയ്യാൻ ഇല്ലാതെ മുട്ട് കുത്തി ഇരുന്നു ഞാൻ വാങ്ങിക്കുക ആണ്. ഒരു കണ്ണാണെൽ ശരിക്കും കാണുന്നുമില്ല. ഇവന്മാർ എന്റെ പത കാണാതെ നിർത്തുമെന്നും തോന്നുന്നില്ല. അവസാനം എനിക്ക് അറ്റകൈ പ്രയോഗം തന്നെ എടുക്കേണ്ടി വന്നു. ചവിട്ട് തലക്ക് കിട്ടാതെ ഇരിക്കാൻ കൈ തലക്ക് വട്ടം പിടിച്ചായിരുന്നു എന്റെ ഇരിപ്പ്. പെട്ടന്ന് എന്റെ കണ്മുന്നിൽ കണ്ട കാല് ഞാൻ പിടിച്ചു വലിച്ചു താഴെ ഇട്ടു. അലക്സ് ആയിരുന്നു ആ വീണത്. വീണിട്ട് എഴുന്നേൽക്കാൻ അവന് സമയം കിട്ടുന്നതിന് മുമ്പേ തന്നെ അവന്റെ തല ഞാൻ ഭിത്തിയിൽ ആഞ്ഞു ഇടിപ്പിച്ചു. അവന്റെ അലർച്ച കേട്ട് അവന്മാർ ഒന്ന് പരിഭ്രമിച്ചു. തല പൊത്തി പിടിച്ച അവന്റെ കയ്യിൽ നിന്നും ചോര നിലത്തേക്ക് ഇറ്റ് വീഴുന്നുണ്ടായിരുന്നു.