‘നൂനു എന്നാണ് ഇവന്റെ പേര് ‘ എനിക്കും ഇഷാനിക്കും ഇടയിൽ ആദ്യമായൊരു സംഭാഷണം സ്വാഭാവികമായി ഉടലെടുക്കുകയായിരുന്നു.
‘നൂനുവോ. അത് പെൺപെട്ടിക്ക് അല്ലെ ചേരുക. ഇവൻ ആൺ പട്ടിയാണ്. കമോൺ മൈ ബോയ് ‘ ഞാൻ നായയെ അടുത്ത് വരുത്തി അവന്റെ മുന്നിലേക്ക് ബിസ്കറ്റ് നീട്ടി. അവനത് ശാന്തമായി തിന്നു
എന്റെ പൂച്ചയുടെ പേരാണ് അത്. അവളെ ഇവിടെ മിസ്സ്‌ ചെയ്യുന്ന കൊണ്ട് ഇവനിവിടെ ആ പേര് ഇട്ടു ‘ അവളുടെ വീട് പാലക്കാട്‌ ആണെന്നും അവിടെ ആണ് ഈ പറഞ്ഞ നൂനു പൂച്ച ഉള്ളതെന്നും അവളെനിക്ക് പറഞ്ഞു തന്നു.. അവളുടെ വീട്ടുകാരെ പറ്റി ചെറിയൊരു ചോദ്യം ഞാനിട്ടത് അവൾ വ്യക്തമല്ലാത്ത ഒരു മറുപടിയിൽ ഒതുക്കി കളഞ്ഞു. വീടിനെ പറ്റി സംസാരിക്കാൻ അവൾക്ക് താല്പര്യമില്ല എന്ന് എനിക്ക് നല്ലത് പോലെ മനസിലായി. അത് പോലെ എത്ര മറുപടികൾ എത്ര പേരോട് പറഞ്ഞിരിക്കുന്നു ഞാൻ.. ബിസ്കറ്റ് തിന്നു ശാന്തനായി ഇരിക്കുന്ന നൂനു എന്ന് ഇഷാനി വിളിക്കുന്ന നായയുടെ തലയിൽ ഞാൻ മെല്ലെ തലോടി. ഞാൻ തടവുന്നത് അവൾ വലിയ കാര്യത്തിൽ നോക്കി ഇരുന്നു ‘നിനക്ക് ചെയ്യണോ? ഞാൻ അവളോട് ചോദിച്ചു. പേടി കൊണ്ട് വേണ്ട എന്ന അർഥത്തിൽ അവൾ തലയാട്ടി. അത് വക വയ്ക്കാതെ ഞാൻ നൂനുവിനെ എടുത്തു ഞങ്ങൾ ഇരിക്കുന്ന വരാന്തയിൽ ഞങ്ങളുടെ ഇടയിലായി ഇരുത്തി. ‘അവന്റെ തലയിൽ മുകളിലോട്ട് ഇങ്ങനെ ചെയ്തു കൊടുക്ക് ‘ ഞാൻ നൂനുവിന്റെ തല തടവി അവളെ കാണിച്ചു കൊടുത്തു. നായ്ക്കളെ ഇഷ്ടം അറിയിക്കുന്നത് അങ്ങനെ ആണ്. പക്ഷെ അവൾ കൈ അടുത്ത് വരെ കൊണ്ട് വന്നിട്ട് പേടിയോടെ പിൻവലിച്ചു.
‘ഇങ്ങ് കൊണ്ട് വാ. ഞാൻ ചെയ്യിക്കാം ‘ പെട്ടന്ന് ഒരു നിമിഷത്തിൽ ഞാൻ അവളുടെ കയ്യിൽ പിടിച്ചു നൂനുവിന്റെ തലയിൽ തൊടുവിച്ചു. നായയെ തൊട്ടതിന്റെ ഷോക്കിൽ ആണോ അതോ ഞാൻ കയ്യിൽ പിടിച്ചതിന്റെ ഷോക്കിൽ ആണോ അവൾ ഒന്ന് അടിമുടി വിറച്ചത് ഞാൻ അറിഞ്ഞു. അവളുടെ കൈപ്പത്തിയിന്മേൽ എന്റെ കൈകൾ കൊണ്ട് ഞാൻ മെല്ലെ നൂനുവിന് തലയിൽ തടവി. അവളുടെ വിരലുകളുടെ സ്പർശനം കൊണ്ട് ഞാൻ ഇന്നേ വരെ അറിയാത്ത ഏതോ സുഖം അപ്പോൾ അറിഞ്ഞു. ഇന്നേ വരെ ഒരു കാമത്തിനും, ഒരു സ്ത്രീ ശരീരത്തിനും നൽകാൻ കഴിയാത്ത സുഖം ഇന്നിവളുടെ വിരൽത്തുമ്പുകൾക്ക് നൽകാൻ കഴിഞ്ഞു. അധികനേരം എന്റെ കൈകൾ അവളുടെ കയ്യിൽ തന്നെ ഇരുന്നാൽ എന്റെ ഉദ്ദേശം ശരിയല്ല എന്ന് അവൾക്ക് മനസിലാകും എന്ന് വച്ചു ഞാൻ മനസില്ലമനസോടെ എന്റെ കൈകൾ പിൻവലിച്ചു. ഇഷാനി അപ്പോളേക്കും പേടി മാറി നൂനുവിനെ തഴുകുന്നുണ്ടായിരുന്നു. പേടി മുഴുവൻ ആയി മാറ്റാൻ ഞാൻ അവനെ എടുത്തു അവളുടെ മടിയിൽ വച്ചു കൊടുത്തു. പഴയത് പോലെ ഞെട്ടിയില്ല എങ്കിലും അവളുടെ കണ്ണുകളിൽ അപ്പോളും പേടി ഉണ്ടായിരുന്നു. നാശം പിടിച്ച മാസ്ക് അവൾ എപ്പോളും വയ്ക്കുന്നത് കൊണ്ട് അവളുടെ മുഖം പലപ്പോഴും എനിക്ക് കാണാൻ പറ്റാറില്ല. അവളായി സൗഹൃദം സ്‌ഥാപിക്കാൻ അടുത്ത വഴി എന്ന നിലയിൽ ഞാൻ അവളോട് നോട്ട് ചോദിച്ചു. അവൾ തരുമോ എന്ന് എനിക്ക് ഉറപ്പില്ലായിരുന്നു ‘രേണു മിസ്സിന്റെ നോട്ട് ഉണ്ടെങ്കിൽ ഒന്ന് തരുമോ. എനിക്ക് കുറച്ചു പോർഷൻ മിസ്സ്‌ ആയിട്ടുണ്ട് ‘ രേണുവിനെ മിസ്സ്‌ കൂട്ടി വിളിക്കുന്നത് എനിക്ക് വലിയ ബുദ്ധിമുട്ട് ആയിരുന്നു. എങ്കിലും മറ്റുള്ളവരുടെ അടുത്ത് അവൾക്ക് കൊടുക്കേണ്ട ബഹുമാനം കൊടുക്കണമല്ലോ. എന്തായാലും ഞാൻ ചോദിച്ചപ്പോൾ തന്നെ അവൾ നോട്ട് എടുത്തു എന്റെ കയ്യിൽ തന്നു. സാധാരണ പഠിപ്പി പെൺകുട്ടികളെ പോലെ നോട്ട് തരുന്നതിൽ ഒന്നും അവൾക്ക് ഒരു പ്രശ്നം ഉള്ളതായി തോന്നിയില്ല. അന്നും ഞാൻ അവളെ കോളേജ് ഗേറ്റ് വരെ കൊണ്ടാക്കി. ക്ലാസ്സ്‌ കഴിഞ്ഞു അവൾ നേരെ ഞാൻ അന്ന് അവളെ കണ്ട ബുക്ക്‌ സ്റ്റാളിൽ ആണ് പോകുന്നത്. അവിടെ ഒമ്പത് മണി വരെ ജോലി. അത് കഴിഞ്ഞു ടൗണിൽ തന്നെ ഒരു വീടിന്റെ മുകൾ ഭാഗം വാടകക്ക് എടുത്തിട്ടുണ്ട് അവിടെ ആണ് ഇഷാനി താമസിക്കുന്നത്. അവിടുത്തെ ഉടമസ്‌ഥ ഒരു പ്രായം ആയ സ്ത്രീ ആണ്. അവർക്ക് പൂച്ചകളെ ഇഷ്ടം അല്ല. അത് കൊണ്ടാണ് ഇഷാനിക്ക് ഇവിടെ പൂച്ചയെ വളർത്താൻ പറ്റാത്തത് റൂമിൽ വന്നപ്പോൾ ഞാൻ അവളുടെ കയ്യിൽ നിന്ന് വാങ്ങിയ ബുക്കിന്റെ കാര്യം വിട്ടു പോയിരുന്നു. രാത്രി കിടക്കുന്നതിനു മുമ്പാണ് അത് ഓർമിച്ചത്. അപ്പോൾ തന്നെ ബാഗ് തുറന്നു അത് പുറത്തെടുത്തു. ഒരു കൊച്ചു കുട്ടിയെ പോലെ വൃത്തിയായി ബുക്കുകൾ സൂക്ഷിക്കുന്ന ആളാണ് ഇഷാനി എന്ന് തോന്നി. തിരിച്ചു കൊടുക്കുമ്പോ ഒളിവും ചളുക്കും ഒക്കെ ഉണ്ടെങ്കിൽ അവൾക്കെന്നോട് മതിപ്പ് പോകുമെന്ന് ഞാൻ ആലോചിച്ചു. അത് കൊണ്ട് ശ്രദ്ധിച്ചു ഞാൻ ആ ബുക്ക്‌ തുറന്നു.
“ഇഷാനി ചന്ദ്രൻ” എന്ന് മനോഹരമായ കൈപ്പടയിൽ എഴുതിയ അവളുടെ പേരിൽ ഒരുപാട് നേരം ഞാൻ നോക്കിയിരുന്നു. സങ്കല്പത്തിൽ ആ പേരിനപ്പുറം എന്റെ പേരൊക്കെ കൂട്ടി ചേർത്ത് ഞാൻ ചേർച്ച പരിശോധിച്ചു.. ഇഷാനി അർജുൻ – അത്ര മോശം ഒന്നുമല്ല താളുകൾ മറിച്ചു ഞാൻ അവളുടെ കയ്യക്ഷരം ശ്രദ്ധിച്ചു. നല്ല കയ്യക്ഷരം ഉള്ളവർക്ക് നല്ല സ്വഭാവം ആയിരിക്കും എന്നോ മറ്റോ കേട്ടിട്ടുണ്ട്. അപ്പൊ അവളും ഒരു നല്ല കുട്ടി ആയിരിക്കും. അവളെപ്പറ്റി എല്ലാവരിൽ നിന്നും കേട്ട മോശം കാര്യങ്ങൾക്ക് എല്ലാം എതിരായി ഞാൻ ആ കയ്യക്ഷരത്തെ കൂട്ടു പിടിച്ചു എന്ന് കരുതാം. സത്യത്തിൽ എനിക്ക് എഴുതാൻ ഒന്നും ഉണ്ടായിരുന്നില്ല. അവളുടെ ശ്രദ്ധ കൂടുതൽ പിടിച്ചു പറ്റാൻ വേണ്ടി മാത്രം ആണ് ബുക്ക്‌ വാങ്ങിച്ചോണ്ട് വന്നത്. രാവിലെ ബുക്ക്‌ എടുത്തു വയ്ക്കുന്ന കാര്യം ഓർത്തെങ്കിലും ഞാൻ മനഃപൂർവം അത് എടുത്തില്ല. ഉച്ചക്ക് മുമ്പുള്ള പീരീഡ് ആയിരുന്നു രേണുവിന്റെത്. രാവിലെ ക്ലാസ്സിൽ വന്നപ്പോൾ മുതൽ മൂലയ്ക്ക് ഇരുന്ന് ഇഷാനി എന്നെ നോക്കുന്നുണ്ട്. അത് ബുക്ക്‌ കൊണ്ട് വന്നോ എന്നറിയാൻ ആണെന്ന് എനിക്ക് മനസിലായി. പക്ഷെ ഞാൻ അവളുടെ കണ്ണുകൾക്ക് പിടി കൊടുക്കാതെ തിരിഞ്ഞു ഇരുന്ന് അവസാനം ഞാനായി ബുക്ക്‌ തരില്ല എന്ന് മനസിലാക്കിയാവണം അവൾ മെല്ലെ ഞാൻ ഇരിക്കുന്ന സീറ്റിന് അടുത്തേക്ക് വന്നു. അവൾ വരുന്ന കണ്ടു ആഷിക്ക് എന്റെ കാലിൽ തട്ടി സിഗ്നൽ തന്നിരുന്നു. ഞാൻ അപ്പോൾ അവളെന്റെ പുറകിൽ നിൽക്കുന്നത് കണ്ടിട്ടേ ഇല്ലെന്ന രീതിയിൽ ഇരുന്നു. ചേട്ടാ എന്ന് അവൾ മൂന്നോ നാലോ തവണ വിളിച്ചു കഴിഞ്ഞാണ് അവളവിടെ നിൽക്കുന്നത് ആദ്യമായി കണ്ടത് പോലെ ഞാൻ അഭിനയിച്ചു അങ്ങോട്ട് തിരിഞ്ഞത്. ഞാൻ കാര്യം മനസിലാകാത്ത പോലെ അഭിനയിച്ചപ്പോൾ അവൾക്ക് വാ തുറന്നു ചോദിക്കേണ്ടി വന്നു
‘നോട്ട് എഴുതാൻ വാങ്ങിയിരുന്നു ‘
‘ആരുടെ നോട്ട്? ഞാൻ ചെറിയ നമ്പർ ഇറക്കി
‘എന്റെ. ചേട്ടൻ ഇന്നലെ വൈകിട്ട് എഴുതാൻ ഉണ്ടന്ന് പറഞ്ഞു വാങ്ങിച്ചിരുന്നു ‘
