മൈര്…!! കണ്ണിൽ കൂടി വെള്ളം ഒഴുകുന്ന പോലെ എനിക്ക് തോന്നി. മൊത്തത്തിൽ ഒരു മൂടൽ. ഇത്രയും നേരം കിട്ടിയ അടിയൊന്നും ഇത്രക്ക് പവർ ഇല്ലായിരുന്നു. എന്റെ കണക്ക് കൂട്ടൽ പിഴച്ചത് ഇവിടെ ആണ്. പിള്ളേരെ മൊത്തത്തിൽ അങ്ങ് ഊക്കി വിടാമെന്ന് ഞാൻ അതിമോഹം കാണിച്ചു. കൂട്ടത്തിൽ അടി പഠിച്ച ഒരുത്തൻ ഉണ്ടാകുമെന്ന് ഞാൻ നിരീച്ചില്ല. എന്തായാലും ഇനി അതാലോചിച്ചിട്ട് കാര്യമില്ല. കിട്ടുന്നത് പോലെ തിരിച്ചു കൊടുക്കുക. ഫൈസീയുടെ രണ്ട് മൂന്ന് അടി കൂടെ അതിനിടയിൽ എനിക്ക് കിട്ടി. ഒറ്റക്ക് ആണേൽ അവനോട് അടിച്ചു നിൽക്കാമായിരുന്നു. പക്ഷെ ഇതിപ്പോ എന്റെ ചുറ്റും അവന്മാർ നിന്ന് അടിക്കുക ആണ്. ഫൈസിക്ക് ആണേൽ നല്ല കൈ നീളവും ഉണ്ട്. അത് വച്ചു അവനും നല്ലത് പോലെ കീച്ചുന്നുണ്ട്. രാഹുൽ ഒരാളിനെ കൊണ്ട് ഇവന്മാരെ എല്ലാം പിടിച്ചു മാറ്റാൻ നടക്കുന്നുമില്ല. കോളേജിലെ ഗരുഡനെ തീർക്കാൻ വന്ന എന്റെ ആരൂഢം പിള്ളേർ ഇടിച്ചു കലക്കുമെന്ന അവസ്‌ഥ ആയി. ഇടി പിന്നെ മാറി ചവിട്ടായി. ഒന്നും ചെയ്യാൻ ഇല്ലാതെ മുട്ട് കുത്തി ഇരുന്നു ഞാൻ വാങ്ങിക്കുക ആണ്. ഒരു കണ്ണാണെൽ ശരിക്കും കാണുന്നുമില്ല. ഇവന്മാർ എന്റെ പത കാണാതെ നിർത്തുമെന്നും തോന്നുന്നില്ല. അവസാനം എനിക്ക് അറ്റകൈ പ്രയോഗം തന്നെ എടുക്കേണ്ടി വന്നു. ചവിട്ട് തലക്ക് കിട്ടാതെ ഇരിക്കാൻ കൈ തലക്ക് വട്ടം പിടിച്ചായിരുന്നു എന്റെ ഇരിപ്പ്. പെട്ടന്ന് എന്റെ കണ്മുന്നിൽ കണ്ട കാല് ഞാൻ പിടിച്ചു വലിച്ചു താഴെ ഇട്ടു. അലക്സ്‌ ആയിരുന്നു ആ വീണത്. വീണിട്ട് എഴുന്നേൽക്കാൻ അവന് സമയം കിട്ടുന്നതിന് മുമ്പേ തന്നെ അവന്റെ തല ഞാൻ ഭിത്തിയിൽ ആഞ്ഞു ഇടിപ്പിച്ചു. അവന്റെ അലർച്ച കേട്ട് അവന്മാർ ഒന്ന് പരിഭ്രമിച്ചു. തല പൊത്തി പിടിച്ച അവന്റെ കയ്യിൽ നിന്നും ചോര നിലത്തേക്ക് ഇറ്റ് വീഴുന്നുണ്ടായിരുന്നു.
ആ സമയം കൊണ്ട് ഞാൻ എഴുന്നേറ്റ് പിന്നിലേക്ക് മാറി. വീണ്ടും അടിക്കാൻ അവർക്കിടയിൽ ഒരു അനക്കം ഉണ്ടായെങ്കിലും ഞാൻ എന്തും ചെയ്യുമെന്ന് ഓർത്താവണം അടുത്തേക്ക് വന്നില്ല. ഫൈസി അലക്സിനെ താങ്ങി എഴുന്നേൽപ്പിച്ചു. തലയിലെ രക്തം പോകാതെ ഇരിക്കാൻ ആരുടെയോ തൂവാല കൊണ്ട് അവൻ തല പൊത്തിപ്പിടിച്ചു. ഫൈസിക്കൊപ്പം അവന്മാർ എല്ലാം അലക്സിന്റെ തലയിലെ മുറിവിലേക്ക് ശ്രദ്ധ തിരിച്ചു.
എന്റെ ദേഹത്തെ മുറിവ് രാഹുലും നോക്കാൻ തുടങ്ങി. ഒന്നും പ്രശ്നം ഇല്ലെന്ന് ഞാൻ നിസാരമട്ടിൽ ഒഴിവാക്കി പറഞ്ഞെങ്കിലും എന്റെ പലയിടത്തും നല്ല വേദന ഉണ്ടായിരുന്നു. കണ്ണിന് താഴെ കിട്ടിയ ഇടി ആയിരുന്നു പുറമെ കാണുമ്പോൾ ഉള്ള വലിയ പരിക്ക്. പിന്നെ ചെറിയ പോറൽ മാത്രമേ കാണാൻ ഉള്ളായിരുന്നുള്ളു. ഞാൻ ഈയിടെ വാങ്ങിച്ച പുത്തൻ ബ്ലാക്ക് ഷർട്ട്‌ ആയിരുന്നു. അതിന്റെ മുന്നിലത്തെ കുറച്ചു ബട്ടൻസ് ഒക്കെ പോയിരുന്നു. ടോയ്‌ലെറ്റിൽ നിന്നും ഞങ്ങളും മാറി. മുഖവും ദേഹവും ഒക്കെ ടാപ്പിൽ കഴുകിയപ്പോൾ ഒരു നീറ്റൽ വന്നെങ്കിലും ചെറിയൊരു ആശ്വാസം തോന്നി മൊത്തത്തിൽ. ഈ സമയം കോളേജിൽ ചുമ്മാ കറങ്ങി നടക്കുന്നത് പന്തി അല്ല എന്ന് രാഹുൽ കൂടെ കൂടെ പറഞ്ഞു. അവന്മാരുടെ കണ്ണ് വെട്ടിച്ചു കോളേജ് ഇറങ്ങാൻ പറ്റിയില്ലെങ്കിൽ ഏറ്റവും സേഫ് സ്വന്തം ഡിപ്പാർട്മെന്റ് തന്നെ ആണ്. അവിടെ കേറി വന്നു ഒരുത്തനും ഒന്നും ചെയ്യില്ല. ലഞ്ച് ബ്രേക്ക് കഴിഞ്ഞുള്ള പീരിയഡ് രേണുവിന്റെ ആയിരുന്നു. അവൾ ക്ലാസ്സിൽ വന്നിട്ടില്ലായിരുന്നു.
ക്ലാസ്സിൽ കയറി കഴിഞ്ഞു മുഴുവൻ പിള്ളേരും ആദ്യമായി കാണുന്ന പോലെ എന്നെ നോക്കി. ഓരോ നോട്ടത്തിലും ഓരോ അർഥം ആയിരുന്നു. ഗോകുൽ ഒറ്റക്ക് എന്തിനാണ് അവരുടെ ഇടയിൽ കയറി കൊടുത്തത് എന്ന് പറഞ്ഞു ഞങ്ങളെ ശകാരിക്കുന്നുണ്ടായിരുന്നു. അജയ് ആണെങ്കിൽ ഇപ്പൊ അവന്മാരെ തിരിച്ചു തല്ലണം എന്ന മൈൻഡിൽ ആയിരുന്നു. അതിനിടക്ക് അവന്മാർ സീനിയർസ് ആണെന്നും ചുമ്മാ പ്രശ്നം വഷളാക്കേണ്ട എന്നും കഞ്ചൻ ശരത് വന്നു പറഞ്ഞതും നീ സീനിയർസിന്റെ മൂഞ്ചിക്കോ എനിക്ക് പറ്റില്ല എന്ന് അജയ് തിരിച്ചു പറഞ്ഞതും അടുത്ത അടിയിലേക്ക് പൊട്ടേണ്ടത് ആയിരുന്നു. മിക്ക പിള്ളേരും ഒരു അത്ഭുതത്തോടെ എന്നെ നോക്കിയപ്പോ കൃഷ്ണയുടെ മുഖത്ത് ഒരു പുച്ഛം ആയിരുന്നു. ഞാൻ വെറും അലമ്പ് ആണെന്ന് അവൾ മനസിലാക്കിയത് കൊണ്ടാവും. പക്ഷെ ഇത്ര ഒക്കെ സംഭവിച്ചിട്ടും ഇഷാനി തല ഉയർത്തി എന്റെ മുഖത്തേക്ക് ഒന്ന് നോക്കുക പോലും ഉണ്ടായില്ല. അടിയുടെ വിവരണം അടുത്തുള്ളവർ പറയുന്നതിന് ഇടയിൽ അലെക്സിന്റെ തല പൊട്ടിയത് പറഞ്ഞപ്പോ മാത്രം അവൾ മുഖം ഉയർത്തി എന്നെ ഒന്ന് നോക്കി. ഞാൻ അത് ശ്രദ്ധിച്ചു എന്നറിഞ്ഞപ്പോൾ തന്നെ ആ നോട്ടം അവൾ വിദഗ്ദമായി പിൻവലിച്ചു. ഷർട്ട്‌ ബട്ടൺ വിട്ട് ഉള്ളിലെ ചുവന്ന ബനിയൻ ഒക്കെ കാണിച്ചോണ്ട് ആയിരുന്നു എന്റെ നിൽപ്പ്. അത് കണ്ട് സങ്കടം തോന്നി ആകണം എവിടുന്നോ വാങ്ങിച്ചോണ്ട് വന്ന രണ്ട് സേഫ്റ്റി പിൻ ശ്രുതി എനിക്ക് കൊണ്ട് വന്നു. എന്നിട്ട് അവൾ തന്നെ അത് വൃത്തിയായി ഷർട്ടിൽ കുത്തി തന്നു. ഇപ്പൊ പെട്ടന്ന് കണ്ടാൽ ബട്ടൺ പൊട്ടിയത് അറിയില്ല. എന്റെ കണ്ണ് കണ്ടു അവൾക്ക് ആകെ പേടി ആയി. ഹോസ്പിറ്റലിൽ പോകാനൊക്കെ എന്നെ വല്ലാതെ നിർബന്ധിക്കുന്നുണ്ടായിരുന്നു. വീട്ടിൽ പോയി കുറച്ചു ഐസ് വച്ചാൽ തീരാവുന്ന പ്രശ്നമേ ഉള്ളെന്ന് പറഞ്ഞു ഞാൻ അവളെ അശ്വസിപ്പിച്ചു. എന്തായാലും ഈ തല്ല് കൊണ്ട് എനിക്ക് എന്തെങ്കിലും പ്രയോജനം ഉണ്ടായിട്ടുണ്ടെങ്കിൽ അത് ശ്രുതി ആയുള്ള സൗഹൃദം ആയിരുന്നു. ക്ലാസ്സിലെ ഏറ്റവും പാവം കൊച്ചായിരുന്നു അവൾ, അതേ പോലെ ഏറ്റവും ചെറിയ കൊച്ചും. അതിന്റെ ഒരു കുട്ടിത്തം ഒക്കെ ഉള്ള അവളുമായി എന്നെ പോലൊരു തെമ്മാടിക്ക് സൗഹൃദം ഉണ്ടാക്കാൻ പറ്റുമെന്ന് ഞാൻ ഒരിക്കലും ചിന്തിച്ചിരുന്നില്ല.
അതിനിടയിൽ ആണ് മുഖം വീർപ്പിച്ചു ഭദ്രകാളിയെ പോലെ രേണു ക്ലാസ്സിലേക്ക് കയറി വന്നത്. അവൾ നേരെ ഞങ്ങൾ ഇരിക്കുന്ന അവിടേക്കാണ് വന്നത്. അവളുടെ ഈ ഭാവം പലതവണ കണ്ട എനിക്ക് അതൊരു പുതുമ അല്ലായിരുന്നു. പിള്ളേരുടെ മുഴുവൻ മുന്നിൽ വച്ചു എന്നെ നാണം കെടുത്താതെ വെളിയിൽ കൊണ്ട് വന്നു അവളുടെ വായിൽ വന്നത് മുഴുവൻ അവൾ എന്നോട് പറഞ്ഞു കൊണ്ടിരുന്നു
‘നീ ആരാന്നാ നിന്റെ വിചാരം.. അർജു.. ഗുണ്ടയോ..? ഒരു ചെറുക്കന്റെ തല പൊട്ടി ചോര ഒക്കെ വന്നെന്നാ കേട്ടത് ‘
ചെയ്തതിന്റെ സീരിയസ്നെസ്സ് എനിക്ക് നല്ലത് പോലെ അറിയാമായിരുന്നു. എന്നിട്ടും അത് വരെ തോന്നാത്ത പശ്ചാത്താപം അവൾ എന്റെ മുന്നിൽ നിന്ന് കണ്ണ് നനച്ചപ്പോൾ എനിക്ക് തോന്നി. ഒരോ രണ്ട് തെറിക്കും ഇടയിൽ ഓരോ അടി കൂടെ അവൾ എന്റെ കൈക്ക് നോക്കി തരുന്നുണ്ടായിരുന്നു. ഇതിനിടയിൽ ഒരു നൂറ് വട്ടം എങ്കിലും അവളെന്നെ”റൗഡി” എന്ന് വിളിച്ചിരുന്നു. സാഹചര്യം ഇതായത് കൊണ്ട് ഞാൻ മിണ്ടാതെ കേട്ട് നിന്നു. അപ്പോളാണ് മൈക്കിലൂടെ എന്റെയും രാഹുലിന്റെയും പേര് വിളിച്ചു പ്രിൻസിപ്പലിന്റെ റൂമിലേക്ക് വരാൻ അറിയിപ്പ് വരുന്നത്. അവിടെ വരെ കൂടെ വരണ്ട എന്ന് നിർബന്ധിച്ചത് കൊണ്ട് മാത്രം രേണു കൂടെ വന്നില്ല.
