ഇഷാനി ഒരു മരവിപ്പോടെ ആ ഗാല്ലറിയിലെ അവളുടെ ചിത്രങ്ങൾ നോക്കി. അവളുടെ പ്രൈവസിയേ മാനിച്ചു അർജുൻ ഫോണിൽ നിന്നും മുഖം തിരിച്ചാണ് ഇരിക്കുന്നത്. അത് കൊണ്ട് ഫോണിൽ ഇഷാനി അവളുടെ ഫോട്ടോ ഓപ്പൺ ആക്കിയത് അർജുൻ കണ്ടില്ല.. കാണാൻ ശ്രമിച്ചില്ല… ഇഷാനി സ്ലൈഡ് ചെയ്തു നോക്കി. അവളുടെ ഒമ്പത് ഫോട്ടോസ് ആണ് ഫോണിൽ ഉള്ളത്. ചിലത് ബ്ലർ ആയിരുന്നു. ചിലതിൽ അവളുടെ മുഖം വ്യക്തമായി പതിഞ്ഞിട്ടുണ്ട്. ഇഷാനി ആ ഫോണിൽ തന്റെ നഗ്നത കാണിക്കുന്ന ചിത്രങ്ങളെ ഒരു നെടുവീർപ്പോടെ കണ്ടു. ദൈവം തന്നെ കൈവിട്ടിട്ടില്ല എന്ന് ഇഷാനിക്ക് ശരിക്കും തോന്നി തുടങ്ങി. കോളേജിൽ ചേർന്നപ്പോൾ മുതലുള്ള പല സംഭവങ്ങളും അവളിലെ ഈശ്വരവിശ്വാസത്തെ തളർത്താൻ പോന്നത് ആയിരുന്നു. എന്നാൽ ഇപ്പോൾ ഈ നിമിഷം അവൾ പ്രാർഥിക്കാറുള്ള സകല ദൈവങ്ങളും അവളുടെ പ്രാർഥന കേട്ടു എന്ന് അവൾക്ക് തോന്നി. ദൈവം വിളി കേട്ടത് ആറടി നീളവും നീണ്ട മുടിയും കട്ടതാടിയും ഒക്കെ ഉള്ള ഒരാളുടെ രൂപത്തിൽ ആയിരുന്നു എന്ന് മാത്രം. അഞ്ചടി പതിനൊന്നു ഇഞ്ചിൽ കുറച്ചു കുരുത്തക്കേടും തന്റെടവും ഒക്കെയുള്ള സാധാരണ മനുഷ്യൻ മാത്രം ആയിരുന്നു അവൾ ദൈവദൂതൻ ആയി കരുതിയ അർജുൻ.
ലക്ഷ്മിയുടെ ഫോണിലെ ആ ചിത്രങ്ങളിൽ രണ്ടാമതൊന്നു നോക്കാൻ ഇഷാനിക്ക് കഴിഞ്ഞില്ല. അത് കാണുമ്പോൾ താൻ അപ്പോൾ അനുഭവിച്ച ഭയം വീണ്ടും ഇഷാനിക്ക് തോന്നി. ആ ഒമ്പത് ഫോട്ടോകളും അപ്പോൾ തന്നെ ഇഷാനി ഡിലീറ്റ് ആക്കി. ഡിലീറ്റ് ആക്കിയ സൗണ്ട് കേട്ടാവണം അർജുൻ അകലേക്ക്‌ നോക്കിയിരുന്ന മുഖം അവളിലേക്ക് തിരിച്ചു.
‘കളഞ്ഞോ മുഴുവൻ..?
‘മ്മ്.. കളഞ്ഞു..’
ഇഷാനി ശരിക്കും സന്തോഷിക്കേണ്ട സന്ദർഭമാണ് ഇത്. പക്ഷെ ഇന്നലത്തെ സംഭവങ്ങൾ വീണ്ടും മനസിലൂടെ പോയതിനാൽ അവൾ ഒരല്പം സങ്കടത്തോടെ ആയിരുന്നു ഇരുന്നത്
‘ഇനി എന്തിനാണ് വിഷമം. എല്ലാം റെഡി ആയില്ലേ.. ഞാൻ ഇന്നലെ തന്നെ പറഞ്ഞില്ലേ എല്ലാത്തിനും പരിഹാരം ഉണ്ടെന്ന്…’
അർജുൻ അത് പറഞ്ഞപ്പോ അവളുടെ കണ്ണുകൾ അവനോടുള്ള നന്ദി കൊണ്ട് നിറഞ്ഞു. അവൻ ചെയ്തതിന് എങ്ങനെ തിരിച്ചു അവനോട് നന്ദി കാണിക്കണം എന്നറിയാതെ അവൾ ശരിക്കും വിഷണ്ണയായി.. ഒരു ഹഗ് ആയിരുന്നു ഏറ്റവും ഉചിതം. പക്ഷെ രണ്ട് പേരുടെയും മനസിൽ ഇത് വരെ പുറത്തിടാത്ത പലതും ഉള്ളത് കൊണ്ട് ഹഗ് ഉണ്ടായില്ല. നിറകണ്ണുകളോടെ ഇഷാനി അർജുനെ നോക്കി..
‘താങ്ക്സ്..!
അത്ര മാത്രമേ അവൾ പറഞ്ഞുള്ളു. പക്ഷെ ആ പറച്ചിലിൽ എല്ലാം ഉണ്ടായിരുന്നു. കുറച്ചു നേരം കൂടെ അങ്ങനെ ഇരുന്നാൽ അവൾ കരഞ്ഞു പോകുമെന്ന് അർജുന് തോന്നി
‘കഴിഞ്ഞെങ്കിൽ ആ ഫോൺ താ.. കുറച്ചു പരുപാടി ഉണ്ട്..’
‘ഇനി എന്ത് പരുപാടി ആണ്..?
ഇഷാനി സംശയത്തോടെ ചോദിച്ചു
‘ഡിലീറ്റ് ചെയ്താലും ആ പിക് ഒക്കെ വീണ്ടും എടുക്കാൻ പറ്റും. ഇനി ഇത് പെർമെനെന്റ് ആയി ഡിലീറ്റ് ചെയ്യണം. സത്യത്തിൽ അങ്ങനെ ചെയ്തിട്ട് ഫോൺ കൊണ്ട് വന്നാൽ മതിയായിരുന്നു. പക്ഷെ നിന്റെ കൈ കൊണ്ട് ഡിലീറ്റ് ആക്കിയാൽ നിനക്ക് ഒരു ആശ്വാസം കിട്ടുമെന്ന് തോന്നി. അതാണ് നേരെ ഇങ്ങ് കൊണ്ട് വന്നത്..’
‘ഇതെങ്ങനെ കിട്ടി. അതിതുവരെ പറഞ്ഞില്ലല്ലോ..’
‘അതൊക്കെ കിട്ടും. ഞാൻ ശരിക്കൊന്ന് ആഗ്രഹിച്ചാൽ എനിക്ക് കിട്ടാത്തതായി ഒന്നുമില്ല ഈ ലോകത്തിൽ..’
ഒരു സിനിമ ഡയലോഗ് പോലെയാണ് അർജുൻ അത് പറഞ്ഞത്. അതും ഇഷാനിയുടെ കണ്ണിൽ തന്നെ നോക്കി
‘പറ. എനിക്ക് ഇനി അതറിയാതെ ഉറക്കം വരില്ല..’
ഇഷാനി ഒരു കൊച്ചു കുട്ടിയെ പോലെ ഫോൺ കിട്ടിയ കഥ അറിയാൻ കെഞ്ചി
‘ഇന്നലെ ഫോട്ടോ പേടിച്ചു ഉറങ്ങിയില്ല. ഇന്ന് അത് ഞാൻ എങ്ങനെ ഒപ്പിച്ചു എന്നോർത്തു ഉറങ്ങുന്നില്ല. നിനക്ക് ഉറങ്ങാതെ അവസാനം വല്ലോ വട്ടും വരും..’
ഞാൻ തമാശക്ക് വെറുതെ പറഞ്ഞു
‘പ്ലീസ് പറ.. എങ്ങനെ ആണ് അവളുടെ ഫോൺ എടുത്തത്.. ആരെ കൊണ്ടാണ് എടുപ്പിച്ചെ.. പറ.. പറ.. ‘
അത് പറയാതെ ഇഷാനി എന്നെ വിടില്ല എന്ന് എനിക്ക് അറിയാമായിരുന്നു.
സത്യത്തിൽ ഇന്നലെ ഇഷാനിയെ പറഞ്ഞു വിട്ട് കഴിഞ്ഞു എന്ത് ചെയ്യണം എന്ന് എനിക്ക് യാതൊരു പിടിയും ഇല്ലായിരുന്നു. ലക്ഷ്മി കാറിലാണ് പോയിരിക്കുന്നത്. അത് ആരെ കൊണ്ടെങ്കിലും ബ്ലോക്ക് ചെയ്യിച്ചാൽ ഒരുപക്ഷെ ആ ഫോൺ കൈക്കലാക്കാം.. പക്ഷെ അതിനുള്ള സമയം ഒന്നും കിട്ടില്ല. പ്ലാൻ സെറ്റ് ആയി വരുന്നതിന് മുന്നേ അവൾ വീട്ടിൽ ചെല്ലും.
ആദ്യം എനിക്കറിയേണ്ടത് ഫോട്ടോ എടുത്തത് ആരൊക്കെ എന്നാണ്. ലക്ഷ്മി അല്ലാതെ മറ്റാരെങ്കിലും ഫോട്ടോ എടുത്തോ എന്ന് തനിക്കറിയില്ല എന്നാണ് ഇഷാനി പറഞ്ഞത്. തല്ക്കാലം ആ ഫോട്ടോകൾ ലക്ഷ്മിയുടെ കയ്യിൽ മാത്രം ഉള്ളു എന്ന് വിശ്വസിക്കുകയെ വഴി ഉള്ളു. അതിനി എടുക്കണം എങ്കിൽ ഒറ്റ വഴിയേ ഉള്ളു. അവളുടെ വീട്ടിൽ കയറണം. ഒരു പെണ്ണ് കേസിനു വേണ്ടി ഇത്രയും വലിയ റിസ്ക് എടുക്കണോ എന്ന ചോദ്യം എന്റെ മനസിലെ വന്നില്ല. കാരണം ഏതെങ്കിലും ഒരു പെണ്ണല്ലല്ലോ ഇഷാനി..!
ഞാൻ ആദ്യം ചെയ്തത് ലക്ഷ്മിയുടെ അതേ മോഡൽ ഫോൺ ഒരെണ്ണം ഒപ്പിക്കുകയാണ്. ലക്ഷ്മി ആയി സംസാരിക്കുമ്പോളും ഇഷാനി പറഞ്ഞ അറിവ് വച്ചുമൊക്കെ അതേത് മോഡൽ ആണെന്ന് ഞാൻ മനസിലാക്കി. അവളുടെ ഇൻസ്റ്റ നല്ലത് പോലെ ഒന്ന് പരതിയപ്പോൾ അവൾക്ക് രണ്ട് ഫോൺ നിലവിൽ ഉണ്ടെന്ന് മനസിലായി. പക്ഷെ ഇന്ന് ഫോട്ടോ എടുക്കാൻ ഉപയോഗിച്ച ഫോൺ ആണ് അവൾ ഏറ്റവും യൂസ് ചെയ്യുന്നത്. അതിന്റെ സെക്കന്റ്‌ ഹാൻഡ് കിട്ടാതെ വന്നപ്പോൾ പുത്തൻ മോഡൽ തന്നെ വാങ്ങിക്കേണ്ടി വന്നു. ഈ പ്ലാൻ റിസ്കി മാത്രം അല്ല കോസ്റ്റിലി കൂടി ആണ്.
അടുത്തത് ആയിരുന്നു ഏറ്റവും റിസ്ക് കൂടിയ ഭാഗം. മണ്ടത്തരം എന്നും പൊട്ടത്തരം എന്നും തോന്നാം. പക്ഷെ എന്റെ മനസിൽ ആകെ വന്ന ഐഡിയ അവളുടെ വീട്ടിൽ രാത്രി കയറുക എന്നതായിരുന്നു. സെക്യൂരിറ്റി ഉള്ള സിസിടിവി ഉള്ള അത്രയും വലിയ വീട്ടിൽ രാത്രി കള്ളനെ പോലെ ഒളിച്ചു കയറുക.. അതും ഒരു ഫോണിന് വേണ്ടി.. അതാണ് എന്റെ കൂർമബുദ്ധിയിൽ തോന്നിയ പ്ലാൻ.
എല്ലാവരും ഉറങ്ങി അർധരാത്രിയിൽ കയറുന്നത് ആണ് ഉചിതം. അത്രയും നേരം ഉറക്കം വരാതെ ഞാൻ മുറിയിൽ അങ്ങോട്ടും ഇങ്ങോട്ടും നടന്നു. ഇടക്ക് കുറച്ചു നേരം കൃഷ്ണയോട് ചാറ്റ് ചെയ്തു. അവൾക്ക് സംശയം തോന്നാത്ത രീതിയിൽ ഞാൻ ലക്ഷ്മിയെ പറ്റി ചോദിച്ചു. അങ്ങനെ ലക്ഷ്മി അവിടെ തന്നെ ഉണ്ടെന്ന് ഞാൻ ഉറപ്പാക്കി. അവിടെ ചെന്നിട്ട് അവൾ ഇനി അവിടില്ല എങ്കിൽ എല്ലാം വെറുതെ ആകുമല്ലോ.. അങ്ങനെ ഏകദേശം രണ്ട് മണി കഴിഞ്ഞു ഞാൻ വീട്ടിൽ നിന്നും ഇറങ്ങി. അവളുടെ വീടിന് കുറച്ചു മുന്നേ ഉള്ള വഴിയിൽ ഞാൻ ബൈക്ക് സൈഡ് ആക്കി. എന്നിട്ട് കയ്യിൽ കരുതിയ മുഖം മൂടി ഞാൻ മുഖത്തിട്ട്.. അത് കൊണ്ട് വലിയ പ്രയോജനം ഒന്നുമില്ല. ഞാൻ വന്ന വഴിയിൽ എല്ലാം സിസിടിവി ഉള്ള റെസിഡന്റ് ഏരിയ ഒക്കെ ആണ്. എന്റെ ബൈക്ക് വച്ചു ഞാൻ ആരെന്ന് കണ്ടു പിടിക്കാവുന്നതേ ഉള്ളു. എങ്കിലും മാസ്ക് ഇടുന്നതാണ് സേഫ് എന്ന് ഞാൻ കരുതി
