‘നിനക്ക് അവനായി പ്രശ്നം ഉണ്ടേൽ ആണുങ്ങളെ പോലെ മുഖത്ത് നോക്കി പറയണം.. അല്ലേൽ തല്ലി തീർക്കണം. നിന്റെ പ്രശ്നം അതല്ലല്ലോ.. ടീമിൽ ഇല്ലാത്തതിന്റെ ചൊരുക്ക് അല്ലെ നീ ഇപ്പോൾ ഇവനെ കളിക്കിടയിൽ ചവിട്ടി തീർത്തത്.. അതും ഞാനും ഫൈസിയും ഇല്ലാത്ത ദിവസം തന്നെ.. നിന്നെ കൊണ്ടു എന്നെങ്കിലും ഇവനായി ഒരു ഡ്യുവൽ ജയിക്കാൻ പറ്റിയിട്ടുണ്ടോ.. ഇന്ന് ഒരു രണ്ട് തവണ എങ്കിലും നീ അവന്റേന്ന് ബോൾ റിക്കവർ ചെയ്തു എടുത്താൽ ഞാൻ നിന്നെ പഴയ പൊസിഷനിൽ ഇറക്കാൻ പറയാം.. പക്ഷെ നിനക്കും അറിയാം അത് ഉണ്ടാക്കാൻ നിന്നെ കൊണ്ട് പറ്റില്ലെന്ന്..’
ഞാൻ മെല്ലെ അവന്റെ തോളിൽ കൈ വച്ചു. തോളിൽ ഇരുന്ന കയ്യിൽ രൂക്ഷമായി ഒന്ന് നോക്കിയെങ്കിലും അത് തട്ടി മാറ്റാൻ അവൻ ധൈര്യപ്പെട്ടില്ല.
‘ഇത് ഡാഡി കളി ഒന്നുമല്ല, പക്ഷെ ഇത് ഞാനും കൂടെ കളിക്കുന്ന ടീമാണ്. അതിൽ നീ മനഃപൂർവം പക പൊക്കാൻ ചവിട്ടും കുത്തുമൊക്ക തുടങ്ങിയാൽ ഉറപ്പായും നീ അടി വാങ്ങും.. അതിൽ ഒരു സംശയവുമില്ല..’
വാക്കേറ്റം പിന്നീട് നീണ്ടില്ല. രാഹുലും നിഖിലും കൈ കൊടുത്തു. ഞാൻ രാഹുലിന്റെ കാൽ ശരിക്കും പരിശോധിച്ചു. വമ്പൻ പണി കിട്ടാൻ ചാൻസുള്ള ടാക്കിൾ ആയിരുന്നു. ഭാഗ്യത്തിന് ഒന്നും പറ്റിയില്ല. ചെറിയ വേദനയെ ഉള്ളെന്നാണ് അവൻ പറഞ്ഞത്. രാഹുൽ പതിയെ എഴുന്നേറ്റ് കാൽ അനക്കി പ്രശ്നം ഒന്നുമില്ല എന്ന് കാണിച്ചു. അപ്പോളാണ് ഞാൻ ഇഷാനിയെ ശ്രദ്ധിക്കുന്നത്
ഗ്രൗണ്ടിന് നടുവിൽ ഒരു പ്രതിമ കണക്കെ സ്വന്തം ബാഗ് തോളിൽ ഇട്ടു എന്റെ ബാഗ് കയ്യിലും പിടിച്ചു അവൾ ഞങ്ങളെ നോക്കി നിൽക്കുകയാണ്. അവൾ ഗ്രൗണ്ടിന് പകുതി വരെ എത്തിയപ്പോൾ വഴക്ക് ഒക്കെ ഒരുമാതിരി കുറഞ്ഞിരിഞ്ഞു. അവിടെ തന്നെ നിൽപ്പാണ് കക്ഷി എന്നെയും നോക്കി. ഞാൻ മെല്ലെ അവളെ കയ്യുയർത്തി ഇങ്ങോട്ട് വരാൻ കാണിച്ചു. അത് കണ്ടതും അവൾ മുഖം വീർപ്പിച്ചു പെട്ടന്ന് വന്ന ദേഷ്യത്തിൽ “പോടാ” എന്ന് പറഞ്ഞു എന്റെ ബാഗ് നിലത്തേക്ക് എറിഞ്ഞിട്ട് തിരിഞ്ഞു നടന്നു.. ഞാൻ സത്യത്തിൽ അയ്യടാ എന്നായിപ്പോയി. ഒരു പിണക്കം ഒന്ന് കഴിഞ്ഞു സെറ്റായി വന്നതാണ്. കൃത്യമായി അടുത്തത് വന്നു ചാടി പിന്നെയും.. വേഗത്തിൽ നടന്നു പോയ അവൾക്ക് ഒപ്പമെത്താൻ ഞാൻ പിന്നാലെ മെല്ലെ ഓടി ബാഗും എടുത്തോണ്ട്.
‘അപ്പൊ റോക്കിക്ക് ഈ കോളേജിൽ ഒരാളെയെങ്കിലും പേടിയുണ്ട്..’
ടീമിൽ ഏതോ തെണ്ടി എന്റെ അവൾക്ക് പിന്നാലെ ഉള്ള ഓട്ടം കണ്ടു കമന്റ്‌ അടിച്ചു. ഗ്രൗണ്ട് മൊത്തം അതിന്റെ ബാക്കിയായി ചിരി പടർന്നു. ഞാൻ തിരിഞ്ഞു നോക്കിയില്ല.. നോക്കിയാൽ അവന്മാർ അളിയിച്ചു വിടും. ഞാൻ ഓടി അവളുടെ തൊട്ട് പിന്നിൽ എത്തി കയ്യിൽ പിടിച്ചെങ്കിലും അവൾ കൈ വിടുവിക്കാൻ കുതറി
‘നീ പോ.. നീ പോയി അടിയുണ്ടാക്ക്… ചെല്ല്.. വല്യ ഹീറോ അല്ലെ..’
‘ആര് അടിയുണ്ടാക്കി.. ഞാൻ പ്രശ്നം സോൾവ് ചെയ്തത് അല്ലെ…’
‘നീ എന്നെ അത്ര പൊട്ടി ആക്കല്ലേ. ഞാൻ കണ്ടതാ നീ വഴക്ക് ഉണ്ടാക്കുന്നത്..’
രണ്ട് പേരും അടിയാകാറായപ്പോൾ തള്ളി മാറ്റിയത് ആണ് ഇവൾ ഞാൻ അടി വച്ചെന്ന് പറയുന്നത്
‘എന്റെ പൊന്നോ… അത് അടിയുണ്ടാക്കിയതല്ല.. അത് അവരെ മാറ്റിയതാണ്..’
‘നീ എന്നോട് പറഞ്ഞതല്ലേ ഇനി വഴക്കിനു ഇടയിൽ ഒന്നും പോകില്ല എന്ന്..’
‘അത് മനഃപൂർവം അല്ലല്ലോ.. നീ കണ്ടതല്ലേ രാഹുലിനെ അവൻ ചവിട്ടിയത്..’
‘നിനക്ക് എപ്പോളും എന്തെങ്കിലും കാരണം ഉണ്ടാകുമല്ലോ..’
‘നീ ഇങ്ങനെ ഒക്കെ പറഞ്ഞാൽ ഞാൻ അതിന് ബാക്കി എന്ത് പറയാനാണ്..’
‘ഞാൻ ഒന്നും പറയുന്നില്ല.. അല്ലേലും ഞാൻ പറയുന്നത് ഒന്നും നീ ചെയ്യില്ലല്ലോ.. മീശ ഉള്ളതാണ് നല്ലതെന്ന് പറഞ്ഞപ്പോൾ അത് വടിച്ചോണ്ട് വന്നു പിറ്റേ ദിവസം., അടിയുണ്ടാക്കില്ല എന്ന് പറഞ്ഞിട്ട് എന്റെ മുന്നിൽ വച്ചു തന്നെ അടിക്കിടയിലേക്ക് ഓടി പോയി. ഞാൻ പറയുന്നതിന് ഒന്നും വില ഇല്ലല്ലോ.. ഇതൊക്കെ ഇഷ്ടപ്പെടാൻ വേറെ ആളുകൾ ഉണ്ടല്ലോ..’
ഇഷാനി ദേഷ്യത്തിൽ അല്ല സങ്കടത്തിന്റെ സ്വരത്തിൽ ആണ് ഇത്രയും പറഞ്ഞത്
‘ നീ ഒന്ന് നിക്ക്.. ഞാൻ ഒന്നു പറയട്ടെ… ഇപ്പോൾ നിന്നില്ലേൽ ഞാൻ ഇനി മിണ്ടാൻ വരില്ല..’
അത് കേട്ടപ്പോൾ ഇഷാനി സ്റ്റോപ്പ്‌ ആയി. ഞാൻ മെല്ലെ അവളുടെ അടുത്ത് ചെന്നു. മുഖത്ത് പരിഭവമാണ്..
‘രാഹുൽ എന്റെ കൂട്ടുകാരൻ അല്ലെ. അവനൊരു പ്രശ്നത്തിൽ പെടുമ്പോൾ കാര്യം എന്തെന്ന് പോലും നോക്കാതെ ഞാനും ചാടും. അതിനി നിനക്ക് വാക്ക് തന്നാൽ പോലും ഞാൻ ഇടപെടും.. നിന്നെ പോലെ തന്നെ അവനും എന്റെ ഫ്രണ്ട് ആണ്.. പിന്നെ മറ്റേ കാര്യം ഒന്നും ഞാൻ മനസ്സിൽ പോലും ചിന്തിക്കാത്ത കാര്യമാണ്.. ‘
അവൾ ഒന്നും മിണ്ടാതെ അത് കേട്ട് നിന്നു. അപ്പോളാണ് ലക്ഷ്മി ഞങ്ങൾ നിന്നടുത്തേക്ക് വരുന്നത്. ഇഷാനി എന്റെ ഒപ്പം ഉള്ളത് കൊണ്ട് ലക്ഷ്മി അടുത്തോട്ടു വന്നില്ല. കുറച്ചു മാറി എന്നെ നോക്കി നിന്നു. ഞാൻ അവളുടെ അടുത്തേക്ക് ചെന്നു
‘ഞങ്ങൾ ബ്രേക്കപ്പ് ആയി..’
മുഖവുര ഏതുമില്ലാതെ അവൾ പറഞ്ഞു. അവൾ പറഞ്ഞതിന് എന്ത് റെസ്പോണ്ട്സ് കൊടുക്കണം എന്നോർത്ത് എനിക്കൊരു പിടുത്തം കിട്ടിയില്ല
‘നന്നായി. ആ ചാപ്റ്റർ അവിടെ കഴിഞ്ഞല്ലോ..’
‘സത്യത്തിൽ തന്നോട് നന്ദി ഉണ്ട്. അവൻ കുറച്ചു നാളായി എന്നെ ചീറ്റ് ചെയ്യുവായിരുന്നു. തന്റെ ഹെല്പ് ഇല്ലായിരുന്നേൽ എനിക്ക് അത് ശരിക്കും അറിയാൻ പറ്റില്ലായിരുന്നു.. താങ്ക്സ്..’
‘നീ ഓക്കേ ആണോ..? കുറച്ചു ദിവസം കണ്ടില്ലായിരുന്നു കോളേജിലോട്ട്..’
‘ഇപ്പോൾ കുഴപ്പമൊന്നും ഇല്ല. ഞാൻ മൂവ് ഓൺ ആയി..’
മുഖത്തൊരു ചിരി വരുത്തി അത് പറഞ്ഞിട്ട് അവൾ പോയി. തിരിച്ചു ഞാൻ ഇഷാനിയുടെ അടുത്ത് ചെന്നപ്പോൾ അവൾ കാര്യം അറിയാതെ എന്നെ തന്നെ നോക്കി നിൽക്കുന്നുണ്ടായിരുന്നു..
‘അവൾ എന്തിനാ വന്നത്..?
ഇഷാനി എന്താണ് കാര്യം എന്നറിയാൻ എന്നോട് ചോദിച്ചു. കുറച്ചു മുമ്പേ നടന്ന വിഷയവും പിണക്കവും ഒന്നും ഇപ്പോൾ അവളുടെ മനസ്സിൽ ഉണ്ടെന്ന് തോന്നുന്നില്ല. അവൾക്കിപ്പോ ലക്ഷ്മി എന്താണ് എന്നോട് സംസാരിച്ചത് എന്നറിയണം.. ഞാൻ ചോദ്യം കേൾക്കാത്ത പോലെ മുന്നോട്ടു നടന്നു
‘ഞാൻ ചോദിച്ചത് നീ കേട്ടില്ലേ.. അവൾ എന്തിനാണ് വന്നതെന്ന്..?
‘അതോ.. അത് എന്നോട് ഒരു താങ്ക്സ് പറയാൻ..!
‘താങ്ക്സോ..? എന്തിന്..? നിന്നോട് എന്തിനാ അവൾ താങ്ക്സ് പറയുന്നെ..?
കാര്യം മനസിലാകാതെ കൺഫ്യൂഷൻ ആയി ഇഷാനി ചോദിച്ചു
‘ഞാൻ അവൾക്ക് ഒരു ഹെല്പ് ചെയ്തു കൊടുത്തു.. അതിന്..’
‘ഹെല്പ് ചെയ്താൽ ആണ് താങ്ക്സ് പറയുന്നത് എന്നെനിക്ക് അറിയാം. എന്ത് ഹെല്പ് ആണ് ചെയ്തത് എന്നാണ് ചോദിച്ചത്.. അത് പറയാൻ പറ്റുവാണേൽ പറ..’
