‘ഇനി ഈ ആഴ്ച്ച അടി വേണ്ട. എനിക്ക് ഒരു റസ്റ്റ് താ..’
ഞാൻ തമാശയ്ക്ക് പറഞ്ഞു. അവളത് കേട്ട് ചിരിച്ചു. എന്നാൽ പെട്ടന്ന് തന്നെ അവളുടെ മുഖം മാറി.. സെക്കന്റ്കൾക്ക് മുമ്പ് ഇല്ലാതായ വഴക്ക് വീണ്ടും ഞങ്ങൾക്കിടയിൽ ഉണ്ടായി. ഞങ്ങൾക്ക് അരികിലേക്ക് കൃഷ്ണ നടന്നു വന്നതായിരുന്നു ആ പെട്ടന്നുള്ള ദേഷ്യത്തിന് കാരണം. കൃഷ്ണ വന്നതല്ല, ഇഷാനി രാവിലേ കൊണ്ടു വന്ന ചുരിദാർ അപ്പോൾ ധരിച്ചു കൊണ്ടാണ് കൃഷ്ണ അങ്ങോട്ട് വന്നത്
‘നീ എന്തിനാ എന്റെ ചുരിദാർ എടുത്തു അവൾക്ക് കൊടുത്തേ…?
ഇഷാനി ദേഷ്യം കൊണ്ടു ചുവന്നു വരുന്ന
കണ്ണുകളോടെ എന്നോട് ചോദിച്ചു.
‘നീ വേണ്ടെന്ന് പറഞ്ഞു അവിടെ വച്ചിട്ട് പോയതല്ലേ.. അവൾക്ക് ചേരുന്നുണ്ട് എന്ന് പറഞ്ഞു അവൾ എടുത്തു..’
ഞാൻ നടന്ന കാര്യം പറഞ്ഞു
‘അവൾക്ക് കൊടുക്കാൻ ആണേൽ പിന്നെ എന്തിനാ നീ എനിക്ക് അത് വാങ്ങി തന്നത്..’
ഇഷാനിയുടെ മുഖം കണ്ടാൽ എന്നെ വെട്ടി കറി വയ്ക്കുന്ന ലക്ഷണം ആണ്. അത് പോലെ കലിപ്പ്..
‘എടി ഞാനല്ലല്ലോ അത് വാങ്ങിയതും അവൾക്ക് കൊടുത്തതും.. ഇതിലൊന്നും എനിക്കൊരു പങ്കുമില്ല..’
ഞാൻ എന്റെ നിസ്സഹായാവസ്ഥയോടെ അവളോട് പറഞ്ഞു. ഞാൻ വീണ്ടും കള്ളം പറയുവാണ് എന്ന് കരുതി ഇഷാനി ഇരുന്നിടത്ത് നിന്ന് എഴുന്നേറ്റ് കൂട്ടത്തിൽ എന്നെ ഒരു തള്ളും വച്ചു തന്നു.. ബാലൻസ് ഇല്ലാതെ ഇരിക്കുന്ന കാരണം ഞാൻ ചെറുതായ് പുറകിലേക്ക് മറിഞ്ഞു.
‘നീ പോ….. എന്നോട് മേലാൽ മിണ്ടാൻ വരണ്ട ഇനി..’
ഇഷാനി കൃഷ്ണയ്ക്ക് മുഖം കൊടുക്കാതെ നടന്നകന്നു. അപ്പോൾ അടുത്തെത്തിയതേ ഉള്ളത് കൊണ്ടു കൃഷ്ണ ഞങ്ങളുടെ സംസാരം ഒന്നും കേട്ടിരുന്നില്ല..
‘വഴക്ക് തീർന്നില്ലേ..?
‘അതിനി ഉടനെ തീരുമെന്ന് തോന്നുന്നില്ല..’
ഞാൻ അവളുടെ ചുരിദാർ നോക്കി പറഞ്ഞു.. പിങ്ക് നിറത്തിൽ ഫുൾ സ്ലീവുള്ള ചുറ്റും നെറ്റൊക്കെ ഉള്ള ഒരു നല്ല ചുരിദാർ.. ഇഷാനി ഇട്ടിരുന്നേൽ ബാർബി ഗേൾ പോലെ ഇരുന്നേനെ. കൃഷ്ണ ഇട്ടിട്ടും അടിപൊളി ആയിട്ടുണ്ട്. അവളുടെ ഹെയർ സ്റ്റൈൽ, മേക്കപ്പ് ഒന്ന് ശ്രദ്ധിച്ചാൽ ഈ ഡ്രസ്സ് മാച്ച് ആകും.
‘എനിക്കിത് ചേരുന്നുണ്ടോ..?
കൃഷ്ണ ഒരു മോഡലിനെ പോലെ എനിക്ക് പോസ് ചെയ്തു കൊണ്ടു ചോദിച്ചു
‘നല്ലപോലെ ചേരുന്നുണ്ട്. സത്യത്തിൽ ഞാൻ കരുതിയത് നിനക്ക് മോഡേൺ മാത്രമേ ചേരൂ എന്നാ.. മേക്കപ്പ് കൂടെ ഇല്ലായിരുന്നേൽ നിന്നെ കണ്ടാൽ ഒരു മിഡിൽ ക്ലാസ്സ് പെൺകൊച്ചു ആണെന്നെ പറയൂ.. ഇതെന്താ ഇപ്പോൾ പെട്ടന്ന് ഡ്രസ്സ് മാറിയേ..?
‘ചുമ്മാ ഇത് കണ്ടപ്പോൾ ഇടാൻ തോന്നി. അപ്പൊ തന്നെ ബാത്റൂമിൽ പോയി മാറി.. എനിക്ക് ഇതാണോ മോഡേൺ ആണോ ചേരുന്നത്..?
കൃഷ്ണ തിളങ്ങുന്ന കണ്ണുകളോടെ എന്നോട് ചോദിച്ചു
‘രണ്ടും ചേരുന്നുണ്ട്. ഏതാണ് കിടു എന്ന് പറയാൻ പറ്റുന്നില്ല..’
സത്യത്തിൽ അന്ന് ഞാൻ മോഡേൺ ആണ് കിടു എന്ന് പറഞ്ഞാൽ മതിയായിരുന്നു എന്ന് തോന്നി. അങ്ങനെ പറഞ്ഞിരുന്നേൽ കൃഷ്ണ പിന്നെ മോഡേൺ മാത്രമേ ധരിക്കുകയുള്ളായിരുന്നു.. ഇടയ്ക്ക് ഈ പിങ്ക് ചുരിദാർ ഇട്ടു വരുമ്പോൾ ഇഷാനി എന്നെ നോക്കി ദഹിപ്പിക്കുന്നതും ഇല്ലാതെ ആക്കാമായിരുന്നു….
ചുരിദാറിന്റെ പിന്നിലെ യഥാർത്ഥ രഹസ്യം പിടി കിട്ടിയില്ല എങ്കിലും ആ പിണക്കം കുറച്ചു പാടായിരുന്നു മാറ്റാൻ. പിണക്കത്തേക്കാൾ ഉപരി സങ്കടം ആയിരുന്നു അവൾക്കെന്ന് എനിക്ക് തോന്നി. എന്റെ കഷ്ടകാലത്തിന് കൃഷ്ണ തന്നെ അത് വലിച്ചു കേറ്റി അവളുടെ മുന്നിൽ വന്നു. അവൾക്ക് വേണ്ടി ഞാൻ വാങ്ങിച്ചത് ഞാൻ തന്നെ കൃഷ്ണയ്ക്ക് കൊടുത്തു എന്നാണ് ഇഷാനി വിശ്വസിച്ചത്.
‘എനിക്ക് തോന്നുന്നത് നിന്റെ വീടിന്റെ ഓപ്പോസിറ്റ് ഉള്ള പയ്യന്നില്ലേ. അവനാകും നിനക്ക് ചുരിദാർ ഗിഫ്റ്റ് ആയി തന്നതെന്നാണ്.. അവൻ രാവിലെ പത്രത്തിൽ നോക്കിയപ്പോൾ നിന്റെ ഫോട്ടോ കണ്ടു.. പെട്ടന്ന് കടയിൽ പോയി ഒരു ഗിഫ്റ്റ് വാങ്ങി നിന്റെ വാതുക്കൽ വച്ചു..’