അവൾ ഒന്നും മിണ്ടാതെ അത് കേട്ട് നിന്നു. അപ്പോളാണ് ലക്ഷ്മി ഞങ്ങൾ നിന്നടുത്തേക്ക് വരുന്നത്. ഇഷാനി എന്റെ ഒപ്പം ഉള്ളത് കൊണ്ട് ലക്ഷ്മി അടുത്തോട്ടു വന്നില്ല. കുറച്ചു മാറി എന്നെ നോക്കി നിന്നു. ഞാൻ അവളുടെ അടുത്തേക്ക് ചെന്നു
‘ഞങ്ങൾ ബ്രേക്കപ്പ് ആയി..’
മുഖവുര ഏതുമില്ലാതെ അവൾ പറഞ്ഞു. അവൾ പറഞ്ഞതിന് എന്ത് റെസ്പോണ്ട്സ് കൊടുക്കണം എന്നോർത്ത് എനിക്കൊരു പിടുത്തം കിട്ടിയില്ല
‘നന്നായി. ആ ചാപ്റ്റർ അവിടെ കഴിഞ്ഞല്ലോ..’
‘സത്യത്തിൽ തന്നോട് നന്ദി ഉണ്ട്. അവൻ കുറച്ചു നാളായി എന്നെ ചീറ്റ് ചെയ്യുവായിരുന്നു. തന്റെ ഹെല്പ് ഇല്ലായിരുന്നേൽ എനിക്ക് അത് ശരിക്കും അറിയാൻ പറ്റില്ലായിരുന്നു.. താങ്ക്സ്..’
‘നീ ഓക്കേ ആണോ..? കുറച്ചു ദിവസം കണ്ടില്ലായിരുന്നു കോളേജിലോട്ട്..’
‘ഇപ്പോൾ കുഴപ്പമൊന്നും ഇല്ല. ഞാൻ മൂവ് ഓൺ ആയി..’
മുഖത്തൊരു ചിരി വരുത്തി അത് പറഞ്ഞിട്ട് അവൾ പോയി. തിരിച്ചു ഞാൻ ഇഷാനിയുടെ അടുത്ത് ചെന്നപ്പോൾ അവൾ കാര്യം അറിയാതെ എന്നെ തന്നെ നോക്കി നിൽക്കുന്നുണ്ടായിരുന്നു..
‘അവൾ എന്തിനാ വന്നത്..?
ഇഷാനി എന്താണ് കാര്യം എന്നറിയാൻ എന്നോട് ചോദിച്ചു. കുറച്ചു മുമ്പേ നടന്ന വിഷയവും പിണക്കവും ഒന്നും ഇപ്പോൾ അവളുടെ മനസ്സിൽ ഉണ്ടെന്ന് തോന്നുന്നില്ല. അവൾക്കിപ്പോ ലക്ഷ്മി എന്താണ് എന്നോട് സംസാരിച്ചത് എന്നറിയണം.. ഞാൻ ചോദ്യം കേൾക്കാത്ത പോലെ മുന്നോട്ടു നടന്നു
‘ഞാൻ ചോദിച്ചത് നീ കേട്ടില്ലേ.. അവൾ എന്തിനാണ് വന്നതെന്ന്..?
‘അതോ.. അത് എന്നോട് ഒരു താങ്ക്സ് പറയാൻ..!
‘താങ്ക്സോ..? എന്തിന്..? നിന്നോട് എന്തിനാ അവൾ താങ്ക്സ് പറയുന്നെ..?
കാര്യം മനസിലാകാതെ കൺഫ്യൂഷൻ ആയി ഇഷാനി ചോദിച്ചു
‘ഞാൻ അവൾക്ക് ഒരു ഹെല്പ് ചെയ്തു കൊടുത്തു.. അതിന്..’
‘ഹെല്പ് ചെയ്താൽ ആണ് താങ്ക്സ് പറയുന്നത് എന്നെനിക്ക് അറിയാം. എന്ത് ഹെല്പ് ആണ് ചെയ്തത് എന്നാണ് ചോദിച്ചത്.. അത് പറയാൻ പറ്റുവാണേൽ പറ..’
ഇഷാനിയുടെ സ്വരം വീണ്ടും പിണക്കത്തിലേക്ക് പോകുന്നത് ഞാൻ കണ്ടു..
‘ഞാൻ അവളുടെ കാമുകന്റെ അക്കൗണ്ട് ഒന്ന് ഹാക്ക് ചെയ്തു കൊടുത്തു. കാമുകൻ അല്ല, ഇപ്പോൾ എക്സ്..’
‘അതൊക്കെ എന്തിന്..?
‘അവൾക്ക് അവനെ എന്തോ സംശയം തോന്നിയിട്ട്. സംഭവം സത്യമായിരുന്നു. അവൻ അവളെ ചതിക്കുവായിരുന്നു. ഇപ്പോൾ അവർ ബ്രേക്കപ്പ് ആയി. അത് വന്നു എന്നോട് പറയുവായിരുന്നു…’
‘ഓ പ്രേമനൈരാശ്യം കൊണ്ടാണോ അവളുടെ മുഖം വല്ലാതെ ഇരുന്നത്.. ‘
‘അതേ.. എന്നാലും അവൻ ആ കൊച്ചിനെ ചതിക്കാൻ ഒക്കെ എങ്ങനെ മനസ്സ് വന്നോ..?
ഞാൻ ചുമ്മാ ഒന്ന് ഇട്ടു നോക്കി
‘പിന്നെ.. ഭയങ്കര പാവം അല്ലെ..’
ഇഷാനി അതിൽ ശരിക്കും കൊത്തി
‘സ്വഭാവം അലന്ന ആണേലും കാണാൻ കിടുവല്ലേ…’
‘ആ കുഴപ്പമില്ല..’
ഇഷാനി അത് അംഗീകരിക്കാത്ത മട്ടിൽ പറഞ്ഞു
‘കുഴപ്പമില്ലെന്നോ.. അവൾ കാണാൻ അടിപൊളി തന്നെയാണ്…’
‘എന്നാൽ അവളെ അങ്ങ് പോയി പ്രേമിക്ക്.. ഇപ്പോൾ അവൾക്ക് കാമുകനും ഇല്ലല്ലോ..’
ഇഷാനി എന്റെ മുഖത്ത് നോക്കാതെ പറഞ്ഞു..
‘വേണേൽ നോക്കാം.. നീ പറഞ്ഞ പോലെ ഇപ്പൊ മുട്ടിയാൽ സെറ്റ് ആകാനും ചാൻസ് ഉണ്ട്..’
ഞാനൊരു തമാശ പോലെ പറഞ്ഞതാണ് എങ്കിലും അത് പറഞ്ഞപ്പോ അവളെന്നെ ദഹിപ്പിക്കുന്ന പോലെ നോക്കി. അപ്പൊ ഇവൾക്ക് എന്തെങ്കിലും ഉള്ളിൽ ഉണ്ടെങ്കിൽ ഇപ്പൊ തന്നെ അത് പുറത്ത് ഇടീക്കണം..
‘അവളുടെ ഗ്ലാമറിനു ഞാൻ ചേരുമോ ഇഷാനി..?
‘അവൾക്ക് അതിന് എന്ത് ഗ്ലാമർ ഉണ്ടെന്നാണ് ഈ പറയുന്നത്..?
ഇഷാനിയുടെ ഒരിക്കലും കണ്ടിട്ടില്ലാത്ത കുശുമ്പിന്റെ മുഖം ഞാനിപ്പോൾ കണ്ടു.
‘ അവൾക്കോ..? ഈ കോളേജിൽ അവളുടെ അത്രയും ലുക്ക് ഉള്ള വേറെ കൊച്ചുണ്ടോ..? സത്യം പറയാല്ലോ അവളുടെ ലുക്കും ഷേപ്പും ഒന്നും ഇപ്പോളത്തെ മലയാളം സിനിമ നടിമാർക്ക് പോലുമില്ല..’