‘റോക്കിയും എത്തി.. ഇനി ഇപ്പൊ നല്ല അടി കാണാം..’
ഇഷാനിക്ക് അരികിൽ നിന്ന് കൃഷ്ണ ആവേശത്തോടെ പറഞ്ഞു. ഇഷാനിയെ പോലെ അടിയോട് താല്പര്യമില്ലാത്ത ആളൊന്നുമല്ല കൃഷ്ണ. അത്തരം ഹീറോയിസം ഒക്കെ ആസ്വദിക്കുന്ന ആളാണ് അവൾ.. റോക്കി ആ വഴക്കിനു ഇടയിൽ കയറിയപ്പോൾ കൃഷ്ണ ആഞ്ഞൊരു വിസിൽ അടിച്ചു.. ഇവൾ എന്തൊരു സാധനം ആണെന്ന് ഇഷാനി മനസിൽ ഓർത്തു.. എന്നാൽ കൃഷ്ണയുടെ ആഗ്രഹം പോലെ അടി പൊട്ടിയില്ല. അർജുൻ അവർക്കിടയിൽ നിന്ന് പ്രശ്നം പറഞ്ഞു തീർക്കുകയാണ്.. അത് കണ്ടു കൃഷ്ണ കൈ വിരൽ വായിൽ വച്ചു കടിച്ചു.
‘നീ എന്താ ഈ കാണിക്കുന്നേ..?
അവളുടെ വിരൽ കടി കണ്ടു ക്രിസ്റ്റി ചോദിച്ചു
‘ഇങ്ങനെ ചെയ്താൽ അടി ഉണ്ടാകുമെന്ന് ലച്ചു പറഞ്ഞിട്ടുണ്ട്.. ഞാൻ ഒന്ന് ട്രൈ ചെയ്തു നോക്കിയതാ..’
അത് കേട്ടതും ഇഷാനിക്ക് ദേഷ്യം കൂടി. ഒരു വഴക്ക് പറഞ്ഞു തീർക്കാൻ ശ്രമിക്കുമ്പോൾ അവിടെ പിന്നെയും അടി ഉണ്ടാക്കാൻ ആഗ്രഹിക്കുന്നോ.. പെട്ടന്ന് വന്ന ദേഷ്യത്തിൽ ഇഷാനി കൃഷ്ണയുടെ കൈ പിടിച്ചു താഴ്ത്തി.. കൃഷ്ണ പെട്ടന്ന് അന്തം വിട്ടു നിന്നു. താൻ ലിമിറ്റ് വിട്ടു പെരുമാറിയത് മനസിലാക്കി ഇഷാനി ഒരു സോറി പറഞ്ഞു പെട്ടന്ന് അവിടെ നിന്നും ഓടിപ്പോയി.. അവൾക്ക് പെട്ടന്ന് എന്താ പറ്റിയത് എന്നോർത്ത് കൃഷ്ണ വണ്ടർ അടിച്ചു. കൃഷ്ണക്ക് പകരം ലക്ഷ്മി ആയിരുന്നു അവിടയെങ്കിൽ തന്നെ രണ്ടാം നിലയിൽ നിന്നും എടുത്തു താഴെ ഇട്ടേനെ എന്ന് ഇഷാനി ഓർത്തു..
അന്ന് ആ വഴക്കിന്റെ ഇടയിൽ പെട്ട് പോയത് കൊണ്ട് ഇഷാനിയോട് ഒന്ന് മിണ്ടാൻ പോലും പറ്റിയില്ല. വഴക്ക് സത്യത്തിൽ ഫുട്ബോൾ ടീമിലെ സ്ഥാനത്തെ ചൊല്ലി ആണ്. രാഹുൽ നന്നായി കളിക്കുന്നത് ചൂണ്ടി കാട്ടി അവനെ ഞാൻ ടീമിൽ സ്ഥിരം ആക്കിയപ്പോൾ സ്ഥാനം പോയ നിഖിൽ ആണ് വഴക്കിനു തുടക്കം ഇട്ടത്. പ്രത്യക്ഷത്തിൽ വിഷയം അതല്ല എങ്കിലും എനിക്കറിയാമായിരുന്നു അവന് രാഹുലിനോട് ചൊരുക്ക് വരാൻ അതാണ് കാരണമെന്ന്. അന്ന് തന്നെ ഇനി ഒരു പ്രശ്നം ഉണ്ടാകില്ല എന്ന് പറഞ്ഞു തീർത്തു
അടുത്ത ദിവസം അവളോട് മിണ്ടണം എന്ന് മനസ്സിൽ കരുതി ഇരിക്കുമ്പോളാണ് അവൾ ഇങ്ങോട്ട് വന്നു മിണ്ടിയത്..
‘എന്നെ ഫൈസി ചേട്ടൻ റീന എന്ന് വിളിച്ചു കളിയാക്കി..’
അവൾ എന്നോട് വന്നു പരാതി പറഞ്ഞു
‘റീനയോ.. അതെന്തിനാ നിന്നെ അങ്ങനെ വിളിച്ചേ..?
‘ഞാൻ എപ്പോളും നിന്റെ കൂടെ നടക്കുന്ന കൊണ്ടാണ്.. റോക്കിയുടെ റീന എന്നൊക്കെ ആണ് പറഞ്ഞു കളിയാക്കിയേ..’
‘ഓ കെജിഎഫ് ലെ റീന.. അതിപ്പോ എന്താ റീന എന്നല്ലേ.. നാറീ എന്നൊന്നും അല്ലല്ലോ. നിന്റെ പഴയ കോണ്ടം എന്ന പേരിനെക്കാൾ എന്ത് കൊണ്ടും നല്ലതാണ്..’
ഞാൻ അവളുടെ പരാതിയെ വലിയ കാര്യമാക്കി എടുക്കാത്തത് പോലെ പറഞ്ഞു
‘എന്നാലും നമ്മളെ കുറിച്ച് ആവശ്യം ഇല്ലാത്തത് ഓരോന്ന് ഉണ്ടാക്കി പറയില്ലേ..?
അവൾ ചിറി കൊട്ടി എന്നോട് ചോദിച്ചു
‘പറയുന്നവർ പറയട്ടെ.. നമുക്കെന്താ.. പണ്ട് നിന്റെ ഇവിടെ പറഞ്ഞു നടക്കുന്ന കഥകളെ പറ്റി ഞാൻ ചോദിച്ചപ്പോൾ നീ ഇങ്ങനെ അല്ലെ പറഞ്ഞത്..’
അത് പറഞ്ഞപ്പോൾ ഇഷാനിക്ക് മറുപടി ഒന്നും ഇല്ലായിരുന്നു..
‘ഇന്ന് തല്ലുണ്ടാക്കാൻ പോയില്ലേ..?
ഒരു വിഷയം തീർന്നപ്പോൾ അവൾ അടുത്തത് എടുത്തിട്ടു..
‘ഞാൻ അതിന് എവിടെയും തല്ലുണ്ടാക്കാൻ ഒന്നും പോയില്ല.. ഇന്നലെ അത് പറഞ്ഞു തീർക്കാൻ ആണ് പോയത്..’
‘എന്തിനാ വഴക്കിനു ഇടയിൽ പോകുന്നത്..’
‘പിന്നെ രാഹുലിന് ഒരു പ്രശ്നം വരുമ്പോ ഞാൻ മാറി നിൽക്കണോ..?
പിന്നെ കുറച്ചു നേരം ഇഷാനി ഒന്നും മിണ്ടിയില്ല
‘അവനോട് ഇങ്ങനെ പ്രശ്നത്തിൽ ഒന്നും പോയി കേറരുത് എന്ന് പറയണം..’
അവൾ പറഞ്ഞു
‘അവനായിട്ട് പോയത് ഒന്നുമല്ല. ഇത് ഫുട്ബോൾ ടീമിനെ ചൊല്ലി ഉള്ള പ്രശ്നം ആണ്. അതിനി ഉണ്ടാകില്ല.. സോൾവ് ആക്കിയിട്ടുണ്ട്..’
അതോടെ അവളുടെ കള്ളപിണക്കം ഒക്കെ ഏതാണ്ട് മാറി..
പിറ്റേന്ന് ക്ലാസ്സ് ഇല്ലാഞ്ഞത് കൊണ്ട് വീട് ഒന്ന് വൃത്തി ആക്കാമെന്ന് കരുതി ഇരിക്കുമ്പോൾ ആയിരുന്നു നീതുവിന്റെ കോൾ വരുന്നത്. അത്യാവശ്യം ആയി ഒരിടം വരെ വരണമെന്ന്.. അവൾ പറഞ്ഞ ഒരിടം ബാർ ആയിരുന്നു. അവിടെ ചെന്നു ഒരു കൂപ്പയിൽ നോക്കിയപ്പോ എല്ലാ എണ്ണവും ഒന്ന് മിനുങ്ങി ഇരിപ്പുണ്ട്. കൃഷ്ണ ആണേൽ മിന്നാമിനുങ്ങായിയും.. ശരിക്കും ഫിറ്റായി..
‘റോക്കി വാ.. വാ.. ഇവിടെ ഇരിക്ക്..’
കൃഷ്ണ കുഴഞ്ഞ ശബ്ദത്തിൽ എന്നെ വിളിച്ചു.. അവളോട് സംസാരിക്കാതെ ഞാൻ നീതുവിനോട് ചോദിച്ചു..
‘എന്തുവാടി ഇത്..?
‘അവധി ആയത് കൊണ്ട് ഞങ്ങൾ ഒന്ന് കൂടാൻ വന്നതാ.. ഇവളുടെ നിർബന്ധം ആണ്. ഇതിപ്പോ ഇവൾക്ക് ഈ അവസ്ഥയിൽ വണ്ടി ഓടിച്ചു വീട്ടിൽ പോകാൻ പറ്റില്ല.. ഞങ്ങൾക്ക് ആർക്കും ഇവളുടെ കാർ ഓടിച്ചു പരിചയവും ഇല്ല.. ഇവളെ ഒന്ന് വീട് വരെ എത്തിക്കുവോ..?
‘ഒന്ന് പോയെടി മോളെ.. ഈ കോലത്തിൽ ഞാൻ ഇവളെ ഇവളുടെ വീട്ടിൽ എത്തിച്ചാൽ എനിക്ക് പെരുന്നാൾ ആയിരിക്കും..’
‘പേടിക്കണ്ട വീട്ടിൽ ആരുമില്ല.. അവരൊക്കെ നൈറ്റ് ആകും വരുമ്പോൾ.. അവളെ ഒന്ന് അവിടെ ഇറക്ക്.. വേറെ ആരെ വിളിക്കണം എന്ന് ഞങ്ങൾക്ക് അറിയില്ല..’
നീതു എന്നോട് അപേക്ഷയുടെ സ്വരത്തിൽ പറഞ്ഞു.. കൃഷ്ണ അതിനിടക്ക് എന്തൊക്കെയോ വിടുവായിത്തം പറയുന്നുണ്ട്.. അവൾക്ക് നടക്കാൻ വലിയ ബുദ്ധിമുട്ട് ഒന്നുമില്ലെങ്കിലും ഒരു ചാഞ്ചാട്ടം ഉണ്ട്. അത് കൊണ്ട് ഞാൻ മെല്ലെ അവളുടെ തോളിൽ പിടിച്ചു വെളിയിലേക്ക് ഇറങ്ങി.. കാറിന് അടുത്തെത്തുന്നതിന് മുമ്പാണ് എന്റെ മുന്നിൽ ഞങ്ങളുടെ ബന്ധുവും പാർട്ണറും ഒക്കെയായ ദേവരാജൻ അങ്കിൾ പ്രത്യക്ഷപ്പെടുന്നത്..
‘എന്ത് പറ്റിയെടാ.. ആരാ ഇത്..?
കൃഷ്ണയേ താങ്ങി പിടിച്ചു പരുങ്ങി നിൽക്കുന്ന എന്നെ കണ്ടു അങ്കിൾ ചോദിച്ചു
‘അത്.. എന്റെ ഒരു ഫ്രണ്ട് ആണ്.. കുറച്ചു അധികം കഴിച്ചപ്പോ ഒന്ന് ലിഫ്റ്റ് കൊടുക്കാൻ വന്നതാണ്.. വേറെ ഫ്രണ്ട്സും ഉണ്ട്.. ‘
ഞാൻ തിരിഞ്ഞു അവളുടെ കൂട്ടുകാരികളെ നോക്കിയപ്പോൾ ഒരുത്തിയെയും കാണുന്നില്ല. പിശാചുക്കൾ ഒക്കെ എവിടെ പോയി..?
‘വേറെ കുഴപ്പം ഒന്നുമില്ലല്ലോ..? വണ്ടി വല്ലോം വേണോ..?
എന്റെ പരുങ്ങൽ കണ്ടു വീണ്ടും അങ്കിൾ ചോദിച്ചു..
‘ഹേയ് വേറെ ഒരു പ്രശ്നവും ഇല്ല.. വണ്ടി ഉണ്ട്.. പിന്നെ.. ഇത്…’
ഞാൻ പറയാൻ ഒന്ന് മടിച്ചു
‘വീട്ടിൽ പറയല്ലെന്നു ആവും.. ഇല്ല.. ‘
അങ്കിൾ പൊട്ടിച്ചിരിച്ചു കൊണ്ട് പറഞ്ഞു.. ഭാഗ്യം പുള്ളി പറയില്ല എന്ന് പറഞ്ഞാൽ പറയില്ല.. കാര്യം എന്റെ തല്ലുകൂടി നടക്കുന്ന സ്വാഭാവമൊക്കെ കുടുംബത്തിൽ എല്ലാവർക്കും അറിയാമെങ്കിലും എന്റെ സ്ത്രീവിഷയസംബന്ധിയായ ഒന്നും കുടുംബത്തിൽ ആർക്കും അറിയില്ല. കൃഷ്ണയേ കാറിൽ കയറ്റിയപ്പോളാണ് അവളുടെ കൂട്ടുകാരികൾ എല്ലാം വന്നത്..