അന്നത്തെ ദിവസം മുഴുവൻ ഈ കേസ് കാരണം ബിസി ആയത് കൊണ്ട് ഇഷാനി ആയി മര്യാദക്ക് ഒന്ന് സംസാരിക്കാൻ കഴിഞ്ഞിരുന്നില്ല. ലാസ്റ്റ് പീരിയഡ് ഫ്രീ ആയിരുന്നത് കൊണ്ട് അവളെവിടെ കാണുമെന്ന് എനിക്കറിയാമായിരുന്നു. ഗ്രൗണ്ടിന് അടുത്തുള്ള വാകമരച്ചുവട്ടിൽ ഏതോ പുസ്തകം വായിച്ചു കൊണ്ടിരുന്ന അവളുടെ മുടിയിൽ വരുന്ന വഴി ഇറുത്ത ചെമ്പകം ചൂടിച്ചു. തലയിൽ നിന്ന് മെല്ലെ ചെമ്പകം എടുത്തു മണത്തു ഒരു ചെറുചിരിയോടെ അവളെന്നോട് ചോദിച്ചു..
‘എനിക്കാണോ..’
മറുപടി കൊടുക്കാതെ ആ നിമിഷം ഞാൻ എന്റെ ഫോണിന്റെ ക്യാമറയിൽ പകർത്തി. ക്യാമറയുടെ ഫോക്കസും ലൈറ്റിങ്ങും എല്ലാം ആ ഒറ്റ നിമിഷത്തിൽ തന്നെ വളരെ പെർഫെക്ട് ആയി ഒത്തുചേർന്നു. എന്റെ ഫോൺ ക്യാമറയിൽ ഇഷാനിയുടെ പുഞ്ചിരിക്കുന്ന ചിത്രം…!
‘എന്താ ഇപ്പൊ കാണിച്ചത്.. എന്തൊന്നിനാ ഫോട്ടോ എടുത്തത്..?
അവളെന്നോട് കൃത്രിമഗൗരവത്തിൽ ചോദിച്ചു
‘ഫ്രെയിം ചെയ്തു പൂജമുറിയിൽ വയ്ക്കാൻ ആണ്..’
‘അതെന്തിനാ പൂജമുറിയിൽ വയ്ക്കുന്നെ.. ഞാൻ ദൈവം ആണോ..?
‘പിന്നെ.. നീ അല്ലെ സൗന്ദര്യത്തിന്റെ ദേവത..’
‘അത് അഫ്‌രോഡൈറ്റി ആണ്.. ഞാനല്ല..’
സൗന്ദര്യത്തിന്റെ ഗ്രീക്ക് ദേവതയെ പറ്റിയാണ് അവൾ പറഞ്ഞത്
‘ എന്നോട് ചോദിക്കാതെ എടുത്തത് കൊണ്ട് ആ ഫോട്ടോ കളയണം.. ഇപ്പോൾ തന്നെ കളഞ്ഞേ..’
ഇഷാനി ചുമ്മാ എന്നോട് വഴക്ക് പിടിക്കാൻ ഇങ്ങനെ ഓരോന്ന് പറയും.
‘നിന്റെ തുണി ഇല്ലാത്തത് ഒന്നും അല്ലല്ലോ. പിന്നെ എന്നാ..’
ഞാനത് പറഞ്ഞപ്പോ ഇഷാനി കുറച്ചു നേരത്തേക്ക് ഒന്നും മിണ്ടിയില്ല. പിന്നെ പതിയെ സ്വരം താഴ്ത്തി എന്നോട് ചോദിച്ചു
‘ഞാനൊരു കാര്യം ചോദിച്ചാൽ ദേഷ്യപ്പെടുമോ..?
‘നീ ചോദിക്ക്..’
ബുദ്ധിമുട്ടി ആണെങ്കിലും അവൾ അവസാനം എന്നോട് അത് ചോദിച്ചു
‘അന്ന് ചേട്ടൻ ലക്ഷ്മിയുടെ ഫോൺ എടുത്തില്ലേ… അപ്പോൾ എന്റെ ഫോട്ടോ ഒക്കെ… ചേട്ടൻ കണ്ടിരുന്നോ…?
‘ആ കണ്ടിരുന്നു.. കാണാതെ പിന്നെ ഞാൻ ഇവിടേക്ക് കൊണ്ട് വരുമോ നിന്നെ കാണിക്കാൻ..’
അവളെന്താണ് ഉദ്ദേശിച്ചത് എന്ന് മനസിലായിട്ടും ഞാൻ ഭാവം മാറ്റാതെ വളരെ കൂളായി പറഞ്ഞു
‘മുഴുവൻ ഫോട്ടോയും കണ്ടോ..?
അവൾ ഒരു സങ്കടത്തോടെ ആണ് ചോദിച്ചത്
‘കണ്ടെടി… അതിൽ ആദ്യം തന്നെ വന്നത് നിന്റെ ഫോട്ടോസ് ആയിരുന്നു. ഞാൻ അപ്പോൾ എല്ലാം എടുത്തു നോക്കി..’
‘അയ്യേ…’
നാണം കൊണ്ടോ സങ്കടം കൊണ്ടോ ഇഷാനി കണ്ണ് പൊത്തി കുമ്പിട്ടിരുന്നു.
‘എന്തിനാ അയ്യേ.. ആ സാഹചര്യം അങ്ങനെ ആയത് കൊണ്ടല്ലേ.. വേറെ വഴി ഇല്ലല്ലോ..?
ഇഷാനി മറുപടി ഒന്നും പറഞ്ഞില്ല.. എന്റെ മുഖത്ത് നോക്കാതെ അവൾ എഴുന്നേറ്റ് പോകാൻ ഒരുങ്ങി
‘ആഹാ പോകുവാണോ..? ഇതാണ് ഇപ്പോൾ നന്നായെ.. നിനക്ക് ഹെല്പ് ചെയ്യാൻ വേണ്ടി കണ്ടവരുടെ വീട്ടിൽ ഒക്കെ രാത്രി കയറിയിട്ട് ഇപ്പോൾ ഞാൻ നിന്റെ എന്തോ കണ്ടത് ആണ് നിനക്ക് പ്രശ്നം അല്ലെ.. കൊള്ളാം..’
എന്റെ ആ പറച്ചിൽ ഇഷാനിക്ക് കൊണ്ടു.. അവൾ എനിക്ക് നേരെ തിരിഞ്ഞു നിന്ന്
‘ഞാൻ അങ്ങനെ അല്ല ഉദ്ദേശിച്ചത്….’
‘മതി, നിന്റെ ഉദ്ദേശം മനസിലായി. പൊക്കോ..’
ഞാനൊരു പുച്ഛഭാവത്തിൽ തല വെട്ടിച്ചിരുന്നു. ഇഷാനി എന്റെ അടുത്ത് വന്നു ഇരുന്നു
‘ഞാൻ എന്റെ ഒരു പൊട്ടബുദ്ധിയിൽ ചോദിച്ച അല്ലെ.. ഞാൻ ചേട്ടനെ ഒന്നും പറഞ്ഞില്ലല്ലോ മോശം..’
‘പിന്നെ നീ എന്തിനാ ഇപ്പോൾ ഇവിടുന്ന് എഴുന്നേറ്റ് പോയത്..?
ഞാൻ ചോദിച്ചു.. അവൾ ഒരു നാണത്തോടെ എന്റെ മുഖത്ത് നോക്കാതെ താഴേക്ക് നോക്കി പറഞ്ഞു
‘അതെനിക്ക് നാണം വന്നിട്ടാ.. ആർക്കായാലും നാണം തോന്നില്ലേ…’
എനിക്കവളുടെ നാണവും സംസാരവും കേട്ടപ്പോൾ ചെറുതായ് ചിരി വന്നു…
‘എന്നാൽ നാണിക്കണ്ട.. ഞാൻ വെറുതെ പറഞ്ഞതാ.. ഞാൻ നിന്റെ ഒന്നും കണ്ടിട്ടില്ല.. ആകെ കണ്ട ഒരെണ്ണത്തിൽ നിനക്ക് തുണി ഉണ്ടായിരുന്നു.. അതിൽ നിന്റെ മുഖം കണ്ടപ്പോൾ എനിക്ക് വിഷമം ആയി.. പിന്നെ ചെക്ക് ചെയ്യാൻ പോലും അത് കാണാൻ എനിക്ക് തോന്നിയില്ല..’
ഞാനത് പറഞ്ഞതും ഇഷാനി ഒരു ആരാധനയോടെ എന്നെ നോക്കി. പെട്ടന്ന് ദൂരെ ആരെയോ കണ്ടു അവളുടെ മുഖം മാറി. ഞാൻ തിരിഞ്ഞു നോക്കിയപ്പോൾ ലക്ഷ്മി ആണ്.. അവൾ ഒറ്റക്ക് ഗ്രൗണ്ടിന്റെ പടവിൽ വന്നു ഇരിക്കുകയാണ്. ഞങ്ങളെ അവൾ കണ്ടില്ല. അവളെ കണ്ടതാണ് ഇഷാനിയുടെ മുഖം മാറിയത്..
‘വാ നമുക്ക് പോകാം.. ആ സാധനം അവിടെ വന്നു ഇരിപ്പുണ്ട്..’
‘അവൾ അവിടെ ഇരുന്നാൽ നമുക്ക് എന്താ.. നിന്നെ ഒന്നും അവൾ ചെയ്യാൻ പോണില്ല. ഇവിടെ ഇരിക്ക്..’
എണീക്കാൻ തുടങ്ങിയ ഇഷാനിയെ ഞാൻ പിടിച്ചു ഇരുത്തി. ലക്ഷ്മിയെ ഒന്ന് അടിമുടി നോക്കിയിട്ട് എന്നോട് ചോദിച്ചു
‘ചേട്ടൻ അന്നവളെ തല്ലുകയോ വല്ലോം ചെയ്തോ..? അതിൽ പിന്നെ അവൾ എന്നെ കണ്ടാൽ മുഖത്ത് പോലും നോക്കില്ല. എപ്പോളും ഇതേ പോലെ എവിടെങ്കിലും തനിയെ വന്നു ഇരിക്കുന്ന കാണാം.. സത്യം പറ എന്താ ചെയ്തെ..’
‘തല്ലൊന്നും കൊടുത്തില്ല.. പക്ഷെ അതിലും കൂടിയ ഒരു ഡോസ് കൊടുത്തു..’
‘അതെന്താ.. എന്നോട് പറഞ്ഞില്ലല്ലോ എന്നിട്ട് ഇത്രയും ദിവസം ആയിട്ടും..’
അവൾ കാര്യം അറിയാനുള്ള ആകാംക്ഷയിൽ ചോദിച്ചു.
‘അതൊക്കെ ഉണ്ട്.. സീക്രെട് ആണ്..’
‘എന്നോട് പറയാൻ പറ്റാത്ത അത്രയും സീക്രെട് ഉണ്ടോ ഈ കാര്യത്തിൽ..?
‘നിന്നോട് പറഞ്ഞാൽ നീ എന്നോട് ദേഷ്യപ്പെടും..’
‘എനിക്ക് വേണ്ടി ഇത്രയും ചെയ്തിട്ട് ഞാൻ ചേട്ടനോട് ദേഷ്യപ്പെടുമെന്നോ.. സത്യം ആയും ഇല്ല.. പറ.. ‘
അവളുടെ നിർബന്ധത്തിന് മുന്നിൽ എനിക്ക് പറയേണ്ടി വന്നു..
‘നിന്റെ ഫോട്ടോ കണ്ടില്ലെങ്കിലും അവളുടെ ഫോണിൽ അവളുടെ കുറച്ചു ചിത്രങ്ങൾ ഞാൻ കണ്ടു..’
‘അവളുടെ എന്ത് ചിത്രങ്ങൾ…’
ഒരു പേടിയോടെ ഇഷാനി ചോദിച്ചു
‘നീ ഉദ്ദേശിച്ചത് തന്നെ. അവളുടെ കുറച്ചു ഹോട് പിക്സ്. പുറത്ത് വന്നാൽ നാണക്കേട് ആകുന്നത്.. അവളിനി നിന്നെ ബുദ്ധിമുട്ടിച്ചാൽ അതായിരിക്കും ഇവിടെ ബാന്നർ അടിക്കുന്നതെന്ന് ഞാൻ അവളോട് പറഞ്ഞു..’
അത് കേട്ടതും ഇഷാനിയുടെ മുഖത്ത് കുറച്ചു മുമ്പ് ഉണ്ടായിരുന്ന ആരാധന അപ്രത്യക്ഷമായി.. അവൾക്ക് ഇത് അംഗീകരിക്കാൻ പറ്റില്ല എന്ന് എനിക്ക് അറിയാമായിരുന്നു. പക്ഷെ അവളോട് എങ്കിലും ഇതെപ്പോളെങ്കിലും പറയണം എന്ന് എനിക്ക് തോന്നിയിരുന്നു..
‘അത് വേണ്ടായിരുന്നു..’
ഇഷാനി അത് പറയുമ്പോ വല്ലാതെ ആയിരുന്നു
‘ഞാൻ അത് ചെയ്തില്ലേൽ അവൾ ചിലപ്പോൾ ഞാൻ വീട്ടിൽ കയറിയത് ഒക്കെ വച്ചു കേസ് വല്ലോം കൊടുത്തേനെ..’
