ആരാണ് ആ ചുരിദാർ അവിടെ വച്ചതെന്ന എന്റെ സംശയം അപ്പോളും ആറിയിട്ടില്ല. ഇഷാനി പലപ്പോഴും അവളുടെ വീടിന് എതിർ വശം താമസിക്കുന്ന വീട്ടിലെ പയ്യൻ അവളെ വായ് നോക്കുന്നതും ട്യൂൺ ചെയ്യാൻ നോക്കുന്നതും ഒക്കെ പറഞ്ഞിട്ടുണ്ട്. അവളവനെ മൈൻഡ് ചെയ്യുക പോലും ഇല്ലായിരുന്നു. ഒരുപക്ഷെ അവനാകാം ചുരിദാർ ഗിഫ്റ്റ് ആയി വച്ചതെന്ന് എന്റെ മനസ് പറഞ്ഞു
‘എന്റെ അർജുൻ ഒന്ന് നിർത്തുവോ… എനിക്ക് ഇപ്പോൾ ചുരിദാർ എന്ന് കേൾക്കുന്ന പോലും ഇഷ്ടമല്ല.. ‘
കോളേജ് വിട്ടു കഴിഞ്ഞു തിരിച്ചു പോകുകയായിരുന്നു ഞങ്ങൾ. ബൈക്ക് പാർക്ക് ചെയ്തിരിക്കുന്ന തണലത്ത് ഞങ്ങളെത്തിയപ്പോൾ ഗ്രൗണ്ടിൽ പ്രാക്ടീസ് മാച്ച് നടക്കുന്നത് ദൂരെയായി കാണാം. ഇന്ന് ഒഴിവ് പറഞ്ഞു ഞാൻ പ്രാക്ടീസിൽ നിന്ന് മുങ്ങിയിരിക്കുകയാണ്. ഫൈസി ഉണ്ടെങ്കിൽ അത് നടക്കില്ല. ഭാഗ്യത്തിന് ഇന്ന് അവൻ ലീവുമാണ്. അപ്പൊ ഇന്ന് ഇഷാനി ആയി ചെറുതായ് ഒന്ന് കറങ്ങാം.. കറക്കം എന്ന് വച്ചാൽ അവളെ കോളേജിൽ നിന്ന് ബുക്ക് ഷോപ്പിൽ എത്തിക്കുന്നതാണ് എന്ന് മാത്രം. ഇടയ്ക്കു വല്ല ഐസ്ക്രീം കട കണ്ടാൽ അവിടെ ചവിട്ടുമെന്ന് മാത്രം..
‘എന്നാലും എനിക്ക് ആലോചിച്ചിട്ട് ഒരെത്തും പിടിയും കിട്ടുന്നില്ല.. പിന്നെ ആ സെയിം ചുരിദാർ ഞാൻ പല കടയിലും തിരക്കി.. കിട്ടിയില്ല..’
‘നിന്നോട് ഞാൻ ഒരുതവണ പറഞ്ഞു ആ കാര്യം ഇനി മിണ്ടരുത് എന്ന്.. ഇനി മിണ്ടിയാൽ ഞാൻ ബസ് പിടിച്ചു പോകും.. നിന്റെ കൂടെ വരില്ല..’
‘നിനക്ക് അത് സംസാരിക്കേണ്ട എങ്കിൽ വേണ്ട. പക്ഷെ അത് ഞാൻ അല്ല വച്ചതെന്ന് നീ ഇനിയെങ്കിലും അംഗീകരിക്കണം..’
‘ഓ സമ്മതിച്ചു.. നീയല്ല പോരേ…..’
ഞാൻ ഇത്രയും ആയിട്ടും സമ്മതിച്ചു കൊടുക്കാഞ്ഞപ്പോൾ അത് ചെയ്തത് ഞാനല്ല എന്ന് അവൾക്കും തോന്നി തുടങ്ങി. അതിന് ബാക്കിയായി അവളെന്തോ പറഞ്ഞത് ഞാൻ കേട്ടില്ല.. എന്റെ ശ്രദ്ധ പെട്ടന്നൊരു നിമിഷം ദൂരെ ഗ്രൗണ്ടിലേക്ക് എത്തി. ബോളുമായ് ഓടുന്ന രാഹുലിനെ ആരോ ചവിട്ടി താഴെ ഇട്ടു. വേദന കൊണ്ടു അവൻ ഗ്രൗണ്ടിൽ വീണു പുളയുകയാണ്.. സൂക്ഷിച്ചു നോക്കിയപ്പോൾ ചവിട്ടിയത് നിഖിൽ ആണെന്ന് മനസിലായി. നേരത്തത്തെ അടിയുടെ ബാക്കി ഇപ്പോൾ ഗ്രൗണ്ടിൽ പൊട്ടുമെന്ന് എനിക്ക് മനസിലായി. രാഹുൽ മെല്ലെ എഴുന്നേറ്റ് നിഖിലിന് അടുത്തേക്ക് ചെല്ലുന്നതും കൂടെ കളിക്കുന്നവർ എല്ലാം അവർക്ക് വട്ടം നിൽക്കുന്നതും ഞാൻ കണ്ടു. പെട്ടന്ന് ബാഗ് ഊരി ഇഷാനിയുടെ കയ്യിൽ വച്ചു കൊടുത്തിട്ട് ഞാൻ ഗ്രൗണ്ടിലേക്ക് ഓടി.
‘അർജുൻ വേണ്ട… അങ്ങോട്ട് പോവണ്ട..’
ഇഷാനി പിന്നിൽ നിന്ന് വിളിച്ചു പറഞ്ഞത് ഞാൻ ഗൗനിച്ചതെ ഇല്ല. എന്റെ പിന്നാലെ ബാഗും തൂക്കി അവളും ഓടി. ഞാൻ ഓടി അവർക്കിടയിൽ എത്തിയപ്പോൾ വാക്കേറ്റം വല്ലാതെ മൂത്തു കൈ വയ്ക്കുന്ന അവസ്ഥയിൽ എത്തിയിരുന്നു. രണ്ട് പേരും പരസ്പരം തള്ളി തുടങ്ങിയപ്പോൾ ഞാൻ ഇടയിൽ കയറി രണ്ട് പേരെയും മാറ്റി. നിഖിലിന്റെ നെഞ്ചിൽ തന്നെ രണ്ട് തള്ള് തള്ളി ഞാൻ അവനെ ദൂരേക്ക് മാറ്റി
‘നിന്നോട് ഞാൻ നേരത്തെ പറഞ്ഞതാ എന്തെങ്കിലും വിഷയം ഉണ്ടെങ്കിൽ അത് വിട്ടോളാൻ..’
‘റോക്കി, നീ ഇതിൽ ഇല്ല.. ‘
‘ഞാൻ ഏതിൽ ഉണ്ടെന്നും ഇല്ലെന്നും നീയാണോ തീരുമാനിക്കുന്നെ..?
‘നീ എല്ലാവരുടെയും ഡാഡി കളിക്കാതെ, ഞങ്ങൾ തമ്മിൽ പ്രശ്നം ഉണ്ടേൽ അത് ഞങ്ങൾ തമ്മിൽ തീർത്തോളാം..’
അവൻ എന്നെ ഇതിൽ നിന്നും ഒഴിവാക്കാൻ ശ്രമിക്കുകയാണ്. അവന്റെ വർത്താനം കേട്ട് ടെമ്പർ തെറ്റി വാടാ എന്ന് പറഞ്ഞു രാഹുൽ അവന്റെ നേർക്ക് അടുത്തു. ഞാൻ അവനെ തള്ളി മാറ്റി നിഖിലിൽ നിന്നും മാറ്റി നിർത്തി
‘നിനക്ക് അവനായി പ്രശ്നം ഉണ്ടേൽ ആണുങ്ങളെ പോലെ മുഖത്ത് നോക്കി പറയണം.. അല്ലേൽ തല്ലി തീർക്കണം. നിന്റെ പ്രശ്നം അതല്ലല്ലോ.. ടീമിൽ ഇല്ലാത്തതിന്റെ ചൊരുക്ക് അല്ലെ നീ ഇപ്പോൾ ഇവനെ കളിക്കിടയിൽ ചവിട്ടി തീർത്തത്.. അതും ഞാനും ഫൈസിയും ഇല്ലാത്ത ദിവസം തന്നെ.. നിന്നെ കൊണ്ടു എന്നെങ്കിലും ഇവനായി ഒരു ഡ്യുവൽ ജയിക്കാൻ പറ്റിയിട്ടുണ്ടോ.. ഇന്ന് ഒരു രണ്ട് തവണ എങ്കിലും നീ അവന്റേന്ന് ബോൾ റിക്കവർ ചെയ്തു എടുത്താൽ ഞാൻ നിന്നെ പഴയ പൊസിഷനിൽ ഇറക്കാൻ പറയാം.. പക്ഷെ നിനക്കും അറിയാം അത് ഉണ്ടാക്കാൻ നിന്നെ കൊണ്ട് പറ്റില്ലെന്ന്..’