‘നിന്റെ അങ്ങ് വീട്ടിൽ വേറെ ഫോട്ടോ ഇല്ലേ.. നീ വിഷമിക്കാതെ..?
ഞാൻ അവളെ സമാധാനിപ്പിച്ചു
‘അവിടെ ഉണ്ട്. പക്ഷെ ഇതെന്റെ കയ്യിൽ ഇരുന്നതാ. അത് കൊണ്ടോയി കളയുക എന്ന് വച്ചാൽ… ശോ…’
ഇഷാനി വിഷമം കൊണ്ട് തലയിൽ കൈ വച്ചു. അവളുടെ വിഷമം കണ്ടു അത് എനിക്ക് ശരിക്കും വിഷമവും കുറ്റബോധവും വന്നു. കാരണം അത് അടിച്ചു മാറ്റിയ ആൾ ഞാൻ ആണല്ലോ…!
രണ്ട് ദിവസം കഴിഞ്ഞു കടയിൽ പോകാൻ പോയ അവളെ ഞാൻ നിർബന്ധിച്ചു ഞാൻ ബീച്ചിൽ കൊണ്ട് പോയി.. കടയിൽ താമസിക്കും എന്ന് ഒരുപാട് പറഞ്ഞിട്ടും എന്റെ നിർബന്ധത്തിന് വഴങ്ങി ഒടുവിൽ അവൾ വന്നു.. ബീച്ചിൽ സാധാരണ കപ്പിൾസ് ചെയുന്നത് പോലെ ഒരു മൂലയിൽ പോയി കടലയും കൊറിച്ചു തിരകൾ എണ്ണാതെ വെറുതെ കടലിലേക്ക് നോക്കി ഇരുന്നു.
‘ടാ പാലക്കാട് ആണേലും കടൽ ഞാൻ കണ്ടിട്ടൊക്കെ ഉണ്ട്. നീ ഇപ്പോൾ ഈ സമയം ഇല്ലാത്ത സമയത്തു എന്നെ എന്തിനാ ഇങ്ങോട്ട് വിളിച്ചോണ്ട് വന്നത്..?
സഹികെട്ടു ഇഷാനി എന്നോട് ചോദിച്ചു
‘ഇത് നമ്മൾ ഇത് വരെ വരാത്ത സ്ഥലം ആണ്. അതാ ഇവിടെ വന്നത്..’
‘നീ എന്താ എന്റെ ടൂറിസ്റ്റ് ഗെയ്ഡ് ആണോ..? എനിക്ക് ദേഷ്യം വരുന്നുണ്ടേ..’
‘നിന്നോട് ഒരു കാര്യം പറയാൻ ആണ് ഞാൻ വന്നത്. അതിനീ ആഴക്കടൽ സാക്ഷി ആവണം..’
‘ഇതെന്ത് നാടക ഡയലോഗ് ഒക്കെ. നിനക്ക് എന്താ പറ്റിയെ..?
അവൾ എന്റെ പെരുമാറ്റത്തിൽ എന്തോ ആസ്വാഭാവികത കണ്ടു ചോദിച്ചു
‘ഞാനീ പറയുന്നത് നിനക്ക് വലിയ താല്പര്യം ഉള്ള കാര്യം ആവില്ല എന്നെനിക്കറിയാം.. പക്ഷെ ഇന്നിത് പറയാതെ ഇരിക്കാൻ എനിക്ക് കഴിയില്ല..’
‘എന്തുവാട..’
ഇഷാനി കാര്യം അറിയാതെ കണ്ണ് മിഴിച്ചു
‘ഞാനും ഇത് അങ്ങനെ അധികം പേരോട് ഒന്നും പറഞ്ഞിട്ടില്ല. സത്യത്തിൽ എനിക്കീ പരുപാടി ഇഷ്ടമേ അല്ലായിരുന്നു..’
‘നീ ഒന്ന് പറയുന്നുണ്ടോ എന്താണെന്ന്..’
ഞാനെന്താണ് പറയാൻ പോകുന്നത് എന്ന് ഓർത്ത് ഇഷാനിയുടെ കണ്ണുകൾ തുടിച്ചു
‘ഇഷാനി……’
ഞാൻ വളരെ മൃദുവായി അവളുടെ കയ്യിൽ പിടിച്ചു. അതിലും മൃദുവായി അവളുടെ പേര് വിളിച്ചു.. അവളുടെ ശരീരം ചെറുതായി വിറച്ചു..
‘മ്മ്….’
അവൾ ചെറുതായ് ഒന്ന് മൂളി. ഞാൻ എന്റെ മുഖം അവളോട് പതിയെ അടുപ്പിച്ചു. എന്നിട്ട് മെല്ലെ അവൾ മാത്രം കേൾക്കാൻ പാകത്തിൽ ഇങ്ങനെ പറഞ്ഞു..
‘ഹാപ്പി ബർത്തഡേ…!
‘ഏ…?
ഇഷാനി പെട്ടന്ന് വേറേതോ ലോകത്ത് നിന്ന് തിരിച്ചു വന്നു
‘ഹാപ്പി ബർത്ത്ഡേ…’
ഞാൻ കുറച്ചു ഉറക്കെ പറഞ്ഞു
‘അതിനാണോ പൊട്ടാ എന്നെ ഇവിടെ വരെ വിളിച്ചോണ്ട് വന്നത്.. അത് അവിടെ വച്ചു വിഷ് ചെയ്താൽ പോരായിരുന്നോ..?
‘അവിടെ വച്ചു വിഷ് ചെയ്താൽ എല്ലാവരും അറിയില്ലേ.. ഇത് നമ്മൾ രണ്ടും മാത്രം അല്ലേ അറിയൂ..
‘അത് നന്നായി. ചുമ്മാ വന്നു ഹാപ്പി ബർത്ത്ഡേ പറയുന്നത് എനിക്ക് വെറുപ്പാണ്.. ആട്ടെ ബർത്ത്ഡേ ആയിട്ട് നീ എനിക്ക് അഞ്ചു രൂപയുടെ കടല ആന്നോ വാങ്ങി തന്നത്. അർജുൻ അംബാനിക്കും സാമ്പത്തിക മാന്ദ്യം ആണോ..?
ഇഷാനി എന്നെ കളിയാക്കി ചോദിച്ചു
‘ഇപ്പോൾ ഇത് വച്ചു അഡ്ജസ്റ്റ് ചെയ്യടി..’
‘അപ്പോൾ വേറെ എന്തോ ഉണ്ട്.. നീ ചുമ്മ വിഷ് ചെയ്യാൻ എന്നെ ഇവിടെ കൊണ്ട് വരില്ല.. ഇനി ഗിഫ്റ്റ് വല്ലോം കയ്യിൽ ഉണ്ടോടാ..’
അവളെന്റെ പോക്കറ്റ് പരതി നോക്കി
‘നിന്റെ ബുദ്ധി സമ്മതിച്ചു തന്നിരിക്കുന്നു..’
ഞാൻ അവളോട് പറഞ്ഞു
‘അപ്പോൾ എന്തോ ഉണ്ട്.. ബാഗ് കാണിച്ചേ..’
അവൾ എന്റെ മടിയിൽ നിന്നും ബാഗ് എടുത്തു പരിശോദിച്ചു. അവളുടെ ഊഹം ശരിയായിരുന്നു. വർണ്ണക്കടലാസ്സിൽ പൊതിഞ്ഞ ഒരു ഗിഫ്റ്റ് അവൾക്ക് വേണ്ടി എന്റെ ബാഗിൽ ഉണ്ടായിരുന്നു
‘ഇതെന്താടാ ഫോട്ടോ വല്ലോം ആണോ..?
ഗിഫ്റ്റ് പേപ്പർ പൊട്ടിക്കുന്നതിന് ഇടയിൽ അവൾ ചോദിച്ചു. അത് മുഴുവൻ ആയി പൊട്ടിച്ചു മാറ്റിയപ്പോൾ അവളുടെ കണ്ണിൽ ആശ്ചര്യത്തിന്റെ ഒരു വസന്തം പൂക്കുന്നത് ഞാൻ കണ്ടു..