‘നീ ജിമ്മിൽ പോകാൻ തുടങ്ങിയ കാര്യം പോലും എന്നോട് പറഞ്ഞിട്ടില്ല ഇത് വരെ..’
കൃഷ്ണ പരാതി പോലെ പറഞ്ഞു
‘എന്റെ പൊന്നോ അതൊക്കെ എന്താടി ഇത്ര വലിയ വിശേഷം പറയാൻ.. ഞാൻ മനഃപൂർവം പറയാത്തത് പോലെ ആണല്ലോ നിന്റെ പറച്ചിൽ..’
‘ഞാനും ജിമ്മിൽ വരാൻ പോവാ ഇനി മുതൽ..’
കൃഷ്ണ അടുത്ത നമ്പർ ഇട്ടു.
‘നീ ആദ്യം എന്തെങ്കിലും കഴിച്ചു കുറച്ചു ശരീരത്തു പിടിപ്പിക്കു. അത് കഴിഞ്ഞു ജിമ്മിൽ പോകാം..’
അവളുടെ ഐഡിയ ഞാൻ നിരുത്സാഹപ്പെടുത്തി കൊടുത്തു
‘പപ്പി പിന്നെ വണ്ണം ഉണ്ടായിട്ടല്ലേ ജിമ്മിൽ പോകുന്നത്..’
കൃഷ്ണ പിന്നെയും കറങ്ങി തിരിഞ്ഞു ഓരോന്ന് പറഞ്ഞു കൊണ്ടിരുന്നു. അവളെ ജിമ്മിൽ നിന്നും പിന്തിരിപ്പിക്കാൻ ഞാൻ വിശപ്പ് എടുത്തിട്ടു. വിശക്കുന്നു എന്ന് പറഞ്ഞു ഞങ്ങൾ രണ്ടും ഫുഡ്‌ എടുത്തു ഒരു മേശയിൽ ഒറ്റയ്ക്ക് പോയിരുന്നു. ഇത്രയും നേരം ആയിട്ടും ഇവിടെ എങ്ങും എന്റെ ലച്ചുവിനെ കാണുന്നില്ലല്ലോ. അവൾ ഇനി ബിസി ആയിരിക്കുമോ..? കൃഷ്ണ അടുത്ത് നിന്നും മാറാതെ അവളെ ഒന്ന് വിളിക്കാൻ പറ്റില്ലല്ലോ. അവളെ പറ്റി മനസ്സിൽ ചിന്തിച്ചപ്പോൾ തന്നെ എന്റെ കണ്ണുകൾ അവളെ കണ്ടു പിടിച്ചു. കുറച്ചു മാറി ബന്ധുക്കളുടെ ഇടയിൽ നിന്ന് എന്നെ രൂക്ഷമായി നോക്കുകയാണ് ലക്ഷ്മി. ഇത്രയ്ക്കും രൂക്ഷമായി നോക്കാൻ ഞാൻ എന്ത് ചെയ്തു. ഞാൻ ചിക്കൻ കാൽ കടിച്ചു വലിച്ചു കൊണ്ട് ആലോചിച്ചു.
ലച്ചു കുറച്ചു ഏറെ നേരമായി ഞങ്ങളെ ശ്രദ്ധിക്കുന്നുണ്ടാകണം. കൃഷ്ണ ഞാനുമായി ഒരുപാട് അടുത്തിടപഴകിയത് അവൾക്ക് ഇഷ്ടം ആകുന്നുണ്ടാവില്ല. ഇന്നത്തെ ദിവസം അവളെക്കാൾ കൃഷ്ണയ്ക്ക് എന്നെ അടുത്ത് കിട്ടിയതും അച്ഛന്റെയും അമ്മയുടെയും ഒക്കെ മുന്നിൽ വച്ചു പരിചയപ്പെടുത്തിയതും ഒന്നും അവൾക്ക് ഇഷ്ടം ആയിട്ടുണ്ടാവില്ല.
എന്റെ ഊഹം ഏറെക്കുറെ ശരിയായിരുന്നു. ലച്ചു ശരിക്കും കുശുമ്പെടുത്തു തെറിച്ചു നിക്കുവാണ്. ഞാൻ അവളെ കണ്ടത് അവളും കണ്ടു. എന്റെ ചിരിക്ക് മറുപടി ആയി അവൾ ദഹിപ്പിക്കുന്ന കണക്കിന് ഒരു നോട്ടം നോക്കി. നീ എന്തിനാണ് എന്നോട് ചൂടാവുന്നെ ഞാൻ എന്ത് ചെയ്തു. ഈ കാര്യത്തിൽ തീർത്തും നിരപരാധിയായ ഞാൻ മറ്റൊരു നിരപരാധിയായ കോഴിയുടെ ഇറച്ചി എല്ലിൽ നിന്നും കടിച്ചു മാറ്റി. ഞങ്ങൾ ഭക്ഷണം കഴിച്ചു തീരാറായപ്പോൾ ആണ് ലച്ചു ഞങ്ങളുടെ അടുത്തേക്ക് പെട്ടന്ന് നടന്നടുക്കുന്നത് ഞാൻ കണ്ടത്. അവളുടെ മുഖം ആകെ മൂടി കെട്ടിയ പോലെ ഉണ്ടായിരുന്നു
‘കിച്ചു.. നിന്നെ സിന്ധു ആന്റി കുറെ നേരമായി തിരക്കുന്നു.. നീ എവിടെ ആയിരുന്നു..’
ലച്ചു വളരെ സീരിയസ് ശബ്ദത്തിൽ കൃഷ്ണയോട് ചോദിച്ചു
‘ആന്റിയുടെ ഫോൺ എന്റെ റൂമിൽ ചാർജ് ചെയ്യാൻ ഇട്ടിരിക്കുവായിരുന്നു. അതെടുക്കാൻ ആവും. ഞാൻ കീ തരാം.. നീയൊന്ന് എടുത്തു കൊടുക്കുമോ..?
എന്റെ അടുത്ത് നിന്നും പോകാനുള്ള മടി കൊണ്ട് കൃഷ്ണ ലച്ചുവിനോട് ചോദിച്ചു
‘എനിക്ക് നിന്ന് തിരിയാൻ സമയമില്ല.. നീ തന്നെ ചെല്ല്..’
മുഖം വീർപ്പിച്ചു ഇത്രയും പറഞ്ഞിട്ട് ലച്ചു തിരിച്ചു പോയി
‘എന്ത് സാധനം ആണോ.. ഒരു ഉപകാരം ചെയ്യില്ല..’
കൃഷ്ണ മുഷിപ്പോടെ ലച്ചുവിനെ കുറിച്ച് പറഞ്ഞു
‘അവൾക്കെന്ത് പറ്റി ഒരു ദേഷ്യം..?
ഞാൻ ചോദിച്ചു
‘ആ ഇടയ്ക്ക് ഉള്ളതാ ഓരോ മൂഡ് സ്വിങ്ങ്സ്.. ഞാൻ ഒന്ന് ആന്റിയുടെ അടുത്ത് വരെ പോയിട്ട് വരാം.. നീ പോവല്ലേ..’
ഫുഡ്‌ കഴിച്ചു കഴിഞ്ഞു എന്നെ അവിടെ നിർത്തി കൃഷ്ണ വീടിന് അകത്തേക്ക് കയറി പോയി. ഞാനവിടെ നിന്ന് വട്ടം തിരിയുന്നത് ലച്ചു കാണുന്നുണ്ടായിരുന്നു. അവൾ മെല്ലെ എന്റെ അടുത്തേക്ക് വന്നു
‘നീ എവിടെ ആയിരുന്നു. ഞാൻ വന്നിട്ട് കുറെ നേരമായി..’
ഞാൻ ഒരു കുശലം പോലെ അവളോട് പറഞ്ഞു
‘ഞാനിവിടെ ഉണ്ടായിരുന്നു. അവളുള്ളപ്പോൾ എനിക്ക് പിന്നെ അങ്ങോട്ട്‌ വരാൻ അനുവാദം ഇല്ലല്ലോ..’
അവളെന്തോ ഞാൻ അവളോട് എന്റെ അടുക്കൽ വരരുത് എന്ന് പറഞ്ഞത് പോലെയാണ് സംസാരിക്കുന്നത്. അത് കാര്യമാക്കാതെ ഞാൻ അവളോട് ഫുഡ്‌ കഴിച്ചോ എന്ന് ചോദിച്ചു
‘ഞാൻ കഴിച്ചില്ല.. നീ കഴിച്ചല്ലോ..’
അവിടെയും വീണ്ടും കുത്തി കുത്തി ആണ് അവൾ സംസാരിച്ചത്
‘അവൾ പിന്നെ നിർബന്ധിച്ചപ്പോൾ എനിക്ക് കഴിക്കാതെ ഇരിക്കാൻ പറ്റിയില്ല. നീ വാ നമുക്ക് വേണേൽ ഒന്നൂടെ ഇരിക്കാം. ഞാൻ കമ്പനി തരാം..’
‘വേണ്ട.. എനിക്ക് വിശക്കുന്നില്ല..’
ഞാൻ അവളെ ഒരുപാട് നിർബന്ധിച്ചിട്ടും അവൾ ഭക്ഷണം കഴിക്കാൻ കൂട്ടാക്കിയില്ല. ഞാൻ മെല്ലെ അവളുടെ കയ്യിൽ പിടിച്ചു. അവളിപ്പോളും മുഖം വീർപ്പിച്ചു നിൽക്കുകയാണ്. ഞാൻ അവളുടെ കൈ വിരലുകളിൽ ചെറുതായ് ഒന്ന് തലോടിയപ്പോൾ അവളൊന്ന് പുഞ്ചിരിച്ചു. ഞങ്ങൾ ആൾ കുറഞ്ഞ ഒരു മൂലയ്ക്ക് ആണ് നിന്നത് കൊണ്ട് ആരും ഇങ്ങോട്ട് ശ്രദ്ധിക്കാൻ ചാൻസ് ഇല്ല. അവൾ മെല്ലെ എന്റെ തോളിലേക്ക് ചാഞ്ഞു. പെട്ടന്നാണ് കാൽപെരുമാറ്റം കേട്ട് ഞാൻ തിരിഞ്ഞു നോക്കിയത്. പദ്മ..!
‘കിച്ചു എവിടെടി.. അമ്മ അവളെ തിരക്കുന്നുണ്ട്..?
ഞങ്ങളെ കണ്ട സംശയത്തിലും പദ്മ വന്ന കാര്യം ലച്ചുവിനോട് പറഞ്ഞു
‘ആ.. അവൾ സിന്ധു ആന്റി വിളിച്ചിട്ട് റൂമിലേക്ക് പോയി. ഇപ്പോൾ വരും..’
ലച്ചു പെട്ടന്ന് പറഞ്ഞു. പദ്മ പക്ഷെ ഇപ്പോളും ഞങ്ങളെ സംശയത്തോടെ നോക്കുകയാണ്. അത് മാറ്റാൻ ലച്ചു കേറി പറഞ്ഞു
‘ഇതെന്റെ ഫ്രണ്ട് ആണ്. അർജുൻ..’
ലച്ചു എന്റെ കൈ ചേർത്ത് പിടിച്ചു പറഞ്ഞു. ഞങ്ങൾ കൈകോർത്തു നിന്നത് പദ്മ എന്തായാലും കണ്ടതാണ്. അവളുടെ മുന്നിൽ വച്ചു ഒന്നൂടെ അങ്ങനെ പിടിച്ചാൽ സംശയം തോന്നേണ്ട കാര്യം ഇല്ലല്ലോ എന്ന് കരുതിയാണ് ലച്ചു അങ്ങനെ ചെയ്തത്. പദ്മ എന്നെ ഒന്ന് സൂക്ഷിച്ചു നോക്കി. എന്നിട്ട് മുഖത്തൊരു ചിരി വരുത്തിയിട്ട് തിരിഞ്ഞു നടന്നു
‘എന്ത് പണിയാടി കാണിച്ചെ.. എന്തിനാണ് നിന്റെ ഫ്രണ്ട് ആണെന്ന് പറഞ്ഞത്. ഞാൻ കൃഷ്ണയുടെ ഫ്രണ്ട് ആണെന്ന് ഇവൾക്ക് അറിയില്ലേ..?
‘ഓ.. അവൾ പറഞ്ഞുള്ള അറിവേ ഉള്ളു. ഇവൾക്ക് നിന്നെ കണ്ടാൽ ഒന്നും അറിയില്ലല്ലോ..’
ലച്ചു അത് വലിയ കാര്യം ആക്കാതെ പറഞ്ഞു
‘അര മണിക്കൂർ മുമ്പ് ഇതേ പോലെ കൃഷ്ണ എന്നെ അവളുടെ അടുത്ത് ചെന്നു ഫ്രണ്ട് ആണെന്ന് പറഞ്ഞു പരിചയപ്പെടുത്തിയതേ ഉള്ളു..’
ഞാൻ നിർജീവനോടെ അവളെ നോക്കി പറഞ്ഞു. ഊമ്പലിന്റെ ഉച്ചസ്‌ഥായിൽ ആണ് ഞാനിപ്പോൾ. ഇളയ രണ്ട് അനിയത്തിമാരെയും ഒരുമിച്ച് വളച്ചു നടക്കുന്ന ഒരുത്തൻ എന്നാണ് പദ്മ ഇപ്പോൾ എന്നെ കുറിച്ച് കരുതയിട്ടുണ്ടാവുക..
‘അങ്ങനെ ഒരു സംഭവം നടന്നോ.. ഞാൻ അറിഞ്ഞില്ലടാ..’
ലച്ചു പറഞ്ഞു
‘നിന്റെ ചേച്ചി എന്നെക്കുറിച്ച് എന്ത് കരുതിയിട്ടുണ്ടാകുമോ..? ഇനി ഇവൾ ഇത് കൃഷ്ണയോട് പറയുമോ..?
