“ശെരി നീ ഞങ്ങളെ ഒരുമിച്ച് ചേര്ത്തു തന്നെ വിളിക്കുകയോ പിടിക്കുകയോ ചെയ്തോ..!!” നിത്യ ടീച്ചർ എന്തോ അര്ത്ഥം വച്ച് പറയും പോലെ പറഞ്ഞിട്ട് ചിരിച്ചു. പെട്ടന്ന് ഗോള്ഡ മിസ്സ് നിത്യ ടീച്ചറെ തുറിച്ചു നോക്കിയെങ്കിലും മിസ്സിന്റെ മുഖം പെട്ടന്ന് കേറി ചുവന്നു തുടുത്തു.
നിത്യ ടീച്ചറും മിസ്സിനെ തന്നെ നോക്കിയിരുന്നു. അവരുടെ കണ്ണുകൾ തമ്മില് എന്തോ സീരിയസ്സായി രഹസ്യ സംഭാഷണം നടത്തുന്നത് പോലെയാണ് എനിക്ക് തോന്നിയത്.
“എന്റെ ചേച്ചീസേ,” ഞാൻ ചെറിയൊരു അസ്വസ്ഥതയോടെ പിന്നെയും വിളിച്ചു.
ഉടനെ അവർ രണ്ടുപേരും തലയാട്ടിക്കൊണ്ട് കണ്ണുകൾ തമ്മിലുള്ള രഹസ്യ സംഭാഷണങ്ങള് മതിയാക്കി എന്നെ നോക്കി.
“എപ്പോഴും നമ്മൾ സന്ദര്ശിച്ച സ്ഥലങ്ങളില് തന്നെ പിന്നെയും പിന്നെയും പോയാൽ എന്ത് ത്രില്ലാണുള്ളത്..?” ഞാൻ എന്റെ എതിർപ്പ് പ്രകടിപ്പിച്ചു,
“നീ പറഞ്ഞത് ശെരിയാണെന്ന് ഞങ്ങളും സമ്മതിക്കുന്നു, കണ്ണാ. പക്ഷേ ടൂർ എങ്ങോട്ട് പോകണമെന്ന നീ പറയുന്നത്..?” മിസ്സ് ചോദിച്ചിട്ട് ഉത്തരത്തിനായി എന്റെ കണ്ണില് തന്നെ നോക്കിയിരുന്നു.
“ശെരിയാ, നീ തന്നെ പറ. നീ നിന്റെ ചെറു പ്രായത്തിൽ തന്നെ നിന്റെ മുത്തച്ഛന്റെ കൂടെ ഇന്ത്യ മുഴുവനായി കറങ്ങി കഴിഞ്ഞു. പുറം രാജ്യങ്ങളിലും നീ ഇടക്കിടക്ക് പോയിട്ട് വരുന്നു. അപ്പൊ ഈ രണ്ട് ദിവസത്തിൽ നമുക്ക് എവിടെ പോയിട്ട്, പക്ഷേ നന്നായിട്ട് അടിച്ചുപൊളിച്ചിട്ട്, വരാൻ കഴിയുമെന്ന് നീതന്നെ പറ.” നിത്യ ടീച്ചർ അഭിപ്രായം ചോദിച്ചു.
“ശെരിയാണ്, ഞാൻ എന്റെ മുത്തച്ഛന്റെ കൂടെ ഇന്ത്യ മുഴുവനും കറങ്ങിയിട്ടുണ്ട്. ലോകത്ത് പല രാജ്യങ്ങളിലുള്ള വനപ്രദേശങ്ങളിലും പോയി കാട്ടുവാസികളോടൊപ്പം ആഴ്ചകളോളം താമസിച്ച് പലതും പഠിച്ചിട്ടുണ്ട്. മുത്തച്ഛന്റെ മരണ ശേഷവും ഞാൻ എന്റെ ജോലിയുടെ ഭാഗമായും, മറ്റ് ആവശ്യങ്ങള്ക്കായും കൂടെകൂടെ ഇന്ത്യ മുഴുവനും, മറ്റ് രാജ്യങ്ങളിലുമൊക്കെ കറങ്ങുന്നുമുണ്ട്. പക്ഷേ നിങ്ങൾ രണ്ടുപേരും നമ്മുടെ ഈ ഏരിയ ഒഴികെ അല്പ്പം ദൂരെയുള്ള ഏതെങ്കിലും ടൂറിസ്റ്റ് സ്ഥലങ്ങളില് പോലും പോയിട്ടില്ല. അതുകൊണ്ട് നമുക്കൊരു ലോങ് ട്രിപ്പ് തന്നെ പോണം. നിങ്ങളുടെ ലൈഫ് ഇങ്ങനെ ഈ വീടും, ഈ ഏരിയയും, പിന്നെ നിങ്ങളുടെ ആ കോളേജിലും മാത്രമായി ജീവിച്ചു തീര്ക്കാനുള്ളതല്ല.”
ഉടനെ രണ്ടുപേരും വിടര്ന്ന കണ്ണുകളോടെ എന്നെതന്നെ നോക്കിയിരുന്നു.
“എന്റെ കണ്ണാ, ഞങ്ങൾക്ക് ലോങ് ട്രിപ്പ് ആഗ്രഹമില്ലാഞ്ഞിട്ടല്ല, ഞങ്ങളുടെ സാഹചര്യവും സമയവുമായിരുന്നു ഞങ്ങളുടെ പ്രശ്നം. പക്ഷേ ശനി ഞായർ ഞങ്ങൾക്ക് ലീവാണെങ്കിലും നീ എപ്പോഴും ബിസിയായിരിക്കും. നീയല്ലാതെ ഞങ്ങൾ എങ്ങോട്ട് പോയാലും ഞങ്ങൾക്ക് ഒരു ഇന്ററസ്റ്റും ഉണ്ടാവില്ല, അതുകൊണ്ടല്ലേ ചാൻസ് കിട്ടുമ്പോ നമ്മുടെ സമയം അടിസ്ഥാനമാക്കി ഞങ്ങൾ എപ്പോഴും ചെറിയ ട്രിപ്പുകൾ മാത്രം പ്ലാൻ ചെയ്തിരുന്നത്.” മിസ്സ് കാരണം പറഞ്ഞു.
“ഓക്കെ, സമ്മതിച്ചു. ഇപ്പൊ നമുക്ക് രണ്ട് ഫുൾ ദിവസങ്ങളും പിന്നെ ഇന്നത്തെ പകുതി ദിവസവുമുണ്ടല്ലോ. ഇതുതന്നെ ധാരാളമാണ്. അതുകൊണ്ട് നമുക്കൊരു ലോങ് ട്രിപ്പ് തന്നെ പോയിട്ട് വരാം. എന്ത് പറയുന്നു.” രണ്ട് സൈഡും എന്റെ തല തിരിച്ചു തിരിച്ച് അവരെ മാറിമാറി നോക്കി ഞാൻ ചോദിച്ചു.
“എനിക്ക് ഓക്കെ.”
“എനിക്കും ഓക്കെ.”
പെട്ടന്നു തന്നെ ടീച്ചറും മിസ്സും ഭയങ്കര ഉത്സാഹത്തോടെ സമ്മതിച്ചു.
“ശെരി, ഇനി ചേച്ചീസ് തന്നെ എങ്ങോട്ട് പോകണമെന്ന് തീരുമാനിച്ചു പറഞ്ഞെ.” അവരുടെ ഇഷ്ടത്തിന് തീരുമാനിക്കാൻ ഞാൻ വിട്ടു കൊടുത്തു.
“എന്ന, നാളെ നമുക്ക് മൂന്നാർ പോകാം. ചെറുപ്പകാലം തൊട്ടേ മൂന്നാറിൽ പോകണമെന്ന് ആഗ്രഹിച്ചിരുന്നു.” നിത്യ ടീച്ചർ പെട്ടന്ന് ഉത്സാഹത്തോടെ പറഞ്ഞു.
“നമുക്ക് നാളെ ഊട്ടി കൊടൈക്കാനൽ പോകാം. അവിടെയൊക്കെ പോകണമെന്ന് ഞാൻ കുട്ടിക്കാലം തൊട്ടേ ആഗ്രഹിക്കുകയാണ്.” നിത്യ ടീച്ചർ പറഞ്ഞ അതേ സമയത്ത് തന്നെ ഗോള്ഡ മിസ്സും ഉത്സാഹത്തോടെ പറഞ്ഞു.