“ഓഹോ… അപ്പോ അച്ചാച്ചൻ അല്ല ഊട്ടി സൂചിപ്പിച്ചത് അല്ലെ..?” അവള് ചോദിച്ചു.
“ഇല്ല. അതെന്താ നീ അങ്ങനെ ചോദിച്ചത്..?” എന്റെ സംശയം ഞാൻ ചോദിച്ചു.
“അല്ലാ… ഊട്ടിയില് നിന്ന് നീലഗിരി വളരെ അടുത്താണല്ലോ.” അവൾ ചിരിച്ചുകൊണ്ട് പറഞ്ഞു.
“അതിന്..?”
“നീലഗിരി ഫോറസ്റ്റിലും അച്ചാച്ചൻ എപ്പോഴും പോകാറുണ്ടല്ലോ, ഇപ്പോഴും അച്ചാച്ചന് അവിടെ പോകേണ്ട ആവശ്യമുണ്ടെന്നറിയാം. അതുകൊണ്ട് എങ്ങനെയും അവിടെ പോകാനുള്ളത് കൊണ്ട് അച്ചാച്ചൻ ആയിരിക്കും ഐഡിയയിൽ ഊട്ടി സൂചിപ്പിച്ചെന്ന് ഞാൻ വിചാരിച്ചു. അങ്ങനെയാണെങ്കില് അവർക്ക് ടൂർ പോകുകയും ചെയ്യാം, പിന്നെ അച്ചാച്ചന് നീലഗിരി ഫോറസ്റ്റിൽ പോയി വേണ്ട സാധനങ്ങൾ ശേഖരിക്കാനും ചെയ്യാമല്ലോ.”
“അത് മോളെ… എന്തായാലും ഞങ്ങൾ അവിടെ പോകുന്ന സതിക്ക് ഞാൻ നീലഗിരി ഫോറസ്റ്റിൽ പോകാൻ തന്നെയ പ്ലാൻ ചെയ്തിരിക്കുന്നത്.” ഞാൻ ചെറിയ ചമ്മലോടെ പറഞ്ഞു. അപ്പൊ ജെസ്സി നിർത്താതെ കുറേനേരം നന്നായി ചിരിച്ചു.
“അതല്ലേ നോക്കിയത്,” ഒടുവില് ചിരി നിര്ത്തി അവൾ പറഞ്ഞു. “എന്റെ അച്ചാച്ചനെ എനിക്കറിയില്ലേ. പക്ഷേ അച്ചാച്ച, അവരുടെ ആ മൂന്ന് റൂൾസ് മറക്കല്ലേ. ടൂർ പോകുമ്പോ ജോലിയുമായി ബന്ധപ്പെട്ട ഒന്നും ചെയ്യാൻ പാടില്ല, മറക്കണ്ട.”
“ആ, അതൊക്കെ അപ്പൊ നോക്കാം.” ഞാനും ചിരിച്ചുകൊണ്ട് പറഞ്ഞു.
“ഞാൻ ഗോൾഡ മിസ്സിനെ വിളിച്ചു പറയുവേ.” ചിരിച്ചുകൊണ്ട് ജെസ്സി ഭീഷണിപ്പെടുത്തി.
“അയ്യോ മോളെ, അങ്ങനെ ഒന്നും ചെയ്യല്ലേ.” ഞാൻ വെപ്രാളം പിടിച്ചു പറഞ്ഞു.
“അങ്ങനെ ചെയ്യേണ്ടൈങ്കിൽ എന്റെ ഒരു ഡിമാന്റ് അച്ചാച്ചൻ അംഗീകരിക്കണം, ഇല്ലെങ്കിൽ ഞാൻ ഗോള്ഡ മിസ്സിനെ വിളിച്ചു പറയും. നിത്യ ടീച്ചറെയും വിളിച്ച് പറയും.”
“പുണ്യാളന്മാരേ….. ഡിമാന്റോ, എന്താണ് ആ ഡിമാന്റ്..?” ഞാൻ ചോദിച്ചു.
“അടുത്ത മാസം, മാർച്ച് 19 ആം തിയതി തൊട്ട് 28 വരെ നീണ്ടു നില്ക്കുന്ന ടെക് ഫെസ്റ്റ്, ഇന്ത്യയിൽ തന്നെ രണ്ടാം സ്ഥാനത്ത് നില്ക്കുന്ന ഡെല്ഹിയിലുള്ള JN യൂണിവേഴ്സിറ്റിയിൽ നടക്കാൻ പോകുവ. അവിടെ എല്ലാ യൂണിവേഴ്സിറ്റിയിൽ നിന്നും സ്റ്റുഡന്റ്സ് നടത്തുന്ന ടെക് എക്സിബിഷനും ഉണ്ടാവും. ഞങ്ങടെ യൂണിവേഴ്സിറ്റി സ്റ്റുഡന്റസും സെലക്റ്റായിട്ടുണ്ട്, അതിൽ ഞാനും ഉണ്ട്.”
“ഓക്കെ, അത് നല്ലത് തന്നെയ. പക്ഷേ എന്താ എന്റെ മോൾടെ ഡിമാന്റ്..?”
“അച്ചാച്ച, ഡെല്ഹിക്ക് പോകുന്ന ഓരോ സ്റ്റുഡന്റസിനും വേണമെങ്കിൽ അവരുടെ ഒരു ഫാമിലി മെമ്പറെ കൂടെ കൊണ്ടുപോകാം. ഇല്ലെങ്കില് ആ ഫാമിലി മെമ്പറിന്റെ കൂടെ ആ സ്റ്റുഡന്റ് ഡെല്ഹിക്ക് പോയാലും മതി. അതുകൊണ്ട് അച്ചാച്ചൻ തന്നെ എന്നെ ഡെല്ഹിക്ക് കൊണ്ടു പോയാൽ മതി. അവിടെ പോയിട്ട് തിരികെ വരുന്നത് വരെ അച്ചാച്ചൻ എന്റെ കൂടെ തന്നെ ഉണ്ടാവണം. അതാണ് എന്റെ ഡിമാന്റ്.”
ജെസ്സി പറഞ്ഞത് കേട്ട് ഞാൻ പൊട്ടിച്ചിരിച്ചു.
“എന്റെ ജെസ്സി മോളെ, ഇതിന് നീ എന്നെ ഭീഷണിപ്പെടുത്തേണ്ട കാര്യം പോലും ഇല്ലായിരുന്നല്ലോ. വെറുതെ പറഞ്ഞിരുന്നെങ്കിലേ ഞാൻ സമ്മതിക്കില്ലേ. നീ എന്തെങ്കിലും ആവശ്യപ്പെട്ടാൽ ഞാൻ സമ്മതിക്കാതെ ഇരുന്നിട്ടുണ്ടോ.. എന്തായാലും നിന്റെ ഒരു ഭീഷണി വെറുതെയങ്ങ് വേസ്റ്റായി പോയല്ലോ മോളെ. സാരമില്ല, വേറെ എന്തെങ്കിലും കാര്യത്തിൽ എന്നെ ഇതും പറഞ്ഞ് ഭീഷണിപ്പെടുത്തിയാൽ മതി.” ഞാൻ പിന്നെയും ചിരിച്ചു. അതുകേട്ട് ജെസ്സിയും പൊട്ടിച്ചിരിച്ചു.
“എന്റെ അച്ചാച്ച, ഞാൻ വെറുതെ പറഞ്ഞാൽ പോലും അച്ചാച്ചൻ വരുമെന്ന് എനിക്കും അറിയില്ലേ, പക്ഷേ എന്തെങ്കിലുമൊക്കെ കാരണം കിട്ടുമ്പോ അച്ചാച്ചനെ ഭീഷണിപ്പെടുത്താൻ ഒരു രസവ.” ജെസ്സി സ്നേഹത്തോടെ പറഞ്ഞിട്ട് പിന്നെയും ചിരിച്ചു. “അപ്പോ അച്ചാച്ച, ഡേറ്റ് മറന്ന് എന്തെങ്കിലും പ്ലാൻ ചെയ്തിട്ട് ഏതെങ്കിലും കാട്ടില് പോയി കിടന്നേക്കല്ലേ..!! ഞാൻ അച്ചാച്ചനെ കൊല്ലും.”