ആ മറുപടി സിനിയുടെ ഉള്ളിൽ ഒരു ചെറിയ തരംഗം ഉണ്ടാക്കി. ഒരു പ്രത്യേക സന്തോഷം അവൾ അറിയാതെ അവളുടെ മനസ്സിൽ നിറഞ്ഞു. തനിക്ക് ലഭിക്കുന്ന ആദരവിനേക്കാൾ, തന്റെ കൂടെയുള്ള ഒരാൾക്ക് ലഭിക്കുന്ന അംഗീകാരത്തിൽ അവൾക്ക് അഭിമാനം തോന്നി.
” മാം… കോൺഫറൻസ് കഴിഞ്ഞ് നമുക്ക് ഷെയ്ഖ് സായിദ് മോസ്ക് ഒന്ന് കണ്ടിട്ട് പോയാലോ…? ഞാൻ ഇതുവരെ അവിടെ പോയിട്ടില്ല… ” റൂബൻ അവളുടെ മുഖത്തേക്ക് നോക്കി ചോദിച്ചു.
” നോക്കാം റൂബൻ ബട്ട് നോട്ട് ഷുവർ… നമുക്ക് തിരികെ എത്തേണ്ടതാണ്. ” സിനി ഗൗരവത്തിൽ പറഞ്ഞു.
” സോറി മാം… ഇത്രയും ദൂരം വന്നിട്ട് അത് കാണാതെ പോകുന്നത് ശരിയല്ലല്ലോന്ന് ഓർത്തും പിന്നെ ഞാൻ ഫസ്റ്റ് ടൈമിന്റെ ഒരു എക്സൈറ്റ്മെന്റിലും പറഞ്ഞതാണ്… ഇറ്റ്സ് ഓക്കേ മാം… ” അവന്റെ മുഖം ചെറുതായി ഒന്നു വാടിയതു സിനി ശ്രദ്ധിച്ചു..
സിനി ഒടുവിൽ സമ്മതിച്ചു. അവൾക്ക് എന്തോ ഇന്ന് റൂബനെ വിഷമിപ്പിക്കാൻ തോന്നിയില്ല.
നാലു മണിക്കു ശേഷം തിരികെ പോകുമ്പോൾ അവർ മോസ്കിൽ കയറാൻ തീരുമാനിച്ചു.
മോസ്കിലെ ആ വെള്ള മാർബിൾ തറയിലൂടെ അവർ നടന്നു. സന്ധ്യാനേരത്തെ ആ വിളക്കുകൾ മോസ്കിനെ ഒരു സ്വർഗ്ഗം പോലെയാക്കിയിരുന്നു. റൂബന്റെ കണ്ണുകളിൽ ഒരു വിസ്മയം നിറഞ്ഞു.
മോസ്കിന്റെ ഗാംഭീര്യത്തിന് മുന്നിൽ നിൽക്കുമ്പോൾ റൂബൻ സിനിയുടെ അടുത്ത് വന്ന് നിന്നു.
” മാം, ഇന്ന് എനിക്ക് മാമിനെ കൂടുതൽ അടുത്തറിയാൻ കഴിഞ്ഞതുപോലെ തോന്നുന്നു. ഈ തിരക്കുകൾക്കിടയിലും മാമിനുള്ളിലെ ആ ഒരു ക്യൂരിയോസിറ്റി… അത് നിലനിർത്താൻ പറ്റുന്നത് വലിയ കാര്യമാണ്… ”
തിരികെ ദുബായിലേക്ക് ഡ്രൈവ് ചെയ്യുമ്പോൾ സിനി ചെറുതായി തളർന്നിരുന്നു…
റൂബൻ സീറ്റ് അല്പം പുറകിലേക്ക് ചരിച്ചു. ഇടയ്ക്ക് റെഡ് സിഗ്നലിൽ നിർത്തിയപ്പോൾ റൂബൻ പതുക്കെ ഹാന്റ് റെസ്റ്റിലിരുന്ന സിനിയുടെ കയ്യിൽ തന്റെ വിരലുകൾ കൊണ്ട് മെല്ലെ ഒന്ന് തൊട്ടു.
” മാം… യൂ ആർ വൺ ഇൻ എ മില്യൺ.” അവന്റെ ശബ്ദം വളരെ താഴ്ന്നതായിരുന്നു…
സിനി അവനെ നോക്കിയില്ല പക്ഷേ ആ സ്പർശനം അവൾ അറിഞ്ഞു. ഗ്ലൗസില്ലാത്ത ആ സ്പർശനത്തിന് ഒരു പ്രത്യേക ചൂടുണ്ടായിരുന്നു. അവൾ അത് മാറ്റാൻ ശ്രമിച്ചില്ല. പകരം ഒരു നേർത്ത പുഞ്ചിരിയോടെ അവൾ ആ നിമിഷം ആസ്വദിച്ചു.
രാത്രി വില്ലയിൽ എത്തിയപ്പോൾ ഫിലിപ്പ് സ്വീകരണമുറിയിലുണ്ടായിരുന്നു.
” എങ്ങനെയുണ്ടായിരുന്നു കോൺഫറൻസ്..? റൂബൻ എന്തെങ്കിലും പഠിച്ചോ…? ” ഫിലിപ്പ് ചോദിച്ചു.
” പഠിക്കുക മാത്രമല്ല ഫിലിപ്പ്, അവൻ അവിടുത്തെ താരം തന്നെയായിരുന്നു… “ സിനി വളരെ ആവേശത്തോടെ റൂബനെക്കുറിച്ച് പറഞ്ഞു. ഫിലിപ്പ് അത് കേട്ട് ഒന്ന് പുഞ്ചിരിച്ചു.
പക്ഷേ, തന്റെ മുറിയിലേക്ക് കയറിയപ്പോൾ സിനി കണ്ണാടിയിൽ നോക്കി സ്വയം ഒന്ന് ചിരിച്ചു. ഫിലിപ്പ് തന്റെ കരിയറിനെ അഭിനന്ദിക്കാറുണ്ട്, പക്ഷേ റൂബൻ നൽകിയ ആ ഒരു ‘സ്പെഷ്യൽ ഫീലിംഗ്’… അത് മറ്റൊന്നായിരുന്നു. സ്വർണ്ണക്കൂടിനുള്ളിലെ കിളി പതിയെ ചിറകടിച്ചു തുടങ്ങുകയായിരുന്നു…
…………………………………………………………………………
DUBAI AIRPORT TERMINAL – 3
ദുബായ് എയർപോർട്ടിലെ ടെർമിനൽ 3-ൽ നിന്ന് ഫെലിക്സിനെയും കൂട്ടി വില്ലയിലേക്ക് വരുമ്പോൾ സിനി വല്ലാതെ സന്തോഷവതിയായിരുന്നു. ഏകദേശം നാലഞ്ചു മാസത്തിന് ശേഷമാണ് മകൻ വരുന്നത്. ഫിലിപ്പ് പതിവ് തിരക്കുകൾ കാരണം എയർപോർട്ടിലേക്ക് വന്നിരുന്നില്ല.
വീട്ടിലെത്തി ഫെലിക്സ് തന്റെ ബാഗുകൾ ഒക്കെ ഒതുക്കി വെച്ച് ഡൈനിങ്ങ് ടേബിളിൽ സിനി ഉണ്ടാക്കിയ ലഘുഭക്ഷണം കഴിക്കാൻ ഇരുന്നു.
ഫിയ വന്നു ഫെലിക്സിനോട് വിശേഷങ്ങളൊക്കെ തിരക്കിയതിനു ശേഷം വീണ്ടും പഠിക്കുവാനായി തന്റെ മുറിയിലേക്ക് പോയി…
ഫെലിക്സ് തന്റെ കോളേജ് വിശേഷങ്ങൾ ഓരോന്നായി സിനിയോട് പറഞ്ഞു കൊണ്ടിരുന്നു…
സംസാരം പതിയെ മെഡിക്കൽ കോളേജിലെ കാര്യങ്ങളിലേക്ക് നീങ്ങി…
” അല്ല മോനേ… നിന്റെ കോളേജിലെ സീനിയർ ആയിരുന്ന റൂബൻ ഇപ്പോൾ എന്റെ കൂടെയാണ് വർക്ക് ചെയ്യുന്നത്. പപ്പ പറഞ്ഞിരുന്നു നിനക്ക് അവനെ നേരത്തെ അറിയാമെന്ന്… ” സിനി വളരെ കാഷ്വൽ ആയി ചോദിച്ചു.