” ദാ… വരുന്നു. നീ അവിടെ തന്നെ നിൽക്ക്… തിരക്കു കൂട്ടാതെടാ… ” സിനി ചിരിച്ചുകൊണ്ട് പറഞ്ഞു.
മാളിലെ ചെറിയ തിരക്കിനിടയിൽ റൂബനെ കണ്ടപ്പോൾ അവൾക്ക് വല്ലാത്തൊരു ആശ്വാസം തോന്നി. ജീൻസും ഒരു കറുത്ത ഷർട്ടും ധരിച്ച്, കൂളിംഗ് ഗ്ലാസ് വെച്ച് നിൽക്കുന്ന റൂബനെ കണ്ടാൽ ഒരു ഡോക്ടറാണെന്ന് പറയില്ല.
” നമുക്ക് ആദ്യം കുറച്ച് വിന്റർ കളക്ഷൻസ് നോക്കിയാലോ…? ലണ്ടനിൽ നല്ല തണുപ്പായിരിക്കും… ” റൂബൻ അവളുടെ അടുത്തേക്ക് നടന്നുകൊണ്ട് പറഞ്ഞു.
അവർ ഒരു വലിയ ബ്രാൻഡഡ് ഷോപ്പിലേക്ക് കയറി. ഓവർക്കോട്ടുകൾ നോക്കുന്നതിനിടയിൽ റൂബൻ ഒരു ലോങ്ങ് കോട്ട് എടുത്ത് സിനിയുടെ തോളിൽ വെച്ച് നോക്കി…
” ഇത് നിനക്ക് നന്നായി ചേരും സിനി. ഒരു ലൗലി ലുക്കുണ്ട്… നല്ല സ്റ്റൈലിഷും ആണ്… ”
സിനി കണ്ണാടിയിൽ നോക്കി ഒന്ന് കറങ്ങി.
” ഇത് കൊള്ളാം. പക്ഷേ റൂബൻ, നമ്മൾ ഇത്രയൊക്കെ ഷോപ്പിംഗ് നടത്തുന്നത് കണ്ടാൽ സംശയം തോന്നില്ലേ…? ഫിലിപ്പിനോട് ഞാൻ പറഞ്ഞത് വെറുതെ കുറച്ച് സാധനങ്ങൾ വാങ്ങാൻ പോകുന്നു എന്നാണ്… ”
റൂബൻ ചിരിച്ചുകൊണ്ട് ഒരു കോഫി ബ്രൗൺ ജാക്കറ്റ് എടുത്തു. ” സിനി, നമ്മൾ ഒരു ഒഫീഷ്യൽ ട്രെയിനിംഗിന് പോകുന്നതല്ലേ…? അപ്പോൾ ഷോപ്പിംഗ് നടത്തുന്നത് നോർമൽ ആണ്. നീ ഇങ്ങനെ പേടിക്കാതെ. പിന്നെ, അവിടെ പോയാൽ നമുക്ക് ഇതൊന്നും ഇടാൻ സമയം കിട്ടില്ല, ഫുൾ ടൈം ബിസി ആവില്ലേ…? ”
” അതെയോ? അതാണോ നീ പറഞ്ഞ ആ ‘സീക്രട്ട് ഹണിമൂൺ’…? ” സിനി കളിയാക്കി ചോദിച്ചു.
റൂബൻ അവളുടെ അടുത്തേക്ക് അല്പം നീങ്ങി നിന്ന് സ്വരം താഴ്ത്തി. ” ട്രെയിനിംഗ് കഴിഞ്ഞുള്ള വൈകുന്നേരങ്ങൾ… അത് നമുക്കുള്ളതല്ലേ…? നമുക്ക് ഹൈഡ് പാർക്കിലൂടെ ഒക്കെ വെറുതെ നടക്കാം. ആരും നമ്മളെ മൈൻഡ് ചെയ്യില്ല. ഇവിടെ ഈ മാളിൽ നിൽക്കുമ്പോൾ നമുക്ക് ഒന്ന് കൈ കോർത്ത് പിടിക്കാൻ പോലും പറ്റില്ല. പക്ഷേ അവിടെ… ”
സിനി ഒരു നിമിഷം ആലോചിച്ചു. ” മ്മ്മ്… എങ്കിലും ഫിലിപ്പിനോട് കള്ളം പറയുന്നത് ആലോചിക്കുമ്പോൾ… ”
” നമ്മൾ കള്ളം പറയുന്നില്ല സിനി, നമ്മൾ നമ്മുടെ ജീവിതം ജീവിക്കുന്നു. ഫിലിപ്പ് സർ ഹാപ്പിയാണ്, നമ്മളും ഹാപ്പിയാണ്. ദാ, ഈ ഡ്രസ്സ് ഒന്ന് ട്രയൽ ചെയ്തു നോക്ക്… ”
ട്രയൽ റൂമിന് മുന്നിൽ കാത്തുനിൽക്കുമ്പോൾ റൂബൻ തന്റെ ഫോണിൽ ലണ്ടനിലെ കുറച്ച് സ്ഥലങ്ങളുടെ ഫോട്ടോസ് നോക്കുകയായിരുന്നു. സിനി പുറത്തേക്ക് വന്നപ്പോൾ അവളുടെ ലുക്ക് കണ്ട് അവൻ ഒരു നിമിഷം നോക്കി നിന്നുപോയി…
” പെർഫെക്റ്റ്…! നീ ഇത് തന്നെ എടുത്തോ… ”
ഷോപ്പിംഗ് കഴിഞ്ഞ് അവർ ഫുഡ് കോർട്ടിൽ ഇരിക്കുമ്പോൾ സിനി പതുക്കെ ചോദിച്ചു, ” റൂബൻ, അബുദാബിയിലെ ഫ്ലാറ്റിന്റെ കാര്യം ഫിലിപ്പ് ഗൗരവമായി എടുത്തിരിക്കുകയാണ്. അടുത്ത ഏതേലും ദിവസം തന്നെ പോയി നോക്കാം എന്നാണ് പറയുന്നത്… ”
റൂബൻ അവളുടെ കൈയ്യിൽ മെല്ലെ തൊട്ടു.
” അതു നല്ലതല്ലേ…? നമുക്ക് കൂടുതൽ പ്രൈവസിയുള്ള ഒരിടം. നീ ഒന്നിനും ടെൻഷൻ അടിക്കണ്ട. എല്ലാം പ്ലാൻ ചെയ്ത പോലെ നടക്കും. വെറുതേ ഓരോന്ന് ആലോചിച്ച് ഇപ്പോഴത്തെ ഈ സന്തോഷം കളയാതെ… ”
ഷോപ്പിംഗ് ബാഗുകളുമായി കാറിലേക്ക് നടക്കുമ്പോൾ, ലണ്ടനിലെ മഞ്ഞുവീണ തെരുവുകളും അബുദാബിയിലെ പുതിയ ജീവിതവും അവർക്കിടയിൽ മനോഹരമായ ഒരു സ്വപ്നമായി വിരിഞ്ഞു തുടങ്ങിയിരുന്നു. എങ്കിലും, ആ സന്തോഷത്തിന്റെ നിഴലിൽ എവിടെയോ ഒരു ഭയം സിനിയെ പിൻതുടരുന്നുണ്ടായിരുന്നു…
ദുബായ് എയർപോർട്ടിലെ തിരക്കിലേക്ക് കാർ വന്നുനിൽക്കുമ്പോൾ സിനിയുടെ ഉള്ളിൽ ഒരുതരം കിടുക്കിടപ്പായിരുന്നു. ഡെന്യം ജീൻസും ഒരു വൈറ്റ് ടീഷർട്ടും അതിനുപുറമെ ഒരു നേവി ബ്ലൂ ബ്ലേസറുമായിരുന്നു അവളുടെ വേഷം. സാധാരണ സാരിയിലോ ഫോർമൽ കുർത്തയിലോ കാണാറുള്ള ഡോക്ടർ സിനിയിൽ നിന്നും തികച്ചും വ്യത്യസ്തയായ ഒരു പെൺകുട്ടി. റൂബനും ഒട്ടും പിന്നിലായിരുന്നില്ല; ഡെനിമും ലെയർ ചെയ്ത ടീഷർട്ടും ഒക്കെയായി അവൻ വല്ലാതെ സ്മാർട്ടായി തോന്നി.
ഫിലിപ്പ് തന്നെയാണ് അവരെ എയർപോർട്ടിൽ ഡ്രോപ്പ് ചെയ്തത്…