“ജംഷീ… നിൻ്റെ കയ്യൊന്ന് നീട്ടെടാ”
ജംഷീർ കൈപ്പത്തി തുടകൾക്ക് മേലേ നിവർത്തി വെച്ചു. ഞാൻ എൻ്റെ കൈപ്പത്തി ജുമൈലത്തിനെ കാണിച്ചു.
“ഇത് കണ്ടോ… ഞങ്ങളെ വിരലിന് വളവും തിരിവും ഒക്കെണ്ട്. തൊടുമ്പോ എല്ലുന്തി നിൽക്കുന്ന പോലെയാ. കാണാൻ അത്രക്ക് സുഖല്ലാത്ത ബെൻ്റ് ആൻഡ് നോട്ടി ഫിംഗേർസ്. ഉള്ളിലാകെ തഴമ്പും. ആൻഡ് യുവർ ഹാൻഡ്സ്. ഇറ്റ്സ് സോ പെർഫെക്റ്റ്. ഈ ലോങ്ങ് കോണിക് ഫിംഗേർസ്. ഇളം ചുവപ്പ് നിറമുള്ള നഖങ്ങൾ. സ്വർണ മോതിരം ഉണ്ടാവുന്നതാ അതിന് ഭംഗി”
“അത്രക്ക് ഇഷ്ടായോ”?
“ലോങ്ങ് പോയിൻ്റഡ് ഫിംഗേർസ് എനിക്ക് ഭയങ്കര ഇഷ്ടാ. പ്രത്യേകിച്ചും ചൂണ്ട് വിരല്. ഇറ്റ് സേയ്സ് സോ മച്ച് എബൗട്ട് ദ പേർസൺ. പിന്നെ ആണെങ്കില്… ഞങ്ങളൊക്കെ റൊമാൻ്റിക്സുകളാ… എനിതിങ് ബ്യൂട്ടിഫുൾ ഈസ് അഡ്മൈയറബ്ൾ എന്നല്ലേ. അല്ലെങ്കിൽ വേണ്ട. എവരിതിങ് ഈസ് ബ്യൂട്ടിഫുൾ”
“ഞാനിപ്പോ വരാം”
ജുമൈലത് പടികൾ കയറി പോയി. ഞാൻ ജംഷീറിൻ്റെ അടുത്തായി ഇരുന്നു. ജംഷീർ തയ്ക്വോണ്ട മത്സരത്തിന് ഇന്തോനേഷ്യയിൽ പോവാനിരിക്കുകയാണ്.
“എന്തായി കാര്യങ്ങള്”?
“മടുത്തു കണ്ണാ. ഇത് വല്യ പാടാ. സാധാരണ പോലെ പോരാ. കോമ്പറ്റീഷനായി പ്രാക്ടീസ് ചെയ്യണം. വേറേം കൊറേ മാമൂലാള്ണ്ട്. പന്തീരങ്കാവിക്ക് ദിവസവും ഒരു മണിക്കൂറ് അങ്ങട്ടും ഒരു മണിക്കൂറ് ഇങ്ങട്ടും. ഇപ്പോ അന്നേത്ത പോലെ ഒരു ഇതില്ല. കോമ്പറ്റീഷനോടുള്ള ക്രേസ് പോയി. ഇപ്രാവശ്യം കൂടെ പോയിട്ട് നിർത്തിയാലോന്ന് കരുതീട്ടാ”
“ആസ് യു ലൈക്. നിനക്കിപ്പോ അത് ഒരു ഹാബിറ്റായി. പണ്ട് ഇഷ്ടള്ളതോണ്ടേന്നു പോയേന്നത്. അല്ലേ? അണ്ടർ ഫോർട്ടീനില് തുടങ്ങിയതല്ലേ? കൊല്ലോം കൊല്ലോം പോയി ഇപ്പോ ഓട്ടോമാറ്റിക്കായി ആ സമയായാ പോവാൻ തോന്നും. ഇൻട്രസ്റ്റ് ഇല്ലാഞ്ഞിട്ടും അങ്ങട്ട് പോയാല് അവിടെ മത്സരം തുടങ്ങുമ്പോ ഒക്കെ റെഡിയാവൂന്ന് വിചാരിച്ചിട്ടല്ലേ” ?
“അതെന്നെ. ഞാൻ പ്രാക്റ്റീസ് ചെയ്യുമ്പോ ഇപ്പോ പഴയ ആ ഒരു മൂഡില്ല. ന്നാലും പിന്നേം ഫോഴ്സ് ചെയ്ത് ചെയ്യും. അന്നൊക്കെ എത്ര നേരം വേണേലും ചെയ്യായിരുന്നു. ഇപ്പോ മടിയല്ല. ഒരു.. ഒരു… എന്താപ്പോ പറയാ…അങ്ങനെ അങ്ങട്ട് തോന്നണില്ല. അപ്പോ ഞാൻ കരുതി അവടെ ചെന്നാ ഒക്കെ മാറൂന്ന്”
“കുറേ വർഷം പോയതോണ്ട് ആ അറ്റാച്ച്മെൻ്റ് പോയിട്ടുണ്ടാകും. ആ ഒരു പുതുമയൊന്നും ഇപ്പോ ഇല്ലല്ലോ. ചെയ്യാൻ തോന്നാത്തത് വെറുതേ ഫോഴ്സ് ചെയ്യണ്ട. ഇഷ്ടമുള്ളത് ആണെങ്കില് ഒന്നും ഇല്ലാതെ തന്നെ എത്ര നേരം വേണേലും ചെയ്യാലോ. അതാ പറഞ്ഞത്. കാലം മാറുമ്പോ പഴയതിൻ്റെ സ്ഥാനത്ത് പുതിയത് വരും. നീ നിനക്ക് ഇഷ്ടമുള്ളത് മാത്രം ചെയ്താൽ മതി.. അൺലെസ്”
“അൺലെസ്” ?
ജംഷി എന്നെ ഉറ്റു നോക്കി.
“അൺലെസ്… ഇൻടാഞ്ചിബിൾ ഷാക്ക്ൾസ്… ഇൻവിസിബ്ൾ ബോണ്ടേജ്…കയറില്ലാതെ കെട്ടുന്ന ഒരവസ്ഥയുണ്ട്. അത്. റെസ്പോൺസിബിലിറ്റീസ് തല മണ്ടേല് ആവുമ്പോ…അപ്പോ പറ്റാത്തതും ചെയ്യേണ്ടി വരും. ഇപ്പോ നിനക്ക് അങ്ങനെത്തെ ബുദ്ധിമുട്ടൊന്നും ഇല്ലല്ലോ. സോ”
“മ്യൂസിക്കിനോടാ ഇപ്പോ. വയലിൻ പഠിച്ചാലോന്ന്”
ഞാൻ അവനെ ചൂഴ്ന്ന് നോക്കി.
“എന്താടാ” ?
“നിൻ്റെ ഈ മാറ്റം. ഇതെനിക്ക് നല്ല പരിചയമുണ്ട്. ഞാനൊരുപാട് കണ്ടിട്ടുണ്ട്. നിനക്കേ ആരോടോ പ്രേമമാണ്. അല്ലെങ്കില് തലേടെ പിരി പോയിട്ടുണ്ടാവും”
ജംഷി അതിന് മറുപടി പറയാൻ തുടങ്ങിയതാണ്. ജുമൈലത്ത് വരുന്നത് കണ്ട് അവൻ പറയാൻ വന്നത് വിഴുങ്ങി. ജുമൈലത്ത് ഒരു വാച്ചുമായി തിരികെ വന്നു. എൻ്റെ കയ്യിലെ വാച്ച് അഴിച്ച് മാറ്റി പുതിയ വാച്ച് കയ്യിൽ കെട്ടി തന്നു. കരിനീല ഡയലുള്ള സിൽവർ മെറ്റൽ വാച്ച്. നല്ല വിലയുള്ളതാണ് എന്ന് തോന്നി.
“ഞാനിൻ്റെ കെട്ട്യോന് കൊടുക്കാൻ വാങ്ങീതാ. ഓൻക്ക്ഞ്ഞിത് വേണ്ട”
ജുമൈലത് എൻ്റെ ഫുൾ സ്ലീവ് ഷർട്ടിൻ്റെ കൈകൾ കൈ മുട്ട് വരെ തെറുത്ത് കയറ്റി.