“അത്രേള്ളോ “?
“അല്ലെങ്കിലും ഞാൻ തന്നെയാ ഷാനാത്തേനോട് എല്ലാം പറഞ്ഞിട്ടുള്ളത്”
“അപ്പോ മൻസൂറ് എന്തൊലത്തേന്നു”?
“മാനുക്ക വരും. ഷാനാത്തേനെ കാണും. ഷാനാത്ത വരുന്നത് കണ്ടാൽ ബൈക്കില് തിരിഞ്ഞിരിക്കും. കടുത്ത പ്രേമം. പക്ഷേ ജീവൻ പോയാലും പറയില്ല”
“ഇഷ്ടാണെങ്കിലും പറയണ്ടേ കണ്ണാ. ഞാൻ പോകുന്നോടൊത്തൊക്കെണ്ട്. പക്ഷേ ആള് ഇന്നോടെന്തേലും പറയണ്ടേ. അറ്റ്ലീസ്റ്റ് ഒന്ന് നോക്കേങ്കിലും ചെയ്യണ്ടേ”?
“അത് തന്നെ. സത്യം പറഞ്ഞാ ഷാനാത്തേൻ്റെ കണ്ണില് പ്രണയം നിറഞ്ഞ് തുളുമ്പേന്നു. മാനുക്ക പ്രപ്പോസ് ചെയ്ത്ണ്ടെങ്കിൽ അപ്പോ തന്നെ യെസ് പറഞ്ഞേനെ. പക്ഷേ പ്രപ്പോസ് ചെയ്യണ്ടേ. അങ്ങനെ തിരിഞ്ഞിരിക്കുന്നത് കണ്ട് മടുത്ത് ഞാൻ പോയി ഷാനാത്തേനോട് എല്ലാം അങ്ങട്ട് പറഞ്ഞു. അല്ല പിന്നെ”
“അതാണ്ടായേല്ലേ? സ്ഥല കച്ചോടം ചെയ്യുന്നോന് ഒരു പെണ്ണിനോട് തൊള്ള തൊറന്ന് ഒന്നും പറയാൻ വയ്യ. ബിസിനസ്സിൻ്റെ എടേല് വേറെ എത്ര പെണ്ണുങ്ങളോട് സംസാരിക്കുന്നതാ”
“വേറെ പെണ്ണുങ്ങളേപ്പോലെ അല്ലല്ലോ ഓള്. മറ്റോരോടൊന്നും പ്രേമോല്ല ഒരു തേങ്ങേല്ല. അപ്പോ പറയാള്ളത് പറഞ്ഞ് ഇക്കിൻ്റെ പാട്ടിന് പോവാ. അതോണ്ടാ. താത്താൻ്റെ പ്രേമം ഞാൻ കാര്യാക്കണില്ല. ഇയ്യാരേലും പ്രേമിക്കുമ്പോ മനസ്സിലാവും കണ്ണാ”
“എനിക്കങ്ങനെത്തെ ബുദ്ധിമുട്ടൊന്നും ഇല്ല. ഫ്രഷേർസ് പാർട്ടിക്ക് ഒരു സീനിയർ ചേച്ചിയെ പ്രപ്പോസ് ചെയ്യാൻ പറഞ്ഞിട്ട് അത് ഞാൻ ചെയ്തതാ. ഞാൻ നേരെ പോയി വരാന്തേടെ അറ്റത്തുള്ള ചെടീന്ന് കുറച്ച് പൂവ് പറിച്ചു. എന്നിട്ട് ചെന്ന് സ്റ്റൈലായി പ്രപ്പോസ് ചെയ്തു. ഡയലോഗേന്നു അതിലെ ഹൈലൈറ്റ്. ആ ചേച്ചി ഇപ്പോ എൻ്റെ ഒരു ഫ്രണ്ടാ. അത് പോലെ വേണം. ഒരാളോട് തോന്നുന്ന പ്രണയം തുറന്ന് പറയണ്ടേ? പറയാതെ എങ്ങനേ അറിയുന്നത്”?
“അന്നേപ്പോലെ അല്ലല്ലോ എല്ലാരും”
“അത് ശരിയാ. ഓനേപ്പോലെ ആരൂല്ല”
“അത് കഴിഞ്ഞിട്ട് ഞങ്ങള് സ്മൂത്തായി പോണില്ലേ” ?
“അതുണ്ട്. അതുണ്ടാവൊല്ലോ. ഫസ്റ്റ് അപ്രോച്ചിന് മാത്രേ ആണുങ്ങൾക്ക് പ്രശ്നള്ളൂ. പിന്നെ ഒക്കെ പെണ്ണുങ്ങക്കാവും ബുദ്ധിമുട്ട്. അതല്ലാതെ നിക്കാഹിന് പെട്ടെന്ന് സമ്മതിക്കാൻ വേറെന്താ കണ്ണാ ഇയ്യോളോട് പറഞ്ഞത്”?
“അതോ … വണ്ടി മോഡിഫൈ ചെയ്യുന്നതും വണ്ടി കച്ചവടവും ഒക്കെ ഷാനാത്തക്ക് എന്തോ ഒരു സുഖല്ലാത്ത പോലെ ആയിരുന്നു. ഹൈപ്പർ മാർക്കറ്റും ഷോപ്പുകളും പോലെ ആ ഒരു ഇതുണ്ടല്ലോ അതില്ല. അപ്പോ ഞാൻ മാനുക്ക ശരിക്കും ചെയ്യുന്നത് .. മറ്റേ യൂസ്ഡ് കാറ് സെയിൽസാണ് പണി എന്ന് വിശദീകരിച്ചു. അതങ്ങനെ ഡീറ്റെയിലായി പറഞ്ഞപ്പോ ഷാനാത്തക്ക് മനസ്സിലായി. പിന്നെപ്പോ അതേ പരിപാടി തന്നെ റീട്ടെയിൽ ബിസിനസ് പോലെ ചെയിനായി നടത്താം. ബെൻസൊക്കെ റെൻ്റിന് കൊടുക്കുന്നില്ലേ? വണ്ടി കച്ചവടം എന്ന് പറയുമ്പോ ഉള്ള ആ ഒരു പ്രീഒക്യുപ്പേഷൻ. ആളുകളുടെ ഒരു ചിന്ത. അതാ പ്രശ്നം. ഇപ്പോ ആക്രി കച്ചവടം നടത്തുന്നവരില്ലേ? കോടികളാ മറിയുന്നത്. പക്ഷേ ആ ഒരു പബ്ലിക് പെർസെപ്ഷൻ… അത്. പിന്നെ ഞാൻ അവരെ ലൈഫ് എങ്ങനെയാവൂന്നും പറഞ്ഞു”
“ഇയ്യോരെത് നോക്കിയോ കണ്ണാ”?
“നോക്കി. ഷാനാത്തേൻ്റെ മാത്രം. അവരത് ബെസ്റ്റ് ഫോർമേഷനാ. ആകെ മൊത്തം പ്രേമം മാത്രം. വേറെ ഒന്നൂല്ല. മാനുക്കയല്ലാതെ വേറെ ആളില്ല. ഇപ്പോ സമ്മതിച്ചില്ലെങ്കിലും രണ്ടാമത് മാനുക്ക തന്നെ ആലോചിച്ച് ചെല്ലുമ്പോഴേ നിക്കാഹ് നടക്കൂ. അതല്ലാഞ്ഞാല് ഗർഭം ഒക്കെ അലസുന്ന എന്തൊക്കെയോ ഉണ്ട്. അതിലും നല്ലതല്ലേ ഫസ്റ്റ്ത്തേത്”
“ന്നാ മൻസൂറിൻ്റേം കൂടെ നോക്ക്. എന്താന്നറിയാലോ ”
“മാനുക്കാൻ്റെ നോക്കാൻ കഴിയില്ല. അടുപ്പമുള്ളവരായാൽ എനിക്ക് കഴിയില്ല. നോക്കാൻ കഴിയും. എനിക്ക് തോന്നില്ല. ഫോഴ്സ് ചെയ്താലും കഴിയില്ല. ഇപ്പോ എൻ്റെ സ്വന്തം കാര്യം തന്നെ ഞാൻ പല പ്രാവശ്യം നോക്കിയതാ. പറ്റുന്നില്ല”