“എന്നാ പൊയ്ക്കൂടായിരുന്നോ”?
“ഞാൻ നീ പറഞ്ഞതല്ലല്ലോ ”
“എന്നാ പറ രേണൂ.. ഇനീപ്പോ കൃത്യം ക്വാളിറ്റീസ് പറയാൻ ബുദ്ധിമുട്ടാണേൽ ആർക്കി ടൈപ്പ്സ് പറഞ്ഞാൽ മതി. അല്ലെങ്കിൽ രേണുവിൻ്റെ ഡ്രീം ആള് എങ്ങനെത്തെ ക്യാരക്ടറാന്ന് പറഞ്ഞാലും മതി. ഫിക്ഷനോ അല്ലെങ്കിൽ വേറെ എന്തേലും ഒക്കെ…”
“ആർക്കി ടൈപ്പ്സ് അറിയില്ല. ക്യാരക്ടർ പറയാൻ ….” രേണു കാൽമുട്ടിൽ തലയും വെച്ച് ഇരുന്ന് കുറച്ച് സമയം ചിന്തിച്ചു. “ഡാർസി. അതുപോലത്തെ ഒരാളാണേൽ നന്നാവില്ലേ” ?
“ആ അൺറൊമാൻ്റിക് മൂരാച്ചിയോ”?
“അങ്ങനെ ആണെന്നേ ഉള്ളൂ. പക്ഷേ ഒരു ഐഡിയൽ ഹസ്ബൻ്റിൻ്റെ ക്വാളിറ്റീസൊക്കെ ഡാർസിക്കുണ്ട് ”
ഞാൻ നിശബ്ദനായി രേണു പറയുന്നത് കേൾക്കുകയായിരുന്നു. മിസ്റ്റർ ഡാർസിയാണത്രേ രേണു ആഗ്രഹിക്കുന്ന പുരുഷൻ. ഞാൻ രേണുവിൻ്റെ സ്വഭാവസവിശേഷതകളെ കുറിച്ച് ചിന്തിക്കുകയായിരുന്നു.
“അല്ലെങ്കിൽ ബെത് ലഹേം ഡെന്നീസ് ”
രേണു ഒരു പഴം എടുത്തു. മിസ്റ്റർ ഡാർസിയും ഡെന്നീസും. ദാറ്റ്സ് ആൻ ഇൻട്രസ്റ്റിങ് കോമ്പിനേഷൻ. വാട്ട് ക്വാളിറ്റീസ് ഡു ദിസ് ബത് ലഹേം ഡെന്നീസ് എംബോഡീസ്? എൻ്റെ മനസ്സ് വളരെ വേഗത്തിൽ പ്രവർത്തിക്കാൻ തുടങ്ങി. ഡാർസിയെ എനിക്കറിയാം. രണ്ടു പേരും തമ്മിൽ പ്രത്യക്ഷത്തിൽ യാതൊരു ബന്ധവുമില്ല. അങ്ങനെയുള്ള രണ്ട് പേരെ ഇഷ്ടപ്പെടണമെങ്കിൽ രേണുവിൻ്റെ പേർസണാലിറ്റി എങ്ങനെയാവും? രേണുവിൻ്റെ താൽപര്യങ്ങൾ എനിക്കറിയാം. രേണുവിൻ്റെ ഇഷ്ടങ്ങളും. പല വഴിക്ക് എൻ്റെ ചിന്തകൾ പോയെങ്കിലും അവസാനം എല്ലാം രേണുവിൽ ചെന്നു ചേർന്നു. ദാറ്റ് പേർസണാലിറ്റി ആൻഡ് ഇറ്റ്സ് ആട്രിബ്യൂട്ട്സ്. എല്ലാം എൻ്റെ ബുദ്ധിയിൽ തെളിഞ്ഞു.
“കണ്ണാ… എന്താ ഈ ചിന്തിച്ചു കൂട്ടുന്നത്? കുറേ ദിവസായിട്ട് നിനക്ക് എന്നോട് എന്തോ ചോദിക്കാനുണ്ടൂന്ന് എനിക്കറിയാം. ചുറ്റും ഉള്ളതൊക്കെ കണ്ട്രോള് ചെയ്ത് നീ മനസ്സിൽ വിചാരിച്ചിടത്ത് കാര്യങ്ങളെത്തിക്കുന്ന നിൻ്റെ സ്വഭാവം എനിക്കറിയാലോ. അതും മനസ്സിലിട്ടല്ലേ ഇതൊക്കെ ചോദിച്ചത്. ഇനി പറ… എന്താ നിൻ്റെ മനസ്സില്”?
“ഒരു കെമിസ്ട്രി പ്രൊഫസർ”
“ഞങ്ങള് തമ്മിൽ ഇഷ്ടത്തിലാന്നായിരിക്കും? ആനന്ദ് രവീന്ദ്രൻ… നല്ലൊരാളാണ്. ഇവൻ്റൊക്കെ കോർഡിനേറ്റ് ചെയ്യാൻ ഒരു പ്രത്യേക കഴിവാ. ആള് നല്ല തമാശക്കാരനാണ്. പിന്നെന്താ ? എല്ലാവർക്കും പെട്ടെന്ന് അടുപ്പം തോന്നുന്ന പേർസണാലിറ്റിയാണ്. നിൻ്റെ ആ കൂട്ടുകാരനില്ലേ? ഷംസാദ്.. അവനേപ്പോലെ. ഒരിത്തിരി ഓവർ ഫ്രണ്ട്ലിയാന്നുള്ളത് സത്യം തന്നെയാ. അത് വിചാരിച്ച് പ്രേമമാണ് എന്നാണോ? സോളിഡ് സ്റ്റേറ്റ് കെമിസ്ട്രിക്കാരെ കൂടെ ഫിസിക്സ് ഡിപ്പാർട്ട്മെൻ്റും ഇലക്ട്രോണിക്സിലെ അവരും കൂടെ കൂടി ഒരുമിച്ച് ഓഗസ്റ്റിലെ ആ പരിപാടി നടത്താൻ ഉള്ള പ്ലാനിലാ. അതല്ലാതെ വേറെ ഒന്നും ഇല്ല”
“രേണു ഇങ്ങനെ ഒറ്റക്ക്… ഫസ്റ്റ് മാര്യേജ് ഏതായാലും അങ്ങനെയായി. ഇനി പറഞ്ഞിട്ട് കാര്യല്ലല്ലോ. ഒന്നൊന്നര ആഴ്ചയായി ഞാൻ രേണുവിനേം പ്രൊഫസറേം ശ്രദ്ധിക്കാൻ തുടങ്ങീട്ട്. അപ്പോ മിനിഞ്ഞാന്നും പ്രൊഫസറെ കൂടെ കണ്ടപ്പോ…. ”
“ഞങ്ങള് രണ്ടും ഫ്യൂച്ചറും പ്ലാൻ ചെയ്ത് ബാസ്കറ്റ് ബോൾ കോർട്ടിൻ്റെ സൈഡിലെ ബെഞ്ചിലിരുന്ന് മേഘങ്ങളെ നോക്കിയിരിക്കാവും എന്നങ്ങട്ട് വിചാരിച്ചിട്ടുണ്ടാവും”
“പിന്നെ? രേണു ഒരു കോലു മിഠായീം വായിലിട്ട് ആ രവീന്ദ്രൻ്റെ കൂടെ ഇരിക്കുന്നത് കണ്ടാൽ അതെന്താന്നറിയാനുള്ള ബോധം ഒക്കെ എനിക്കുണ്ട് ”
“അച്ചോടാ… നോക്കട്ടെ ഞാനാ കാരണവരെ… അല്ലേലും നിനക്കുള്ളതാ വെറുതേ ഇരിക്കുമ്പോ കാരണവര് കളിക്കുന്നത്. രമ ചേച്ചി ആ സ്റ്റാള് നടത്തുന്നതേ പൈസ ഉണ്ടാക്കാനാ. കാമുകീ കാമുകന്മാര് ഒരുപാട് വിലസി നടക്കുന്നതല്ലേ. അപ്പോ ചിലവാവുന്ന സാധനാവും അവിടെ ഉണ്ടാവാ. ആനന്ദ് എന്തോ വാങ്ങിയപ്പോ ചില്ലറയില്ലാഞ്ഞിട്ട് ബാക്കിക്ക് പകരം കൊടുത്തതാ ആ കോലു മിഠായി. എന്നെ കണ്ടപ്പോ അതെനിക്ക് തന്നു. അതിനാ ഇവിടെ ഒരാള്”