“ആദ്യായിട്ട് വന്നതല്ലേ. വലത് കാല് വെച്ച് കേറിയാ മതി”
ജുമൈലത്ത് ഒരു നിമിഷം നിന്നു. അറബിയിൽ എന്തോ സൂക്തം ചൊല്ലി വലത് കാല് വെച്ച് അകത്തേക്ക് കയറി.
“ഞാൻ വിളിച്ചപ്പോ ഇയ്യെന്തെടുക്കേന്നു”?
“വായനയിലായിരുന്നു. പിന്നെ കുറച്ച് എഡിറ്റിങ് വർക്ക്സും”
“ഇയ്യൊറ്റക്കാല്ലേ? ഒറ്റക്കിരുന്ന് മടുക്കൂലേ കണ്ണാ”?
“ശരിയാ. ഒരു ബീവിയും കൂടെ കൂട്ടിനുണ്ടെങ്കില് ഒരോളണ്ടായേനേ”
“അയ്യടാ. ഓൻ്റെ ഒരു പൂതി”
“ഇവിടെ ഇരിക്ക്. ഞാനിപ്പോ വരാം”
പറമ്പിൽ നിന്നും ഞാൻ പഴുത്ത് വീണ മാങ്ങ പെറുക്കിയെടുത്തിരുന്നു. കൂട്ടത്തിൽ രണ്ട് കസ്തൂരി മാമ്പഴവും ഉണ്ടായിരുന്നു. കസ്തൂരി മാമ്പഴത്തിന് ഒരു പ്രത്യേക രുചിയാണ്. അണ്ണാറ കൊട്ടൻ പകുതി കടിച്ച് തിന്നിടുന്ന മാങ്ങയാണ് സാധാരണ മാവിൻ്റെ ചുവട്ടിൽ ഉണ്ടാകാറ്. ജുമൈലത്തിൻ്റെ ഭാഗ്യമാണെന്ന് തോന്നുന്നു. ഞാനത് മുറിച്ച് ഒരു പാത്രത്തിലെടുത്ത് ജുമൈലത്തിൻ്റെ മുന്നിലെ ടീ പോയി യിൽ കൊണ്ട് വെച്ചു.
“അത് കഴിച്ച് നോക്കേ. കസ്തൂരി മാങ്ങയാ. നല്ല രസാ കഴിക്കാൻ”
ജുമൈലത്ത് മാങ്ങ എടുത്ത് വായിലേക്ക് വെച്ചപ്പോഴാണ് മേശപ്പുറത്തിരിക്കുന്ന താളിയോല കെട്ടുകൾ കണ്ടത്.
“ഇയ്യ് അതേന്നോ വായിച്ചേന്നത്? എന്താ അതില്ള്ളത്”?
“പറയാൻ മാത്രം ഒന്നും ഇല്ല. പഴയ കുറച്ച് താന്ത്രിക ക്രിയകളാ. അമ്പലത്തില് പ്രതിഷ്ഠിക്കുമ്പോ ചെയ്യുന്നത്. പബ്ലിക് ആയിട്ട് തന്ത്രസമുച്ചയമുണ്ട്. പക്ഷേ ഇത് അതല്ല. ആ താളിയോല കെട്ടില് കുറച്ച് കൂടിയ ക്രിയകളാ. പിന്നെ യന്ത്രങ്ങൾ…ചില കടുത്ത പ്രയോഗങ്ങൾക്കുള്ള പരിഹാര കർമ്മങ്ങൾ… അങ്ങനെ ഉള്ള ചിലതും ഉണ്ട്”
ജുമൈലത്ത് എഴുന്നേറ്റ് എൻ്റെ അടുത്ത് വന്നിരുന്നു. പാത്രത്തിൽ മാങ്ങക്കൊപ്പം ഉണ്ടായിരുന്ന കത്തിയെടുത്ത് ഒരു പൂളെടുത്ത് രണ്ടാക്കി കത്തിയിൽ കുത്തി കോർത്ത് എൻ്റെ വായിലേക്ക് വെച്ചു തന്നു. ഞാൻ സോഫയിൽ കിടന്ന ഐ പാഡ് എടുത്തു മാറ്റി വെച്ച് ജുമൈലത്തിൻ്റെ അടുത്തേക്ക് നീങ്ങിയിരുന്നു.
“നിക്കാഹായില്ലേ? എന്തിനാ ഇപ്പോ പോകുന്നത്”?
“വന്നിട്ട് കൊറേയായില്ലേ? സിസേറിയനും കോംപ്ലിക്കേഷൻസൂണ്ടാവുമ്പോ സർജറിക്ക് ആള് വേണ്ടേ? അവടെ ഇപ്പോ പ്രഗ്നൻസി സീസണാ”
“അതിനും സീസണോ? ഹോമോ സാപ്പിയൻസ് എന്ന് പറയുമ്പോ വർഷം മുഴുവൻ ഗർഭം ധരിക്കാൻ കഴിയില്ലേ”?
“യെസ് വി കാൻ. നോട്ട് വി യു.. വി ആസ് അസ് ഫീമെയിൽസ്. ബട്ട് ദേർ ആർ സം പർട്ടിക്യുലർ മന്ത്സ് ഇൻ വിച്ച് ദ കേസസ് ആർ എ ബിറ്റ് ഹൈയർ ദാൻ ദ യൂഷ്വൽ. ദാറ്റ്സ് വൈ”
“കൊള്ളാം. അതെനിക്കറിയില്ലായിരുന്നു”
“പറയുന്നത് കേട്ടാൽ ഗർഭത്തെ പറ്റി വേറെള്ളതൊക്കെ അറിയാന്ന് തോന്നും”
“എനിക്കറിയൊന്നുമില്ല. പക്ഷേ ആവശ്യമുണ്ടേൽ ഞാൻ പഠിക്കും. ഒരു പെണ്ണിനറിയുന്നതിനേക്കാൾ കൂടുതൽ അതിനേക്കാൾ പെർഫെക്ഷനിൽ ഞാൻ പഠിച്ചെടുക്കും”
“യെസ് യൂ വിൽ. ഇയ്യത് ചെയ്യൂന്നിക്കറിയാലോ. ഇയ്യിന്നെ ഇപ്പോള്ള പോലെ ആക്കാൻ വേണ്ടി മാത്രം കൊറേ കാര്യങ്ങള് പഠിച്ചോനല്ലേ. അത് മാത്രല്ല കണ്ണാ. അവടെ ആരൂല്ല. ഉപ്പ പലേ തെരക്കാളും ആയി നടക്കീണ്ട്. ജംഷി പോയി. ഓൻ വരാൻ രണ്ടാഴ്ച്ചേലും ആവും. മൻസൂറ് ഷാനേൻ്റൊപ്പം മൊഹബ്ബത്തിൻ്റെ മുന്തിരിച്ചാറും നൊണഞ്ഞ് നടക്ക്ണത് അനക്കറിയൂലേ. അവടെ നിന്നാ പഴേതൊക്കെ ഓർമ്മ വരും”
“ചാറ് നുണയാൻ ഞാൻ കൂടെ വന്നാലോ”?
“ഇയ്യ് വര്വോ”?
“ജംഷീടെ കൂട്ടുകാരനല്ലേ ഞാൻ? അത് പറഞ്ഞപ്പഴാ…. ജംഷി ഇന്തോനേഷ്യേന്ന് എന്തൊക്കെയോ കുറച്ച് വീഡിയോസ് ഷൂട്ട് ചെയ്തത് അയച്ച് തന്നിട്ടുണ്ട്. ആ കമ്പ്യൂട്ടറിലുണ്ട്. ഞാനത് എഡിറ്റ് ചെയ്യേന്നു”
ജുമൈലത്ത് എഴുന്നേറ്റ് പോയി കമ്പ്യൂട്ടർ ഓൺ ചെയ്ത് ഞാൻ എഡിറ്റ് ചെയ്തു കൊണ്ടിരുന്ന ഇന്തോനേഷ്യയിൽ നിന്നുള്ള വീഡിയോ പ്ലേ ചെയ്ത് നോക്കി. നീഹ മാളിൽ നിന്നെടുത്ത ഒരു ഡാൻസ് വീഡിയോയും ഉണ്ട്. ഞാൻ അത് രണ്ടും കൂട്ടി ചേർക്കാൻ നോക്കുകയായിരുന്നു. ഷംസാദാണ് സാധാരണ അതൊക്കെ ചെയ്യുന്നത്. വെറുതെ എടുത്ത രംഗങ്ങൾ കൂട്ടി ചേർത്ത് ഒന്നാക്കി പ്ലോട്ടോടു കൂടിയ എന്തെങ്കിലും ആക്കാൻ അവനൊരു പ്രത്യേക മിടുക്കുണ്ട്. ജുമൈലത്ത് യു ട്യൂബ് എടുത്ത് ചാനലിലെ അപ് ലോഡ്സ് നോക്കാൻ തുടങ്ങി. ഞങ്ങൾ പാടത്ത് വെച്ചെടുത്ത ഡാൻസാണ് അവസാനമായി അപ് ലോഡ് ചെയ്തത്.