“ആയിരിക്കും. ഞാൻ ചെയ്യാൻ പോവുന്നതെന്താന്ന് എനിക്കറിയാം. ഞാനല്ലേ ചെയ്യുന്നത്. അത് ഞാൻ ചെയ്യും എന്നും അറിയാം. പിന്നെന്തിനാ പാനിക്കാവുന്നത്. മറ്റേതെന്താന്നറിയോ ജംഷീ… ആൾക്കാർക്ക് കാടിനെ അറിയില്ല. ബത്തേരിയില് ബോർഡറിലെ കാടിൻ്റെ അടുത്ത് ജീവിച്ചതോണ്ട് എനിക്ക് ആനയെ ഒക്കെ പരിചയണ്ട്. അന്ന് ഇപ്പോ എന്താ? മുന്നില് ഒരു കൊമ്പനാന. പിന്നില് ഒരാന കൂട്ടം. രണ്ട് മൂന്ന് കുട്ടിയാനകളും ഉണ്ട്. നമ്മള് വീട്ടിലെത്തിയില്ലേ? അതത്രേ ഉള്ളൂ. വേറെ വല്ലവരും ആണെങ്കിൽ ഒറ്റയാൻ്റെ കയ്യിൽ നിന്ന് രക്ഷപ്പെട്ട കഥാന്നും പറഞ്ഞ് പൊടിപ്പും തൊങ്ങലും വെച്ച് ചാകുന്നത് വരെ പറഞ്ഞ് നടക്കും. ഞാൻ നോക്കിയിട്ട് എനിക്ക് അത് ഒരു നോർമൽ ഇവൻ്റായിട്ടേ തോന്നുന്നുള്ളൂ. എട്ട് മണിയായില്ലേ? പോയാലോ? നിന്നെ അങ്ങട്ടാക്കിയിട്ട് വേണം എനിക്ക് വീട്ടിൽ പോവാൻ”
ഞാൻ എഴുന്നേറ്റു. അത് കണ്ട് ജംഷീറും എഴുന്നേറ്റു.
“അൻ്റെ കാര്യം എന്താന്നറീലാ. ഇക്കത് കംപ്ലീറ്റ്ലി ഷേക്കൺ എക്സ്പീരിയൻസാ. ചാവുന്നത് വരെ മനസ്സ്ന്ന് പോവൂല. ചെലപ്പഴൊക്കെ ആന ഓടിക്കണത് സ്വപ്നം കണ്ട് ഞെട്ടിയൊണരും…. അവടെ ആ ഭഗവതീൻ്റെ അമ്പലത്തില് ഉത്സവത്തിന് ആനേനെ കാണണതും കൂടെ ഇക്കിപ്പോ പേടിയാ… ഡാ … തിങ്കളാഴ്ച ഇന്തോനേഷ്യേക്ക് കെട്ടിയെടുക്കണം. ഇയ്യ് അക്കാദമിയിലാക്കിയാ മതി”
“ഉറങ്ങുന്നതാടാ ഏറ്റവും ബെസ്റ്റ്. പിന്നേ.. ഞാൻ കുറേ നാളായിട്ട് പറയണന്ന് വിചാരിച്ചതാ. നിൻ്റെ ആ സിഗ്നേച്ചർ മൂവുണ്ടല്ലോ… അത് എല്ലാർക്കും അറിയാം”
പറഞ്ഞ് തീരുന്നതിന് മുൻപ് ജംഷീറിൻ്റെ ഇടതുകാൽ എൻ്റെ ചെവിക്കു നേരെ വന്നു. ഞാൻ നിലത്ത് അമർന്നിരുന്ന് നല്ല വേഗതയിൽ കറങ്ങി ഒരു സ്വീപ്പിങ് സൈഡ് കിക്കെടുത്തു. ജംഷി പിന്നിലേക്ക് വീണു. നിലത്ത് പതിക്കുന്നതിന് മുൻപ് ഞാൻ മുന്നോട്ടാഞ്ഞ് അവനെ താങ്ങിപ്പിടിച്ചു.
“കണ്ടില്ലേ. അതാ പറഞ്ഞത്. എനിക്ക് നിൻ്റെത്ര പ്രാക്ടീസും കൂടെയില്ല”
“ഇഞ്ഞിപ്പോ എന്താടാ ഞാൻ ചെയ്യാ”?
“നിനക്കിപ്പോ നോക്ക് ഔട്ട് ചെയ്താ പോരേ”?
ഞാൻ അവന് മർമ്മത്തിൽ പെരുവിരലൂന്നി ബോധം കെടുത്തുന്നത് കാണിച്ചു കൊടുത്തു.
“അച്ഛച്ഛൻ പഴയ കളരി എക്സ്പേർട്ടാ. അങ്ങനെ പഠിച്ചതാ. പല സ്റ്റാൻസും എടുത്ത് കൺഫ്യൂസ് ചെയ്യണം. അതിൻ്റെ ഇടയിൽ കൂടെ നോർമൽ സ്റ്റാൻസിൽ ഫ്രണ്ട് കിക്കെടുത്താൽ മതി. പക്ഷേ പെട്ടെന്ന് വേണം. കിക്ക് തന്നെ ആവണം. എഗെയ്ൻസ്റ്റ് റൂൾസൊന്നും അല്ല. സാധാരണ കിക്കല്ലേ. പക്ഷേ ഒരിത്തിരി ഫോഴ്സ് കൂടുതൽ കൊടുക്കണം. വേറെ വല്ലതും ആയാല് അവിടെ ഉള്ളോർക്ക് അറിയാൻ പറ്റും. മറുകൈ പ്രയോഗണ്ട്. അതൊന്നും നോക്കണ്ട”
ജംഷീർ അഞ്ചാറ് പ്രാവശ്യം ചെയ്ത് നോക്കി അത് മനസ്സിലാക്കി. ഞങ്ങൾ ചാലിയത്ത് നിന്നും മടങ്ങി. ജംഷീറിനെ പന്തീരങ്കാവിൽ ഇറക്കി. രാത്രി വൈകിയിരുന്നു. മാസ്റ്റർ ഗേറ്റിനടുത്ത് തന്നെ ഉണ്ടായിരുന്നു. കൂടെ സീനിയേഴ്സായ രണ്ട് ബ്ലാക്ക് ബെൽറ്റ് സ്റ്റുഡൻ്റ്സും. അവർ കരാട്ടേ വിദഗ്ദ്ധരാണ്. സെക്കൻ്റ് ഡാൻ ബ്ലാക്ക് ബെൽറ്റാണ് ഒരാൾ. എന്നിട്ടും ശിഷ്യനാണ് പഠിക്കുകയാണെന്നും പറഞ്ഞ് മാസ്റ്ററുടെ കൂടെ കൂടിയിക്കുകയാണ്. ചാംപ്യൻഷിപ്പ് അടുത്തത് കൊണ്ട് തകൃതിയായ പരിശീലനത്തിലാണ് എല്ലാവരും. ഞാൻ കാലുകൾ ചേർത്ത് പിടിച്ച് ശരിയായ നില സ്വീകരിച്ച് ബോ ചെയ്തു. ബ്രൗൺ ബെൽറ്റിനുള്ള ടെസ്റ്റ് വ്യാഴാഴ്ച രാവിലെയാണ്. പഠിപ്പിച്ച് തന്നതിൽ നിന്ന് അഞ്ചാമത്തെ കട്ടാസ് മുഴുവനായും ചെയ്ത് കാണിച്ച് ഞാൻ പെട്ടെന്ന് തന്നെ വീട്ടിലേക്ക് മടങ്ങി.
ഇന്ന് പ്രാതൽ കഴിഞ്ഞ് പ്രത്യേകിച്ചൊന്നും ചെയ്യാനുണ്ടായിരുന്നില്ല. കാര്യങ്ങളെല്ലാം പതിവ് പോലെ നടക്കുന്നു. നീഹ വിളിച്ചിരുന്നു. അവളുടെ ചേച്ചി റെബേക്കയും ഉണ്ടായിരുന്നു. റെബേക്കക്ക് ഇന്ന് ലീവാണ്. രണ്ട് പേരും കൂടെ ബാംഗ്ലൂരിലെ മാളുകളിൽ തെണ്ടി തിരിയാൻ ഇറങ്ങുന്നതിന് മുൻപ് വിളിച്ചതാണ്. എപ്പോഴും എന്നെ വീഡിയോ കോൾ ചെയ്യുന്നത് കൊണ്ട് അവളുടെ ചേച്ചിക്ക് ഞാനാരാണെന്നറിയാനൊരു ആകാംക്ഷ. അനിയത്തി ബാംഗ്ലൂരിൽ എത്തിയിട്ട് പലരേയും വിളിക്കുന്ന കൂട്ടത്തിൽ എന്നെ മാത്രം ഒരുപാട് പ്രാവശ്യം വിളിക്കുന്നു എന്നതാണ് അതിൻ്റെ കാരണം. ഏതവനാണ് അത് എന്നറിയാൻ ഒരു ചേച്ചിക്ക് ആഗ്രഹമുണ്ടാവും. കുറ്റം പറയാൻ പറ്റില്ല. ഞാനാണല്ലോ അവളുടെ ബെസ്റ്റ് ഫ്രണ്ട്. അനിയത്തിയുടെ കൂട്ടുകാരനോട് ചേച്ചിക്കും പലതും ചോദിക്കാനും പറയാനുമുണ്ടായിരുന്നു.