“അനക്ക് പിന്നെ എങ്ങനെള്ളോരേ ഇഷ്ടം”?
“രേണുവിനേപ്പോലെയുള്ളവരെ. ഇൻ്റലിജൻ്റ്. സെൽഫ് അഷ്വേർഡ്. ഞാൻ തന്നെ മതി എന്ന ഒരു വിശ്വാസം ഉണ്ടല്ലോ… അതുള്ളവരെ. സെൽഫ് സഫിഷ്യൻ്റ്. ഇൻഡിപെൻഡൻ്റ്. അങ്ങനെ ഒക്കെ. പിന്നെ രേണുവിൻ്റെ പോലത്തെ ആ ഒരു ഇൻ്റിമിഡേറ്റിങ് പ്രസൻസ് കൂടി വേണം. ഒന്നും ഇല്ലെങ്കിലും ഇൻ്റലിജൻ്റ് ആൻഡ് സെൽഫ് അഷ്വേഡ് ആയാൽ മതി…. ഇങ്ങനെ പറഞ്ഞാൽ ശരിയാവില്ല. ഒറ്റ വാക്കിൽ പറഞ്ഞാൽ രേണു. അത് പോലെ ഒക്കെയുള്ള ആരും”
ജുമൈലത്ത് ഞാൻ പറയുന്നതും ശ്രദ്ധിച്ച് ഇരിക്കുകയായിരുന്നു. മുഖത്ത് നേരിയ വിഷാദം പടർന്നിരിക്കുന്നു.
“ഇന്നെ അനക്കെങ്ങനെയാ തോന്നീത്”?
” ….സീരിയസ് ആൻഡ് മച്വർ ഔട്ട്ലുക്കൊക്കെയുള്ള കുറച്ച് കൂടി അക്കാദമിക്കൽ ആയിട്ടുള്ള ഒരു മൊഞ്ചത്തി ഡോക്ടറ്. ഒരു ആൻഷ്യൻ്റ് ആൻഡ് ഓൾഡ് സോൾ വൈബൊക്കെയുണ്ട്. എനിക്കതും ഇഷ്ടാണ്. അങ്ങനെ ഉള്ളവരെ കൂട്ടും ഇഷ്ടാണ്. യു ആർ സോ പെർഫക്റ്റ് ഫോർ മി”
ജുമൈലത്ത് കമ്പ്യൂട്ടർ ഷട്ട് ഡൗൺ ചെയ്ത് കറങ്ങുന്ന കസേരയിൽ എൻ്റെ നേരെ തിരിഞ്ഞ് കാൽ നിലത്ത് കുത്തി പെൻഡുലം പോലെ ഇടത്തോട്ടും വലത്തോട്ടും കറങ്ങി കൊണ്ടിരുന്നു. തല ഒരൽപ്പം താഴ്ത്തി ചെറു ചിരിയോടെ ജുമൈലത്ത് എൻ്റെ നേരെ നോക്കിയപ്പോൾ ഡയാനാ രാജകുമാരിയുടെ സ്പെൻസർ സ്റ്റെയറാണ് എനിക്കോർമ്മ വന്നത്.
“അൻ്റെ രേണൂനെപ്പോലെ ഞാനും അനക്ക് പറ്റിയ ഒരാളാല്ലേ”
“യെസ് ഇൻഡീഡ്. എനിക്ക് രണ്ട് തരം ആൾക്കാരെ പറ്റും. നല്ല ഇൻ്റലിജൻ്റ് ആൻഡ് സോഫിസ്റ്റിക്കേറ്റഡ് ആയിട്ടുള്ളോരും കുറേക്കൂടി സോഫ്റ്റ് ആൻഡ് എംപതറ്റിക് ആയിട്ടുള്ളോരും”
“അനക്കൊരു മൈൻഡ് മേറ്റും പിന്നെ ഒരു സോൾമേറ്റും വേണല്ലേ”
“അതെന്നെ. അങ്ങനെ ഒക്കെ ആയാ കൊള്ളാന്ന് ആഗ്രഹണ്ട്”
ജുമൈലത്ത് മറുപടി ഒന്നും പറഞ്ഞില്ല.
“കണ്ണാ… യു ട്യൂബിലുള്ളതല്ലാതെ ഇയ്യ് വേറെ എന്തേലും ചെയ്ത്ണ്ടോ”?
“വേറെ എന്തേലും ചെയ്തിട്ടുണ്ടോന്ന് ചോദിച്ചാൽ… ഒരു പഞ്ചാബി മ്യൂസിക് വീഡിയോയിൽ അഭിനയിച്ചിട്ടുണ്ട്”
“പഞ്ചാബിയോ? എങ്ങനെ”?
“അതിലിത്ര അത്ഭുതപ്പെടാനൊന്നൂല്ല. എൻ്റെ അമ്മ പഞ്ചാബിയാന്നറിയില്ലേ. അവിടെ കുറച്ച് പ്രോപ്പെർട്ടി ഒക്കെയുണ്ട്. പാട്യാലക്കടുത്താ. ഡെൽഹീലും പൂനേലും ഉള്ളത് വീടാ. പക്ഷേ ഇത് കുറച്ച് സ്ഥലണ്ട്. ഗോഡൗണൊക്കെ ആയി. രേണുവായിരുന്നു ബെനിഫിഷ്യൽ ഓണർ എന്ന നിലക്ക് അതൊക്കെ നോക്കിയേന്നത്. ബട്ട്.. ഞാൻ ചെല്ലേണ്ട ആവശ്യണ്ടായി… ഈ കഴിഞ്ഞ നവംബറില്. അമ്മയുടെ ഫാമിലീടെ അടുത്ത് അല്ലാതേം ഞാൻ ചെല്ലലുണ്ട്. അമ്മേടെ മൂത്ത ഒരേട്ടനുമായിട്ട് അത്യാവശ്യം നല്ല ബന്ധണ്ട്. മറ്റുള്ളവരുമായും അടുപ്പമൊക്കെണ്ട്. എന്നാലും…”
“….അവിടെളള കസിനൊരുത്തൻ പാട്ടൊക്കെ പാടും. ഇപ്പോ പഠിക്കാൻ കാനഡയിൽ പോയി. അപ്പോ അന്ന് അവൻ ഒരു സോളോ ആൽബം ചെയ്യുന്നുണ്ടായിരുന്നു. ഞാൻ യുട്യൂബില് വീഡിയോ ചെയ്യുന്നതൊക്കെ അറിയാം. പാട്ട് സീനിൽ അഭിനയിക്കാൻ പറഞ്ഞപ്പോ വൈ നോട്ടെന്ന് ഞാനും വിചാരിച്ചു. രേണുവും കൂടെയുണ്ട്. ഷൂട്ടിങ്ങാണ്. രേണു വന്ന് നോക്കുമ്പോ ഞാൻ മസിൽ ബോഡി കാണിച്ച് വലിയൊരു കട്ടിലിൽ ചാരി കിടക്കാണ്. ജീൻസും ബൂട്ടും മാത്രേള്ളൂ. കട്ടിലിൽ ഒപ്പം ബിക്കിനിയിട്ട നാല് പെണ്ണുങ്ങളും. രേണു ആകെ അപ്സെറ്റായി. പിന്നെ അങ്ങനെത്തെ മ്യൂസിക് വീഡിയോസിനൊന്നും പോയിട്ടില്ല. പൂണൂലുള്ളത് കൊണ്ട് സ്റ്റീൽ ബോഡി കാണിക്കാൻ മടിയാ. ജംഷീടെ ചാനലില്ലാതെ ഞാൻ വേറെ ഒരടത്തും വീഡിയോയും ചെയ്തിട്ടില്ല. ആകെള്ളത് ആ മ്യൂസിക് ആൽബാ. അത് ഭാഗ്യത്തിന് വലിയ ഹിറ്റൊന്നും ആയില്ല”
“അതാണ്ടായേല്ലേ. ഞാൻ കരുതി… ”
“വിചാരിച്ച അത്രക്കൊന്നുണ്ടായിരുന്നില്ല. ഒരു ചെറിയ ആൽബം. അതല്ലാതെ എട്ട് പാട്ടും കൂടെണ്ടേരുന്നു. ചാനലിൻ്റെ കാര്യാണെങ്കില് ഇപ്പോ ഞങ്ങള് ഫുള്ള് സ്ക്രിപ്റ്റെഴുതി ചെയ്യുന്ന വീഡിയോസിലേക്ക് മാറി. അതാവുമ്പോ എല്ലാ ആൾക്കാർക്കും കാണാം. സാധാ റൊമാൻസ് ഷോർട്സ് പോലെയല്ല. ഡയലോഗ്സില്ലാതെ അഞ്ച് ആറ് മിനിറ്റൊക്കെ നീളമുള്ള കോമഡി ഒക്കെയുള്ള വീഡിയോസ്. മൈം… സ്പൂഫ് ഒക്കെപ്പോലെ”