” ആഹ് ” മറുപടിയായി അവളുടെ മൂളൽ ഞാൻ പുറകിൽ നിന്ന് കേട്ടു. വീട്ടിൽ പോവുന്നതിൽ അവൾ എത്രത്തോളം സന്തോഷവതി ആണ് എന്ന് എനിക്ക് അവളുടെ ശബ്ദത്തിൽ നിന്ന് അറിയാൻ സാധിച്ചു. എന്റെ ചുണ്ടിലും ഞാൻ പോലും അറിയാതെ ഒരു ചിരി വിടർന്നു.
‘ damn it ‘ ഞാൻ മനസ്സിൽ പറഞ്ഞു. എനിക്ക് എന്താണ് സംഭവിക്കുന്നത്?, ആരതി തെറ്റുകാരി അല്ലെന്ന് അറിഞ്ഞതിനു ശേഷം അവളുടെ അരികിൽ എത്തുമ്പോൾ ഞാൻ, ഞാൻ അല്ലാതെ ആവുന്നത് പോലെ, എനിക്ക് എന്നെ തന്നെ നിയന്ത്രിക്കാൻ പറ്റാത്തത് പോലെ.
‘ what the hell is going on with me?’
ഞാൻ ഒന്ന് പുകക്കാൻ ടെറസിലേക്ക് പോവാൻ തീരുമാനിച്ചു. മുകളിൽ എത്തിയപ്പോൾ ആണ് അവിടെ സിറ്റിംഗ് ഏരിയയിൽ ആരോ ഇരിക്കുന്നത് കണ്ടത്. അവർ രണ്ടുമാണ്, കീർത്തനയും അനിയനും. ഞാൻ ദേഷ്യത്തിൽ തിരികെ നടക്കാൻ പോയി അന്നേരം ആണ് ആ ചെക്കൻ പറയുന്നത് ഞാൻ കേട്ടത്, എന്തോ അത് കേട്ട് നിക്കാൻ ആണ് എനിക്ക് തോന്നിയത്.
” ഇച്ചേയി, ന്തിനാ കരയനെ?? ആ ബാദ്ഗായ് വീണ്ടും ഇച്ചേയിയെ വയക്കിട്ടോ? ” അവൻ കൊഞ്ഞപ്പോടെ അവളോട് ചോദിക്കുവാണ്. അന്നേരം അവൾ ഇല്ലന്ന് പറയും പോലെ തലയാട്ടി.
” ആ ബാദ്ഗായ് ഇല്ലായിന്നെ ഇച്ചേയിയും ചിരിച്ചേനെ, ഇവിടെ എല്ലാരേം നിക്ക് ഇസ്റ്റാ, അയാൾ എപ്പോയാ പോണേ?? അല്ല മ്മാ എപ്പോഴയാ വന്നേ ” അവൻ ചോദിച്ചപ്പോൾ അവൾ അവനെ കെട്ടിപിടിച്ചു.
” കുഞ്ഞാ… ഏട്ടനെ അങ്ങനെ ഒന്നും വിളിക്കരുത്, നമ്മുടെ ഒക്കെ ഏട്ടനാ അത്. നമ്മൾ ഒക്കെ കാരണം ഏട്ടൻ ഒരുപാട് വിഷമിച്ചിട്ടുണ്ട് അതാണ് നമ്മളോട് അങ്ങനെ ഒക്കെ… എല്ലാം ശരിയാകും അച്ചുചേച്ചിയും ആരുയേച്ചിയും ആന്റിയും അങ്കിളും ഒക്കെ നമ്മളോട് സ്നേഹത്തിൽ അല്ലേ പെരുമാറുന്നെ. നമ്മളും എല്ലാം അറിഞ്ഞു അവർക്ക് ഒരു ശല്യവും ആവാതെ നിക്കണം. ഇച്ചേയി പഠിച്ചു വേഗം ഒരു ജോലി ഒക്കെ വാങ്ങാം എന്നിട്ട് നമുക്ക് ഏട്ടന് ശല്യം ആവാതെ വേറെ എവിടെയെങ്കിലും മാറി താമസിക്കാം, ഇച്ചേയിയും ഇച്ചേയിയുടെ കുഞ്ഞനും ഒരുമിച്ച് താമസിക്കുന്ന ഒരു കൊച്ചു വീട് ” അവൾ അവനെ ആശ്വസിപ്പിക്കുന്ന പോലെ പറഞ്ഞു.
” അപ്പൊ മ്മ ഉണ്ടാവില്ലേ ഇച്ചേയി?? ” അവൻ സംശയത്തോടെ ചോദിച്ചു. അത് കേട്ടപ്പോൾ അവളുടെ കണ്ണിൽ നിന്നും വീണ്ടും കണ്ണീർ വന്നു അവൾ അത് അടക്കി.
” ഇല്ല കുഞ്ഞാ, അമ്മയെ ഇനി നമുക്ക് ഒന്നും കാണാൻ പറ്റില്ല, അമ്മ വളരെ ദൂരെയാ. കുഞ്ഞനും ഇച്ചേയിക്കും ഒട്ടും പറ്റിയില്ലേൽ അവിടേക്ക് പോവാം ” അതും പറഞ്ഞു അവൾ വിങ്ങിപൊട്ടി അവനെ ഒന്നൂടെ തന്നിലേക്ക് ചേർത്ത് പിടിച്ചു.
” അപ്പൊ മ്മ കടലിന്റെ അടിയിലെ വീട്ടിൽ ഉണ്ടെന്ന് ആ ചേച്ചി പറഞതോ, അവിടെ ചെന്നാ മ്മയേ കനാന്നാ, നിക്ക് പോയിട്ട് കാണാൻ പറ്റീല്ലാ” അവൻ വീണ്ടും പറഞ്ഞു.
” അതൊക്കെ വെറും കഥകളാ കുഞ്ഞാ, ഇനി അതൊക്ക വിശ്വസിച്ച് അങ്ങനെ ഒന്നും ചെയ്യില്ലെന്ന് ഇച്ചേയിക്ക് സത്യം ചെയ്തു താ ” അവൾ അവനെ തന്റെ കൈ വലയത്തിൽ നിന്ന് മാറ്റി നിർത്തിയിട്ട് അവനോട് പറഞ്ഞൂ. അവൻ തലയാട്ടി. അത്രേം ആയപ്പോഴേക്കും ഞാൻ താഴേക്ക് ഇറങ്ങി. ഹാളിൽ സോഫയിൽ വന്ന് ഇരുന്നു. അവൻ ലാസ്റ്റ് പറഞ്ഞ വാചകം എന്നെ വല്ലാതെ സ്ട്രൈക്ക് ചെയ്തു. കുറച്ചു നേരം അതിനെ കുറിച്ച് ആലോചിച്ചിട്ട് ഞാൻ എന്റെ റൂമിൽ കേറി. ആരതി ബാത്റൂമിൽ കേറിയിട്ടുണ്ട്. ഞാൻ ഇന്നലെ മാറിയ പാന്റ്ന്റെ പോക്കെറ്റിൽ നിന്ന് ആ ചെക്കന്റെ ഗ്ലാസ് എടുത്തു താഴേക്ക് പോയി.
കുറച്ചു കഴിഞ്ഞു ചേച്ചിയും അനിയനും താഴേക്കു വന്നു, അവൾ നേരെ അടുക്കളയിലേക്കും അവൻ tv യുടെ മുന്നിലേക്കും ആണ് പോയത്. രണ്ടു പേരും എന്നെ ശ്രദ്ധിച്ചിരുന്നില്ല. ഞാൻ ചെന്ന് അവന്റെ അടുത്ത് സോഫയിൽ ഇരുന്നു. അവൻ തിരിഞ്ഞു നോക്കി എന്നെ കണ്ട് ഒന്ന് ഞെട്ടി, പിന്നെ മുഖം വീർപ്പിച്ചു tv യിലേക്ക് തന്നെ നോക്കി.
” ഡാ ” ഞാൻ പതിയെ വിളിച്ചു. അവൻ എന്നെ നോക്കി, ചെക്കന് അവളെ പോലെ അല്ല, ഇത്തിരി ധൈര്യം ഒക്കെ ഉള്ള കൂട്ടത്തിൽ ആണ്. ഞാൻ കണ്ണട അവന്റെ മുഖത്തു വെച്ച് കൊടുത്തു. അപ്പൊ അവന്റെ കണ്ണ് വിടർന്നു. ആക്ച്വലി അവന് ഇത്രേം നേരം കണ്ണ് നേരെ ചൊവ്വേ കാണുന്നില്ലായിരിന്നു. കണ്ണട കിട്ടിയപ്പോൾ അവൻ എന്നെ നോക്കി പുഞ്ചിരിച്ചു.
” നീ എന്തിനാ കടലിൽ ഇറങ്ങിയത്? ” ഞാൻ അവനോട് ചോദിച്ചു. അവൻ ആദ്യം ഒന്ന് മടിച്ചു, പറയണോ വേണ്ടയോ എന്ന് ആലോചിക്കും പോലെ.
” അത് മ്മായെ കാനാൻ ” അവൻ പിന്നെ മറുപടി തന്നു.
” അമ്മ കടലിന്റെ അടിയിൽ ഉണ്ടെന്ന് ആരാ നിന്നോട് പറഞ്ഞേ?? ”
” ആ ചേച്ചി ”
” ഏത് ചേച്ചി?? ”
” മുടി ഇല്ലാത്ത ചേച്ചി ”
” അഞ്ചു ” അവൻ അത് പറഞ്ഞപ്പോൾ ആളെ മനസ്സിലായ ഞാൻ മന്ത്രിച്ചു.
” ആ ചേച്ചിയാ മ്മേ കാനാ ന്നേ പറഞ്ഞു വിട്ടേ ” അവൻ കൂട്ടിച്ചേർത്തു.
” mmm ” അന്നേരം ഞാൻ ഒന്ന് മൂളി. പിന്നെ അവന്റെ തലമുടി കൈ കൊണ്ട് ഒന്ന് ഇളക്കി വിട്ടിട്ട് ഞാൻ എഴുന്നേറ്റു. അവൻ കെറുവിച്ച ഭാവത്തിൽ അവന്റെ മുടി നേരെയാക്കി. പിന്നെ എന്നെ കലിപ്പിൽ നോക്കി. ഞാൻ ഒന്ന് ചിരിച്ചിട്ട് അച്ചുന്റെ റൂമിലേക്ക് ചെന്നു. അഞ്ചു അവിടെ ഉണ്ടായിരുന്നില്ല. വീട് മുഴുവൻ അവളെ നോക്കിയെങ്കിലും കണ്ടില്ല. ഞാൻ പുറത്തേക്ക് ഇറങ്ങി അന്നേരം പൂളിന്റെ സൈഡ് മാറി കാൾ ചെയ്തു നിൽക്കുന്ന അവളെ ഞാൻ കണ്ടു. ഞാൻ അവളുടെ അടുത്തേക്ക് നടന്നു.
” ഹായ് ചേട്ടായി ” എന്നെ കണ്ടതും അഞ്ചു ഫോൺ കട്ട് ചെയ്തിട്ട് എന്റെ നേരെ തിരിഞ്ഞു.
” നീയാണോ ആ ചെറുക്കന് കടലിന്റെ അടിയിൽ അവന്റെ അമ്മ ഉണ്ടെന്ന് പറഞ്ഞു കൊടുത്തത്?? ” ഞാൻ നേരെ വന്ന കാര്യം ചോദിച്ചു. അവൾ ആദ്യം ഒന്ന് ഞെട്ടി. പിന്നെ പുഞ്ചിരിച്ചു..
” ചേട്ടായി അറിഞ്ഞോ, ആഹ് ഞാനാ ”
” നീ എന്തിനാ അവനോട് അങ്ങനെ ഒക്കെ പറഞ്ഞു കൊടുത്തേ, അത് കൊണ്ടല്ലേ നിന്റെ കണ്ണ് വെട്ടിയപ്പോ അവൻ കടലിൽ ഇറങ്ങിയേ?? ആ ചെറുക്കന് അഞ്ചു പൈസയുടെ കുറവ് ഉള്ള കാര്യം നിനക്ക് അറിഞ്ഞൂടെ??”
” അതിന് എന്റെ കണ്ണ് വെട്ടിയപ്പൊ അല്ലൊല്ലോ, ഞാൻ അല്ലേ അവനെ കടലിലേക്ക് ഇറക്കി വിട്ടേ?? ” എന്തോ നിസാര കാര്യം പോലെ അവൾ പറഞ്ഞത് കേട്ട് ഞാൻ ശരിക്കും ഞെട്ടി.
” എന്താ?? ” എന്റെ ഞെട്ടൽ ആ ചോദ്യത്തിൽ ഉണ്ടായിരുന്നു.
” എനിക്ക് അറിയാം ആ ചെറുക്കനേം പെണ്ണിനേം ചേട്ടായിക്ക് ഇഷ്ട്ടം അല്ലെന്ന് എനിക്ക് നന്നായി അറിയാം, ആ ചെക്കൻ തീർന്നാൽ ചേട്ടായി ഹാപ്പിയാവുമല്ലോ. ശരിക്കും അവന്റെ കഥ കഴിയേണ്ടതായിരുന്നു അപ്പോഴാ ചേട്ടായിടെ പുന്നാര കെട്ടിയോൾ ഇടക്കിട്ട് കേറി അവനെ രക്ഷിച്ചത്. ” അവൾ അത് പറഞ്ഞപ്പോൾ ഒരു തരിപ്പോടെ കേട്ടു നിൽക്കാനേ എനിക്ക് പറ്റിയുള്ളൂ. ഒരു തരം വന്യതയായിരുന്നു അപ്പോൾ അഞ്ചുവിൽ.