“ഹലോ മേഡം,” അവളുടെ ശബ്ദത്തിൽ മയങ്ങി നിന്നിരുന്ന ഞാൻ പെട്ടന്ന് ബോധവാനായി മാറി സംസാരിച്ചു. “ഞാൻ ഇവിടെ ലോഡ്ജ് റിസപ്ഷനിൽ നില്ക്കുകയാണ്. എനിക്കൊരു റൂം ബുക്ക് ചെയ്യണം.” ഹിന്ദിയില് ഞാൻ പറഞ്ഞു.
“ഓക്കെ, അവിടെ വെയിറ്റ് ചെയ്യൂ. പത്ത് മിനിറ്റിൽ ഞാൻ വരാം.” ആ സ്ത്രീ ശബ്ദം എന്നോട് പറഞ്ഞിട്ട് കോൾ കട്ടാക്കി.
എന്റെ മൊബൈൽ പോക്കറ്റിലിട്ടിട്ട് ഞാൻ പോയി അവിടെ ഉണ്ടായിരുന്ന വലിയ കൂഷൻ ബെഞ്ചിന്റെ ഒരു അറ്റം ചേര്ന്നിരുന്നു.
ആറു മിനിറ്റിൽ തന്നെ റിസപ്ഷന്റെ സൈഡിലായി കുറച്ച് മാറി ഉണ്ടായിരുന്ന ലിഫ്റ്റിൽ നിന്നും ബെല്ല് ശബ്ദം കേട്ട് ഞാൻ അങ്ങോട്ട് നോക്കി.
അതിസുന്ദരിയായ ഒരു പെണ്ണാണ് ലിഫ്റ്റിൽ നിന്നിറങ്ങിയത്. ലിഫ്റ്റിൽ നിന്നിറങ്ങിയ ഉടനെ അവളുടെ നോട്ടം എന്റെ മേല് വീണു. അവള് പുഞ്ചിരിച്ചു. എന്നെത്തന്നെ നോക്കി പഠിച്ചു കൊണ്ട് നടന്നു വന്ന് അവള് റിസപ്ഷനിൽ കേറി. ഞാനും എഴുനേറ്റ് റിസപ്ഷനു മുന്നില് പോയി നിന്നു.
അവള്ക്ക് വെറും 22 വയസ്സ് എന്നെ ആരും പറയുകയുള്ളു. പക്ഷേ കണ്ണിലൂടെ വളരെ ഡീപ്പായി നോക്കി മനസ്സിലാക്കാൻ സ്വയം പഠിച്ചിരുന്നത് ഞാൻ അവളുടെ യഥാർത്ഥ വയസ് ഊഹിച്ചു. 28 അല്ലെങ്കിൽ 29. അപ്പൊ എന്റെ അതേ പ്രായമാണ് അവള്ക്ക്.
അവളുടെ കൈകളിൽ പല ഭാഗത്തായി പല ഷേപ്പിലുള്ള മങ്ങിപോയ പഴയ പൊള്ളലേറ്റ പാടുകള് ഉണ്ടായിരുന്നു. അതുപോലെ കഴുത്തിൽ ചില ഭാഗങ്ങളിൽ ഉണ്ടായിരുന്നു. മനപ്പൂര്വ്വം ആരോ അവളെ പൊള്ളിച്ച് ടോർച്ചർ ചെയ്ത പാടുകളാണെന്ന് എനിക്ക് വ്യക്തമായി തന്നെ പറയാന് കഴിയുമായിരുന്നു. എന്റെ മനസ്സ് പെട്ടന്ന് വിറങ്ങലിച്ചു പോയി.
ഏത് അപരാധിയാണ് ഈ ക്രൂരത കാണിച്ചത്..!! എന്തിനായിരിക്കും മനുഷ്യത്വമിലാലാതെ അവളോട് അങ്ങനെ ചെയ്തത്..!! എനിക്ക് നല്ല ദേഷ്യവും സങ്കടവും വന്നുപോയി.
എന്തൊക്കെയായാലും അവളുടെ കണ്ണുകളിൽ ഒരു അസാധാരണ കരുത്തിന്റെ തിളക്കം ഉണ്ടായിരുന്നു. പക്ഷേ ആത്മവിശ്വാസം നിറഞ്ഞ കണ്ണുകൾ ആണെങ്കിലും കൂടി ജീവിതം മടുത്തത് പോലത്തെ ഒരു നെഗറ്റീവ് എനർജിയാണ് അവളിൽ നിന്നും വരുന്നതായി എനിക്ക് ഫീൽ ചെയ്തു കൊണ്ടിരുന്നത്. ചിലപ്പോ ഒരു വൈദ്യന് ആയത് കൊണ്ടാവും ഇങ്ങനെയുള്ള കാര്യങ്ങൾ എനിക്ക് പെട്ടന്ന് മനസ്സിലാക്കാൻ കഴിയുന്നത്.
ഞാൻ അവളുടെ കണ്ണുകളിലേക്ക് നോക്കി. അപ്പൊ അവളുടെ സൂക്ഷ്മതയുള്ള നോട്ടം എന്റെ കണ്ണുകളിലൂടെ തുളച്ച് എന്റെ മനസ്സിലേക്ക് ആഴ്ന്നിറങ്ങി ചെന്നത് പോലെ തോന്നി.
അവള് വന്നത് തൊട്ടേ ഒരു സത്യസന്ധമായ പുഞ്ചിരി അവളുടെ ചുണ്ടുകളിൽ നിറഞ്ഞു നിന്നിരുന്നെങ്കിലും അവളുടെ മനസ്സിൽ വെറും വിഷമങ്ങളും ഭാരങ്ങളും മാത്രം നിറഞ്ഞു നില്ക്കുന്നത് അവളുടെ കണ്ണുകളിൽ നിന്നും എനിക്ക് മനസ്സിലാക്കാൻ കഴിഞ്ഞായിരുന്നു. കൂടാതെ വര്ഷങ്ങളായി ശെരിക്കുള്ള റെസ്റ്റ് കിട്ടാത്തത് പോലത്തെ ക്ഷീണവും അവളുടെ കണ്ണുകളിൽ ഞാൻ കണ്ടു.
എന്നെ ഏറ്റവും കൂടുതലായി ആകര്ഷിച്ചത് എന്തെന്ന് വച്ചാല്, അവളെ പൂര്ണമായി വിശ്വസിക്കാൻ കഴിയുമെന്ന് എന്റെ മനസ്സിൽ പെട്ടന്ന് നിറഞ്ഞു തുളുമ്പി നിന്ന ചിന്തയാണ്…, അത്ര പെട്ടന്ന് എനിക്ക് ആരോടും തോന്നാത്ത ഒരു വികാരമായിരുന്നു അത്.
അവളെ വിശ്വസിച്ച് എത്ര വലിയ ഉത്തരവാദിത്തങ്ങളും ഏല്പിക്കാൻ കഴിയുമെന്നും എന്റെ മനസ്സ് എന്നോട് മന്ത്രിച്ചു കൊണ്ടിരുന്നു. അവളെ എന്റെ ഏതെങ്കിലും പ്രധാനപ്പെട്ട ബിസിനസ്സിന്റെ ഹെഡ് സ്റ്റാഫായി നിയമിക്കാന് അര്ഹയായവളാണ് എന്നും എന്റെ മനസ്സ് മന്ത്രിച്ചു കൊണ്ടിരുന്നു.
സാധാരണയായി എന്റെ മനസ്സിൽ ചിലരോട് ഇങ്ങനത്തെ തോന്നലുകള് ഉണ്ടായപ്പോൾ മാത്രമാണ് അവരെ ഞാൻ സെലക്റ്റ് ചെയ്ത് എന്റെ പല ബിസിനെസ്സുകളുടേയും നടത്തിപ്പുകിരായി ഞാൻ നിയമിച്ചിരുന്നത്.
ഇപ്പൊ ദാ, ഈ സുന്ദരി പെണ്ണിനെ കണ്ടപ്പോഴും അതേ സൂചനകൾ എന്റെ മനസ്സ് തന്നു കൊണ്ടിരിക്കുന്നു. ഈ നല്ല സൂചനയേ ഞാൻ സീരിയസ്സായി തന്നെ എടുക്കാൻ തീരുമാനിച്ചു. ഇവളെ പോലെയുള്ളവരേയാണ് എനിക്ക് എന്റെ ബിസിനസ്സിൽ വേണ്ടത്. പക്ഷേ ഇവൾക്ക് താൽപര്യം ഉണ്ടാവുമോ എന്നാണ് ആദ്യം അറിയേണ്ടത്. എന്തായാലും വഴിയേ നോക്കാം.