“അടുത്തടുത്തായി രണ്ട് റൂമുകൾ ഉണ്ടോന്ന് ചോദിച്ച് നോക്കാം.” ഹോട്ടലിന് പുറത്ത് വച്ച് അവളോട് ഞാൻ പറഞ്ഞു.
“ജിനു, നമ്മൾ രാവിലെ നാല് മണിക്ക് ഇവിടെ നിന്ന് തിരിക്കുമെന്നല്ലേ നീ പറഞ്ഞത്. വെറും നാലോ അഞ്ചോ മണിക്കൂര് റസ്റ്റ് എടുക്കാനായി എന്തിനാ രണ്ട് റൂം. ഒന്ന് മതി.” അവള് പറഞ്ഞു.
“ധ്വനി നമ്മൾ ഒരുമിച്ച്—”
“എനിക്ക് നിന്നെ വിശ്വാസമാണ് ജിനു.”
“എന്നാലും ധ്വനി—”
“നിന്റെ കൈയിൽ ഒരുപാട് കാശുണ്ടെന്നറിയാം. അതുകൊണ്ട് അതിന്റെ വില നിനക്കറിയില്ലേ. പക്ഷേ എനിക്കറിയാം. ഒരു റൂം മാത്രം ബുക്ക് ചെയ്താല് മതി ജിനു. നമുക്ക് അഡ്ജസ്റ്റ് ചെയ്യാം.” ഇനി തർക്കികരുത് എന്നപോലെ അവള് കടുപ്പിച്ച് പറഞ്ഞു.
പിന്നേ ഞാൻ തര്ക്കിച്ചില്ല. ഞങ്ങൾ അകത്ത് പോയി ഒരു ചെറിയ ഫാമിലി റൂം ബുക്ക് ചെയ്തിട്ട് അവിടെ നിന്നും കിട്ടിയ കീ കാർഡും വാങ്ങി ആദ്യത്തെ നിലയില് തന്നെ കിട്ടിയ റൂം ലക്ഷ്യമാക്കി നടന്നു.
കീ കാർഡ് ഉപയോഗിച്ച് ഡോർ തുറന്ന് റൂമിൽ കേറി ഡോർ ലോക്ക് ചെയ്തിട്ട് ഞാൻ അവളെ നോക്കി.
“ആദ്യം ഞാൻ പോയി കുളിച്ചിട്ട് വരാം.” പുഞ്ചിരിയോടെ പറഞ്ഞിട്ട് അവളുടെ പുതിയ ഷോൾഡർ ബാഗ് അവിടെ ഉണ്ടായിരുന്ന മേശപ്പുറത്തു കൊണ്ട് വച്ചിട്ട് ബാഗ് തുറന്ന് വേണ്ടതൊക്കെ എടുത്തുകൊണ്ട് അവള് ചെന്ന് ബാത്റൂമിൽ കേറി.
ഞാനും എന്റെ ചെറിയ ഷോൾഡർ ബാഗ് അവളുടെ ബാഗിനടുത്തായി കൊണ്ട് വച്ചിട്ട് കുളിച്ച് മാറാനുള്ള ഡ്രെസ്സും ടവലും എടുത്ത് പുറത്ത് വച്ചു. എന്നിട്ട് ഒരു സ്റ്റീല് ചെയറിൽ ചെന്നിരുന്നു.
ഈ വിശാലമായ റൂമിൽ ഡബിൾ ബെഡ്ഡായത് കൊണ്ട് രണ്ടുപേര്ക്ക് ബെഡ്ഡിൽ സുഖമായി കിടക്കാൻ കഴിയുമായിരുന്നു. പുറത്ത് സെക്യൂരിറ്റി ഉള്ളതുകൊണ്ട് എന്റെ വണ്ടിയെ കുറിച്ചുള്ള ആശങ്കയും ഇല്ലായിരുന്നു.
റൂമിൽ ബെഡ്ഡ് കൂടാതെ ഒരു വലിയ മേശയും, ചെറിയ ടീപോയും, കുഷൻ സീറ്റുള്ള മൂന്ന് സ്റ്റീല് ചെയറും, മൂന്ന് പേര്ക്ക് ഇരിക്കാനുള്ള ഒരു ലെദർ സോഫയും ഉണ്ടായിരുന്നു. ഫാമിലി റൂം എന്നാണ് പേര്, പക്ഷേ ഇത്രയും സൗകര്യങ്ങള് മാത്രമേ ഉണ്ടായിരുന്നുള്ളു. വേറെ എക്സ്ട്രാ റൂമോ, തുണി അലക്കി വിരിക്കാൻ സൗകര്യത്തിന് പോലെ ഒരു ചെറിയ ബാൽക്കനിയോ ഇല്ലായിരുന്നു.
ധ്വനി കുറച്ച് മുമ്പ് വിചാരിച്ച് പറഞ്ഞത് പോലെ എനിക്ക് കാശിന്റെ വില അറിയാത്തത് കൊണ്ടൊന്നുമല്ല, സാഹചര്യം കണ്ടത് പോലെയാണ് ഞാൻ എപ്പോഴും ചിലവാക്കാറുള്ളത്. എന്റെ മനസ്സിന് ഇഷ്ട്ടപ്പെട്ടു പോയാൽ ആ ആള്ക്ക് വേണ്ടി കോടികൾ വേണമെങ്കിലും ചിലവാക്കാൻ ഞാൻ മടിക്കില്ല.
അങ്ങനെ ഓരോന്ന് ആലോചിച്ച് സമയം പോയത് ഞാൻ അറിഞ്ഞില്ലായിരുന്നു.
“എന്താ ലോകം മറന്ന് ഇത്രയും ചിന്തിക്കുന്നത്…? എന്നെ കൂടെ കൂട്ടിയത് ബുദ്ധിമുട്ടായോ..?” കുളി കഴിഞ്ഞ് പുറത്തേക്ക് വന്ന് ആശങ്കയോടെ ധ്വനി ചോദിച്ചത് കേട്ടാണ് എന്റെ ചിന്തയില് നിന്നും ഞാൻ ഉണര്ന്നത്.
“യേയ്, വെറുതെ അങ്ങനെയൊന്നും നീ ചിന്തിക്കാതെ ധ്വനി, വെറുതെ ഒരു തീരുമാനം ഞാൻ എടുക്കില്ല, പക്ഷേ എടുത്ത തീരുമാനം ഓര്ത്ത് ഒരിക്കലും ഞാൻ ദുഃഖിച്ചിട്ടില്ല, ദുഃഖിക്കേണ്ട കാര്യവും എനിക്ക് ഉണ്ടായിട്ടില്ല. …?” ഞാൻ പുഞ്ചിരിയോടെ പറഞ്ഞു.
അപ്പോഴാണ് അവളുടെ മുഖം ഒന്ന് തെളിഞ്ഞത്. അന്നേരമാണ് അവള് ഇട്ടിരിക്കുന്ന ഡ്രെസ്സ് ഞാൻ കണ്ടത്.
ഒരു കറുത്ത സ്ലീവ് ലെസ് ഹാഫ് ടോപ്പും, ഒലിവ് കളർ പാന്റും ആയിരുന്നു വേഷം. കാല് മുട്ടിന് ഒരല്പ്പം താഴെ വരെ മാത്രമേ പാന്റിന് ഇറക്കം ഉണ്ടായിരുന്നുള്ളു. തോളിൽ ചെറിയ വള്ളി ഒഴികെ അവളുടെ തോളും കൈകളും വയറുമൊക്കെ നഗ്നമായിരുന്നു. ആ നഗ്ന വെളുത്ത ഭാഗങ്ങളിൽ ഒക്കെ ഇടവിട്ടിടവിട്ട് അവളുടെ അച്ഛൻ പൊള്ളിച്ച മങ്ങിയ പാടുകള് കണ്ടപ്പോ എനിക്ക് സങ്കടം തോന്നി. എത്ര വേദന അവള് അനുഭവിച്ചിട്ടുണ്ടാകും..!!