സെമി ജയിച്ചതിന്റെ പിറ്റേന്ന് ഹോളിഡേ ആയിരുന്നു. കുറെ ദിവസം ആയി ഫുഡ്‌ ഓർഡർ ചെയ്തു വരുത്തിച്ചത് കൊണ്ട് എനിക്ക് ആകെ മടുത്തു. അത് കൊണ്ട് ഇന്ന് എഴുന്നേറ്റ് ഇവിടെ തന്നെ എന്തെങ്കിലും ഉണ്ടാക്കാം എന്ന് കരുതി അടുക്കളയിൽ കയറി. ഫുഡ്‌ റെഡി ആയി കൊണ്ട് ഇരിക്കുമ്പോളാണ് കോളിങ് ബെല്ലിന്റെ ശബ്ദം കേൾക്കുന്നത്.. ആരാണ് ഈ രാവിലെ എന്നെ കാണാൻ വന്നതെന്ന് മനസ്സിൽ ഓർത്ത് ഞാൻ ഡോർ തുറന്നു..
‘നീ ഇവിടെ ഉണ്ടായിരുന്നോ..? ഞാൻ കരുതി നാട് വിട്ടു പോയി കാണുമെന്ന്..’
ഇഷാനി സ്വല്പം ദേഷ്യത്തിൽ ആണ് അത് പറഞ്ഞത്
‘നീ എന്താ ഇവിടെ.. ഇങ്ങോട്ട് വന്നതാണോ..?
ഞാൻ അവളെ പെട്ടന്ന് കണ്ട അന്ധാളിപ്പിൽ ചോദിച്ചു
‘ഇങ്ങോട്ട് തന്നെ വന്നതാ.. നിന്നെ ഒന്ന് കാണാൻ..’
അവൾ നല്ല ദേഷ്യത്തിൽ ആണെന്ന് തോന്നുന്നു
‘എന്നാൽ വെളിയിൽ നിക്കാതെ വാ.. ‘
ഞാൻ അവളെ അകത്തോട്ടു ക്ഷണിച്ചു
‘ നീ എന്താ ഇപ്പോൾ എന്നെ ഒഴിവാക്കുന്നെ..? ഞാൻ എന്തെങ്കിലും തെറ്റ് ചെയ്തോ നിന്നോട്..?
ഇഷാനി സംശയഭാവത്തിൽ എന്റെ മുഖത്തേക്ക് സൂക്ഷിച്ചു നോക്കികൊണ്ട് ചോദിച്ചു
‘ എന്ത് തെറ്റ്.. ആര് ഒഴിവാക്കി എന്ന്.. നീ വാ..’
ഞാൻ അവളുടെ കയ്യിൽ പിടിച്ചു അകത്തേക്ക് കയറ്റാൻ നോക്കിയപ്പോൾ ബലം പിടിച്ചു അവൾ കൈ വിടുവിച്ചു
‘ ഇല്ല.. നീ എന്തോ ഒളിച്ചു വയ്ക്കുന്നുണ്ട്.. പണ്ടത്തെ പോലെ നമ്മൾ പിന്നെയും കമ്പനി ആയി വന്നതല്ലേ.. ഇപ്പോൾ നീ ആയിട്ട് എന്നെ അവോയ്ഡ് ചെയ്യുന്നു. ക്ലാസ്സിൽ വരില്ല, ഞാൻ വിളിച്ചാൽ എടുക്കില്ല. നിന്നെ കാണാൻ തന്നെ ഞാൻ എത്ര തവണ വന്നെന്നു അറിയാമോ..?
ഇഷാനി സങ്കടത്തോടെ ചോദിച്ചു
‘എടി അങ്ങനെ ഒന്നും ഇല്ല. ഞാൻ ആകെ മടുപ്പ് അടിച്ചത് കൊണ്ട് ക്ലാസ്സിലേക്ക് ഒന്നും ഇറങ്ങാഞ്ഞത് ആണ്..’
ഞാൻ അവളുടെ ചോദ്യങ്ങളെ എല്ലാം ഒഴിവാക്കാൻ ശ്രമിച്ചു
‘സത്യം പറ.. ഞാൻ അറിയാതെ വല്ലതും പറഞ്ഞോ നിന്നോട്.. എന്റെ ഭാഗത്തു നിന്ന് എന്തെങ്കിലും മിസ്റ്റേക്ക് വന്നോ..?
ദേഷ്യം മാറി സങ്കടത്തിന്റെ രീതിയിൽ ആണ് അവൾ അത് ചോദിച്ചത്
‘എന്റെടി ഒന്നും ഇല്ലെന്ന്.. ഫൈനൽ കഴിഞ്ഞാൽ ഞാൻ പഴയ പോലെ ക്ലാസ്സിൽ തന്നെ കാണും.. നീ ഇങ്ങോട്ട് വാ..’
ഞാൻ അവളെ നിർബന്ധിച്ചു വീട്ടിലേക്ക് കയറ്റി
‘അതിന് മുമ്പുള്ള കളികൾ ഒക്കെ ജയിച്ചപ്പോൾ ഓടി വന്നു ആദ്യം എന്റെ അടുത്ത് പറഞ്ഞവനാ.. ഇപ്പോൾ സെമി ജയിച്ചിട്ട് ഒരു മെസ്സേജ് പോലും ഇട്ടില്ല.. കൊള്ളാമെടാ നീ..’
ഇഷാനി പരിഭവത്തോടെ പറഞ്ഞു
‘എടി സത്യം പറഞ്ഞാൽ കുറച്ചു ദിവസം ഒറ്റയ്ക്ക് ഇരിക്കാൻ തോന്നി. മനസിന് ഒരു റിഫ്രഷ് കിട്ടാൻ.. അല്ലാതെ നിന്നെ ഒഴിവാക്കിയത് ഒന്നും അല്ലായിരുന്നു..’
‘എന്നാൽ ഒറ്റയ്ക്ക് ഇരുന്നോ.. ഞാൻ ശല്യം ആകുന്നില്ല..’
ഇഷാനി പോകാനായി തിരിഞ്ഞു. അവൾ വാതിൽക്കലേക്ക് എത്തുന്നതിനു മുമ്പ് ഞാൻ അവളുടെ മുന്നിൽ കയറി വട്ടം നിന്നു..
‘നീ ആദ്യായിട്ട് ഇവിടെ വരുന്നതല്ലേ.. പിണങ്ങി പോകാതെ..’
ഞാൻ അവളെ പിടിച്ചു കസേരയിൽ ഇരുത്തി.. അപ്പോളാണ് അടുക്കളയിൽ നിന്ന് കുക്കറിൽ വിസിൽ അടിച്ചത്
‘ഞാൻ ദേ ഇപ്പോൾ വരാം.. അടുക്കളയിൽ ചെറിയ പണി.. നീ വല്ലതും കഴിച്ചാരുന്നോ..?
‘ഞാൻ കഴിച്ചു. നീ ഇത് വരെ കഴിച്ചില്ലേ.. സമയം എത്ര ആയീന്നാ..?
ഇഷാനി വാച്ചിലേക്ക് നോക്കി
‘ഓ രാവിലെ എഴുന്നേൽക്കാൻ ഒന്നും വയ്യാ.. നീ ഇവിടെ ഇരി.. പോകല്ലേ.. ഒരു ടൂ മിനിറ്റ്സ്..’
അവളെ അവിടെ ഇരുത്തി ഞാൻ അടുക്കളയിലേക്ക് ഓടി..
ഇഷാനി അവിടെ ഇരുന്ന് അർജുന്റെ വീട് മൊത്തത്തിൽ ഒന്ന് കണ്ണോടിച്ചു.. രണ്ട് മുറി, ഒരു ഹാൾ, ഒരു കിച്ചൺ, ഒരു ബാത്രൂം.. മൊത്തത്തിൽ സൗകര്യം ഒക്കെ ഉള്ള ഒരു കുഞ്ഞു വീട്.. വീടിന് വൃത്തിക്കുറവ് ഒന്നും ഇല്ലെങ്കിലും ഒരു ചെറുപ്പക്കാരൻ താമസിക്കുന്ന ഇടത്തു കാണുന്ന അലങ്കോലങ്ങൾ ഒക്കെ ഇവിടെയും ഉണ്ട്. അലക്കാനായി ഒരു മൂലയ്ക്ക് കൂട്ടി ഇട്ടിരിക്കുന്ന തുണികൾ, അലക്ഷ്യമായി ഊരി ഇട്ടിരിക്കുന്ന ഷൂസ്, കാപ്പി കുടിച്ചിട്ട് കട്ടിലിന് അടിയിൽ തന്നെ വച്ചിട്ട് പോയ ഗ്ലാസ്.. അങ്ങനെ വീടിന്റെ ഓരോ മൂലയിലും ഇഷാനിയുടെ കണ്ണുകൾ എത്തി..
‘നിനക്ക് ഇവിടൊക്കെ കുറച്ചു മെന ആയിട്ട് കൊണ്ട് പൊയ്ക്കൂടേ..?
ഇഷാനി ചോദിച്ചു
‘ഇപ്പോൾ എന്താണ് കുഴപ്പം.. എല്ലാം അടിപൊളി ആണല്ലോ..’
അടുക്കളയിൽ നിന്ന് ഹാളിലേക്ക് വന്നു ഞാൻ മറുപടി കൊടുത്തു. ഹാളിൽ വന്നപ്പോൾ അവൾ എല്ലാം ഒന്ന് അടുക്കി പെറുക്കി വക്കുവാണ്..
‘ഭയങ്കരം തന്നെ.. ഈ സോഫയിലെ വിരിപ്പ് എങ്കിലും നിനക്ക് ഒന്ന് നേരെ വിരിച്ചൂടെ..?
‘അത് നേരെ തന്നെ ആണ് കിടക്കുന്നത്.. നിനക്ക് ഓസിഡി വല്ലതും കാണും. അതാ എത്ര വൃത്തിയിൽ ഇരുന്നിട്ടും വൃത്തി ആകാത്ത പോലെ തോന്നുന്നത്..’
ഞാൻ അവളെ കളിയാക്കുന്ന പോലെ പറഞ്ഞു
‘ഓസിഡി നിന്റെ മറ്റവൾക്കാ..’
ഇഷാനി പതിയെ പറഞ്ഞു…
‘എന്താ..?
അവൾ പറഞ്ഞത് ഞാൻ ശരിക്കും കേട്ടില്ല
‘നിനക്ക് പുസ്തകം വായിക്കുന്ന ശീലം ഒക്കെ ഉണ്ടല്ലേ.. ‘
വിഷയം മാറ്റാൻ അവൾ പുസ്തകം അടുക്കി വച്ചിരിക്കുന്ന ഷെൽഫിലേക്ക് നോക്കി പറഞ്ഞു
‘ആ ഉണ്ടായിരുന്നു.. ഇപ്പോൾ കുറവാണ്.. വീട്ടിൽ ഒരു ലൈബ്രറിക്കുള്ള പുസ്തകം ഉണ്ട്..’
ഞാൻ പറഞ്ഞു
‘ആഹാ.. എന്നെ ഒരു ദിവസം കൊണ്ട് പോ എന്നാൽ.. എനിക്ക് ഫ്രീ ആയിട്ട് കുറെ ബുക്ക്സ് എടുത്തോണ്ട് വരാമല്ലോ..’
അവൾ ഷെൽഫിലെ ബുക്ക്സ് നോക്കികൊണ്ട് പറഞ്ഞു
‘നിന്റെ ഷോപ്പിലെ ബുക്സ് ഒക്കെ വായിച്ചു തീർത്തോ.. അവിടെ പണി എടുക്കാൻ പോയിട്ട് ഗ്യാപ്പിൽ ഇരുന്ന് വായന ആണല്ലോ പണി..’
എന്റെ ചോദ്യം ഗൗനിക്കാതെ ഇഷാനി പെട്ടന്ന് ഷെൽഫിൽ നിന്നും കുറച്ചു വലിയ ഒരു ബുക്ക്‌ കൈ നീട്ടി എടുത്തു
‘എടാ ഇത് നമ്മുടെ അറ്റൻഡൻസ് രജിസ്റ്റർ അല്ലേ..? ഈയിടെ കാണാതെ പോയത്..? അതെങ്ങനെ ഇവിടെ വന്നു..?
അവൾ അത്ഭുതത്തോടെ രജിസ്റ്റർ മറിച്ചു കൊണ്ട് ചോദിച്ചു
‘അയ്യോ ശരിയാണല്ലോ.. ഇതെങ്ങനെ ഇവിടെ വന്നു..?
ഞാൻ ഒന്നും അറിയാത്ത പോലെ വെറുതെ അഭിനയിച്ചു.. എന്റെ അഭിനയം അവൾക്ക് പിടി കിട്ടി
‘എടാ ദ്രോഹി.. അപ്പോൾ നീയാണല്ലോ ഇത് മാറ്റിയത്.. എന്നിട്ട് നമ്മുടെ ക്ലാസ്സിനെ മൊത്തത്തിൽ ചീത്ത കേൾപ്പിച്ചില്ലേ..’
‘അത് പിന്നെ എനിക്ക് എക്സാം എഴുതാൻ ഉള്ള അറ്റൻഡൻസ് പോലും ഇല്ലായിരുന്നു.. വേറെ വഴി ഒന്നും കണ്ടില്ല. കിട്ടിയ ഗ്യാപ്പിൽ ഇത് മുക്കി..’
‘കണ്ട പെണ്ണുങ്ങളുടെ പുറകെ നടന്നു ക്ലാസ്സിൽ കയറാതെ ഇരുന്നാൽ അറ്റന്റൻസ് കിട്ടില്ല..’
ഇഷാനി സ്വല്പം ഗർവ്വോടെ എന്നെ നോക്കി പറഞ്ഞു
