‘സത്യം.. നിന്റെ കൂടെ നടക്കുമ്പോ ആണ് എനിക്കിങ്ങനെ പണി കിട്ടുന്നത്..’
അവൾ ചിരിച്ചു കൊണ്ട് പറഞ്ഞു. അവളുടെ നാക്ക് ചെറുതായ് കുഴയുന്ന പോലെ. സംസാരം കേൾക്കാൻ എന്നാലും നല്ല രസമുണ്ടായിരുന്നു..
‘ഞാൻ ഉള്ളത് കൊണ്ട് നീ ഇതൊക്കെ എക്സ്പീരിയൻസ് ചെയ്തു..’
ഞാൻ പറഞ്ഞു
‘ അങ്ങനെയും പറയാം.. ആദ്യമായി ബൈക്കിൽ കയറിയത്, ആദ്യമായി ഓടി അണച്ചത്, ആദ്യമായ് പോയത് അങ്ങനെ എല്ലാം നീ കാരണമാണ്..’
‘ഇനി എന്തേലും ഒക്കെ എക്സ്പീരിയൻസ് ചെയ്യാൻ ആഗ്രഹം ഉണ്ടേൽ പറ..’
ഞാൻ ചിരിച്ചു കൊണ്ട് പറഞ്ഞു
‘എന്ത് പറഞ്ഞാലും സാധിച്ചു തരുമോ..?
അവൾ ചിരിച്ചു കൊണ്ട് ചോദിച്ചു
‘നീ പറയെന്നെ..’
‘ഇപ്പോൾ തന്നെ സാധിച്ചു തരണം..’
അവൾ പറഞ്ഞു
‘ഇപ്പോളോ..? ഇപ്പോൾ ഇവിടെ വച്ചു പറ്റുന്ന വല്ലതും ആണേൽ ചെയ്യാം..’
ഞാൻ പറഞ്ഞു
‘ചെയ്യാമെന്ന് ഉറപ്പ് തരുവാണേൽ പറയാം..’
അവൾ പറഞ്ഞു
‘നീ കാര്യം പറയാതെ എങ്ങനെ ഉറപ്പ് പറയും..?
ഞാൻ ചോദിച്ചു
‘സാധിച്ചു തരുമോ.. ഇല്ലയോ..?
അവൾ ചോദിച്ചു
‘തരാം.. നീ എന്താണെന്ന് പറ…’
‘എനിക്കൊരു ഉമ്മ വേണം…!
യാതൊരു മടിയും കൂടാതെ ഒരു കള്ളച്ചിരിയോടെ അവൾ പറഞ്ഞു
‘ഫിറ്റ് ആയോ മോളെ..?
ഞാൻ ഉറക്കെ ചിരിച്ചു കൊണ്ട് ചോദിച്ചു
‘അല്ലടാ.. എനിക്കിത് വരെ ഉമ്മ കിട്ടിയിട്ടില്ല.. ഇപ്പോൾ ഉമ്മ വേണമെന്ന് തോന്നി..’
അവൾ പറഞ്ഞു
‘അതിനെന്താ ഇപ്പോൾ തന്നേക്കാം.. ഞാൻ തമാശക്ക് അവളുടെ മുഖം എന്റെ മുഖത്തേക്ക് അടുപ്പിച്ചു.. അവൾ കണ്ണടച്ചു എന്റെ മുഖത്തിന് നേർക്ക് നിന്നു.. ഞാൻ വീണ്ടും മുഖം അടുപ്പിച്ചു.. ഇപ്പോൾ അവളുടെ ശ്വാസം എനിക്ക് അനുഭവിച്ചു അറിയാം.. അത്രക്കും അടുത്ത്.. പെട്ടന്നൊരു നിമിഷം എന്റെ തമാശ എന്റെ കയ്യിൽ നിന്ന് പോകുന്ന പോലെ എനിക്ക് തോന്നി.. എന്റെ കൈകുമ്പിളിൽ അവളുടെ മുഖം ഉണ്ട്. എന്റെ ചുണ്ടിന് തൊട്ടടുത്തായി ഞാൻ എന്നും ആഗ്രഹിച്ചിട്ടുള്ള അവളുടെ ചെഞ്ചുണ്ടുകളും.. ഞാൻ ഒരു നിമിഷം അനങ്ങാതെ ചിന്തിച്ചു കൊണ്ട് ഇരുന്നപ്പോൾ കണ്ണടച്ചു ഇരുന്ന ഇഷാനി കണ്ണ് തുറന്നു. ഞാൻ ഒന്നും ചെയ്യാതെ ഇരിക്കുന്ന കണ്ട ഇഷാനി മെല്ലെ മുഖം എന്റെ നേർക്ക് അടുപ്പിച്ചു.. ഞങ്ങളുടെ ചുണ്ടുകൾ തൊട്ടു തൊട്ടില്ല എന്ന രീതിയിൽ എത്തിയപ്പോൾ ഞാൻ പെട്ടന്ന് ഞെട്ടി പിറകിലേക്ക് മാറി
‘നീ ഫിറ്റാണ്.. ശരിക്കും ഫിറ്റാണ്..’
ഞാൻ വല്ലായ്മയിൽ പറഞ്ഞു
‘നീ എന്തിനാണ് ഒരുമ്മ തരാൻ ഇത്ര പേടിക്കുന്നത്..?
അവൾ ചിരിയോടെ കുഴഞ്ഞു കൊണ്ട് ചോദിച്ചു
‘നീ സീരിയസ് ആയിട്ടാണോ ഇത്രയും നേരം ചോദിച്ചത്..?
ഞാൻ ഒരു പൊട്ടനെ പോലെ ചോദിച്ചു
‘പിന്നെ തമാശക്ക് ആണെന്ന് കരുതിയോ..?
‘എന്റെ ദൈവമേ.. നിന്റെ റിലേ ഇത്രക്ക് പോകാനുള്ളതൊന്നും ഞാൻ ഒഴിച്ചില്ലലോ..?
ഞാൻ തലയിൽ കൈ വച്ചു പറഞ്ഞു.
‘എന്റെ റിലേ ഒന്നും പോയില്ല..’
അവൾ ഈർഷ്യയോടെ പറഞ്ഞു
‘പിന്നെ ബോധം ഉള്ള ആൾ ചോദിക്കുന്ന കാര്യം ആണല്ലോ ഉമ്മ..’
‘എനിക്കെന്താ ഉമ്മ ചോദിച്ചാൽ..?
അവൾ തിരിച്ചു ചോദിച്ചു
‘നീ എന്നോട് ഇഷ്ടം ആണെന്ന് പോലും പറഞ്ഞിട്ടില്ല.. എന്നിട്ടു ഇപ്പോൾ രണ്ട് ബിയർ അടിച്ചപ്പോൾ നിനക്ക് ഉമ്മ വേണമെന്ന്.. അത് റിലേ പോയത് അല്ലാതെ വേറെന്താണ്..?
ഞാൻ ചോദിച്ചു
‘ഇഷ്ടം ആണെന്ന് പറഞ്ഞിട്ടില്ലെന്നോ..? ഞാൻ പറഞ്ഞല്ലോ.. ഇവിടെ വച്ചു തന്നെ പറഞ്ഞല്ലോ..’
അവൾ കുഴയുന്ന സ്വരത്തിൽ മറുപടി തന്നു
‘അത് ഞാൻ നിന്നെ കൊണ്ട് പറയിച്ചത് അല്ലേ..? വേറെ വഴി ഇല്ലാതെ നീ പറഞ്ഞത് അല്ലേ..?
‘എടാ പൊട്ടാ എനിക്ക് ഇഷ്ടം ഇല്ലേൽ നീ എന്നെ കൊല്ലുമെന്ന് പറഞ്ഞാൽ പോലും എന്റെ വായിൽ നിന്ന് നീ ഇഷ്ടം ആണെന്ന് കേൾക്കില്ല..’
‘അപ്പോൾ നീ ശരിക്കും ഇഷ്ടം ആയിട്ട് പറഞ്ഞതാണോ..? എന്നിട്ട് ഞാൻ അത് കാര്യമാക്കുന്നില്ല എന്ന് പറഞ്ഞപ്പോ നീയെന്താ ഒന്നും പറയാതെ ഇരുന്നത്..?
ഞാൻ ആശ്ചര്യത്തോടെ ചോദിച്ചു
‘അത് നിന്റെ വിവരക്കേട്.. ഞാൻ ഒരു വിധത്തിൽ സമ്മതിച്ചു തന്നതല്ലേ.. അപ്പോൾ അവൻ വലിയ പുണ്യാളൻ കളിച്ചു അത് കാര്യം ആക്കാതെ വിട്ടു..’
അവൾ എന്നെ കളിയാക്കി പറഞ്ഞു
‘അപ്പോൾ എന്നെ ഇഷ്ടം ആയിട്ട് നീ എന്താ ഇത് വരെ അതെന്നോട് പറയാതെ ഇരുന്നത്..? ഞാൻ നിർബന്ധിച്ചാൽ മാത്രമെ നിന്റെ വായിൽ നിന്ന് ഇഷ്ടം ആണെന്ന് വരുള്ളൂ..?
‘പിന്നെ നീ ചോദിച്ച ഉടനെ അങ്ങ് ഇഷ്ടം ആണെന്ന് പറഞ്ഞാൽ എന്റെ വില പോവൂലെ.. അതുവല്ല നീ ബാക്കി ഉള്ളവരുടെ അടുത്ത് പോയ പോലെ ആണോ എന്റെ അടുത്ത് വന്നതെന്ന് അറിയണ്ടേ..?
‘അവരോട് ഉള്ളത് പോലെ അല്ല നിന്നോട്.. ഞാൻ അത് പറഞ്ഞല്ലോ…’
‘എന്നാലും എനിക്ക് വിശ്വാസം വരണ്ടേ.. അതാ ഞാൻ യെസ് പറയാതെ ഇരുന്നെ..’
അവൾ പറഞ്ഞു
‘അപ്പോൾ ഫുട്ബോൾ മാച്ച് ജയിച്ചാൽ പറയാം എന്നൊക്കെ പറഞ്ഞത്..?
‘അത് അപ്പോൾ പറയാമെന്നു കരുതിയതാ.. പക്ഷെ എനിക്ക് ടൈം വന്നപ്പോൾ ഭയങ്കര ചളിപ്പ്.. പിന്നെ നിന്നെ ഒന്ന് വട്ട് പിടിപ്പിക്കാമെന്ന് കരുതി..’
‘എടി ഭയങ്കരി.. രാവിലെ കെട്ട് പോകുമ്പോ ഈ പറഞ്ഞതൊക്കെ സമ്മതിച്ചു തന്നാൽ മതി മോൾ..’
ഞാൻ അവളുടെ അടുത്തേക്ക് ഇരുന്നു അവളുടെ ചെവിയിൽ നുള്ളി പറഞ്ഞു
‘ഞാൻ സമ്മതിക്കും.. എനിക്ക് എന്താ സമ്മതിച്ചാൽ…’
‘അപ്പോൾ ശരിക്കും നിനക്ക് എന്നോട് ഇഷ്ടം എപ്പോളാ തുടങ്ങിയെ..?
എന്റെ ഉള്ളിൽ ഇനിയും ഒരുപാട് സംശയങ്ങൾ ഉണ്ടായിരുന്നു.. അതൊക്കെ തീർക്കാൻ ഇപ്പോളാണ് പറ്റിയ അവസരം
‘നിന്നെ ആദ്യം കണ്ട അന്ന് മുതൽ….!
ഇഷാനി വളരെ മൃദുലമായി പറഞ്ഞു
‘ഫസ്റ്റ് ടൈം തന്നെ നിനക്ക് ഇഷ്ടം തോന്നിയോ..? പോടീ നുണ പറയാതെ..’
എനിക്ക് അവൾ പറഞ്ഞത് വിശ്വസിക്കാൻ കഴിഞ്ഞില്ല
‘കള്ളം അല്ലടാ.. സത്യം ആണ്.. നീയാണെ സത്യം..’
അവൾ എന്റെ തലയിൽ തടവി സത്യം ഇട്ടു
‘അന്ന് ആ മഴ ഉള്ള ഡേ, നൂനു നിന്നെ ഓടിച്ച അന്നല്ലേ നമ്മൾ ആദ്യമായി കണ്ടത്.. അന്ന് തന്നെ നിനക്ക് എന്നോട് ഒരിഷ്ടം ഒക്കെ തോന്നിയോ..?
ഞാൻ വീണ്ടും ചോദിച്ചു
‘അന്നല്ല… അതിനുമൊക്ക മുമ്പ്.. നമ്മൾ ശരിക്കും ആദ്യം കണ്ട അന്ന്…’
ഇഷാനി പറഞ്ഞത് എനിക്ക് വ്യക്തം ആയില്ല
‘അതല്ലേ നമ്മുടെ ഫസ്റ്റ് മീറ്റ്.. അല്ലാതെ അതിന് മുമ്പ് നമ്മൾ കണ്ടിട്ടുണ്ടോ..?
ഞാൻ ചോദിച്ചു
‘ഉണ്ടല്ലോ..’
അവൾ ചിരിച്ചു കൊണ്ട് പറഞ്ഞു
‘നോ വേ.. ക്ലാസ്സ് തുടങ്ങി കുറച്ചു ദിവസം കഴിഞ്ഞാണ് നമ്മൾ മീറ്റ് ചെയ്യുന്നത്.. അതിന് മുമ്പ് ഞാൻ നിന്നെ കണ്ടിട്ടില്ല.. അല്ലെങ്കിൽ എവിടെ വച്ചെന്ന് നീ തന്നെ പറ..’