…….. ഷൂ…. ഹ്………..
കളി ആരംഭിച്ച വിസിൽ മുഴങ്ങി.. ഞങ്ങളുടെ മൈതാനത്തു കലാശക്കൊട്ടിന്റെ പന്തുരണ്ടു.. മഞ്ഞ ജേഴ്സിയിൽ അവരും നീല ജേഴ്സിയിൽ ഞങ്ങളും ഒരു പന്തിന് പിന്നാലെ പാഞ്ഞു. നല്ലവണ്ണം കളിച്ചാൽ ജയിക്കാൻ കഴിയും എന്ന ആത്മവിശ്വാസം ഞങ്ങൾക്ക് ഉണ്ടായിരുന്നു. അത് കൊണ്ട് വളരെ ശ്രദ്ധയോടെ ഞങ്ങൾ കളിച്ചു.. ഞങ്ങളുടെ ഓരോ മുന്നേറ്റത്തിലും ഗാലറി ആയി മാറിയ പടവുകൾ ആർത്തലച്ചു..
ഞാൻ പ്രതീക്ഷിച്ച അത്രയും അപകടകാരികൾ അല്ല എസ് എൻ കോളേജ് എന്ന് എനിക്ക് തോന്നി. ആദ്യത്തെ മിനിട്ടുകളിൽ ഞങ്ങൾക്ക് ആയിരുന്നു പന്തിന് മേൽ കൃത്യമായ ആധിപത്യം. അവർ പന്തിന് വേണ്ടി ഒരുപാട് കിണഞ്ഞു ശ്രമിക്കുന്നില്ല എന്ന് എനിക്ക് തോന്നി. എന്നിരുന്നാലും അവരുടെ പ്രതിരോധം ശക്തമായിരുന്നു.. ഞങ്ങളുടെ മുന്നേറ്റങ്ങൾ എല്ലാം ബോക്സിൽ എത്തുന്നതിനു മുമ്പ് പാളി.. ബോക്സിനു മുന്നിലേക്ക് ബോളിന് വേണ്ടി ഞാൻ ഓടിയെത്തുന്നതും അവർ ബോൾ ക്ലിയർ ചെയ്യുന്നതും രണ്ട് മൂന്ന് തവണ ആവർത്തിച്ചു.. ഒടുവിൽ ഞാൻ കുറച്ചു പിന്നിലേക്ക് ഇറങ്ങി കളിക്കാൻ തീരുമാനിച്ചു.. മധ്യവരയ്ക്ക് അടുത്ത് വച്ചു രാഹുലിന്റെ പാസ്സിൽ ബോൾ എനിക്ക് കിട്ടി.. കളിയിലെ എന്റെ ആദ്യത്തെ ടച്ച്‌.. ബോൾ എന്റെ കാലുകളിൽ എത്തിയപ്പോൾ ഗാലറി ഒന്നടങ്കം ഒരു ആർപ്പ് വിളി ഉയർന്നു.. ഇപ്പോൾ എതിർ ടീമിന്റെയും അവരെ സപ്പോർട്ട് ചെയ്യാൻ വന്ന കോളേജിലെ പിള്ളേരുടെയും ഒക്കെ ശ്രദ്ധ എന്റെ മേലെ ആയിരിക്കും എന്ന് തീർച്ച… ടീമിലെ ഏറ്റവും സ്റ്റാർ പ്ലയെർ ഞാൻ ആണെന്നാകും അവർ ധരിച്ചിട്ട് ഉണ്ടാവുക.. പക്ഷെ അവർക്ക് അറിയില്ലല്ലോ ഞങ്ങളുടെ ടീമിലെ ഏറ്റവും ദുരന്തൻ പ്ലയെർ ഞാൻ ആണെന്ന്….
എട്ടാം നമ്പർ ജേഴ്സിയുമായി ഞാൻ എതിർ ടീമിന്റെ ഗോൾ മുഖം ലക്ഷ്യമാക്കി കുതിച്ചു.. റൈറ്റ് വിംഗ് ആയിരുന്നു എന്റെ പൊസിഷൻ. രാഹുൽ മിഡ്‌ മാത്രം നോക്കാതെ മുന്നോട്ടു കൂടി വന്നു കളിക്കുക എന്നതായിരുന്നു ഞങ്ങളുടെ തീരുമാനം. ഗാലറിയിൽ എനിക്ക് വേണ്ടി ഉയരുന്ന ആരവങ്ങൾ വെറുതെ ആകാതെ ഇരിക്കാൻ ഞാൻ എന്റെ മുഴുവൻ വേഗതയിലും മുന്നിലേക്ക് കുതിച്ചു. ബോക്സിന് തൊട്ട് മുമ്പ് ഒഴിഞ്ഞു കിടന്ന ഒരിടത്തേക്ക് ഞാൻ പന്തുരുട്ടി വിട്ടു. ഞങ്ങളുടെ മെയിൻ സ്ട്രൈക്കർ അമീൻ ആ പന്ത് സ്വീകരിക്കാൻ അവിടേക്ക് പാഞ്ഞെത്തി. അമീൻ ആ പന്ത് സ്വന്തം ആക്കിയെങ്കിലും മുന്നോട്ടു കയറാൻ ഒരു പഴുത് ഇല്ലാതെ അവനെ എതിർ ടീം പൂട്ടി.. ബോൾ വീണ്ടും നഷ്ടമായി..
അത് കൊണ്ടും ഞങ്ങൾ വിട്ടു കൊടുത്തില്ല.. വീണ്ടും വാശിയോടെ ഞങ്ങൾ അവരുടെ ഗോൾ മുഖത്തേക്ക് പാഞ്ഞു.. പക്ഷെ അപ്പോൾ ഒന്നും ഞങ്ങൾ മനസിലാക്കിയിരുന്നില്ല അവർ ഞങ്ങളെ കളിക്കാൻ വിട്ടു ഞങ്ങളുടെ കളി പഠിക്കുക ആയിരുന്നു എന്ന്.. അലസമായി കളിക്കുന്നത് പോലെ നടിച്ചു അവർ ഞങ്ങളുടെ ഫോർമേഷനും കളിക്കാരുടെ വേഗതയും സ്കില്ലും എല്ലാം പഠിക്കുക ആയിരുന്നു.. ഒരു ഫൈനൽ ആയിട്ട് കൂടി എതിർ ടീമിനെ ഇങ്ങനെ ബോൾ കൊണ്ട് പോകാൻ അനുവദിക്കണം എങ്കിൽ അവരുടെ കോൺഫിഡൻസ് എത്ര വലുതായിരിക്കണം…
ഞങ്ങളുടെ ഓരോ നീക്കങ്ങളും അവർ തകർത്തോണ്ട് ഇരിക്കവേ തന്നെ ബോളിന് മേൽ ഞങ്ങൾ സൃഷ്‌ടിച്ച അധിപത്യവും അവർ കയ്യിലാക്കി.. അത്രയും നേരം ഒതുങ്ങിയ പോലെ നിന്നവർ ഞങ്ങളുടെ ബോക്സിലേക്ക് ഇരച്ചു കയറാൻ തുടങ്ങി.. ഗോൾ ഏത് നിമിഷവും വീഴുമെന്ന സ്‌ഥിതി പലവട്ടം ഉണ്ടായി.. ഗാലറികളിൽ ഞങ്ങടെ പിള്ളേരുടെ ആരവം ഒക്കെ നിലച്ചിരുന്നു. കളി തുടങ്ങി ഇരുപത്തൊന്നാം മിനിറ്റിൽ ഞങ്ങളുടെ പ്രതിരോധത്തെ എല്ലാം വെട്ടിയുഴിഞ്ഞു എസ് എൻ ന്റെ പത്താം നമ്പർകാരൻ ഡിവിൻ ഞങ്ങളുടെ ഗോളിയെയും കബളിപ്പിച്ചു പന്ത് ഗോൾ വലയിൽ എത്തിച്ചു.. ആദ്യ ഗോൾ പിറന്നിരിക്കുന്നു..
ആദ്യ ഗോളിന് ശേഷം കളി തിരിച്ചു പിടിക്കാൻ വാശിക്ക് കളിച്ചെങ്കിലും അവരോട് പിടിച്ചു നിൽക്കാൻ അതൊന്നും മതിയായിരുന്നില്ല. ഞങ്ങളുടെ നീക്കങ്ങൾ ഒന്നും അവരുടെ പാതിയിലേക്ക് പോലും എത്തുന്നില്ല. കളി മുഴുവൻ ഇപ്പോൾ ഞങ്ങളുടെ ഹാഫിൽ ആണ്.. പന്ത് പലവട്ടം ബോക്സിൽ എത്തി. ചന്തു പലവട്ടം ഗോളിലേക്ക് പോകേണ്ട ബോൾ ക്ലിയർ ആക്കി വിട്ടു.. ചന്തു ക്ലിയർ ആക്കിയ പന്തുകളിൽ ഒന്ന് അമീന്റെ നേർക്കാണ് വന്നത്.. അവൻ അത് ഹെഡ് ചെയ്തു എനിക്ക് നേരെ ഇട്ടു. ഒരു കൌണ്ടർ പ്രതീക്ഷിച്ചു തന്നെ കുറച്ചു ഇറങ്ങി ആണ് ഞാൻ നിന്നത്.. ബോൾ കൃത്യമായി എന്നിലേക്ക് തന്നെ എത്തി.. എന്റെ അടുത്ത് രണ്ട് ഡിഫന്റർമാരെ ഉള്ളു. അവരെ കബളിപ്പിച്ചു മുന്നോട്ടു പോയാൽ പിന്നെ ഉള്ളത് ഗോളി മാത്രം. ഞാൻ ഡിഫെൻഡേഴ്സ്നേ പിന്നിലാക്കി മുന്നോട്ടു കുതിച്ചു.. രാഹുലും സാരംഗും എനിക്ക് പിന്നാലെ വരുന്നുണ്ട്.. ബോക്സിൽ എത്തിയാൽ പന്ത് അവർക്ക് കൊടുക്കാം.. ഞാൻ സർവ ശക്തിയും എടുത്തു മുമ്പോട്ടു ഓടി.. എന്നാൽ എനിക്ക് തൊട്ട് പിന്നാലെ അവരുടെ ഒരു ഡിഫെൻഡർ ഉണ്ടായിരുന്നു.. അവൻ വളരെ നിസാരമായി എന്റെ ഒപ്പം ഓടിയെത്തി തെന്നി എന്റെ കാലിൽ നിന്നും പന്ത് തെറിപ്പിച്ചു.. ആ പന്ത് എത്തിയത് അവരുടെ മറ്റൊരു കളിക്കാരന്റെ കാലിൽ ആണ്.. അവനാ പന്ത് ഒരു ലോങ്ങ്‌ പാസ്സ് ബോക്സിലേക്ക് കൊടുത്തു.. ആ ബോൾ കാത്തു നിൽക്കുന്നത് പോലെ ഞങ്ങളുടെ ടീമിലെ ആരാലും നോട്ട് ചെയ്യപ്പെടാതെ ഡിവിൻ ആ പന്ത് നെഞ്ചിലെടുത്തു കാലിലേക്ക് കൊണ്ട് വന്നു ബാണം പോലെ ഒന്ന് തൊടുത്തു വിട്ടു… മൂപ്പതാം മിനിറ്റിൽ രണ്ടാമത്തെ ഗോൾ.. ഞങ്ങളുടെ തോൽവിയിലെ രണ്ടാമത്തെ ആണി
ഗോൾ അടിച്ചതിനു ശേഷം ഡിവിൻ നേരെ ഞങ്ങളുടെ കോളേജ് പിള്ളേർ ഇരിക്കുന്ന പടവുകളുടെ നേർക്ക് ഓടി വായുവിൽ ഉയർന്നു പൊങ്ങി കൈ കൊണ്ട് ഒരു വൃത്തം വരച്ചു..
SIUUUUUUU……!
റൊണാൾഡോയുടെ ഐക്കണിക്ക് സെലിബ്രേഷൻ ഇട്ടു അവൻ കളിയിലെ താരം ആയി.. ഗാലറിയിൽ ഞങ്ങളുടെ പിള്ളേർ മരിപ്പിനു വന്നിരിക്കുന്ന പോലെ മൂകരായി.. ഞങ്ങളും ഏകദേശം മരിച്ച അവസ്‌ഥ തന്നെ ആയിരുന്നു
എനിക്ക് എന്നിൽ തന്നെ ഉള്ള വിശ്വാസം നഷ്ടം ആയി. രണ്ടാമത്തെ ഗോൾ എന്റെ പിഴവിൽ നിന്നാണ്.. ഗോളി മാത്രം മുന്നിലുള്ള ഒരു അവസരം ആയിരുന്നു എനിക്ക് കിട്ടിയത്.. ഞാൻ കുറച്ചു കൂടി വേഗത്തിൽ ഓടിയിരുന്നു എങ്കിൽ ഞങ്ങൾക്ക് അതൊരു അവസരം ആയേനെ.. എന്നാൽ സംഭവിച്ചത് എന്നെ കീഴ്പ്പെടുത്തി ബോളും സ്വന്തം ആക്കി അവർ വീണ്ടുമൊരു ഗോൾ കൂടി അടിച്ചിരിക്കുന്നു.. ഞാൻ നിരാശയോടെ കൈ ഉരത്തിൽ വച്ചു ഗാലറിയിലേക്ക് നോക്കി.. എന്റെ മുഖത്തുള്ള അതേ നിരാശ എല്ലാവരുടെയും മുഖത്തുണ്ട്.. എസ് എൻ കോളേജിലെ പിള്ളേർ ആകട്ടെ ഒരു സൈഡിൽ ഇരുന്ന് വമ്പൻ ഓളം ഉണ്ടാക്കുന്നുമുണ്ട്.. ഞാൻ ഇഷാനി ഇരിക്കുന്ന സ്ഥലത്തേക്ക് നോക്കി. ഞാൻ നോക്കുന്നത് അവൾ കണ്ടു. ഞാൻ വിഷമത്തോടെ എന്നെ കൊണ്ട് പറ്റുന്നില്ല എന്ന മട്ടിൽ ചെറുതായ് ഒന്ന് തലയാട്ടി. നിനക്ക് സാധിക്കും എന്നൊരു അർഥത്തിൽ അവൾ തിരിച്ചു തലയാട്ടി..
