തല തോർത്തി കഴിഞ്ഞു ഞാൻ എണീറ്റ് നിന്ന് അവളെ നോക്കി. ഹെൽമെറ്റ്‌ വച്ചത് കൊണ്ട് തല നനഞ്ഞില്ല എങ്കിലും മുടിയിഴകളിൽ മഴത്തുള്ളികൾ ഒഴുകുന്നുണ്ടായിരുന്നു. തണുപ്പ് കാരണം ദേഹം ചെറുതായ് വിറയ്ക്കുന്നുണ്ട്. ഹെൽമെറ്റ്‌ കയ്യിൽ പിടിച്ചിട്ടുണ്ട്.. പെട്ടന്ന് മേഘക്കീറുകൾക്ക് ഇടയിൽ നിന്ന് ബോംബ് പോലെ ഒരു ഇടിവെട്ടി. ഞാൻ വരെ പെട്ടന്ന് ഒന്ന് പകച്ചു പോയി.. ഇഷാനി ആണേൽ ശരിക്കും പേടിച്ചു.. അവൾ അല്പം കൂടി എന്റെ അടുത്തേക്ക് ചേർന്നു നിന്നു. അവളുടെ കയ്യിൽ ഇരിക്കുന്ന ഹെൽമെറ്റ്‌ എന്റെ വയറിൽ ആണ് ഇപ്പോൾ മുട്ടി നിൽക്കുന്നത്. ഞങ്ങളുടെ രണ്ട് പേരുടെയും ശരീരങ്ങൾക്ക് ഇടയിൽ ആ ഹെൽമെറ്റ്‌ മാത്രം ഒരു തടസമെന്ന പോലെ..
ഇത് വരെ അവളിൽ കാണാത്ത ഒരു സൗന്ദര്യം ഞാൻ അറിഞ്ഞു. ഇത് വരെ അവളെ കാണാത്ത ഒരു രീതിയിൽ ഞാൻ അവളെ നോക്കി. ചിറക് വിരിച്ചത് പോലെ വിടർന്ന പിരികങ്ങൾ… ചെറിയ കണ്ണുകളിൽ നിന്നും കറുത്ത ഗോട്ടി പോലെ തോന്നിപ്പിക്കുന്ന കൃഷ്ണമണി എന്നെ തന്നെ നോക്കുന്നുണ്ടായിരുന്നു.. അളവിൽ കൊത്തി വച്ചത് പോലെ അവളുടെ നാസികകൾ… അതിന് താഴെയായി ചോരചുവപ്പിൽ വിറയ്ക്കുന്ന ചുണ്ടുകൾ.. ദൈവമേ ഇവൾ ബാക്കിയെല്ലാവരെയും പോലെ മജ്ജയും മാംസവുമായി ഇവിടെ ജനിച്ചു വീണതാണെന്ന് എനിക്ക് വിശ്വസിക്കാൻ കഴിയുന്നില്ല.. ഏതോ ശില്പി അയാളുടെ പരിപൂർണശില്പത്തിന് ജീവൻ കൊടുത്തത് പോലെയാണ് എനിക്ക് തോന്നിയത്..
അവളൊരു ശില്പമായിരുന്നു എങ്കിൽ എന്ന് ഞാൻ ചിന്തിച്ചു.. എങ്കിൽ ഞാൻ അവളെ എന്റെ സർവ്വസ്വവും കൊടുത്തു സ്വന്തം ആക്കിയേനെ.. അവളൊരു രാജകുമാരി ആയിരുന്നെങ്കിൽ അവൾക്ക് വേണ്ടി ഞാൻ യുദ്ധം ചെയ്തേനെ.. അവളൊരു ദേവത ആയിരുന്നെങ്കിൽ അവൾക്ക് വേണ്ടി ഞാൻ തപസ്സ് ചെയ്തേനെ… എന്നാൽ യഥാർത്ഥ്യത്തിൽ എന്റെ കൈയ്യകലത്തിൽ മഴയുടെ തണുപ്പിൽ അടിമുടി വിറച്ചു നിൽക്കുന്ന വെറുമൊരു പെൺകുട്ടി മാത്രമാണ് അവൾ.. ആ അവളെ എങ്ങനെ സ്വന്തം ആക്കണമെന്ന് മാത്രം എനിക്ക് അറിയില്ലായിരുന്നു…
മഴ ശരീരത്തെ തണുപ്പിച്ചു കൊണ്ടിരിക്കുമ്പോൾ അവൾ അടുത്തുണ്ടെന്ന ബോധം എന്റെ മനസിനെ ചൂട് പിടിപ്പിച്ചു കൊണ്ടിരുന്നു. അവളുടെ മുഖം കൈകളിൽ കോരിയെടുത്തു ചുംബനം കൊണ്ട് അവളെ മൂടാൻ ഞാൻ മോഹിച്ചു. She is made for kissing. എന്റെ ജീവിതത്തിൽ ഇന്നോളം ഒരു ചുംബത്തിനായി ഞാൻ ഇത്രയധികം മോഹിച്ചിട്ടില്ല. എന്റെ ചുണ്ടുകളിൽ കൊത്തിപ്പറിച്ചിട്ട് പോയ അനേകം ചുണ്ടുകളെ ഞാൻ മറന്നു. അതൊന്നും അവളുടെ ചെഞ്ചുണ്ടിനോളം വരില്ല എന്ന് ഞാൻ ചിന്തിച്ചു. ഞാൻ അവളെ ആകെ മൊത്തത്തിൽ നിരീക്ഷിച്ചു
അവളുടെ കണ്ണുകളിൽ ഒരു ഭയവും കുസൃതിയുമെല്ലാം ഞാൻ കണ്ടു. വിടർന്നു തടിച്ച അവളുടെ കീഴ്ച്ചുണ്ടുകൾ മലർന്ന് ചുംബനം ക്ഷണിക്കുന്നത് പോലെ ഉണ്ടായിരുന്നു. അവളുടെ നിശ്വാസങ്ങൾ അവളെന്താണ് ചിന്തിക്കുന്നത് എന്ന് എനിക്ക് മനസിലാക്കി തന്നു.. എന്നെ പോലെ തന്നെ അവളും ചുംബനത്തെ പറ്റിയാണ് ചിന്തിക്കുന്നത്.. ഒന്ന് മുന്നോട്ടാഞ്ഞു അവളുടെ ചുണ്ടുകളിൽ മുത്താൻ ഞാൻ ആലോചിച്ചു. എന്നാൽ ഏതോ ഒരു ഉൾബോധം എന്നെ പിറകിലേക്ക് പിടിച്ചു വലിച്ചു. ഒരുപക്ഷെ അവൾ ഇപ്പോൾ അത് ആഗ്രഹിക്കുന്നില്ല എങ്കിൽ ഞാൻ ഇപ്പോൾ ചുംബിച്ചാൽ അതൊരു മോശം ഫീലെ അവളിൽ ഉണ്ടാക്കൂ.. ഇനിയും ഇത് പോലെ നിന്നാൽ ചിന്തിക്കാനുള്ള എന്റെ കഴിവ് തന്നെ നഷ്ടപ്പെടുമെന്ന് പേടിച്ചു ഞാൻ അവളോട് പറഞ്ഞു
‘മഴ ഇപ്പോളൊന്നും തോരുമെന്ന് തോന്നണില്ല.. നിന്റെ വീട്ടിലോട്ട് പോകാൻ ഇനിയും കുറെ പോണം.. രണ്ട് മിനിറ്റ് കൊണ്ട് എന്റെ വീട്ടിൽ ചെല്ലാം.. മഴ തോർന്നു കഴിഞ്ഞു ഞാൻ നിന്നെ വീട്ടിൽ കൊണ്ട് വിടാം.. അത് ഓക്കേ ആണോ..?
അവൾ അതിന് എതിർത്തു ഒന്നും പറഞ്ഞില്ല. അല്ലാതെ വേറെ മാർഗം മുന്നിൽ ഇല്ല. ഇവിടെ നിന്നാൽ നനഞ്ഞു ഒരു പരുവം ആകും. ബസ് നോക്കി നിന്ന് മാറി കേറി പോകുന്നത് ഈ മഴയത്തൊരു നല്ല ഐഡിയ അല്ല. മഴ ഉടനെ ഒന്നും തോരാൻ പോണില്ല എന്നാണ് തോന്നുന്നത്. അവൾ ഹെൽമെറ്റ്‌ വച്ചു എന്റെ പിന്നിൽ വന്നു കയറി. ഞങ്ങൾ പെട്ടന്ന് തന്നെ എന്റെ വീട്ടിൽ വന്നു കയറിയെങ്കിലും ദേഹം മൊത്തത്തിൽ നനഞ്ഞു കുളിച്ചിരുന്നു. ജാക്കറ്റ് ഊരിയപ്പോൾ ആണ് അവളുടെ ഹൂടിയും നനഞ്ഞിട്ടുണ്ടെന്ന് കണ്ടത്. ഞാൻ തല്ക്കാലം ഒരു തോർത്ത്‌ എടുത്തു അവളോട് തോർത്താൻ പറഞ്ഞിട്ട് റൂമിലേക്ക് കയറി.
ഞാൻ ഡ്രസ്സ്‌ മാറി പുറത്ത് ഇറങ്ങിയപ്പോ അവൾ തണുത്തിട്ട് കൈ കെട്ടി നിപ്പായിരുന്നു. മഴ ഇനിയും കുറെ നേരത്തേക്ക് കുറയും എന്ന് തോന്നുന്നില്ല. അത്രയും നേരം അവൾ നനഞ്ഞ ഡ്രസ്സ്‌ ഇട്ടു നിക്കുന്നത് ഓർത്തപ്പോ ഞാൻ പറഞ്ഞു
‘വേറെ ഡ്രസ്സ്‌ തരാം. നീ ഇത് ഇട്ടു എത്ര നേരം നിക്കാനാണ്.. പാന്റൊക്കെ നനഞ്ഞു കുതിർന്നു..’
അവൾ വേണ്ട എന്ന് പറഞ്ഞെങ്കിലും ഞാൻ അലമാരയിൽ നിന്ന് ഒരു ഫുൾ സ്ലീവ് ബനിയനും ട്രാക്ക് സ്യൂട്ടും എടുത്തു അവൾക്ക് കൊടുത്തു. എന്റെ ഒന്നും അവൾക്ക് ചേരാത്തത് കൊണ്ട് ലച്ചു ഇടയ്ക്ക് ഇവിടെ തങ്ങുമ്പോ ഇട്ടോണ്ട് ഇരുന്നതിൽ നിന്ന് ഒരെണ്ണം ആണ് അവൾക്ക് കൊടുത്തത്. ലച്ചുവിന്റെ അത്ര സൈസ് ഇല്ലെങ്കിലും അവൾക്ക് അഡ്ജസ്റ്റ് ചെയ്യാം
‘ഇതാരുടെയാ..?
ഡ്രസ്സ്‌ നോക്കിയിട്ട് അവൾ ചോദിച്ചു
‘ഇത്…’
ലച്ചുവിന്റെ പേര് പറയാൻ പെട്ടന്ന് എനിക്കെന്തോ ബുദ്ധിമുട്ട് പോലെ തോന്നി. അതിൽ നിന്ന് തന്നെ അവൾക്ക് കാര്യം മനസിലായി. അവൾ പെട്ടന്ന് എന്റെ മുറിയിലേക്ക് നടന്നു
‘ഞാൻ ഡ്രസ്സ്‌ മാറട്ടെ..’
എന്റെ മുറിയിൽ കയറി അവൾ വാതിൽ അടച്ചു. ഞാൻ അവളുടെ ബാഗിൽ നിന്ന് എന്റെ ഫോൺ എടുത്തു. ചാർജ് കുറവായത് കൊണ്ട് അത് ഞാൻ ചാർജ് ചെയ്യാൻ ഇട്ടു. അടുക്കളയിൽ പോയി രണ്ട് പേർക്കുമുള്ള കാപ്പിയും ഇട്ടു. പെട്ടന്ന് തന്നെ അവൾ ഡ്രസ്സ്‌ ചേഞ്ച്‌ ചെയ്തു ഇറങ്ങി. അവൾ ബാഗ് തുറന്നു ബുക്ക്‌ വല്ലതും നനഞ്ഞോ എന്നൊക്കെ പരിശോധിച്ചു. പുറത്ത് മഴ ആരോടോ ഉള്ള വാശിക്കെന്ന പോലെ പെയ്തു കൊണ്ടിരുന്നു.
‘ഓണറമ്മ ഫോൺ എടുക്കുന്നില്ല. ഞാൻ വരാൻ താമസിക്കും എന്ന് പറയാൻ വിളിച്ചതാ..’
ഇഷാനി പറഞ്ഞു
‘റിംഗ് ഉണ്ടായിരുന്നോ..?
ഞാൻ ചോദിച്ചു
‘ഉണ്ട്. അമ്മ പിന്നെ നേരത്തെ കിടക്കും. ഉണർത്തണം എങ്കിൽ പിന്നെ വെടി പൊട്ടിക്കണം. ഞാൻ ഷോപ്പിൽ നിന്ന് വരാൻ ലേറ്റ് ആകുന്ന കൊണ്ട് ഞാൻ വരുന്നതിന് മുമ്പ് തന്നെ കിടക്കും..’
‘എങ്കിൽ പിന്നെ വിളിക്കണ്ടല്ലോ.. നീ താമസിച്ചത് അവര് അറിയുന്നില്ലല്ലോ.. നല്ല ഉറക്കം പിടിച്ചു കാണും ഇപ്പോൾ..’
ഞാൻ പറഞ്ഞു
‘പണ്ടാരം മഴ ഒന്ന് തോരുന്നുമില്ലലോ..’
