‘ഓ ഓരോ പിണക്കങ്ങൾ..’
ഞാൻ വെറുതെ പറഞ്ഞു ഒഴിഞ്ഞു
‘സാധാരണ പിണക്കം ഒന്നുമല്ല. ആണേൽ അവൾ ഒരു മൈൻഡ് എങ്കിലും തന്നേനെ.. ഇതിപ്പോ എന്നോട് മിണ്ടുന്ന അത്ര പോലും നിന്നോട് മിണ്ടുന്നില്ല.. അതും ഇത്രയും നാളായി… എന്തോ സീരിയസ് ആണല്ലോ..’
കൃഷ്ണ മാത്രം അല്ല. ഞങ്ങളെ അറിയുന്ന എല്ലാവരും അത് തന്നെ ആണ് പറഞ്ഞത്. ചിലരൊക്കെ എനിക്ക് വേണ്ടി കാര്യം അറിയാതെ പോലും അവളോട് സംസാരിക്കാൻ പോയി. ആഷിക്ക്, ശ്രുതി, അജയ്, ഗോകുൽ, റോസ് അങ്ങനെ പലരും ഞങ്ങളെ പഴയ പോലെ ആക്കാൻ ശ്രമിച്ചു പരാജയപ്പെട്ടു
‘ഇഷാനിക്ക് എന്താടാ പറ്റിയെ..? അവളിപ്പോ പണ്ടത്തെലും കഷ്ടം ആണ്. നീ ആയി കമ്പിനി ആയപ്പോൾ ആളൊന്ന് സെറ്റ് ആയി വന്നതാ.. ഇപ്പോൾ പഴയ പോലെ മിണ്ടാപ്പൂച്ച ആയി.. നിന്നോടും മിണ്ടുന്നില്ല.. എന്താ കാര്യം..?
ഗോകുൽ ഒരിക്കൽ ചോദിച്ചു
‘വലിയ കാര്യം ഉള്ള കാര്യം ഒന്നും അല്ലടാ.. അവൾ പിന്നെ അത് ഒരു ഇഷ്യൂ ആക്കി മിണ്ടുന്നില്ല..’
ഞാൻ മറുപടി കൊടുത്തു
‘നിങ്ങൾക്ക് ഇടയിൽ എന്താണ് പ്രശ്നം എന്ന് നീ എന്നോട് പറയണ്ട. അത് പേർസണൽ ആണേൽ അങ്ങനെ തന്നെ ഇരിക്കട്ടെ.. പക്ഷെ അത് സോൾവ് ആകാതെ ഇരുന്നാൽ നിങ്ങളുടെ ചുറ്റുമുള്ള ഞങ്ങൾക്ക് തന്നെ മടുപ്പ് ആണ്.. നീ ഒന്ന് അവളോട് സംസാരിച്ചു നോക്ക്..’
അവൻ എന്നെ നിർബന്ധിച്ചു
‘ഇനി ഇപ്പോൾ അത് നടക്കില്ലെടാ.. അവൾ സ്വയമേ തോന്നണം മിണ്ടണം എന്ന്.. ആ മിണ്ടുമായിരിക്കും..’
‘ഞാൻ നിനക്ക് വോട്ട് ചെയ്യുമോ എന്ന് ചോദിച്ചപ്പോൾ ചെയ്യും എന്ന് പറഞ്ഞു. നിന്നോട് ദേഷ്യം ഒന്നുമില്ല.. എന്തോ ഒരു ചെറിയ പിണക്കം മാത്രേ ഉള്ളു. അങ്ങനെ ആണ് എനിക്ക് തോന്നിയെ.. നീ ഒന്ന് മിണ്ടി നോക്ക്..’
‘എനിക്ക് വേണ്ടി വോട്ടോ..? അതെന്താ..?
ഞാൻ കാര്യം അറിയാതെ ചോദിച്ചു
‘അത് ഞാൻ അവളോട് വെറുതെ നിന്റെ അടുത്തുള്ള ആറ്റിട്യൂട് അറിയാൻ വേണ്ടി ഇട്ടു കൊടുത്തത് ആണ്. പിന്നെ വെറുതെ അല്ല ശരിക്കും അങ്ങനെ തന്നെ ആണ്. വേറെ ആരോടും പറഞ്ഞില്ല എന്നെ ഉള്ളു. നീ ഞങ്ങളുടെ പാനലിൽ നിക്കണം..’
ഗോകുൽ എന്നോട് പറഞ്ഞു
‘ ഞാനോ..? അപ്പോൾ ക്ലാസിൽ നിന്ന് ഒരാൾ അല്ലേ പറ്റൂ.. നിനക്ക് അപ്പോൾ നിക്കാൻ പറ്റില്ലല്ലോ..?
ഞാൻ ചോദിച്ചു
‘ഞാൻ അല്ലേ കഴിഞ്ഞ രണ്ട് വർഷവും ക്ലാസ്സിൽ നിന്ന് റപ്പ് ആയത്. ഇത്തവണ നീ ആകു.. നീ പോപ്പുലർ ആയത് കൊണ്ട് പാനലിൽ നിർത്തിയാൽ ആ സീറ്റ് ഷുവർ ആണെന്ന് കമ്മിറ്റിയിൽ ഇന്നലെ പറഞ്ഞു..’
‘ഇതാണ് നിങ്ങൾ പാർട്ടിക്കാരുടെ കുഴപ്പം.. ഇത്രയും പ്രവർത്തിച്ചു വന്ന നിന്നെ മാറ്റി പോപ്പുലർ ആയത് കൊണ്ട് എന്നെ നിർത്താം എന്ന് പറയുക.. അതൊന്നും ശരിയാവില്ല..’
‘എടാ എനിക്ക് പ്രശ്നം ഇല്ല. ഞാൻ രണ്ട് തവണ ആയതല്ലേ.. പിന്നെ ഇലക്ഷന്…’
അവൻ പറഞ്ഞു
‘പ്രശ്നം ഉണ്ട്. ഇത് തേർഡ് ഇയർ ആണ്. ഇപ്പോൾ ആണ് നിനക്ക് ശരിക്കും റപ്പ് ആകേണ്ടതും പാനലിൽ നിക്കേണ്ടതിന്റെയും ഒക്കെ ആവശ്യം. നിന്നെ പോലെ എല്ലാം നടത്താൻ ഒന്നും എനിക്ക് കഴിവില്ല.. പിന്നെ നിങ്ങൾ രണ്ട് പാർട്ടിക്കാരോടും ഞാൻ ഒരേപോലെ ആണ്. നിന്നോട് ഉള്ള കമ്പിനി കൊണ്ട് നിങ്ങടെ കൂടെ ഞാൻ നിക്കുന്നു എന്നെ ഉള്ളു..’
‘എടാ എന്നാലും ഇലക്ഷന്….’
‘ഇലക്ഷന് നിന്നെ ഞാൻ ജയിപ്പിക്കാം.. നിനക്ക് വേണ്ടി മാത്രം ഞാൻ വോട്ട് പിടിക്കാൻ ഇറങ്ങാം. അത് പോരേ.. ‘
ഞാൻ ചിരിച്ചു കൊണ്ട് പറഞ്ഞു. പറഞ്ഞത് പോലെ തന്നെ ഞാൻ അവന് വേണ്ടി വോട്ട് ചോദിക്കാൻ ഇറങ്ങി. കോളേജിൽ നല്ല പോപ്പുലർ ആയത് കൊണ്ട് എനിക്കൊരു വില ഒക്കെ ഉണ്ട് എല്ലായിടത്തും. പിന്നെ റാഗിംഗ് ഒക്കെ ഞാൻ ഇടപെട്ട് കുറച്ചത് കൊണ്ട് ജൂനിയർസിന്റെ ഇടയിൽ ഒരു പേരും ഉണ്ട്. അത് കൊണ്ട് തന്നെ പാനലിൽ ഏറ്റവും ഭൂരിപക്ഷത്തിൽ തന്നെ ഗോകുൽ ജയിച്ചു..
കോളേജിലെ എല്ലാ പരിപാടിയും അതിന്റെ മുറയ്ക്ക് നടന്നു. ഗോകുൽ എല്ലാത്തിലും നല്ല ആക്റ്റീവ് ആയിരുന്നു. ഞങ്ങൾ അവനു മാക്സിമം സപ്പോർട്ട് കൊടുത്തു. ഇഷാനി എന്നെ തിരിഞ്ഞു നോക്കുന്നില്ല എന്നത് മാറ്റിയാൽ കോളേജ് മൊത്തത്തിൽ കളർഫുൾ ആയിരുന്നു. പക്ഷെ അവളുടെ അവഗണന എല്ലാത്തിനും മേൽ എന്നിൽ മുഴച്ചു നിന്നു. ആ സമയത്താണ് ഞങ്ങളുടെ കമ്പനിയുടെ പല ആവശ്യങ്ങൾക്കും എനിക്ക് അടിക്കടി കോൾ വന്നിരുന്നത്. അച്ഛന്റെ നിർബന്ധം മൂലം ഇടയ്ക്ക് അവിടെ പോയി തല കാണിച്ചു പോന്നോണ്ട് ഇരുന്നത് ആണ്. പക്ഷെ അവിടെ വിചാരിക്കുന്നതിലും കൂടുതൽ പണിയുണ്ട്. അവധി ദിവസം ഒക്കെ അവിടെ പെട്ട് പോകുമെന്ന ആവസ്‌ഥ ആയപ്പോൾ ആണ് രക്ഷകനെ പോലെ ഫൈസി വരുന്നത്.. ശരിക്കും ഞാൻ അവനെ ആണ് രക്ഷിച്ചത്…
‘അളിയാ നെഫീസൂവിന്റെ വീട്ടിൽ ആലോചന വന്നു ബഹളം ആണ്.. അവളെന്നോട് വീട്ടിൽ വന്നു പെണ്ണ് ചോദിക്കാൻ പറയുന്നു..’
അത്യാവശ്യം ആയി എന്തോ പറയാൻ ഉണ്ടെന്ന് പറഞ്ഞു ഫൈസി എന്നെ വിളിച്ചത് ആയിരുന്നു. ഫൈസിക്ക് വർഷങ്ങൾ ആയുള്ള പ്രണയം ആണ് നെഫീസൂ.. അത് അവളുടെ വീട്ടിൽ അറിയില്ല. ഇപ്പോൾ അവൾക്ക് വീട്ടിൽ ആലോചന വന്നെന്ന് പറഞ്ഞാണ് അവൻ എന്നെ വിളിച്ചത്..
‘എന്താടാ പെണ്ണ് കാണാൻ കൂടെ വരണോ..?
ഞാൻ ചിരിച്ചു കൊണ്ട് ചോദിച്ചു
‘അതല്ലഡാ.. അവളുടെ വീട്ടുകാര് കുറച്ചു വലിയ പാർട്ടികളാ.. ഞാൻ ഇങ്ങനെ ചെന്നു ചോദിച്ചാൽ അവൾ ഒരിക്കലും എനിക്ക് കെട്ടിച്ചു തരാൻ പോണില്ല..’
‘അപ്പോൾ ചാടിക്കണോ..?
ഞാൻ ചോദിച്ചു
‘അതല്ല.. ഒരു ജോലി വേണം. അതാണ് പ്രശ്നം. ഞാനിപ്പോ ഒരു ഷോപ്പിൽ നിൽപ്പുണ്ട്. പക്ഷെ അതൊന്നും വച്ചു അവളുടെ വീട്ടിൽ ചെന്നിട്ട് കാര്യമില്ല. ഞാൻ പുറത്തോട്ട് നോക്കുന്നുണ്ടായിരുന്നു. അത് പക്ഷെ ശരിയാവാൻ ടൈം പിടിക്കും.. അത്രയും ടൈം ഞങ്ങൾക്ക് കിട്ടില്ല..’
അവൻ എന്നോട് കാര്യം അവതരിപ്പിച്ചു
‘ഓക്കേ.. എന്റെ എന്ത് ഹെല്പ് വേണം എന്ന് പറ..’
‘നിന്നെ ബുദ്ധിമുട്ടുക്കുവാണ് എന്ന് കരുതരുത്.. നിനക്ക് അബ്രോട് ആരെയെങ്കിലും പരിചയം ഉണ്ടോ..? നീ അവിടെ വർക്ക്‌ ചെയ്തത് അല്ലേ.. എനിക്ക് പെട്ടന്ന് ഒന്ന് കേറി പോകാൻ എന്തെങ്കിലും ചാൻസ് ഉണ്ടോന്ന് അറിയാനാണ്.. ഇവിടെ നല്ലൊരു ജോലി വേണേൽ എക്സ്പീരിയൻസ് വേണം. പഠിച്ചിറങ്ങി ഒരു വർഷം ആയ എനിക്ക് എന്ത് എക്സ്പീരിയൻസ്..’
‘എന്റെ പുറത്തുള്ള കണക്ഷൻ വച്ചു നിനക്ക് ജോലി കിട്ടുമെന്ന് ഉറപ്പില്ല. ഞാൻ സോഫ്റ്റ്‌വെയർ ഫീൽഡ് അല്ലാരുന്നോ.? എന്നാലും പരിചയക്കാർ ഉണ്ട്.. ഞാനൊന്ന് അന്വേഷിച്ചു നോക്കാം..’
ഞാൻ അവനോട് പറഞ്ഞു
‘എന്തെങ്കിലും ശരിയാകുവാണേൽ നീ പറ..’
അവൻ എന്നോടുള്ള വിശ്വാസത്തിൽ പറഞ്ഞു. അവന്റെ കൂടെ പഠിച്ചവരിൽ പലരും വലിയ ടീംസ് ആയിട്ടും അവൻ ഒരു ഹെല്പിന് എന്നെ ആണ് വിളിച്ചത്.. കാരണം ഞങ്ങൾ അത്രക്ക് കമ്പിനി ആയിരുന്നു.
