‘ഞാൻ.. ഞാൻ.. നമുക്ക് പിന്നെ കാണാം..’
ഇഷാനി പെട്ടന്ന് എന്നിൽ നിന്നും കുറച്ചു പിന്നിലേക്ക് മാറി കൊണ്ട് പറഞ്ഞു.. പുറത്തേക്ക് ഇറങ്ങാൻ നടക്കവേ മുന്നിൽ ഇരുന്ന കസേര കാണാതെ അവൾ അതിൽ തട്ടി വീഴാനും പോയി.. കുഴപ്പമൊന്നുമില്ല എന്ന് പറഞ്ഞു അവൾ ധൃതി പിടിച്ചു പുറത്തേക്ക് ഇറങ്ങാൻ തുടങ്ങി
‘നിന്റെ ഫോൺ..?
അവൾ ഫോൺ വിളിക്കാൻ നോക്കിയപ്പോൾ തട്ടിപ്പറിച്ച മൊബൈൽ എന്റെ കയ്യിൽ ആയിരുന്നു. ഞാൻ അത് അവളോട് വിളിച്ചു പറഞ്ഞു
‘ഓ സോറി.. ഞാൻ മറന്നു.. താങ്ക്സ്.. ബൈ..’
എന്റെ മുഖത്ത് നോക്കാതെ ഇത്രയും പറഞ്ഞിട്ട് അവൾ പോയി. പിന്നാലെ പോയി അവളോട് സംസാരിക്കണോ എന്ന് ഞാൻ ആലോചിച്ചു.. വേണ്ട അവളിപ്പോ നല്ല ടെൻഷനിൽ ആണ്. ഇപ്പോൾ പെട്ടന്ന് ഒരു പ്രൊപോസൽ അവൾ പ്രതീക്ഷിച്ചിട്ടില്ല. അതിന്റെ ഷോക്ക് ആകും.. മാത്രം അല്ല ഇനി കാണുമ്പോൾ ഞാനും കുറച്ചു തയ്യാറായിരിക്കണം..
അവളെ ഇനി കാണുമ്പോൾ എങ്ങനെ സംസാരിക്കണം എന്നൊക്കെ ഞാൻ മനസ്സിൽ കാണാൻ തുടങ്ങി. ഒരു പ്രാങ്ക് ആയിരുന്നു ഇതെന്ന് പറഞ്ഞാൽ വേണമെങ്കിൽ സുഖമായി എനിക്ക് രക്ഷപെടാം.. ചിത്രം വരച്ചത് ബർത്ത്ഡേ ഗിഫ്റ്റിന് വേണ്ടി ആണെന്നും പറയാം. പിന്നെ അച്ഛന്റെ കൂടെയുള്ള പിക് ആണ് ബെറ്റർ എന്ന് തോന്നിയപ്പോൾ ഇത് ഒഴിവാക്കി എന്നും പറയാം.. സമാധാനത്തോടെ ഇരുന്ന് ചിന്തിച്ചപ്പോൾ എനിക്ക് എസ്‌കേപ്പ് ആകാനുള്ള കള്ളത്തരങ്ങൾ ഒക്കെ തെളിഞ്ഞു വരാൻ തുടങ്ങി.. ഇതൊരുപക്ഷെ അവൾ വിശ്വസിച്ചേക്കും.. പക്ഷെ ഈ നാടകം ഇനിയും തുടർന്ന് കൊണ്ട് പോകാൻ എനിക്ക് താല്പര്യമില്ലായിരുന്നു..
എന്റെ ഉള്ളിൽ ഉള്ളത് ഇഷാനി അറിഞ്ഞു. ഇനി അവളുടെ മറുപടി കിട്ടിയാൽ മതി. അതെന്ത് തന്നെ ആയാലും…!
അവളെ ഒന്ന് ഫോൺ വിളിക്കുകയോ മെസ്സേജ് അയക്കുകയോ ചെയ്താലോ എന്ന് ഞാൻ കുറെ വട്ടം ആലോചിച്ചു. അവളുടെ മുഖം കാണാതെ ആകുമ്പോൾ ഒരു ധൈര്യം കിട്ടും. പിന്നെ ഓർത്തു ചില പെൺകുട്ടികൾക്ക് നേരിട്ട് സംസാരിക്കുന്നത് ആണ് ഇമ്പ്രെസ്സ് ആകുന്നത്. എപ്പോൾ ആയാലും അവളെ ഫേസ് ചെയ്യണം. അപ്പോൾ പിന്നെ നേരിട്ട് തന്നെ സംസാരിക്കാൻ തീരുമാനിച്ചു.. പിറ്റേന്ന് അവളെ എങ്ങനെ ഫേസ് ചെയ്യണം എന്നെല്ലാം ഞാൻ മനസ്സിൽ പ്ലാൻ ചെയ്തു. പ്ലാൻ ചെയ്തത് ഒക്കെയും കുറച്ചു കഴിഞ്ഞു ചിന്തിക്കുമ്പോൾ ബോർ ആയി തോന്നുന്നു. വീണ്ടും വീണ്ടും ഇങ്ങനെ തന്നെ. അവസാനം അപ്പോൾ മനസിൽ എന്ത് തോന്നുന്നോ അങ്ങനെ ചെയ്യാൻ ഞാൻ തീരുമാനിച്ചു
എന്നാൽ പിറ്റേന്ന് ക്ലാസിൽ വന്നു കഴിഞ്ഞാണ് അതിന്റെ ബുദ്ധിമുട്ട് ഞാൻ മനസിലാക്കിയത്. അവളുടെ മുഖത്തേക്ക് നോക്കാൻ ഉള്ള ധൈര്യം എനിക്ക് ഇല്ലാതെ ആയിരിക്കുന്നു. ഒരുപക്ഷെ അവൾ എന്നോട് ദേഷ്യപ്പെട്ടാണ് ഇരിക്കുന്നത് എങ്കിൽ എല്ലാം തീർന്നു.. അന്ന് ഉച്ച വരെയും ഞാൻ അവൾക്ക് മുഖം കൊടുക്കാതെ നടന്നു. ഉച്ച കഴിഞ്ഞു ഫസ്റ്റ് പീരീഡ് തുടങ്ങാൻ പോകുന്നതിന് തൊട്ട് മുമ്പ് ഞാൻ ക്ലാസ്സിലേക്ക് കയറിയപ്പോൾ അവൾ ക്ലാസ്സിന് മുമ്പിലായ് നിൽപ്പുണ്ടായിരുന്നു. ഞാൻ അവളുടെ മുഖത്ത് നോക്കാതെ നിലത്തു നോക്കി പുറകിൽ എന്റെ സീറ്റിലേക്ക് നടക്കാൻ തുടങ്ങിയപ്പോൾ എന്റെ കയ്യിൽ മെല്ലെ പിടിച്ചു നിർത്തി കൊണ്ട് അവൾ പതിയെ പറഞ്ഞു
‘ഞാൻ നിന്നെ പിടിച്ചു തിന്നുവൊന്നും ഇല്ല കേട്ടോ…’
മുഖം തിരിച്ചു ഞാൻ അവളെ നോക്കിയപ്പോ ആ മുഖത്ത് ഒരു ചെറിയ ചിരിയും കുസൃതിയുമൊക്കെ ഉണ്ട്.. ഇപ്പോളാണ് സത്യത്തിൽ മനസിന് ഒരു ആശ്വാസം ആയത്. അവൾക്ക് എന്നോട് പിണക്കം ഒന്നുമില്ല. അവളോട് അപ്പോൾ തന്നെ സംസാരിക്കണം എന്ന് വിചാരിച്ചെങ്കിലും ക്ലാസ്സ്‌ തുടങ്ങാൻ പോകുന്നത് കൊണ്ട് അപ്പോൾ സംസാരം വേണ്ടെന്ന് വച്ചു. അടുത്ത പീരീഡ് മിക്കവാറും ഫ്രീ ആയിരിക്കും.. അപ്പോൾ ശരിക്ക് സംസാരിക്കാം..
എന്റെ പ്രതീക്ഷ പോലെ തന്നെ അടുത്ത പീരിയഡ് ഫ്രീ ആയിരുന്നു. ഇഷാനി മെല്ലെ ക്ലാസ്സിൽ നിന്ന് പുറത്തേക്ക് പോയപ്പോ ഒന്നുകിൽ അത് ഗ്രൗണ്ടിന് അടുത്തുള്ള വാക മരച്ചുവട്ടിൽ അല്ലേൽ ലൈബ്രറിയിൽ ആയിരിക്കും എന്ന് തോന്നി. ഊഹം പോലെ തന്നെ അവൾ ലൈബ്രറിയിലേക്കാണ് പോയത്. അവളെ തപ്പി ലൈബ്രറി കയറിയെങ്കിലും കണ്ടു പിടിക്കാൻ കുറച്ചു ബുദ്ധിമുട്ടി. ആളൊഴിഞ്ഞ ഒരു മൂലയിൽ ബുക്ക്‌ തിരഞ്ഞു കൊണ്ടിരിക്കുകയിരുന്നു അവൾ..
‘ എന്താണ് മോനെ രാവിലെ ഒക്കെ നമ്മളെ മൈൻഡ് ചെയ്യാതെ വല്യ ജാഡ ആയിരുന്നല്ലോ..?
ഷെൽഫിൽ നിന്ന് കിട്ടിയ ഏതോ ബുക്ക്‌ മറിച്ചു കൊണ്ട് അവൾ എന്നോട് ചോദിച്ചു
‘ജാഡ ഒന്നും അല്ലായിരുന്നു.. ഞാൻ.. അത്.. ഇന്നലെ പറഞ്ഞ കാര്യം ഓർത്തു..’
ഞാൻ അത് പൂർത്തിയാക്കാൻ പറ്റാതെ നിന്ന് വിക്കി
‘ഓ അതായിരുന്നോ..? എനിക്ക് തോന്നി.. ഞാൻ അത് സീരിയസ് ആയി ഒന്നും എടുത്തില്ല..’
അവൾ കൂളായി പറഞ്ഞു
‘സീരിയസ് ആയി എടുത്തില്ലേ.. എന്തെ..?
ഞാൻ സംശയത്തിൽ ചോദിച്ചു
‘നീ തമാശ പറഞ്ഞത് ആകും എന്ന് കരുതി. നിന്റെ കയ്യിൽ ഇങ്ങനത്തെ കുറെ നമ്പർ ഉണ്ടല്ലോ എന്നെ പറ്റിക്കാൻ ആയിട്ട്.. അതെങ്ങാനും വിശ്വസിച്ചാൽ നീ എന്നെ ഫൂൾ ആക്കും..’
ഇഷാനി ബുക്കിൽ തന്നെ നോക്കികൊണ്ട് പറഞ്ഞു
അപ്പോൾ ഞാൻ ചിന്തിച്ചത് പോലെ ഒക്കെ അവളും ചിന്തിച്ചു. ഒരു പ്രാങ്ക് ആണെന്ന് പറഞ്ഞാൽ ഇപ്പോൾ ഊരി പോരാം. പക്ഷെ എന്റെ ഇഷ്ടം അവൾക്ക് മനസിലായിട്ടുണ്ട്. അതിനിയും മറച്ചു വച്ചു നടക്കുന്നത് ശരിയല്ല. എല്ലാം തുറന്നു പറയുന്നത് ആണ് ബെറ്റർ..
‘അങ്ങനെ അല്ല. ഞാൻ.. ഞാൻ പറഞ്ഞത് ഒക്കെ സത്യം ആണ്..’
ഞാൻ സ്വരം കുറച്ചു ഞങ്ങൾക്ക് രണ്ട് പേർക്ക് മാത്രം കേൾക്കാവുന്ന ഒച്ചയിൽ പറഞ്ഞു. കാര്യം വേറെ ആരും അടുത്തില്ല എങ്കിലും എന്തോ ഒരു ഫീലിൽ പറഞ്ഞപ്പോ അങ്ങനെ ആയതാണ്
‘എന്ത് സത്യം ആണെന്ന്..?
അത് ചോദിച്ചപ്പോളും അവൾ എന്നെ നോക്കിയിരുന്നില്ല. അവളുടെ കണ്ണുകൾ ബുക്കിൽ തന്നെ ആയിരുന്നു
‘ഞാൻ പറഞ്ഞതൊക്കെ.. എനിക്ക് നിന്നോട് ഉള്ള ഫീലിംഗ്സ്…!
ഹൃദയം പട-പടാ മിടിക്കുമ്പോളും ഞാൻ അത് പറഞ്ഞു.
‘എന്ത് ഫീലിംഗ്സ്…?
അത് ചോദിച്ചപ്പോൾ അവൾ കണ്ണുകൾ ഉയർത്തി എന്നെ നോക്കി. അവൾക്ക് എന്റെ നാവിൽ നിന്ന് അത് കേൾക്കണം.. വ്യക്തമായി കേൾക്കണം..
‘എനിക്ക്.. എനിക്ക് നിന്നെ ഇഷ്ടം ആണ്.. ഒരു ഫ്രണ്ട് എന്നതിൽ ഉപരി.. റിയലി.. റിയലി.. ഐ ലവ് യൂ…!
അത് പറഞ്ഞു തീർന്നപ്പോൾ എന്റെ ഹൃദയമിടിപ്പ് കുറച്ചു കുറഞ്ഞത് പോലെ തോന്നി.. ഒരു ആശ്വാസം നെഞ്ചിനുള്ളിൽ.. അത് കേട്ടതും ഇഷാനിയുടെ കണ്ണുകൾ വിടർന്നത് ഞാൻ കണ്ടു. അവളുടെ കവിളുകൾ ചുവന്നിരുന്നോ എന്ന് മൂലയിലെ ആ അരണ്ട വെളിച്ചത്തിൽ എനിക്ക് പറയാൻ കഴിയുമായിരുന്നില്ല..
