‘അല്ലേലും എല്ലാ ആമ്പിള്ളേരും ഒരേപോലെ ആണല്ലേ.. കമ്പനി അടിച്ചു നടക്കാൻ എന്നെ പോലെ ഒരുത്തി. സീരിയസ് ആയിട്ട് പ്രേമിക്കുന്ന കാര്യം വരുമ്പോൾ അവളെ പോലെ പാവം ഒരുത്തി.. അല്ലേ…?
കരഞ്ഞു കലങ്ങിയ കണ്ണുകളോടെ അവളെന്നോട് ചോദിച്ചു
‘അങ്ങനെ ഒന്നും അല്ലടാ..’
ഞാൻ പറഞ്ഞത് അവൾ ഉൾക്കൊണ്ടോ ഇല്ലയോ എന്ന് എനിക്ക് മനസിലായില്ല.. അവൾ മെല്ലെ സോഫയിൽ പോയി ഇരുന്നു. കൈ തലയിൽ വച്ചു കുമ്പിട്ടു ഇരുന്നു. അവൾ കരയുക ആണെന്നാണ് ഞാൻ കരുതിയത്. എന്നാൽ അവൾ കരച്ചിൽ മെല്ലെ കുറച്ചു നോർമൽ ആയി വരിക ആയിരുന്നു..
‘ജ്യൂസ്‌…’
ഞാൻ പ്രതീക്ഷിക്കാത്ത ഒന്നാണ് അവളുടെ വായിൽ നിന്ന് വീണത്.. അവൾ പറഞ്ഞത് പോലെ തന്നെ ഞാൻ പെട്ടന്ന് ജ്യൂസ്‌ അടിച്ചു അവൾക്ക് കൊണ്ട് കൊടുത്തു. ഒരെണ്ണം ഞാനും ഗ്ലാസ്സിൽ ആക്കി അവളുടെ അരികിൽ ചെന്നിരുന്നു. ലച്ചു മുഖം ഒക്കെ തോർത്തി ഒന്ന് ഫ്രഷ് ആയി ഇരുന്നു ജ്യൂസ്‌ കുടിച്ചു.. അവൾ അങ്ങനെ എങ്കിലും കുറച്ചൊന്നു തണുക്കട്ടെ എന്ന് ഞാൻ കരുതി.. ജ്യൂസ്‌ മുഴുവൻ കുടിച്ചു കഴിഞ്ഞു അവൾ വീണ്ടും മൗനത്തിലേക്ക് പോയി… ഒടുവിൽ അതും തകർത്തു കൊണ്ട് അവൾ സംസാരിക്കാൻ തുടങ്ങി..
‘എനിക്കിത് വലിയ സർപ്രൈസ് ഒന്നും അല്ല.. ആദ്യം മുതലേ എനിക്ക് അറിയാമായിരുന്നു നിനക്ക് അവളോട് വേറെ എല്ലാവരോടും ഉള്ള ഒരിഷ്ടം അല്ല എന്ന്..’
ജ്യൂസ്‌ ഒഴിഞ്ഞ ഗ്ലാസ്സ് കയ്യിൽ പിടിച്ചു കൊണ്ട് വളരെ പതിയെ അവൾ സംസാരം തുടർന്നു
‘ എന്നാലും ഞാൻ കരുതി നീ എന്റെ അടുത്ത് വന്നു കഴിഞ്ഞു അവളെ പറ്റി മറക്കുമെന്ന്.. അവളുടെ കല്യാണം എല്ലാം ഉറപ്പിച്ചെന്ന് നീ പറഞ്ഞതൊക്കെ വച്ചു ഞാൻ ആശ്വസിച്ചു.. എന്നാലും ചില നേരം നീ അവളെ കുറിച്ച് സംസാരിക്കുമ്പോ എനിക്ക് പൊളിഞ്ഞു കേറും. അവളെ പറ്റി പറയുമ്പോ നിനക്ക് നൂറ് നാവാണ്.. ഇഷാനിയുടെ ലുക്ക്‌, ഇഷാനിയുടെ ഡാൻസ്, ഇഷാനിയുടെ പാട്ട്, ഇഷാനിയുടെ കളർ, ഇഷാനിയുടെ സ്വഭാവം.. ഇങ്ങനെ നീ അവളെ പറ്റി പൊക്കി അടിക്കാത്ത ഒന്നും തന്നെ ഇല്ല.. നീ എത്ര അടക്കി വച്ചിട്ടും അവളെ പറ്റി പറയുമ്പോ എനിക്ക് നിന്റെ ഒബ്സെഷൻ മനസിലാക്കാൻ പറ്റുമായിരുന്നു.. അവൾക്ക് മാത്രമേ നമ്മുടെ റിലേഷന് ഒരു വിലങ്ങു തടി ആകാൻ പറ്റുള്ളൂ എന്ന് എനിക്ക് പണ്ടേ അറിയായിരുന്നു.. അവളെ മാത്രമേ ഞാൻ ആ കാര്യത്തിൽ പേടിച്ചിട്ടുള്ളു.. എന്തായാലും അത് ഇപ്പോൾ സത്യം ആയി..’
ഞാൻ ഇഷാനിയെ എത്രമാത്രം സ്നേഹിക്കുന്നു എന്ന് എന്നേക്കാൾ മുമ്പ് എനിക്ക് ചുറ്റും ഉള്ളവരാണ് മനസിലാക്കിയത് എന്ന് ഞാൻ ഓർത്തു.. അവളുടെ കയ്യിൽ നിന്നും ഗ്ലാസ്സ് വാങ്ങി ഞാൻ അരികിൽ ഇരുന്ന ടീപ്പോയിൽ വച്ചു.. എന്നിട്ട് എന്റെ കൈ അവളുടെ കൈയ്ക്ക് മേലെ വച്ചു
‘അവളോട് എനിക്ക് പ്രേമം ആണോന്ന് ആദ്യം മുതൽക്കേ തന്നെ എനിക്ക് ഡൌട്ട് ആയിരുന്നു.. അത് മാറിയത് ഇപ്പോൾ ആയിരുന്നു പക്ഷെ.. ആ കല്യാണ ആലോചന ഒക്കെ അവൾ ചുമ്മാ പറഞ്ഞു ഉണ്ടാക്കിയത് ആണ്.. പിന്നെ നീ കരുതുന്നത് പോലെ അവൾ നിന്നെക്കാൾ ബെറ്റർ ആയത് കൊണ്ട് ഞാൻ അവളെ ചൂസ് ചെയ്തത് ഒന്നും അല്ല.. അവളോട് എനിക്ക് ഒരു ഡിഫറെൻറ് ഇമോഷൻ ആയിരുന്നു.. അതാണ്…’
ഞാൻ അവളുടെ കയ്യുടെ മേലെ വച്ച കയ്യിൽ തിരികെ അവൾ മുറുകെ പിടിച്ചു. എന്റെ മുഖത്തേക്ക് അവൾ നോക്കി. കരഞ്ഞു കണ്ണ് കലങ്ങിയത് ശരിക്കും അറിയാം. എങ്കിലും അവൾ മുഖത്തൊരു ചിരി വരുത്താൻ ശ്രമിച്ചു..
‘ അവൾ എന്നേക്കാൾ ബെറ്റർ ആണെന്ന് എനിക്ക് നല്ല ബോധ്യം ഉണ്ട് അർജുൻ.. നീ എന്നെ വിഷമിപ്പിക്കാതെ ഇരിക്കാൻ വേണ്ടി അങ്ങനെ അല്ല എന്നൊന്നും പറയണ്ട. എന്റെ സ്വഭാവത്തിന് നീ എന്നെ പ്രേമിക്കണം എന്ന് പറയുന്നത് ഒക്കെ കൂടുതൽ ആണ്. ശരിക്കും അവൾ തന്നെയാണ് നിനക്ക് ചേരുന്ന പെണ്ണ്..’
‘നീ ഇങ്ങനെ സ്വയം കുറ്റപ്പെടുത്താതെ.. അവളോട് എനിക്ക് ഇഷ്ടം ഉണ്ട്. സത്യം ആണ്. പക്ഷെ അത് കൊണ്ട് എനിക്ക് നിന്നോട് ഇഷ്ടം കുറവ് ഉണ്ടെന്നല്ല. ഇത്രയും ദിവസം ഞാൻ നിന്നെ എത്രത്തോളം മിസ്സ്‌ ചെയ്‌തെന്നോ..? എനിക്ക് നിന്നെയും നഷ്ടപ്പെടുത്താൻ കഴിയില്ല.. ഐ നീഡ് യൂ ആസ് മൈ ബെസ്റ്റ് ഫ്രണ്ട്.. ‘
ഞാൻ അത് പറഞ്ഞപ്പോൾ അവൾ ചിരിച്ചു. വേദന മറയ്ക്കുന്ന ഒരു പൊട്ട ചിരി.
‘നമുക്ക് രണ്ട് പേർക്കും ഫ്രണ്ട്സ് ആയി ഇരിക്കാൻ പറ്റില്ല അർജുൻ. ഫ്രണ്ട്സ് ആയി ഇരുന്നിട്ട് നമ്മൾ എന്ത് കാണിക്കാൻ ആണ്. എനിക്ക് അത് ഇമേജിൻ പോലും ചെയ്യാൻ കഴിയില്ല.. ഇനി നിന്റെ മുന്നോട്ടു ഉള്ള ലൈഫിൽ ഞാൻ നിന്നാൽ ശരിയാവില്ല..’
എന്റെ കൈ വിടുവിച്ചു പോകാൻ എന്നോണം ലച്ചു എഴുന്നേറ്റു.. ഞാൻ എഴുന്നേറ്റു വീണ്ടും അവളുടെ കയ്യിൽ പിടിച്ചു അവളെ നിർത്തി
‘നിന്നോട് എന്ത് പറയണം.., എങ്ങനെ ആശ്വസിപ്പിക്കണം എന്നെനിക്ക് അറിയില്ല.. നീ എനിക്ക് ഇത്രയും നാൾ എന്തായിരുന്നു എന്ന് എനിക്ക് പറഞ്ഞു തരാനും അറിയില്ല.. ഇത്രയൊക്കെ നിന്നോട് ചെയ്തിട്ടും ഞാൻ എന്റെ ലൈഫിൽ നിന്നെ പിടിച്ചു നിർത്തുന്നത് എന്റെ സ്വാർത്ഥത കൊണ്ട് കൂടെ ആയിരിക്കും.. ഞാൻ സ്നേഹിച്ചത് അവളെ ആണ്.. പക്ഷെ.. പക്ഷെ.. നീയാണ് എന്നെ മനസിലാക്കിയിട്ടുള്ളത്..’
ഞാൻ കൈ പിടിച്ചു നിർത്തിയത് കൊണ്ട് ലച്ചു അവിടെ തന്നെ നിന്നു. എനിക്ക് നേരെ തിരിഞ്ഞു കൊണ്ട് എന്റെ ചുളിഞ്ഞു പോയ കോളർ നേരെ ആക്കി തന്നു കൊണ്ട് അവൾ പറഞ്ഞു
‘നീയെന്നെ ആശ്വസിപ്പിക്കുവൊന്നും വേണ്ട.. ഞാൻ ഇത് പ്രതീക്ഷിച്ചു തന്നെ ആണ് ഇവിടെ വന്നത്.. പിന്നെ വന്നപ്പോൾ നിന്റെ അടുത്ത് അങ്ങനെ ഒന്നും അറിയാത്ത പോലെ പെരുമാറിയത് എന്റെ അവസാന ഹോപ്പ് മാത്രം ആയിരുന്നു. നീ ഇങ്ങനെ ഒക്കെയേ പറയൂ എന്ന് എനിക്ക് അറിയാമായിരുന്നു.. ‘
‘നിനക്ക് വിഷമം ഉണ്ടോ..?
ഞാൻ എന്ത് ചോദ്യം ആണ് ചോദിച്ചത് എന്ന് എനിക്ക് തന്നെ അറിയില്ല.
‘ഇല്ലെന്ന് പറഞ്ഞാൽ നീ വിശ്വസിക്കില്ലല്ലോ.. എനിക്ക് സങ്കടം ഉണ്ടെടാ… ബട്ട്‌ ഐ വിൽ ബി ഓക്കേ.. ഞാൻ നാളെ ബാംഗ്ലൂർ പോകും. ടിക്കറ്റ് വരെ എടുത്തിരുന്നു.. നീ അഥവാ മൈൻഡ് മാറ്റിയിരുന്നേൽ മാത്രം അത് ക്യാൻസൽ ആയേനെ. ഇനിയിപ്പോ ബാംഗ്ലൂർ പോകാൻ എനിക്ക് ബുദ്ധിമുട്ട് ഒന്നും ഇല്ലല്ലോ.. അല്ലേ..?
അത് ചോദിച്ചപ്പോൾ അവളുടെ കണ്ണുകളിൽ വീണ്ടും കണ്ണീർ ഉറഞ്ഞു കൂടുന്നത് ഞാൻ കണ്ടു
‘നീ ഞാൻ കാരണം ഇങ്ങനെ എടിപിടി എന്ന് ഡിസിഷൻസ് എടുക്കാതെ.. നീ കുറച്ചു കഴിഞ്ഞു ഓക്കേ ആണ് അവിടെ പോണം എന്ന് തോന്നുമ്പോ പോയാൽ മതി.. ‘
ഞാൻ അവളെ ഉപദേശിക്കാൻ ശ്രമിച്ചു
‘ഇത് ഞാൻ ശരിക്കും ആലോചിച്ച കാര്യം ആണെടാ. അല്ലേൽ തന്നെ അവിടെ കോഴ്സ് ചെയ്യണം എന്നാരുന്നല്ലോ എന്റെ ആഗ്രഹം.. നീ ഇവിടെ നിക്കുന്നത് കൊണ്ടാണ് ഞാൻ അങ്ങോട്ട് പോവാതെ മടി പിടിച്ചു നിന്നതും. ഇനിയിപ്പോ അതിന്റെ കാര്യം ഇല്ല.. നിന്നെ രണ്ട് തെറി പറഞ്ഞിട്ട് മനസ്സ് ഓക്കേ ആക്കി ഇവിടുന്ന് പോണം എന്നായിരുന്നു പ്ലാൻ..’
