‘അത് നീ ഇപ്പോൾ അറിയണ്ട..’
ഇഷാനി ഒരു കള്ളച്ചിരിയോടെ പറഞ്ഞു. ഞാൻ വീണ്ടും നിർബന്ധിച്ചു നോക്കിയെങ്കിലും അതിനെ കുറിച്ച് കൂടുതൽ സംസാരിക്കാൻ അവൾ താല്പര്യപ്പെട്ടില്ല
‘അപ്പോൾ ഉള്ളിൽ ഇഷ്ടം ഒക്കെ ഉണ്ടായിട്ടാണോ നീ ഇടയ്ക്ക് എന്നെ കല്യാണം ആയെന്ന് പറഞ്ഞു ഒഴിവാക്കിയേ..?
ഞാൻ പിന്നെയും ചോദിച്ചു കൊണ്ടിരുന്നു
‘അത് പിന്നെ… പിള്ളേർ ഒക്കെ പറയുന്നു നിനക്ക് നല്ല ഗേൾസിനെ കിട്ടും, ഞാൻ കൊള്ളില്ല എന്നൊക്കെ.. അത് കേട്ടപ്പോൾ എനിക്ക് ഈഗോ അടിച്ചു.. അതാ അങ്ങനെ പറഞ്ഞെ. നീ അത് കേട്ട ഉടനെ പോയി ലക്ഷ്മിയുടെ പുറകെ പോകുമെന്ന് ഞാൻ കരുതിയില്ല..’
അവൾ വിഷമത്തോടെ പറഞ്ഞു
‘ഞാൻ ഒരിക്കലും അവളുടെ പുറകേ പോകില്ലായിരുന്നു.. നീ അന്ന് ആ കള്ളം പറഞ്ഞത് കൊണ്ടാണ് ഇതൊക്കെ ഇങ്ങനെ ആയി തീർന്നത്..’
ഞാൻ അത് പറഞ്ഞു തീർന്നതും എന്റെ കയ്യിൽ ഒരടി വന്നു വീണു.
‘ഇതെന്തിനാ ഇപ്പോൾ ഒരടി..?
ഞാൻ ചോദിച്ചു
‘ദേഷ്യം വന്നിട്ട്.. നീ എന്തിനാ ഞാൻ ഒരു കള്ളം പറഞ്ഞ ഉടനെ അവളുടെ പുറകെ പോയത്..? അതും വേറെ ആരെയും കിട്ടിയില്ല അല്ലേ..’
അവൾ കൈ വീശി പിന്നെയും എന്നെ വേദനിപ്പിക്കാതെ തല്ലി
‘ഇത് കൊള്ളാം.. കഴിഞ്ഞ കേസിന് ഒക്കെ ഇപ്പോൾ ആണോ വഴക്ക് ഇടുന്നത്.. അന്നീ സ്നേഹവും സങ്കടവും ദേഷ്യവും ഒന്നും കണ്ടില്ലല്ലോ..’
അവളുടെ കൈ പിടിച്ചു വച്ചു കൊണ്ട് ഞാൻ പറഞ്ഞു
‘വിഷമം ഇല്ലാരുന്നെന്നോ..? നിങ്ങളെ ആദ്യമായ് കണ്ടപ്പോൾ തന്നെ എന്റെ നെഞ്ച് പൊട്ടി പോകുന്ന പോലെ തോന്നി.. അന്ന് രാത്രി ഞാൻ ഉറങ്ങിയില്ല.. ഫുൾ കരച്ചിൽ ആയിരുന്നു.. അറിയുമോ നിനക്ക്..?
ഇഷാനിയുടെ കണ്ണുകൾ നിറഞ്ഞു.. അവളുടെ ശബ്ദം കരച്ചിലിന്റെ വക്കോളാം എത്തിയിരുന്നു
‘ശരിക്കും….?
ഞാൻ ആകാംഷ അടക്കാൻ വയ്യാതെ ചോദിച്ചു
‘സത്യം.. അന്ന് മാത്രം അല്ല.. നിങ്ങളെ ഒരുമിച്ച് എപ്പോ കണ്ടാലും അന്നെല്ലാം ഞാൻ കുറെ നേരം ഇരുന്നു കരയുമായിരുന്നു.. കരഞ്ഞു കരഞ്ഞു എനിക്ക് നെഞ്ച് വേദന വന്നിട്ടുണ്ട്…’
ഇഷാനി ശരിക്കും കരയുമെന്ന് ആയപ്പോൾ ഞാൻ പതിയെ അവളുടെ കവിളിൽ തലോടി
‘വെക്കേഷൻ തുടങ്ങി ഞാൻ നാട്ടിൽ പോയപ്പോൾ ആണ് നിന്നെ ഏറ്റവും മിസ്സ്‌ ആയത്. ഇവിടെ ആണേൽ കാണുവെങ്കിലും ചെയ്‌യായിരുന്നു.. പിന്നെ ക്ലാസ്സ്‌ തുടങ്ങി കഴിഞ്ഞു ഞാൻ നിന്നോട് അടുപ്പം കാണിച്ചത് ഒക്കെ എന്റെ മനസിൽ ഉള്ളത് നിന്നെ അറിയിക്കാൻ ആയിരുന്നു. പക്ഷെ അതും നടന്നില്ല.. അന്ന് എന്നെ രാവിലെ ഡ്രോപ്പ് ചെയ്യാൻ പറഞ്ഞു വിളിച്ചത് നിന്നോട് ഒന്ന് ശരിക്കും ഫ്രീ ആയി സംസാരിക്കാൻ ആയിരുന്നു.. അപ്പോൾ നീ മറ്റവളുടെ കൂടെ…..’
ഇഷാനി മുഴുവൻ പറഞ്ഞില്ല.. ദേഷ്യത്തോടെ അവൾ അർജുനെ നോക്കി
‘ഇങ്ങനെ നോക്കല്ലേ…. പേടി ആകുന്നു..’
ഞാൻ അവളുടെ മൂഡ് മാറ്റാൻ ഒരു കോമഡി അടിച്ചു
‘നീ പോ.. അതൊക്കെ ആലോചിക്കുമ്പോൾ എനിക്ക് ദേഷ്യമാ നിന്നോട്..’
ഇഷാനി പിണങ്ങിയത് പോലെ പറഞ്ഞു
‘കുറച്ചു മുന്നേ സ്നേഹം ആയിരുന്നു.. ഇപ്പോൾ ദേഷ്യം ആയോ എന്നോട്..?
ഞാൻ ചോദിച്ചു
‘ഞാൻ ഒരുമ്മ ചോദിച്ചിട്ട് തന്നില്ലല്ലോ.. അത്രയും സ്നേഹം അല്ലേ എന്നോട് ഉള്ളു..’
‘അങ്ങനെ പറയാതെ.. ഞാൻ നാളെ നേരം വെളുത്തു കഴിഞ്ഞു എത്ര ഉമ്മ വേണേൽ തരാം.. ഇപ്പോൾ പറ്റില്ല..’
‘നിനക്ക് നിന്റെ ലച്ചുവിന് കൊടുക്കാമല്ലോ അതും എന്റെ കണ്മുന്നിൽ വച്ചു.. ഞാൻ ഒരെണ്ണം ചോദിക്കുമ്പോ അല്ലേ ബുദ്ധിമുട്ട്..’
അവൾ ദേഷ്യത്തോടെ സംസാരിച്ചു
‘അത്.. അത് അന്ന് അവളല്ലേ പെട്ടന്ന് കേറി ഉമ്മ വച്ചത്. ഞങ്ങൾ നീ അവിടോട്ട് വരുന്നത് കണ്ടു കൂടിയില്ല. പിന്നെ നീ ആണേൽ ഇപ്പോൾ സ്വബോധത്തിലും അല്ല.. നീ എത്ര കണ്ടു ചോദിച്ചാലും ഞാൻ തരില്ല..’
ഞാൻ കട്ടായം പറഞ്ഞു.
‘അങ്ങനെ ആണല്ലോ.. നീ നിന്റെ ഉമ്മ അവൾക്ക് കൊടുത്താൽ മതി.. ഞാൻ പോവാ..’
ഇഷാനി ദേഷ്യപ്പെട്ടു എഴുന്നേറ്റു. ബോഡി ചെറുതായ് കുഴയുന്നുണ്ട്. അവൾ ബാഗ് എടുത്തു ഡോറിന് അടുത്തേക്ക് നടന്നു
‘എവിടെ പോകുവാ..?
ഞാൻ അവളുടെ മുന്നിൽ വട്ടം കയറി നിന്ന് കൊണ്ട് പറഞ്ഞു
‘ഞാൻ വീട്ടിൽ പോകുവാ.. നീ മാറി നിക്ക്..’
അവൾ ദേഷ്യത്തിൽ സംസാരിച്ചു
‘മഴ ഒന്ന് കുറഞ്ഞു പോലുമില്ല. മഴ തോരുമ്പോ കൊണ്ട് വിടുമല്ലോ.. പിന്നെ എന്താ…?
‘എനിക്ക് ഇപ്പോൾ പോണം..’
അവൾ വാശി പിടിച്ചു
‘ഒന്നാമത് മഴ. പിന്നെ ഇപ്പോൾ ബസ് ഒക്കെ കണക്കാ ഈ സമയം. പോരാത്തതിന് നീ ഡ്രിങ്കും. ഇപ്പോൾ നീ പോകണ്ട..’
‘ഞാൻ പോകും..’
എന്നെ തള്ളി മാറ്റിയിട്ടു മുന്നിലേക്ക് പോകാൻ നിന്ന അവളെ ഞാൻ തടഞ്ഞു കെട്ടി വരിഞ്ഞു താഴെ ഇരുത്തി.
‘എന്റെ പൊന്ന് ഇഷാനി അല്ലേ.. ചുമ്മാ ബഹളം ഉണ്ടാക്കാതെ..’
‘എനിക്ക് പോണം. നിന്റെ അടുത്ത് എനിക്കിനി നിക്കണ്ട..’
‘ഒരുമ്മ തരാത്തതിന് ആണ് ഈ പിണങ്ങി പോകുന്നത്.. അപ്പോൾ തന്നെ അറിയാമല്ലോ നീയെത്ര കിറുങ്ങി ആണ് നിൽപ്പെന്ന്..’
ഞാൻ പറഞ്ഞു
‘പോകും.. നിനക്ക് എന്നോട് ഒരു സ്നേഹവും ഇല്ല..’
ഇഷാനി കുട്ടികളെ പോലെ ചിണുങ്ങി പറഞ്ഞു
‘ഇഷ്ടം ഇല്ലെന്നോ….? നീ ഇപ്പോൾ ഡ്രങ്ക് ആയ കൊണ്ടല്ലേ.. അല്ലേൽ നിന്നെ ഞാൻ ഇപ്പോൾ കടിച്ചു തിന്നേനെ.. അത്രക്ക് ഇഷ്ടം ആ..’
‘നീ ഒന്നും പറയണ്ട. ഞാൻ പോകും..’
ഇഷാനി എന്റെ കയ്യിൽ കിടന്നു കുതറാൻ ശ്രമിച്ചു
‘ശരി.. ഉമ്മ തരാം.. ഒരൊറ്റ തവണ.. പക്ഷെ അത് പറഞ്ഞു നാളെ എന്നെ തിന്നാൻ വരരുത്..’
ഒടുവിൽ ഞാൻ സമ്മതിച്ചു കൊടുത്തു
‘ഇല്ല.. സത്യം…’
അവൾ സന്തോഷത്തോടെ ചിരിച്ചു കൊണ്ട് എന്റെ അരികിലേക്ക് കൂടുതൽ അടുത്തു.. കണ്ണുകൾ അടച്ചു അവൾ ചുംബനത്തിനായി കാത്തിരുന്നു.. എന്റെ മനസ്സ് വല്ലാത്തൊരു ആശങ്കയിൽ ആയിരുന്നു. ഇവൾ മുഴുവൻ ബോധത്തിൽ അല്ല ഇപ്പോൾ. ഇപ്പോൾ ഇവൾ പറയുന്നത് കേട്ട് കിസ്സ് അടിച്ചാൽ അതൊരു തരത്തിൽ ചതിയാണ്.. അതറിയാമെങ്കിലും ഈ ഒരു അവസ്‌ഥയിൽ എനിക്ക് പോലും കണ്ട്രോൾ പോകുന്ന പോലെ.. ഞാൻ അവളുടെ തലയിൽ മെല്ലെ പിടിച്ചു മുഖം എന്നിലേക്ക് അടുപ്പിച്ചു. അവൾ അനുസരണയോടെ കണ്ണടച്ചു എന്റെ നേർക്ക് നീങ്ങി വന്നു.. കണ്ണിന് തൊട്ട് താഴെയായി കവിളിൽ ഒരുമ്മ… ഇഷാനിക്ക് ജീവിതത്തിൽ ആദ്യമായ് കിട്ടുന്ന ചുംബനം
ഉമ്മ കിട്ടി കഴിഞ്ഞു അവൾ കണ്ണ് തുറന്നു. ഞാൻ ചിരിച്ചു കൊണ്ട് അവളെ നോക്കി. അവളുടെ മുഖത്ത് എന്തോ ഒരു നിരാശ ഉണ്ടായിരുന്നു.. അതെന്തിനാണ് എന്നെനിക്ക് മനസിലായില്ല
‘കിട്ടിയില്ലേ…?
ഞാൻ ചോദിച്ചു
‘ഇങ്ങനെ അല്ല..’
അവൾ ഉദ്ദേശിച്ചത് ഇതല്ല എന്ന് അവൾക്ക് പറയണം എന്നുണ്ട്.. പക്ഷെ അതെങ്ങനെ പറയണം എന്ന് അവൾക്ക് നിശ്ചയം ഇല്ലായിരുന്നു
