‘രണ്ടും കൂടെ ഏതേലും കാട്ടിൽ കയറിയോ..?
ഞാൻ പിന്നിലേക്ക് പാളി അവരുണ്ടോ എന്ന് നോക്കി കൊണ്ടു പറഞ്ഞു. അപ്പോൾ എല്ലാവർക്കും ചിരി പിന്നെയും പൊട്ടി. കൃഷ്ണയ്ക്കും ചിരി ചെറുതായി വന്നു. ഇനിയും എതിർത്താൽ ഞങ്ങൾ പിന്നെയും കളിയാക്കുമെന്ന് അറിയാവുന്നത് കൊണ്ടു കൃഷ്ണ പിന്നെ അടങ്ങി ഇരുന്നു നല്ല കുട്ടി ആയിട്ട്..
ഞങ്ങൾ നേരെ പോയത് ശ്രുതിയുടെ വീട്ടിലേക്കാണ്. കഴിഞ്ഞ കൊല്ലം ഓണത്തിന് ഇവിടെ വന്നിട്ട് പിന്നെ ഇപ്പോളാണ് എല്ലാവരും ഇവിടേക്ക് വരുന്നത്. ഇടയ്ക്കു വരണം എന്നൊക്കെ വച്ചെങ്കിലും ഒന്നും നടന്നില്ല. കഴിഞ്ഞ വട്ടം വരാതെ ആദ്യമായ് ഞങ്ങളുടെ കൂടെ വന്നത് ഫാത്തിമ ആയിരുന്നു. ഞങ്ങൾ വന്നു കഴിഞ്ഞു അഞ്ചു മിനിറ്റ് കഴിഞ്ഞാണ് അവര് വന്നത്. അത് കൊണ്ടു കാറിൽ പറഞ്ഞത് വച്ചു അവനെ കുറച്ചു നേരം ഊക്കി. ശ്രുതിയുടെ വീടും അവളുടെ അമ്മയെയും അച്ഛനെയും ഒക്കെ കണ്ടപ്പോ കൃഷ്ണയുടെ മുഖം കുറച്ചു തെളിഞ്ഞു. ഇഷാനിയും ശ്രുതിയും അവളുടെ കൂടെ തന്നെ ഉണ്ടായിരുന്നു..
ഞങ്ങളുടെ ഉച്ചക്കത്തെ ഊണ് ശ്രുതിയുടെ വീട്ടിൽ വച്ചു ആയിരുന്നു. അന്ന് കിട്ടിയതിലും കെങ്കേമം ആയ സദ്യ തന്നെ ഇന്ന് കിട്ടി. സദ്യ കഴിഞ്ഞു ഞങ്ങൾ അന്നത്തെ പോലെ ശ്രുതിയുടെ പറമ്പിലൂടെ എല്ലാം ചികഞ്ഞു നടന്നു. അന്ന് കെട്ടിയ ഊഞ്ഞാൽ ഇന്ന് ഇല്ലാതിരുന്നത് മാത്രം ഒരു നഷ്ടം ആയി തോന്നി. ഈ സമയം എല്ലാം ഇഷാനി എന്നേക്കാൾ കൃഷ്ണയുടെ ഒപ്പം ആയിരുന്നു ഉണ്ടായിരുന്നെ. കൃഷ്ണ ഒരു വിധത്തിൽ ഇഷാനിയോട് രസപ്പെട്ടു തുടങ്ങിയ പോലെ തോന്നി. വെയിൽ ഒന്ന് ആറിയപ്പോൾ ആണ് ഞങ്ങൾ ശ്രുതിയുടെ വീട്ടിൽ നിന്ന് ഇറങ്ങിയത്.. ശ്രുതിയുടെ അമ്മയോടും അച്ഛനോടും ഒക്കെ യാത്ര പറഞ്ഞു ഞങ്ങൾ പിന്നെ പോയത് ബീച്ചിലേക്കാണ്.. അന്നത്തെ പ്ലാനിന്റെ അവസാനം ബീച്ചിൽ ആയിരുന്നു…
ബീച്ചിൽ അത്യാവശ്യം തിരക്ക് ഉണ്ടായിരുന്നു. ഞങ്ങൾ ബോയ്സ് മാത്രം വെള്ളത്തിൽ ഇറങ്ങി. അവളുമാർ എല്ലാവരും കരയിൽ നിന്നതേ ഉള്ളു. ഞങ്ങൾ കടലിൽ ഇറങ്ങി കുളിച്ചു നിൽക്കുന്നതിന് ഇടയിൽ കൃഷ്ണയും ഇഷാനിയും സംസാരിക്കുന്നത് ഞാൻ കണ്ടു.. ശ്രുതിയും ഫാത്തിമയും മാറി വേറെന്തോ സംസാരിക്കുകയാണ്.. ഇഷാനി എന്താണ് കൃഷ്ണയോട് സംസാരിക്കുന്നത് എന്ന് എനിക്ക് ഇവിടെ നിന്ന് അറിയാൻ പറ്റിയില്ല…
‘എന്തായിരുന്നു പോയിട്ട് പരുപാടി ഉണ്ടെന്ന് പറഞ്ഞിരുന്നേ…?
ഇഷാനി കൃഷ്ണയോട് ചോദിച്ചു
‘അത്.. അതങ്ങനെ പ്രത്യേകിച്ച് പരുപാടി ഒന്നും ഇല്ലായിരുന്നു..’
കൃഷ്ണ ചെറിയ ചമ്മലോടെ പറഞ്ഞു
‘കള്ളം പറഞ്ഞതാ അല്ലേ..? മുങ്ങാൻ..?എനിക്ക് അറിയാമായിരുന്നു..’
ഇഷാനി ചിരിച്ചു കൊണ്ടു പറഞ്ഞു
‘അത് ഞാൻ….’
കൃഷ്ണ എന്തോ പറഞ്ഞു ഫലിപ്പിക്കാൻ നോക്കി
‘എനിക്ക് മനസിലാകും. അത് വിട്.. എന്റെ ഭാഗത്തു മിസ്റ്റേക്ക് ഉണ്ട്.. സോറി… ഇത് അവൻ ഉന്തി തള്ളി വിട്ടു പറയിച്ചത് അല്ല കേട്ടോ. ശരിക്കും സോറി..’
ഇഷാനി പറഞ്ഞു
‘അയ്യോ നീ എന്നോട് സോറി ഒന്നും പറയണ്ട. ഞാൻ നിന്റെ അടുത്ത് എത്ര മാത്രം പോക്രിത്തരം കാണിച്ചിട്ടുണ്ട്.. അത് വച്ചു നോക്കുമ്പോ നീ എന്നോട് ഒന്നും ചെയ്തിട്ടില്ല..’
കൃഷ്ണ പറഞ്ഞു
‘അതൊക്കെ പഴയ കാര്യങ്ങൾ അല്ലേ..’
‘അതേ. പക്ഷെ പോക്രിത്തരം തന്നെ ആണ്.. അതിന് ഞാനാണ് നിന്നോട് സോറി പറയേണ്ടത്..’
കൃഷ്ണ പറഞ്ഞു
‘അത് വിട്. ഞാൻ നിന്റെ സോറി അക്സെപ്റ്റ് ചെയ്തു. നീ എന്റെ സോറി അക്സെപ്റ്റ് ചെയ്തു. ഇപ്പൊ എല്ലാം സോൾവ് ആയില്ലേ..?
ഇഷാനി അവളോട് ചോദിച്ചു
‘അർജുന്റെ കാര്യം. അത് ഞാൻ മനഃപൂർവം ആയിരുന്നില്ല. എനിക്കു അറിയില്ലായിരുന്നു അന്ന് സത്യം ആയിട്ടും. അതിന് മുമ്പൊക്കെ നിങ്ങളുടെ ഇടയിൽ കിടന്ന് ഞാൻ കുറെ കളിച്ചിട്ടുണ്ട്. എനിക്ക് സത്യത്തിൽ വാശി ആയിരുന്നു. ഞാൻ എന്നേക്കാൾ ലോ ആയാണ് നിന്നെയും ബാക്കി എല്ലാവരെയും കരുതിയത്.. അത് കൊണ്ടു തന്നെ അവനെ പോലെ ഒരാൾ എന്നേയേ ഡേറ്റ് ചെയ്യാവൂ എന്നൊക്കെ ഞാൻ ആഗ്രഹിച്ചു. നിന്റെ അടുത്ത് ഒരു മത്സരം പോലെ ആയിരുന്നു ഞാൻ അവനെ കണ്ടത്. ഇപ്പൊ ആലോചിക്കുമ്പോൾ എനിക്ക് എന്തിന്റെ സൂക്കേട് ആയിരുന്നു എന്ന് തോന്നുന്നു…’