‘നിനക്ക് അവനെ കിട്ടാത്തതിന്റെ ദെണ്ണം നീ ഇങ്ങനെ കരഞ്ഞു തീർക്ക്…’
ജയിക്കാനായി അവളുടെ മസ്തകത്തിൽ തന്നെ ഇഷാനി അടിച്ചു.. ആ വാക്കുകൾ ഒരടി പോലെ കൃഷ്ണയുടെ മേലെ പതിച്ചു.. തന്നെ കൊണ്ട് അർജുനെ തിരിച്ചു സ്നേഹിപ്പിക്കാൻ കഴിയില്ല എന്നാണ് അവൾ പറഞ്ഞത്.. കൃഷ്ണയ്ക്ക് അവളെ മാരകമായി ഉപദ്രവിക്കണം എന്ന് മനസിൽ തോന്നി.. പക്ഷെ അവൾ ലക്ഷ്മി അല്ലാത്തത് കൊണ്ട് അത് ചെയ്തില്ല
‘ നിന്നെക്കാൾ മുമ്പ് അവന്റെ കൂടെ കഴിഞ്ഞവൾ ഞാനാണെടി.. ഇനിയും അതിന് എന്നെക്കൊണ്ട് പറ്റും. അവൻ എന്റെ ആകുന്നത് നീ കാണും.. അന്ന് നീ കരയും… ഇത് കൃഷ്ണ ആണ് പറയുന്നത്.. കൃഷ്ണ…..’
കൃഷ്ണ പൊട്ടിത്തെറിച്ചത് പോലെ ഇഷാനിയോട് പറഞ്ഞു..
അവൾ പറഞ്ഞത് കേട്ട് ഇഷാനിയുടെ ചുണ്ടുകൾ വിറച്ചു.. കൃഷ്ണ അത് പറഞ്ഞിട്ട് തിരിഞ്ഞു നടന്നെങ്കിലും അവളെ നോക്കി ഇഷാനി അമർഷത്തിൽ പല്ലുറമ്മി.. തന്റെ അടുത്ത് നിന്നായിരുന്നു അവൾ ഇത് പറഞ്ഞിരുന്നത് എങ്കിൽ അവളെ താൻ തല്ലിയേനെ എന്ന് ഇഷാനിക്ക് തോന്നി.. അത് പോലെ ദേഷ്യം അവളുടെ ഉള്ളിൽ തിളച്ചു മറിയുന്നുണ്ടായിരുന്നു….
ഈ രണ്ട് പെണ്ണുങ്ങളും എന്റെ പേരിൽ ഇങ്ങനെ അടി വച്ച കാര്യമൊന്നും ഞാൻ അറിഞ്ഞതേയില്ല.. ഇഷാനി എന്നോട് ചെറിയ അടുപ്പം കാണിച്ച സന്തോഷം എനിക്ക് ഉണ്ടായിരുന്നു. പക്ഷെ സൗഹൃദം പഴയ പോലെ അത്ര തിക്ക് ഒന്നും ആയില്ല.. കോളേജിലെ സകല ആഘോഷങ്ങളും കഴിയാറായി.. ഇനി ആകെ ഉള്ളത് കോളേജ് ഡേ മാത്രം ആണ്.. അതിന് രണ്ട് ദിവസം മുന്നേ ആണ് ഞങ്ങൾ ഹോളി ആഘോഷിച്ചത്.. ആ ഹോളിയുടെ പിന്നിലെ ചരിത്രം പക്ഷെ ആർക്കും അറിയില്ല.. ആഷിക്ക് ആണ് എന്നോട് ഇത് വന്നു പറയുന്നത്
‘എടാ ഇന്ന് ഹോളി ആണെന്ന്…’
‘ഹോളിയോ..? ഇന്നോ..? എത് താളി ആണ് അത് പറഞ്ഞത്…?
ഞാൻ തിരിച്ചു ചോദിച്ചു
‘ഏത് വ്യാളി ആണെന്ന് അറിയില്ല.. ആരൊക്കെയോ ഹോളി ആണെന്ന് പറഞ്ഞു കളർ വാരിയേറു തുടങ്ങിയിട്ടുണ്ട് പുറത്ത്..’
ആഷിക്ക് പറഞ്ഞു.
കോളേജ് അവസാനിക്കുന്നതിന്റെ ഭാഗം ആയി ആർക്കോ തോന്നിയ ഐഡിയ ആണ് ചുമ്മ ഒരു ഹോളി ആഘോഷം. കലണ്ടർ അനുസരിച്ചു ഹോളി അല്ലാത്തത് കൊണ്ട് കോളേജിനു ഉള്ളിൽ ആഘോഷിക്കാൻ ആർക്കും പെർമിഷൻ കിട്ടിയില്ല. അത് കൊണ്ട് കോളേജിനു പുറത്തായിരുന്നു എല്ലാം.. എന്നാൽ പിന്നെ ഇന്ന് തന്നെ ഹോളി ആഘോഷിക്കാം എന്ന് ഞങ്ങളും വച്ചു…
കോളേജ് ഗേറ്റ് തൊട്ട് റോഡിലേക്കുള്ള നടപ്പാത വരെയും ആളുകൾ രണ്ട് സൈഡിലും നിന്ന് കളർ വാരി എറിയുന്നുണ്ടായിരുന്നു. എന്തിന് റോഡിൽ പോലും ചിലർ ആഘോഷം തുടങ്ങി.. കോളേജ് കഴിഞ്ഞു വരുന്ന പിള്ളേരെ എല്ലാം കളറിൽ മുക്കിയേ പുറത്തേക്ക് വിട്ടുള്ളു. പരിചയം ഉള്ളവരെയും ഇല്ലാത്തവരെയും എല്ലാം ഒരു ദാക്ഷിണ്യവും കൂടാതെ കളറിൽ വാരി പൊത്തി.. അതിൽ നിന്ന് ആർക്കും ഒരു പരിഗണന ഇല്ലായിരുന്നു. ഞാനും രാഹുലും കൃഷ്ണയും ആഷിക്കും റോസുമെല്ലാം ഇപ്പോൾ തന്നെ പലതരം കളറുകളിൽ മുങ്ങി ഒരു പരുവം ആയിരുന്നു.. ആഘോഷങ്ങൾ പൊടി പൊടിക്കുന്നതിന് ഇടയിലാണ് ദൂരെ നിന്നും ഇഷാനി വരുന്നത് ഞാൻ കണ്ടത്..
നിറങ്ങൾ വാരി വിതറുന്ന കുട്ടികൾക്ക് ഇടയിലൂടെ ദേഹത്ത് നിറം വീഴാതെ ശ്രദ്ധിച്ചു അവൾ വരുന്നത് ഞങ്ങൾ എല്ലാം കണ്ടു.. ഒരു കൈ കൊണ്ട് അരുതെന്ന ആംഗ്യത്തിൽ ആയിരുന്നു അവളുടെ നടത്തം.. അത് കൊണ്ട് ആരും അവളുടെ ദേഹത്ത് കളർ എറിഞ്ഞില്ല.. സാധാരണ അങ്ങനെ പറഞ്ഞാൽ ഒന്നും ആരെയും വെറുതെ വിടുന്നത് അല്ല. പക്ഷെ ഇഷാനിയെ ആരും ഒന്നും ചെയ്തില്ല.. എറിയാൻ മുതിർന്നവരോട് ഒക്കെ കൂടെ ഉള്ളവർ റീന റീന എന്ന് അടക്കം പറഞ്ഞു.. എന്റെ കമ്പിനിക്കാരി ആയത് കൊണ്ട് അവൾ പറഞ്ഞത് അവര് ഒരു ബഹുമാനം പോലെ അവളെ ഒഴിവാക്കി.. ഞാൻ അത് ഒട്ടും പ്രതീക്ഷിച്ചില്ല.. എന്നേ പോലും വെറുതെ വിടാത്തവർ എന്റെ പേരിൽ അവളെ ഒഴിവാക്കുന്നു..
ഇഷാനി മെല്ലെ നടന്നു ഞങ്ങളുടെ അടുത്തെത്തി.. തൊട്ട് അടുത്ത് വന്നപ്പോൾ ആണ് അവൾ ഞങ്ങളെ കണ്ടത്. മൊത്തം കളറിൽ കുളിച്ചു നിൽക്കുന്നത് കൊണ്ട് അവൾക്ക് പെട്ടന്ന് എന്നേ മനസിലായില്ല.. മനസിലായപ്പോൾ അവൾ പെട്ടന്ന് ഒന്ന് സ്റ്റോപ്പ് ആയി..