വീട് അടുക്കാറായപ്പോൾ എന്റെ മനസ്സിൽ വല്ലാത്ത പേടി ഉടലെടുത്തു. വണ്ടി വളച്ചു വീട്ടിലേക്ക് കയറ്റുമ്പോ അവൾ വീടിന് മുന്നിൽ ഉണ്ടായിരിക്കണേ എന്ന് ഞാൻ പ്രാർഥിച്ചു. വീടിന് മുന്നിൽ വണ്ടി എത്തിയപ്പോൾ കതക് തുറന്നു കിടക്കുന്നത് ഞാൻ കണ്ടു.. ഞാൻ പോയപ്പോ ചാരി കിടന്നതാണ്. അത് തുറന്നിട്ടുണ്ടേൽ അവൾ വന്നിട്ടുണ്ടാകും.. ഞാൻ വണ്ടി വച്ചു പെട്ടന്ന് അകത്തേക്ക് ഓടി കയറി
എന്റെ മനസിനെ വല്ലാത്ത പിടിച്ചുലയ്ക്കുന്ന ഒരു കാഴ്ച്ച ആണ് ഞാൻ അവിടെ കണ്ടത്. സാധനങ്ങൾ എല്ലാം ചിതറി കിടക്കുന്നു. ആരൊക്കെയോ കയറി ഇറങ്ങിയത് പോലെ എല്ലാം വലിച്ചു വാരി ഇട്ടിരിക്കുന്നു. എന്റെ ശ്വാസം ഒരു മാത്ര ഒന്ന് നിലച്ചു പോയി. ഞാൻ അപ്പോളും ഇഷാനിയെ ഫോണിൽ ട്രൈ ചെയ്യുന്നുണ്ടായിരുന്നു. പക്ഷെ അവൾ എടുക്കുന്നില്ല. അവൾ ഇവിടെ ഉണ്ടെങ്കിൽ ബെല്ലടിക്കുന്നത് കേൾക്കേണ്ടത് ആണ്.. അതുമില്ല.. ഞാൻ അവളുടെ പേര് ഉറക്കെ വിളിച്ചു. മുറിയിലും അടുക്കളയിലും എല്ലാം അവൾ മുഖം വീർപ്പിച്ചു ഇരിക്കുന്നുണ്ടാകും എന്ന വിശ്വാസത്തിൽ ഞാൻ ഓടി ചെന്നു. അവിടെ ഒന്നും അവൾ ഉണ്ടായിരുന്നില്ല.. ടെറസിലും വീടിന്റെ പിന്നിലുമെല്ലാം ഞാൻ കയറി നോക്കി. അവൾ ഇവിടെ ഇല്ല… പെട്ടന്ന് ഫോൺ ശബ്ദിച്ചപ്പോൾ അത് അവൾ ആകുമെന്ന് കരുതി പ്രതീക്ഷയോടെ ഞാൻ ഫോൺ എടുത്തു.. മഹാൻ ആയിരുന്നു വിളിച്ചത്
‘നീ വീട്ടിൽ എത്തിയോ…?
‘എത്തി.. പക്ഷെ ഇവിടെ.. ഇവിടെ അവളില്ല.. വിളിച്ചിട്ട് എടുക്കുന്നില്ല…’
ഞാൻ ഭീതിയോടെ പറഞ്ഞു
‘നീ ടെൻഷൻ ആകണ്ട. ഒരു പതിനഞ്ചു മിനിറ്റ്.. അതിനുള്ളിൽ ഞാൻ അവിടെ എത്തും..’
മഹാൻ പറഞ്ഞു
‘മഹാനെ.. ആരാ..? അവളെ എന്തിനാ പിടിച്ചു കൊണ്ട് പോയെ…?
എന്റെ ശബ്ദം ഇടറി.
‘അത് നമുക്ക് കണ്ട് പിടിക്കാം.. ഞാനല്ലേ പറയുന്നത്.. നീ പേടിക്കണ്ട..’
മഹാൻ പറഞ്ഞു..
കോൾ കട്ടാക്കി ഞാൻ പിന്നെയും അവളെ ഒന്ന് കൂടി എല്ലായിടത്തും നോക്കി. അവളിവിടെ ഇല്ല എന്ന് എനിക്ക് നല്ല ഉറപ്പ് ഉണ്ടായിരുന്നു. എന്നാലും എന്തെങ്കിലും അത്ഭുതം സംഭവിക്കുമോ എന്ന് കരുതി ഞാൻ അവളെ പിന്നെയും തിരഞ്ഞു.. ആരാണ്, എന്തിനാണ് അവളെ പിടിച്ചു കൊണ്ട് പോയത്…? ഞാൻ മനസിൽ ആ ചോദ്യം ചോദിക്കാൻ തുടങ്ങി..
ഒരുപക്ഷെ എന്റെ മറഞ്ഞിരിക്കുന്ന ആ ശത്രു ആയിരിക്കുമോ..? എന്നെ ആളുകളെ വിട്ടു തല്ലിച്ച ഇപ്പോളും അജ്ഞാതൻ ആയിരിക്കുന്ന റോളക്സ് എന്ന് ഞാൻ പേരിട്ട ആ ശത്രു. അയാളുടെ കോടിക്കണക്കിനു രൂപ വിലമതിക്കുന്ന ഡ്രഗ്സ് കത്തിച്ചു കളഞ്ഞ എന്നോട് അവൻ പ്രതികാരം വീട്ടിയത് ആണോ..? എങ്കിൽ കത്തിച്ചു കളഞ്ഞതിന്റെ ഇരട്ടിയുടെ ഇരട്ടി തിരിച്ചു കൊടുക്കാം.. അവളെ എനിക്ക് തിരിച്ചു തന്നാൽ..
അയാളല്ലാതെ വേറെ ആരായിരിക്കും..? ഇനി ആ മുഴു ഭ്രാന്തൻ ഫെർണാണ്ടസ് ആയിരിക്കുമോ…? അവന്റെ ഉദ്ദേശം എന്താണെന്ന് പോലും എനിക്കറിയില്ല. ലാസ്റ്റ് വിളിച്ചപ്പോൾ അവനെ മുഷിപ്പിച്ചു ബ്ലോക്കും ആക്കിയാണ് ഞാൻ വിട്ടത്. ഇനി അവനാകുമോ..? ഞാൻ ഫോണിൽ നിന്ന് അവന്റെ നമ്പർ തിരഞ്ഞു.. അൺബ്ലോക്ക് ചെയ്തു അതിൽ വിളിച്ചിട്ട് കോൾ പോയില്ല.. എനിക്ക് എന്ത് ചെയ്യണം എന്ന് അറിയാത്ത അവസ്ഥ ആയി.. അവസാനമായി ഒന്ന് കൂടി ഞാൻ ഇഷാനിയെ വിളിച്ചു.. ഫോൺ റിംഗ് ചെയ്തു. പഴയത് പോലെ തന്നെ അവൾ എടുത്തില്ല..
ഞാൻ ഇത് മുൻകൂട്ടി കാണേണ്ടത് ആയിരുന്നു. ഇത്രയും വലിയ പ്രശ്നങ്ങൾ ഉള്ള ഞാൻ അവളെ ഇവിടേക്ക് കൊണ്ട് വരരുതായിരുന്നു. പ്രശ്നങ്ങൾ ഒതുങ്ങി എന്ന് കരുതി അവളെ ഇവിടേക്ക് കൊണ്ട് വന്ന എന്റെ തീരുമാനം തെറ്റായിരുന്നു.. ഞാൻ സ്വയം പഴിച്ചു. എല്ലാം എന്റെ തെറ്റാണ്..
ജീവിതത്തിലെ വളരെ കുറച്ചു നിമിഷങ്ങളിൽ ആണ് ഞാൻ ആകെ തകർന്ന് തോറ്റു പോയ സ്ഥിതിയിലേക്ക് പോയിട്ടുള്ളത്. ആദ്യം അത് അമ്മയുടെ മരണം ആയിരുന്നു. പിന്നെ ചേട്ടന്റെയും ചേച്ചിയുടെയും അനാര മോളുടെയും വിയോഗം. അതിൽ നിന്ന് കര കയറാൻ ഞാൻ ഒരുപാട് സമയം എടുത്തിരുന്നു. അന്നൊക്കെ തോന്നിയ ഒരു നെഗറ്റീവ് ഫീലിംഗ് എനിക്ക് ഇപ്പോൾ തോന്നാൻ തുടങ്ങി. പ്രിയപ്പെട്ടത് നഷ്ടം ആകുന്ന വേദന ഞാൻ ഒരിക്കൽ കൂടി അറിഞ്ഞു….