അച്ഛൻ ഇന്ന് പതിവ് ഇല്ലാതെ ഒരുപാട് തമാശ ഒക്കെ പറഞ്ഞു. മക്കൾ രണ്ട് ആൺകുട്ടികൾ ആയത് കൊണ്ട് തന്നെ അച്ഛന് പെൺകുട്ടികളോട് നല്ല വാത്സല്യം ഉണ്ടായിരുന്നു. അത് കൊണ്ട് തന്നെ ഇഷാനിയെ മോളെ പോലെ ആണ് അച്ഛൻ കരുതുന്നത്.. ഞാൻ ഇത് വരെ കൈ പിടിച്ചു കയറ്റിയില്ല എങ്കിലും അവൾ എപ്പോളെ ഈ വീട്ടിലെ മരുമോൾ ആയി.. ഈ വീടിന്റെ മഹാലക്ഷ്മി ആയി.. ഭക്ഷണം കഴിച്ചു കഴിഞ്ഞും ഞങ്ങൾ വെറുതെ ഓരോ തമാശകൾ പറഞ്ഞു ഇരുന്നു. ഞങ്ങൾ എല്ലാം സംസാരിക്കുമ്പോളും മഹാൻ അധികം സംസാരിച്ചിരുന്നില്ല. ഞങ്ങളെ കെട്ടിരുന്നതേ ഉള്ളു ആൾ.. പക്ഷെ മഹാന്റെ ഉള്ളിലൂടെ പോയ കാഴ്ചകൾ കുറച്ചു മുന്നത്തെ ആയിരുന്നു.. ഇത് പോലെ ഇരുന്നു ഞങ്ങൾ എല്ലാം തമാശ പറഞ്ഞ ആ പഴയ ദിനങ്ങൾ.. ഞാനും അച്ഛനും അനിയും രാഖിയും പിന്നെ അനാര മോളുമെല്ലാം.. ഞങ്ങളുടെ ചിരിയിൽ മഹാൻ കണ്ണടച്ചു.. ഇപ്പൊ ഞങ്ങളെ മാത്രം അല്ല അവരെയും മഹാൻ കേൾക്കാം.. അനിയുടെ പൊട്ടിച്ചിരി ഞങ്ങളുടെ കൂടെ മുഴങ്ങുന്നുണ്ട്.. അനാര മോളുടെ കൊഞ്ചിയ ശബ്ദം ഇതിനിടയിൽ അറിയുന്നുണ്ട്.. എല്ലാവരും ഇവിടെ ഉണ്ട്….
ഇഷാനി ശരിക്കും ഭാഗ്യം ചെയ്ത കുട്ടിയാണ്. അച്ഛനും അമ്മയും ഇല്ലാതെ വളർന്ന അവളെ അവളുടെ പേരപ്പനും പേരമ്മയും അതറിയിക്കാതെ ആണ് വളർത്തിയത്. അവരായിരുന്നു അവളുടെ അച്ഛനും അമ്മയും. ഇപ്പൊ ഇതാ അവൾക്ക് അവളുടെ അമ്മയെ തിരിച്ചു കിട്ടിയിരിക്കുന്നു.. ഇവിടെ ഒരച്ഛനെയും.. അവൾ ഇനി അനാഥത്വത്തെ കുറിച്ച് ചിന്തിക്കുക കൂടിയില്ല…
അവൾക്ക് കിടക്കാൻ വേറെ മുറി റെഡി ആക്കിയിരുന്നു. പക്ഷെ എല്ലാരും കിടന്നു കഴിഞ്ഞു അവൾ എന്റെ മുറിയിലേക്ക് വന്നു. ഞങ്ങൾ കുറെ നേരം സംസാരിച്ചു ഇരുന്നു. അവളുടെ നാട്ടിലെ പുതിയ വിശേഷങ്ങൾ ഒക്കെ നോൺ സ്റ്റോപ്പ് ആയി അവൾ പറഞ്ഞു. ശിവാനി ആയി എല്ലായിടത്തും കറങ്ങാൻ പോയത്, അവളെ നീന്താൻ പഠിപ്പിച്ചത്, വയലിൻ പഠിപ്പിക്കുന്നത്… അങ്ങനെ ഈ നാളുകൾക്ക് ഇടയിൽ അവളൊരു ജന്മം ജീവിച്ചു തീർത്ത കഥ എന്നോട് പറഞ്ഞു.. അതിനിടയിൽ അവളുടെ അമ്മയുടെ ഫോണും വന്നിരുന്നു.. ഇവിടെ നേരത്തെ നിന്ന വീട്ടിൽ നിന്നിട്ട് നാളെ നാട്ടിലോട്ട് വരുമെന്നാണ് അവൾ പറഞ്ഞത്…
‘ഒരു വിധത്തിൽ ആണ് ഞാൻ ഇവിടെ തന്നേ പഠിക്കാൻ അമ്മയെ കൊണ്ട് സമ്മതിപ്പിച്ചേ..’
ഫോൺ വച്ചു കഴിഞ്ഞു ഇഷാനി പറഞ്ഞു
‘അത് ഉറപ്പിച്ചോ..?
ഞാൻ ചോദിച്ചു
‘ആഹ്.. ഞാൻ ഒത്തിരി നാൾ കൂടി അമ്മയുടെ അടുത്ത് തിരിച്ചു വന്നതല്ലേ.. പിന്നെയും പിരിഞ്ഞു ഇരിക്കാൻ വയ്യെന്ന്.. ഞാൻ പിന്നെ നമ്മുടെ കോളേജിന്റെ അത്ര നല്ല കോളേജ് ഒന്നും അവിടെ ഇല്ല, പിന്നെ ഇവിടെ എനിക്ക് പെട്ടന്ന് അഡ്മിഷൻ എല്ലാം ശരിയാകുമെന്ന് ഒക്കെ തട്ടി വിട്ടു…’
ഇഷാനി പറഞ്ഞു
‘അമ്മ പറഞ്ഞതും കാര്യം അല്ലേ..? അമ്മയ്ക്ക് നിന്നെ മിസ്സ് ചെയ്യും…’
ഞാൻ പറഞ്ഞു
‘അതേ.. ഞാൻ എല്ലാ ആഴ്ചയും അങ്ങോട്ട് ചെന്നോളാം എന്നാ വാക്ക് കൊടുത്തേക്കുന്നെ.. പിന്നെ അമ്മ മാത്രം അല്ലല്ലോ എന്നെ മിസ്സ് ചെയ്യുന്നത്…’
അവൾ എന്നെ കുസൃതി ചിരിയോടെ നോക്കി പറഞ്ഞു
‘വേറെ ആര്…?
ഞാൻ അറിയാത്ത പോലെ ചോദിച്ചു
‘ഒരാൾ.. ഞാൻ ഇനി ഇവിടെ പഠിക്കാൻ വരുന്നില്ല എന്നൊക്കെ പറഞ്ഞപ്പോ അയാളുടെ മുഖം വാടി. ശബ്ദം ഒക്കെ വേറെ പോലെ ആയി.. അയാളെ വിഷമിപ്പിക്കാൻ എനിക്ക് പറ്റില്ല…’
ഇഷാനി പറഞ്ഞു
‘എനിക്ക് പ്രശ്നം ഒന്നുമില്ല.. നീ എന്നെ ഓർത്തു തീരുമാനം എടുക്കരുത്..’
ഞാൻ ഉപദേശിച്ചു
‘എന്നെയും കൂടെ ഓർത്താണ്. എനിക്ക് പിന്നെ മിസ്സ് ചെയ്യില്ലേ..?
അവൾ പറഞ്ഞു
‘അതൊക്കെ വെറുതേ..’
ഞാൻ പറഞ്ഞു
‘ ഞാൻ കിടന്നു മോങ്ങിയത് ഒക്കെ അപ്പോൾ വെറുതെ ആണോ..?
‘എന്നാലും ഇപ്പൊ എല്ലാരും ആയില്ലേ… പഴയ പോലെ എന്നെ മിസ്സ് ചെയ്യില്ലായിരിക്കും…’
ഞാൻ തമാശ പോലെ പറഞ്ഞു. പക്ഷെ അവൾ അത് സീരിയസ് ആയി എടുത്തു
‘ഓ ശരി. സമ്മതിച്ചു..’
അവൾ മുഖം വെട്ടിച്ചു തിരിഞ്ഞു ഇരുന്നു
‘ദാണ്ടേ പിണങ്ങി..’
ഞാൻ അവളുടെ ചുമലിൽ പിടിച്ചു