ആലോചിച്ചിട്ട് ഇഷാനിക്ക് ഒരെത്തും പിടിയും കിട്ടിയില്ല. ചുറ്റും നോക്കിയപ്പോൾ എല്ലാം വലിച്ചു വാരി അലങ്കോലം ആക്കി ഇട്ടിരിക്കുന്നത് ഇഷാനി കണ്ടു. അവൻ ദേഷ്യത്തിൽ ചെയ്തത് ആണോ..? അതോ എന്തെങ്കിലും തപ്പിയത് ആണോ..? അവന്റെ എന്തെങ്കിലും കാണാതെ പോയോ..? അത് തപ്പാനോ കണ്ടോ എന്ന് ചോദിക്കാനോ ആയിരിക്കും അവൻ തന്നെ ഇത്രയും വിളിച്ചത്..? ഇഷാനി മനസ്സിൽ വെറുതെ ചിന്തിച്ചു കൂട്ടി.. അവനിത്രയും ദേഷ്യം വരണമെങ്കിൽ അത്രയും വേണ്ടപ്പെട്ട എന്തായിരിക്കും അവന് നഷ്ടപ്പെട്ടിട്ടുണ്ടായിരിക്കുക…..?
ഇഷാനി അർജുനെ നോക്കി. അവൻ തല കുനിച്ചു ഇരിക്കുകയാണ്.. ശകാരം നിന്നു. സൂക്ഷിച്ചു നോക്കിയപ്പോൾ അവന്റെ കൈകളിൽ ചെറുതായ് ചോര പൊടിയുന്നത് ഇഷാനി കണ്ടു. ഇനി അവൻ വണ്ടിയിൽ നിന്ന് വല്ലതും വീണോ..? ദൈവമേ.. ഫോൺ എടുക്കാതിരുന്ന തീരുമാനത്തെ അവൾ ശപിച്ചു. പക്ഷെ അതിനേക്കാൾ ഇഷാനിയെ ഞെട്ടിച്ചത് മറ്റൊരു കാര്യമാണ്. അവന്റെ കണ്ണിൽ നിന്നും പൊഴിയുന്ന കണ്ണ് നീർ.. അർജുൻ കരയുകയാണ്.. തല കുമ്പിട്ടിരുന്നാണേലും ആ കണ്ണുകൾ നിറഞ്ഞു ഒഴുകുന്നത് ഇഷാനിക്ക് കാണാമായിരുന്നു. ആദ്യമായാണ് അവനിങ്ങനെ കരയുന്നത് താൻ കാണുന്നത്. ഇങ്ങനെ കരയാൻ മാത്രം ഞാൻ എന്താടാ നിന്നോട് ചെയ്തത്…? ഇഷാനിയുടെ ഉള്ള് പൊള്ളി. ഇഷാനി മുട്ടിൽ നിരങ്ങി അർജുന്റെ അടുത്തേക്ക് ചെന്നു. അവന്റെ താടിയിൽ പിടിച്ചു അവൾ മുഖം ഉയർത്തി
‘എന്താടാ…? എന്ത് പറ്റി….?
ഇഷാനി ചോദിച്ചു..
‘പോ മൈരേ…’
അവന്റെ ദേഷ്യം അപ്പോളും വിട്ടു പോയിരുന്നില്ല. ഇഷാനി അത് വക വച്ചില്ല. അവൾ രണ്ട് കൈ കൊണ്ടും അവന്റെ കവിളിൽ പിടിച്ചു
‘ഞാൻ ഇനി അങ്ങനെ ഒന്നും ചെയ്യില്ല.. വിളിച്ചാൽ ഫോൺ എടുത്തോളാം.. നീ എന്തിനാ കരയുന്നെ..? ഞാൻ അതിന് മാത്രം എന്താടാ ചെയ്തേ….?
ഇഷാനിയുടെ തൊണ്ട ഇടറി
അർജുൻ മറുപടി ഒന്നും പറഞ്ഞില്ല. അവൻ പകരം തന്റെ കയ്യിൽ പിടിച്ചു.. എന്നിട്ട് ആ കയ്യിൽ ചുംബിച്ചു. അവന്റെ കണ്ണിൽ നിന്ന് ഒഴുകിയ കണ്ണീരും ആ ചുംബനത്തിൽ അവളുടെ കയ്യിൽ പതിഞ്ഞു..
‘ഒന്നുമില്ല..’
ഞാൻ പറഞ്ഞു
‘അല്ല.. എന്തോ ഉണ്ട്.. എനിക്കറിയാം..’
ഇഷാനി അവന്റെ കണ്ണുകൾ തുടച്ചു
‘പറ.. എന്നോട് പറ.. എന്തിനാ നീ കരയുന്നെ.. എന്റെ പൊന്നിന് എന്ത് പറ്റി…?
തെല്ലു മുമ്പ് അവൻ അടിച്ച വിഷമമോ പരിഭവമോ ഒന്നും ഇല്ലാതെ ഒരു കുട്ടിയോടെന്ന പോലെ വാത്സല്യത്തിൽ ഇഷാനി ചോദിച്ചു
‘ഞാൻ.. എനിക്ക്.. നിന്നെ കാണാഞ്ഞപ്പോ.. ഞാൻ ആകെ പേടിച്ചു…’
ഞാൻ പറഞ്ഞു
‘ എന്തിനാ പേടിച്ചേ…? എന്താ ഉണ്ടായേ…?
ഇഷാനിക്ക് ഒന്നും മനസിലായില്ല
‘മഹാൻ… മഹാൻ വിളിച്ചിരുന്നു.. എന്നിട്ട് എന്നോട് പറഞ്ഞു.. നിന്നെ… ആരോ പിടിച്ചു കൊണ്ട് പോയി എന്ന്.. ഞാൻ അപ്പോൾ തൊട്ട് നിന്നെ വിളിക്കുവാ.. നീ എടുക്കുന്നില്ല.. ഞാൻ ഇവിടെ വന്നപ്പോൾ എല്ലാം വലിച്ചു വാരി ഇട്ടേക്കുന്നു.. നിന്നെ കാണാനുമില്ല….’
‘എന്നെ ആര് പിടിച്ചു കൊണ്ട് പോവാനാടാ…?
ഇഷാനി ചോദിച്ചു
‘എനിക്ക് അറിയില്ലെടാ.. ഞാൻ ഒരു നിമിഷം എല്ലാം കൈ വിട്ടു പോയത് പോലെ ആയി.. എന്റെ അമ്മയും ചേട്ടനുമെല്ലാം എന്റെ അടുത്ത് നിന്ന് പോയത് പോലെ നീയും എനിക്ക് നഷ്ടമായ പോലെയൊക്കെ എനിക്ക് തോന്നി…’
അത് പറഞ്ഞപ്പോ എന്റെ കണ്ണുകൾ പിന്നെയും നിറഞ്ഞു
‘അയ്യോ കരയല്ലേ… അങ്ങനെ ഒന്നുമില്ല.. എന്റെ കുഞ്ഞു പേടിക്കണ്ട..’
എന്റെ കണ്ണ് നിറഞ്ഞപ്പോ ഇഷാനിയുടെ ചങ്ക് പൊടിഞ്ഞു
‘സത്യത്തിൽ നീ ഇപ്പോൾ എന്റെ അടുത്തുള്ളത് റിയൽ ആണോന്ന് പോലും എനിക്ക് അറിയില്ല.. എനിക്ക് ചിലപ്പോൾ തോന്നുന്നത് ആണോ നീ അടുത്ത് ഉണ്ടെന്ന്..? എനിക്ക് ഇപ്പോളും.. ഇപ്പോളും.. ഉള്ളിലൊരു…’
എനിക്ക് അത് പൂർത്തിയാക്കാൻ കഴിഞ്ഞില്ല. അതിന് മുന്നേ ഇഷാനി അവളുടെ ചുണ്ടുകൾ എന്റെ നെറുകയിൽ തൊട്ട് ചുംബിച്ചു.. അവളുടെ തണുത്ത ചുണ്ടുകൾ എന്റെ നെറുകയിൽ ഞാൻ അനുഭവിച്ചു
‘പേടിക്കണ്ട.. ഞാൻ ഇവിടെ ഉണ്ട്.. നിന്റെ കൂടെ.. ഇപ്പോ വിശ്വാസം ആയില്ലേ…?
ചുംബനം തന്നു ഇഷാനി ചോദിച്ചു