എന്റെ കയ്യിൽ വാച്ച് കിടക്കുമ്പോ അവൾ അത് ശ്രദ്ധിക്കണം എന്നായിരുന്നു എന്റെ മനസ്സിൽ. പക്ഷെ അവളെ കണ്ടപ്പോൾ ഞാൻ ആ കാര്യമേ വിട്ടു പോയി.. കാരണം അവൾക്ക് ചെറിയൊരു മാറ്റം ഉണ്ടായിരുന്നു.. അവളുടെ മുടിയിഴകളിൽ ഒരു ചുവപ്പ് നിറം.. ഇഷാനി മുടി ചെറുതായ് കളർ ചെയ്തിട്ടുണ്ട്..
‘ആഹാ ഇതെപ്പോ ചെയ്തു…?
ഞാൻ മുടിയിലേക്ക് നോക്കി ചോദിച്ചു
‘ഇന്നലെ വന്നിട്ട് നീ കണ്ടില്ലേ..?
അവൾ തിരിച്ചു ചോദിച്ചു. ഇന്നലെ ലൈബ്രറി വച്ചു ഞാൻ അവളോട് സംസാരിച്ചതാണ്. എന്നിട്ടും ഞാൻ എന്താ ഇത് കാണാഞ്ഞത്.. ഒരുപക്ഷെ ഇന്നലെ അവളുടെ കയ്യിലെ ചെയിൻ കാണാനുള്ള തിടുക്കത്തിൽ തലമുടി ഞാൻ ശ്രദ്ധിക്കാഞ്ഞത് ആകും
‘ഇന്നലെ ശ്രദ്ധിച്ചില്ല.. ഇപ്പോളല്ലേ നിന്നെ മര്യാദക്ക് കാണുന്നത്.. അടിപൊളി ആയിട്ടുണ്ടല്ലോ…’
ഞാൻ അവളെ ഒന്ന് പൊക്കിയടിച്ചു.. ശരിക്കും അവൾക്ക് ചേരുന്നുണ്ടായിരുന്നു കളർ ചെയ്തത്. ഹോളിയുടെ അന്ന് അവളുടെ മുടിയിൽ ചുവന്ന കളർ വീണപ്പോൾ ചേരുന്നുണ്ട് എന്ന് ഞാൻ അവളോട് പറഞ്ഞിരുന്നു.. അത് കഴിഞ്ഞാണ് അവൾ മുടി കളർ ചെയ്തത്.. ഞാൻ അത് ഓർത്തതെ ഇല്ല.. ഞാൻ പുകഴ്ത്തിയപ്പോൾ അവളുടെ കവിളുകൾ മുടിയിഴകളെക്കാൾ ചുവന്നു തുടുത്തത് പക്ഷെ ഞാൻ ശ്രദ്ധിച്ചു..
‘മൊത്തം ബിസി ആയിരുന്നല്ലോ.. ഞാൻ കരുതി സ്റ്റേജിൽ കയറി എന്തേലും പരുപാടി ഉണ്ടാകുമെന്ന്..’
അവൾ ചോദിക്കുന്നതിനിടയിൽ എന്റെ കയ്യിലേക്ക് നോക്കുന്നതും വാച്ച് ശ്രദ്ധിച്ചതും ഞാൻ ശ്രദ്ധിച്ചു.
‘സ്റ്റേജിൽ കയറി കളിക്കാൻ ഒന്നും നമുക്ക് കഴിവില്ലല്ലോ.. ഗ്രൗണ്ടിൽ ആണേൽ പിന്നെയും നടന്നേനെ.. ആർട്സ് ഒക്കെ നിനക്ക് അല്ലേ കഴിവ്.. എന്നിട്ട് നിന്നെ കണ്ടില്ലല്ലോ സ്റ്റേജിൽ…’
ഞാൻ അവളോട് ചോദിച്ചു
‘ഓ.. എനിക്ക് വട്ടല്ലേ.. നീ പറഞ്ഞത് കൊണ്ടാ ഞാൻ ഇങ്ങോട്ട് കെട്ടി എടുത്തത് തന്നെ.. അല്ലാരുന്നേൽ വീട്ടിൽ ചുമ്മാ കിടന്നു ഉറങ്ങായിരുന്നു…’
അവൾ പറഞ്ഞു
‘ഇവിടെ ഇത്രയും വലിയ പരുപാടി നടക്കുമ്പോ വീട്ടിൽ പോയി ഉറങ്ങാനോ…? നീ വേഗം റെഡി ആകു.. നിന്റെ പരുപാടി ആണ് കുറച്ചു കഴിഞ്ഞു…’
‘ഒന്ന് പോടാ.. എന്റെ പേരെങ്ങാനും കൊടുത്താൽ എനിക്ക് പകരം നീ കയറി കച്ചേരി നടത്തേണ്ടി വരും…’
അവൾ പറഞ്ഞു
‘കച്ചേരി അല്ല.. വയലിൻ ഫ്യൂഷൻ. നമ്മുടെ മ്യൂസിക് ടീം സെറ്റ് ആണ്.. ജസ്റ്റ് ഒരു പതിനഞ്ചു മിനിറ്റ് കയറിയാൽ മതി നീ.. ദേ വയലിൻ….’
ഞാൻ അടുത്തിരുന്ന കസേരയിൽ നിന്ന് വയലിൻ അവളുടെ നേർക്ക് നീട്ടി. അപ്പോളാണ് ഞാൻ പറയുന്നത് സീരിയസ് ആണെന്ന് അവൾക്ക് മനസിലായത്.. അവളുടെ മുഖം മാറി
‘അർജുൻ ചുമ്മാ കളിക്കാതെ.. എനിക്കൊന്നും വയ്യ..’
ഇഷാനി അത് പറയുമ്പോ മൈക്കിലൂടെ അടുത്തടുത്ത പരിപാടികൾ വിളിച്ചു പറയുന്നുണ്ടായിരുന്നു.. അഞ്ചാറു പരിപാടികൾ കഴിഞ്ഞു തന്റെ പേര് കേട്ടപ്പോ ഇഷാനിയുടെ നെഞ്ചോന്ന് കിടുങ്ങി…
‘ഞാൻ പോവാ.. നിന്നെ ഞാൻ പിന്നെ കണ്ടോളാം.. എന്നേ വിളിച്ചു വരുത്തി പണി തന്നത് ആണല്ലേ…’
അവൾ ദേഷ്യത്തോടെയും പേടിയോടെയും പോകാനായി എഴുന്നേറ്റു
‘ഇതിൽ എന്താ പണി..? നിനക്ക് അറിയാത്ത പരുപാടി ഒന്നും അല്ലല്ലോ വയലിൻ വായിക്കാൻ..? നീ ആദ്യമായ് അല്ല സ്റ്റേജിൽ കയറുന്നതും.. പിന്നെ എന്താ പ്രശ്നം..?
അവളുടെ കയ്യിൽ പിടിച്ചു തടഞ്ഞു കൊണ്ട് ഞാൻ ചോദിച്ചു
‘എടാ അതൊന്നും ഫ്യൂഷൻ അല്ലല്ലോ.. മാത്രം അല്ല ഇങ്ങനെ ഒരു ഓടിയൻസിന് ഒന്നും മുന്നിൽ അല്ല ഞാൻ പെർഫോമ് ചെയ്തിട്ടുള്ളെ..’
‘ഇന്നേ വരെ സ്റ്റേജിൽ കയറാത്തവർ വരെ ഇന്ന് സ്റ്റേജിൽ കയറി. പിന്നെ ആണോ നിനക്ക് പാട്..’
‘എടാ ഇതൊന്നും പെട്ടന്ന് പറഞ്ഞാൽ നടക്കുന്നത് അല്ല.. ഇതൊക്കെ കുറച്ചു പ്രാക്ടീസ് വേണ്ട കാര്യമാണ്..’
ഇഷാനി പിന്നെയും ഒഴിവ്കഴിവുകൾ പറയാൻ തുടങ്ങി
‘ടൈം ഉണ്ട്. ഇനിയും ഒരു മണിക്കൂർ എങ്കിലും നിങ്ങൾക്ക് സെറ്റ് ആകാൻ ടൈം ഉണ്ട്.. നീ പറയുന്നത് പോലെ അവര് സെറ്റ് ആകും.. നീ ഓക്കേ ആയാൽ മതി..’