‘ഇന്നിനി കടയിൽ പോണുണ്ടോ…?
ഞാൻ സംഭാഷണത്തിന് തുടക്കമിട്ടു
‘ഈ കോലത്തിലോ..? ഇന്നിനി ഇല്ല. നേരെ വീട്ടിലേക്ക്..’
അവൾ എന്റെ അടുത്തേക്ക് വന്നു
‘ആരുടെ ഐഡിയ ആണോ എന്തോ..? എന്തായാലും പരുപാടി അടിപൊളി ആയിരുന്നു..’
ഞാൻ പറഞ്ഞു
‘ എത്ര നേരം ഉരച്ചു കളഞ്ഞാൽ ആണോ എല്ലാം ശരിക്കും പോകുന്നത്..?
ഇഷാനി നിറങ്ങളെ പറ്റി പറഞ്ഞു
‘നിന്റെ കണ്ണിന്റെ താഴെ കളറ് പോയിട്ടില്ല..’
അവൾ എന്റെ മുഖത്ത് നേരെ വിരൽ ചൂണ്ടി കാണിച്ചു കൊണ്ടു പറഞ്ഞു
‘എവിടെ…?
ഞാൻ എന്റെ കൈകൾ കൊണ്ട് കണ്ണിന് താഴെ തൂത്തു.
‘അവിടെ അല്ല കുറച്ചു മാറി..’
ഇഷാനി കൈ ചൂണ്ടി എനിക്ക് ഡയറക്ഷൻ പറഞ്ഞു തന്നു. പക്ഷെ എന്റെ വിരൽ ശരിക്കും അവിടെ എത്തിയില്ല.. രണ്ട് മൂന്ന് തവണ ഞാൻ ശ്രമിച്ചു പരാജയപ്പെട്ടപ്പോൾ അവൾ എന്റെ അരികിലേക്ക് വന്നു.. അവളെക്കാൾ മുമ്പ് അവളുടെ സുഗന്ധം എന്റെ അടുത്തെത്തി.. ദൈവമേ…. ഈ ഗന്ധം ഞാൻ അനുഭവിച്ചിട്ട് എത്ര നാളായി… അവൾ അടുത്തേക്ക് വന്നപ്പോൾ എനിക്ക് കെട്ടിപ്പിടിക്കാൻ തോന്നി.. അത്രത്തോളം ആ ഗന്ധം എന്നേ സ്വാധീനിച്ചിരുന്നു..
എന്റെ അരികിൽ എന്നോട് ചേർന്നു നിന്ന് എന്റെ കണ്ണിലേക്കു നോക്കി അവൾ ആ ചായം തുടച്ചു.. രണ്ട് മൂന്ന് തവണ വിരൽ കൊണ്ടു ഉരച്ചപ്പോൾ കളർ അടർന്നു പോയി.. ഞങ്ങൾ അടുത്തായിരുന്നു.. ഒന്ന് മുന്നോട്ടു ആഞ്ഞാൽ ദേഹം ഉരസുന്ന രീതിയിൽ ഉള്ളത്ര അടുത്ത്.. അവളുടെ തോളൊപ്പം ഉള്ള മുടിയിൽ നിന്നും വെള്ളത്തുള്ളികൾ ഇറ്റിറ്റു ഹൂഡിയിൽ വീഴുന്നുണ്ടായിരുന്നു.. കണ്ണിന് താഴെ തുടച്ചതിന് ശേഷം ഒരു നിമിഷം അവൾ അത് പോലെ തന്നെ എന്റെ അടുത്ത് നിന്നു. എന്റെ കണ്ണിലേക്കു നോക്കി..
എനിക്കിപ്പോ അനുഭവിക്കുന്ന അതേ വികാരം ആയിരിക്കുമോ അവൾക്കും ഉള്ളിൽ തോന്നിയിട്ടുണ്ടാവുക.. എന്റെ ഉള്ളിലെ വേലിയേറ്റം അവൾക്ക് മനസ്സിലാകുമോ..? എത്ര വേണ്ടെന്ന് മനസിനെ പറഞ്ഞു പഠിപ്പിച്ചാലും പ്രാണന്റെ പകുതി പകുത്തു കൊടുത്തവളെ കണ്ടാൽ ശരീരം അനുസരണക്കേട് കാണിക്കും.. ഞാൻ പ്രണയം കൊണ്ടു വിറച്ചു.. എന്റെ കണ്ണുകൾ വല്ലാതെ തുടിച്ചു.. അവളുടെ ചെഞ്ചുണ്ടുകൾ ഒരിക്കൽ കൂടി സ്വന്തം ആക്കാൻ ഞാൻ കൊതിച്ചു.. എന്തോ ഭാഗ്യത്തിന് എന്റെ ശരീരം വേണ്ടാതീനം കാണിക്കുന്നതിന് മുമ്പ് അവൾ പിന്നിലേക്ക് മാറി.. ഞങ്ങൾ രണ്ട് പേരും നോർമൽ ആയി പെരുമാറാൻ തുടങ്ങി
‘നിന്റെ മുടിയിൽ ഇപ്പോളും നല്ലപോലെ കളറുണ്ട്…’
ഞാൻ ആ നിമിഷത്തെ ഓക്വാർഡ് സിറ്റുവേഷൻ മറയ്ക്കാൻ അവളോട് സംസാരിച്ചു
‘അറിയാം.. വീട്ടിൽ പോയി തല കഴുകിയാലേ മാറൂ…’
അവൾ മുടിയിൽ തഴുകി കൊണ്ടു പറഞ്ഞു
‘പക്ഷെ നിനക്ക് ഈ കളർ ചേരുന്നുണ്ട്.. ഇപ്പോൾ കണ്ടാൽ കളർ ചെയ്ത പോലെ ഉണ്ട്…’
ഞാൻ അവളുടെ മുടിയെ കുറിച്ച് പറഞ്ഞു
‘ആണോ…?
അവൾ ചിരിച്ചു കൊണ്ടു തിരിച്ചു ചോദിച്ചു
‘യെസ്.. നീ ഇനി നേരെ വീട്ടിലേക്ക് ആണോ…?
‘അതേ….’
അവൾ അതേയെന്ന് പറഞ്ഞു
പിന്നെ ഞങ്ങൾക്ക് ഇടയിൽ പിന്നെയും ഒരു നിശബ്ദത കടന്നു വന്നു. കാരണം ഞാൻ പെട്ടന്ന് അവളോട് വീട്ടിൽ ഇറക്കാമെന്ന് പറയാൻ വന്നതാണ്.. പക്ഷെ സൗഹൃദം കാണിച്ചു എന്ന് വച്ചു ഓവർ ആകേണ്ട എന്ന് ഉള്ളിൽ നിന്ന് മറ്റൊരു ഉൾവിളി വന്നതോടെ ആ ചോദ്യം ഞാൻ ചോദിക്കാതെ വിഴുങ്ങി.. പക്ഷേ അവൾക്ക് മനസിലായി. അതല്ലാതെ വേറെ എന്തെങ്കിലും ചോദിക്കാൻ ഞാൻ കിടന്ന് പരുമ്മി
‘കൃഷ്ണയെ കണ്ടിരുന്നോ…?
പെട്ടന്ന് അതാണ് ചോദിച്ചത്.. അത്രയും നേരത്തെ ഓളം ആ ചോദ്യത്തിൽ അവളുടെ മുഖഭാവം മാറുന്നത് പോലെ മാറിയത് ഞാൻ കണ്ടു.. ഇഷാനിയോട് കൃഷ്ണയുടെ കാര്യം ചോദിക്കരുതായിരുന്നു.. അബദ്ധം പറ്റി പോയി.. ഇനി പറഞ്ഞിട്ട് കാര്യമില്ല..
‘ഇല്ല..’
മുഖത്ത് താല്പര്യം ഇല്ലാത്ത ഭാവത്തിൽ അവൾ പറഞ്ഞു
‘ഞാൻ പോവാ…’
ഒരു ചിരി വരുത്തിയിട്ട് അവൾ തിരിഞ്ഞു നടന്നു.. കൃഷ്ണയെ പറ്റി ചോദിക്കണ്ടായിരുന്നു. പക്ഷെ ചോദിച്ചു പോയി.. എന്നാലും കൃഷ്ണ എവിടെ പോയി എന്ന് ഞാൻ ആലോചിച്ചു.. കുറെ നേരം എന്റെ ഒപ്പം ഉണ്ടായിരുന്നു അവൾ. പെട്ടന്ന് കാണാതെ ആയി.. ഞാൻ ഒന്നൂടെ ആലോചിച്ചപ്പോൾ ഇഷാനി എന്റെ അടുത്ത് വന്നു കളർ എറിഞ്ഞപ്പോൾ തൊട്ട് അവളെ കാണാനില്ല എന്ന് ഞാൻ മനസിലാക്കി.. ഇനി അത് കൊണ്ടു അവൾ പോയതാകുമോ..? ഇടയ്ക്ക് വിളിച്ചു നോക്കിയിട്ടും ഫോൺ എടുത്തില്ല.. ഞാൻ പിന്നെയും ട്രൈ ചെയ്തു.. റിംഗ് ഉണ്ട്.. പക്ഷെ ഫോൺ അവൾ എടുത്തില്ല…