‘അവര് നിന്നെ വിളിച്ചില്ലേ..? ഞങ്ങൾ ഉച്ചക്ക് കറങ്ങാൻ പോണുണ്ട്. നീയും വരണം..’
ഞാൻ പറഞ്ഞു
‘ഞാൻ ഇല്ല..’
അവൾ താല്പര്യം ഇല്ലാത്തത് പോലെ സംസാരിച്ചു
‘നമുക്കിടയിൽ വഴക്ക് ഉണ്ടാകും. പക്ഷെ അത് മൊത്തം ഫ്രണ്ട്ഷിപ്പിനെ ബാധിക്കണോ..? ഇന്ന് ലാസ്റ്റ് ഡേ അല്ലേ..? നീയും വാ.. നീ ഇല്ലേൽ ഞങ്ങൾ ആരും പോണില്ല..’
‘എനിക്ക് തീരെ വയ്യ. നിങ്ങൾ പൊക്കോ..’
അങ്ങനെ പറഞ്ഞിട്ട് അവൾ എന്റെ അടുത്ത് നിന്നും പോയി
അവൾ വരുന്നില്ല എന്നായപ്പോ എങ്ങനെ ആണ് പ്ലാൻ എന്ന് ഞങ്ങൾ എല്ലാം ആലോചിച്ചു. എല്ലാവരും ഉച്ചക്ക് ക്ലാസ്സിൽ നിന്നിറങ്ങി വണ്ടിയുടെ അടുത്ത് വന്നിരുന്നു. ഞാൻ വീട്ടിൽ പോയി കാർ എടുത്തിരുന്നു ഇന്നത്തേക്ക്.. അതിൽ പോകാമെന്നു വച്ചാണ്. പക്ഷെ കൃഷ്ണ ഇല്ലാതെ പോകണോ വേണ്ടയോ എന്ന് എല്ലാവർക്കും ഇടയിൽ സംസാരം ഉണ്ടായി. ഞങ്ങൾ സംസാരിച്ചു കൊണ്ടിരിക്കുന്നതിന് ഇടയിൽ ആണ് കൃഷ്ണ അവിടേക്ക് വരുന്നത്
കൃഷ്ണ ഞങ്ങളുടെ കൂടെ പോകാൻ വന്നത് അല്ലായിരുന്നു. അവൾ ക്ലാസ്സ് കഴിഞ്ഞു വീട്ടിൽ പോകാനായി വണ്ടി എടുക്കാൻ വന്നതാണ് ഇങ്ങോട്ട്. അവൾ വരുന്നത് കണ്ടു ഒന്ന് കൂടി അവളോട് സംസാരിക്കാം എന്ന് ഞങ്ങൾ വച്ചു. പക്ഷെ അവളോട് സംസാരിക്കാൻ പോയത് ഇഷാനി ആയിരുന്നു. അവര് രണ്ട് പേരും ദൂരെ നിന്ന് സംസാരിക്കുന്നത് ഞങ്ങൾ നോക്കി നിന്നു
‘നീ എന്താ ഞങ്ങളുടെ കൂടെ വരാത്തത്..? ഞാൻ സോറി പറഞ്ഞതല്ലേ…?
ഇഷാനി ചോദിച്ചു
‘നീ എന്നോട് സോറി ഒന്നും പറയണ്ട ആവശ്യമില്ല. എനിക്ക് ഇപ്പോ വരാൻ തീരെ ഇൻട്രസ്റ്റ് ഇല്ല..’
കൃഷ്ണ പറഞ്ഞു
‘നീ ഇല്ലെങ്കിൽ പോകുന്നില്ല എന്ന് പറഞ്ഞു എല്ലാവരും നിക്കുവാ.. നീ ജാഡ ഇടാതെ വാ..’
ഇഷാനി അവളെ നിർബന്ധിച്ചു
‘ഞാൻ ഇല്ലെന്ന് ഞാൻ പറഞ്ഞു..’
കൃഷ്ണ തറപ്പിച്ചു പറഞ്ഞു
‘നീ വരും..’
ഇഷാനി അതിലും ഉറപ്പിച്ച സ്വരത്തിൽ പറഞ്ഞു.. കൃഷ്ണ അതൊട്ടും പ്രതീക്ഷിച്ചില്ല. ഇഷാനി നേരെ കൃഷ്ണയുടെ കയ്യിൽ പിടിച്ചു കൊണ്ടു ഞങ്ങൾക്ക് നേരെ നടന്നു. കൃഷ്ണ അവളിൽ നിന്ന് കൈ വിടീക്കാൻ നോക്കിയെങ്കിലും നടന്നില്ല. കൃഷ്ണയെയും വലിച്ചു കൊണ്ടു ഇഷാനി വണ്ടിക്ക് അടുത്തേക്ക് വന്നു..
‘വേഗം വണ്ടി എടുക്ക്.. പോകാം..’
ഇഷാനി പറഞ്ഞു
‘എടി ഞാൻ വരുന്നില്ല..’
കൃഷ്ണ പറഞ്ഞു നോക്കി. ഇഷാനി അത് മൈൻഡ് ആക്കിയില്ല
‘നീ എന്ത് നോക്കി നിക്കുവാ. വണ്ടി എടുക്കടാ..’
ഇഷാനി എന്നേ ചീത്ത പറഞ്ഞു. ഞങ്ങൾ എല്ലാവരും പെട്ടന്ന് വണ്ടിയിൽ കയറി. ഇഷാനി കൃഷ്ണയെ പിടിച്ചു പിന്നിൽ കയറ്റി. ഒരു വശത്തു ഇഷാനിയും മറു വശത്തു ശ്രുതിയും. കൃഷ്ണ ശരിക്കും അവളുമാർക്ക് ഇടയിൽ ലോക്ക് ആയി. രാഹുൽ ആണ് എന്റെ കൂടെ മുന്നിൽ ഇരുന്നത്. ആഷിക്കും പാത്തുവും ബൈക്കിൽ വന്നോളും.. ഞാൻ വണ്ടി എടുത്തു
‘എടി ഞാൻ പൊക്കോട്ടെ.. എനിക്ക് പോയിട്ട് വേറെ പരുപാടി ഉണ്ട്..’
കൃഷ്ണ ലാസ്റ്റ് കെഞ്ചി നോക്കി
‘ഒരു പരിപാടിയും ഇല്ല..’
ഇഷാനി എന്തോ അധികാരത്തിൽ പറഞ്ഞു.
അവളോട് അത്രയും കമ്പിനി ഉള്ള ഞങ്ങൾ ഒക്കെ വിചാരിച്ചിട്ടും നടക്കാഞ്ഞത് കമ്പിനി ഇല്ലാഞ്ഞ ഇഷാനി ബലം പ്രയോഗിച്ചപ്പോൾ നടന്നു. ഇഷാനി അവളോട് എടുത്ത സ്വാതന്ത്ര്യം കണ്ടാൽ അവർ കട്ട ചങ്ക്സ് ആണെന്ന് തോന്നിപോകും. എന്തോ കൃഷ്ണ ഇഷാനിയെ ഈ കാര്യത്തിൽ അനുസരിച്ചു.
‘ടാ കിഡ്നാപ്പിംഗ് ന് നമ്മൾ അകത്താകുമോ..?
രാഹുൽ തമാശയായി ചോദിച്ചു. കൃഷ്ണ ഇടയ്ക്ക് അവളെ ഇറക്കി വിടുമോ എന്ന് ചോദിക്കുന്നത് കൊണ്ടു അവൻ കളിയാക്കിയത് ആണ്.
‘നീ നോക്കിക്കേ.. പോലീസ് വല്ലോം പുറകെ ഉണ്ടോന്ന്…’
ഞാൻ ചുമ്മാ മിററിൽ കൂടി പുറകിലേക്ക് നോക്കി..
‘പ്രശസ്ത സിനിമതാരം പദ്മ വാസുദേവിന്റെ അനുജത്തിയെ നാലാംഗ സംഘം പട്ടാപ്പകൽ തട്ടിക്കൊണ്ടു പോയി..’
ശ്രുതി ഒരു ചാനൽ അവതാരികയേ പോലെ പറഞ്ഞു. ഞങ്ങൾ എല്ലാം അത് കേട്ട് ചിരിച്ചു
‘നാലാംഗ സംഘം അല്ല, ആറംഗ സംഘം ആണ്.. പറഞ്ഞ പോലെ അവര് എന്തിയെ..?
ആഷിക്കിനെയും ഫാത്തിമയെയും കാണാഞ്ഞിട്ട് രാഹുൽ ചോദിച്ചു