അതിനും മറുപടി കിട്ടിയപ്പോ കമ്പിനിയെ പറ്റി കൂടുതൽ വിവരങ്ങൾ ഒക്കെ അവര് തിരക്കാൻ തുടങ്ങി. ഞാൻ പറഞ്ഞത് അത്ര വിശ്വാസം വരാത്ത രീതിയിൽ.. ഞാൻ കമ്പനിയുടെ പേരും വിവരവും എല്ലാം പറഞ്ഞു. അപ്പോളേക്ക് ഉണ്ണികൃഷ്ണൻ അവിടേക്ക് വന്നു. ഇയാളുമായി ഇഷാനിയെ കല്യാണം കഴിപ്പിക്കണം എന്നാണ് ഇവരുടെ ഒക്കെ ആഗ്രഹം. എന്നോട് സംസാരിച്ച മാമന്മാരിൽ ഒരാൾ ഉണ്ണിയുടെ അച്ഛനാണ്. ആയാളെ കണ്ടപ്പോൾ ഞാൻ മെല്ലെ ഒന്ന് പുഞ്ചിരിച്ചു. അവന്റെ മുഖത്തും ഒരു ചെറിയ ചിരി വന്നു. വരുത്തിയത് ആകും എന്നേ പോലെ..
‘നമ്മുടെ തോട്ടുങ്കലെ ശശിയുടെ മോൻ എറണാകുളത്തല്ലേ…?
ഞാൻ കമ്പനിയുടെ കാര്യങ്ങൾ ഒക്കെ പറഞ്ഞപ്പോ അവര് പരസ്പരം ചോദിച്ചു
‘അവൻ തൃപ്പൂണിതുറ ആണ്..’
ഉണ്ണികൃഷ്ണൻ ആണ് അത് പറഞ്ഞത്
‘കൈതേരി എന്ന് പറയുമ്പോ ആ പേരിൽ വേറൊരു കമ്പിനി ഇല്ലേ..? പണ്ട് ന്യൂസ് ഒക്കെ സ്ഥിരം വന്നിരുന്നെ..? എന്തോ ബാർ സംബദ്ധമായ വിഷയം ആയിരുന്നു എന്ന് തോന്നുന്നു. ഓർമ കിട്ടുന്നില്ല. കുറച്ചു വർഷം ആയി..’
കൂട്ടത്തിൽ ഒരാൾ എന്നോട് ചോദിച്ചു.
‘അത് തന്നെ. ഞങ്ങളുടെ കമ്പിനി തന്നെ ആണ്. ഇപ്പൊ രണ്ടായാണ് പോകുന്നത്. ബാർ ഒക്കെ അച്ഛന്റെ ഒരു ബ്രദർ ആണ് നോക്കി നടത്തുന്നത്..’
അത് പറഞ്ഞപ്പോ അവരുടെ എല്ലാം മുഖം പെട്ടന്ന് മാറി. ആ കേസിനെ കുറിച്ച് പറഞ്ഞത് കൊണ്ട് ആകുമെന്നാണ് ഞാൻ കരുതിയത്. ഞാൻ കമ്പനിയുടെ കാര്യം പറഞ്ഞെങ്കിലും അവര് ഏതോ ചെറിയ രീതിയിൽ ആണ് അത് എടുത്തത്. പക്ഷെ ഞാൻ അത്യാവശ്യം നല്ലത് പോലെ കാശുള്ള വീട്ടിലെ ആണെന്ന് മനസിലായപ്പോ അവര് പരസ്പരം നോക്കി. ഉണ്ണികൃഷ്ണൻ ഫോണിൽ ഞങ്ങളുടെ കമ്പിനിയെ പറ്റി തിരയുന്നത് എനിക്ക് കാണാമായിരുന്നു. പിന്നെ കുറച്ചു നേരത്തേക്ക് ആരും ചോദ്യം ഒന്നും ചോദിച്ചില്ല. എന്നേ ബുദ്ധിമുട്ടിച്ചോണ്ട് ഇരുന്ന അമ്മാവൻ അകത്തേക്ക് പോയി
അകത്തു വേറൊരു ചോദ്യോത്തരം നടക്കുവായിരുന്നു. ഇഷാനി ആയിരുന്നു എല്ലാത്തിനും ഉത്തരം കൊടുക്കേണ്ട ആൾ.
‘നമ്മൾ ഇനി എന്ത് പറഞ്ഞിട്ട് എന്താ അവളുടെ ഇഷ്ടം പോലെയല്ലേ നമുക്ക് ചെയ്യാൻ പറ്റൂ..’
രവിയമ്മ വിഷമത്തോടെ പറഞ്ഞു. ഉണ്ണികൃഷ്ണൻ ആയുള്ള ബന്ധം ഇവിടെ എല്ലാവർക്കും താല്പര്യം ഉള്ള ഒന്നായിരുന്നു. ഞാൻ ഇടയിൽ വന്നു അത് കുളം ആക്കിയതിൽ അവർക്കെല്ലാം ഒരു നീരസം ഉണ്ടായിരുന്നു. നല്ല പയ്യൻ, കല്യാണം കഴിഞ്ഞാലും ഇഷാനി അവരുടെ കണ്മുന്നിൽ തന്നെ കാണും. അതൊക്കെ കൊണ്ട് ഉണ്ണികൃഷ്ണൻ ആയുള്ള ബന്ധം വേണ്ടെന്ന് വക്കുമ്പോ അവർക്ക് നല്ല വിഷമം ഉണ്ടായിരുന്നു
‘രവിയേ.. പയ്യൻ നല്ല കാശുള്ള വീട്ടിലെ ആണ്.. നമുക്ക് ചേരുന്ന പാർട്ടികളെ അല്ല..’
അമ്മാവൻ രവിയച്ഛനോട് പറഞ്ഞു. രവിയച്ഛൻ ഒന്നും പറയാതെ ഇരിക്കുകയായിരുന്നു
‘അവര് തമ്മിൽ ഉള്ള ചേർച്ച അല്ലേ നോക്കേണ്ടത്..?
പാർവതി ചോദിച്ചു
‘മോളെ അവന്റെ വീട്ടുകാർക്ക് ഒക്കെ നമ്മളെ ഇഷ്ടം ആകുമോ..? അവരുടെ നിലയും വിലയും വച്ചല്ലേ അവര് ബന്ധം നോക്കൂ..’
അമ്മാവൻ പാർവതിയോട് പറഞ്ഞു
‘ചേട്ടന് അച്ഛൻ മാത്രേ ഉള്ളു. അച്ഛൻ എന്നേ കണ്ടിട്ടുണ്ട്. എന്നേ ഇഷ്ടവും ആണ്…’
ഇഷാനി മറുപടി കൊടുത്തു. അവരുടെ ഒക്കെ മുന്നിൽ വച്ചു ഇഷാനി പിന്നെയും എന്നേ ചേട്ടാ എന്നാണ് അഭിസംബോധന ചെയ്തത്. എന്നാലേ അവർക്ക് എന്നോടൊരു ഇത് വരൂ എന്നാണ് അവൾ പറഞ്ഞത്.
‘നമ്മുടെ കൂട്ടരാണോ…?
അമ്മാവൻ പിന്നെയും ചോദിച്ചു. ഇഷാനി താല്പര്യം ഇല്ലാത്ത പോലെ ആ ചോദ്യം അവഗണിച്ചു. അപ്പോൾ അകത്തേക്ക് വന്ന ഉണ്ണികൃഷ്ണൻ ആണ് അതിന് മറുപടി കൊടുത്തത്
‘അവർക്ക് ഇഷ്ടം ആണേൽ ജാതിയൊക്കെ നോക്കുന്നത് എന്തിനാ..?
ഉണ്ണികൃഷ്ണൻ അങ്ങനെ പറഞ്ഞപ്പോ അവർക്കെല്ലാം ഒരു വിഷമം ആയി. അയാൾക്ക് ഉള്ളിൽ വിഷമം കാണുമെന്നു എല്ലാവർക്കും അറിയാം. ഇഷാനിക്കും അതോർത്തു വിഷമം തോന്നി. വർഷങ്ങൾ ആയി ഉണ്ണിയേട്ടന് തന്നോട് താല്പര്യം ഉള്ള കാര്യം അവൾക്ക് അറിയാം. പക്ഷെ എന്ത് ചെയ്യാം. അവളുടെ മനസ്സിൽ മറ്റൊരാൾ ഉണ്ടായി പോയില്ലേ…