‘അപ്പോൾ നിങ്ങൾ രണ്ട് പേരും കൂടെ ചെന്നു എല്ലാവരെയും സമ്മതിപ്പിച്ച സ്ഥിതിക്ക് ഇനി എന്റെ സഹായം ഒന്നും ഈ കാര്യത്തിൽ വേണ്ടല്ലോ..?
അച്ഛൻ ചിരിച്ചു കൊണ്ട് ഇഷാനിയോട് ചോദിച്ചു
‘ഇവള്ടെ പേരപ്പൻ ചിലപ്പോ വിളിക്കും അച്ഛനെ. ഇവൾ നമ്പർ കൊടുത്തിട്ടുണ്ട്..’
ഞാൻ പറഞ്ഞു..
ഞങ്ങളുടെ ഫാമിലി ചുറ്റുപാട് ഒക്കെ കാരണം ഇഷാനിയുടെ വീട്ടുകാർക്ക് ഈ ബന്ധത്തിൽ താല്പര്യം കുറയുമോ എന്നൊക്കെ അച്ഛന് ഒരു പേടി ഉണ്ടായിരുന്നു. അതിന്റെ ഒന്നും ആവശ്യമില്ല എന്ന് ഇഷാനി പറഞ്ഞു.. ഞങ്ങൾ സംസാരിച്ചു ഇരിക്കുമ്പോ മഹാനും വന്നു.. ഏറെ നാളുകൾക്ക് ശേഷം വീട്ടിൽ തമാശകളും ചിരിയും എല്ലാം മുഴങ്ങി. ഒരു കുടുംബം ആണിതെന്ന ഫീൽ അച്ഛന് ഇപ്പോൾ ആയിരിക്കും തോന്നുന്നത്
സംസാരം ഒക്കെ കഴിഞ്ഞു ഞാൻ ഇഷാനിയെ വീട് എല്ലാം ചുറ്റി കാണിച്ചു. മുകളിലെ എന്റെ മുറിയിൽ കയറിയപ്പോ അവിടെ ചുമരിൽ വരച്ചിട്ട അക്ഷരങ്ങൾ ഇഷാനി ശ്രദ്ധിച്ചു.. അത് അനാര മോളു എഴുതിയത് ആണെന്ന് അവൾക്ക് മനസിലായി. പെട്ടന്ന് ആ കാര്യം ഓർത്തു അവളൊന്ന് ഇമോഷണൽ ആയപ്പോൾ അത് മാറ്റാൻ ഞാൻ അവളെ വേറൊരു കൂട്ടം കാണിച്ചു കൊടുത്തു. ഇഷാനിക്ക് ഒരുപാട് ഇഷ്ടം ആകുന്ന ഒരു സംഗതി ആണത്..
എന്റെ പുസ്തകങ്ങളുടെ ഷെൽഫ്. എന്റെ മാത്രം അല്ല അനിയുടെയും ഉണ്ട്. കൂടുതലും എന്റെ ആയിരുന്നു. ഒരു മിനി ലൈബ്രറി പോലെ ആയിരുന്നു എന്റെ പുസ്തകശേഖരം. അത് കണ്ടപ്പോ അവൾക്ക് ഉണ്ടായിരുന്ന ശോകം മൂഡ് അപ്പാടെ മാറി.. കുറച്ചു നേരം അതെല്ലാം നോക്കി ഞങ്ങൾ നിന്നു
‘നൈസ് കളക്ഷൻസ്..’
അവൾ എന്നെ ചെറുതായ് ഒന്ന് അഭിനന്ദിച്ചു
‘ഇതെല്ലാം നീ വായിച്ചിട്ടുള്ളതാണോ..?
ഞാൻ അവളോട് ചോദിച്ചു
‘ഞാൻ വായിക്കാത്തതും ഉണ്ട്..’
ഇഷാനി പറഞ്ഞു
‘ എന്റെ വീട് എങ്ങനെ ഉണ്ട്.. നിനക്ക് ഇഷ്ടം ആയോ..?
ഞാൻ അവളോട് ചോദിച്ചു
‘അടിപൊളി അല്ലേ.. സത്യത്തിൽ ഇത്രയും വലിയ വീട്ടിൽ ഒന്നും ഞാൻ ഇങ്ങനെ കേറിയിട്ടില്ല. മൈസൂർ പാലസിൽ കയറിയ പോലെ ഉണ്ട്..’
അവൾ തമാശ ആയി പറഞ്ഞു
‘അത്രക്ക് അങ്ങ് വേണോ മോളെ..?
ഞാൻ ചിരിച്ചു കൊണ്ട് ചോദിച്ചു
‘ചുമ്മാ പറഞ്ഞതാടാ.. പക്ഷെ എനിക്ക് കൂടുതൽ ഇഷ്ടം നമ്മുടെ ആ കൊച്ചു വീടാ..’
ഇഷാനി ഞങ്ങൾ താമസിക്കുന്ന വീടിന്റെ കാര്യം പറഞ്ഞു
‘അപ്പോൾ കല്യണം കഴിഞ്ഞാലും ഞാൻ അവിടെ തന്നെ താമസിക്കണോ…?
ഞാൻ ചോദിച്ചു
‘ശെന്റെ പൊന്നോ ഞാൻ അങ്ങനെ ഒന്നും അല്ലടാ പൊട്ടാ പറഞ്ഞേ.. നമ്മൾ ഒരുമിച്ച് കഴിഞ്ഞത് കൊണ്ടാകും എനിക്ക് അവിടെ ഇഷ്ടം..’
അവൾ പറഞ്ഞു
‘നിന്നെ ഒരു കാര്യം കൂടി കാണിക്കാൻ ഉണ്ട്.. വാ..’
ഞാൻ അവളുടെ കൈ പിടിച്ചു ഏറ്റവും മേലേക്ക് കൊണ്ട് പോയി. അവിടെ നിന്ന് ഇഷാനി താഴേക്ക് നോക്കി നിന്നപ്പോൾ ഞാൻ അവളെ പൂളിന്റെ അടുത്തേക്ക് വിളിച്ചു. അവൾ അത് ശ്രദ്ധിച്ചിരുന്നില്ല..
‘വൗ..! ഇത് അടിപൊളി ആണല്ലോ..’
ഇഷാനി പൂൾ നോക്കി അതിശയത്തോടെ പറഞ്ഞു
‘സ്വിമ്മിംഗ് എനിക്കൊരു ക്രേസ് ആയിരുന്നു..’
ഞാൻ പറഞ്ഞു
‘ഇത് നല്ല വെള്ളം ആണോടാ..’
ഇഷാനി കുനിഞ്ഞു നിന്ന് വെള്ളത്തിൽ കൈ ഇട്ടു തുളുമ്പിച്ചു
‘യെസ്. ആരും ഇറങ്ങാറില്ല എങ്കിലും അടിക്കടി വെള്ളം മാറ്റാറുണ്ട്..’
ഞാൻ പറഞ്ഞു
‘നീയല്ലാതെ വേറെ ആരും ഇതിൽ ഇറങ്ങില്ലേ..?
അവൾ ചോദിച്ചു
‘ഇറങ്ങും..’
ഞാൻ പറഞ്ഞു
‘അതാരാ..?
അവൾ ചോദിച്ചു
‘നീ.. നിനക്ക് നീന്തൽ അറിയാമെന്നല്ലേ പറഞ്ഞത്..’
ഞാൻ അത് പറഞ്ഞപ്പോ ഇഷാനിക്ക് പെട്ടന്ന് അപകടം മണത്തു. പക്ഷെ അവൾക്ക് എന്തെങ്കിലും ചെയ്യാൻ കഴിയുന്നതിനു മുന്നേ ഞാൻ നൈസ് ആയി എന്റെ ചന്തി കൊണ്ട് അവളുടെ ചന്തിയിൽ ഒരിടി ഇടിച്ചു. ഇഷാനി മൂക്ക് കുത്തി വെള്ളത്തിലേക്ക് വീണു.. അന്ന് നാട്ടിൽ പോയിട്ട് തിരിച്ചു വരുന്ന വഴി ആറിൽ വച്ചു ഓങ്ങിയത് ഇപ്പോൾ ഞാൻ കൊടുത്തു. വെള്ളത്തിൽ നിന്നും പൊങ്ങി വന്നു അവൾ എന്നോട് ദേഷ്യത്തോടെ ചോദിച്ചു
‘എന്ത് പണിയാ കാണിച്ചേ.. ഞാൻ മൊത്തം നനഞ്ഞു..’
‘നനയട്ടെ.. അതിനിപ്പോ എന്താ…’
അത് പറഞ്ഞു ഞാൻ വായുവിൽ വട്ടം കറങ്ങി വെള്ളത്തിലേക്ക് ഒറ്റ ചാട്ടം വച്ചു കൊടുത്തു.. വെള്ളം നല്ല ഓളത്തിൽ അലയടിച്ചു, കുറച്ചു ഫ്ലോറിലേക്കും വീണു..